នៅថ្ងៃទី២៦ ខែកញ្ញានេះ លោកនាយករដ្ឋមន្ត្រី ហ៊ុន ម៉ាណែត បានស្នើឱ្យក្រសួងយុត្តិធម៌ពិនិត្យមើលឡើងវិញលើករណីអ្នកបើកបរទាំងស្រវឹង ដែលត្រូវបានផ្ដន្ទាទោសឱ្យជាប់ពន្ធនាគាររយៈពេល៥ឆ្នាំ និងពិន័យជាប្រាក់៥ពាន់ដុល្លារ បន្ទាប់ពីបង្កគ្រោះថ្នាក់ចរាចរណ៍បណ្តាលឱ្យមនុស្ស៤នាក់ស្លាប់កាលពីខែមករា ឆ្នាំ២០២៤។
ការណែនាំនេះធ្វើឡើងបន្ទាប់ពីសាលាដំបូងរាជធានីភ្នំពេញបានប្រកាសសាលក្រមផ្តន្ទាទោសលោក នាង សំអូន កាលពីថ្ងៃទី២៥ ខែកញ្ញា បន្ទាប់ពីមានករណីគ្រោះថ្នាក់ចរាចរណ៍ ដែលបណ្ដាលឲ្យមនុស្សស្លាប់នៅខណ្ឌឫស្សីកែវ និងបណ្តាលឱ្យមនុស្ស៤នាក់ទៀតរងរបួសផងដែរ។ លើសពីនេះទៅទៀត ឈ្មោះ សំ អូន ត្រូវបានហាមឃាត់មិនឲ្យបើកបររយៈពេល៥ ឆ្នាំបន្ទាប់ពីអនុវត្តទោសចប់។
នៅក្នុងសេចក្តីថ្លែងការណ៍មួយ អ្នកនាំពាក្យសាលាដំបូងរាជធានីភ្នំពេញបានបញ្ជាក់ថា បុរសរូបនេះ ត្រូវបានផ្តន្ទាទោសតាមច្បាប់ជាអតិបរមា ទោះបីជាដើមបណ្តឹងក្នុងសំណុំរឿងបានទទួលយកសំណង និងដកពាក្យបណ្តឹងរួចហើយក៏ដោយ។
នៅក្នុងពិធីចែកសញ្ញាបត្រនៅសកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច លោក ហ៊ុន ម៉ាណែត មានប្រសាសន៍ថា ទោះបីជាលោក សំ អូន ទទួលទោសអតិបរមាក៏ដោយ ក៏ការផ្តន្ទាទោសជាប់ពន្ធនាគាររយៈពេល៥ឆ្នាំនេះ មិន«ធ្ងន់ធ្ងរគ្រប់គ្រាន់»ទេ ដោយសារលោកបានសម្លាប់មនុស្ស៤នាក់ ដូច្នេះស្នើឱ្យពិនិត្យមើលឡើងវិញលើករណីនេះ។
លោកបានស្នើឲ្យលោក កើត រិទ្ធ រដ្ឋមន្ត្រីក្រសួងយុត្តិធម៌ ចាត់អគ្គព្រះរាជអាជ្ញានៃសាលាឧទ្ធរណ៍ពិនិត្យមើលថា តើការសម្រេចនេះ «មានទម្ងន់គ្រប់គ្រាន់ឬនៅ»។
លោកមានប្រសាសន៍ថា៖ «សាលាដំបូងរាជធានីបានពន្យល់ថា ការកាត់ទោសនេះឡើងដល់កម្រិតអតិបរមាតាមច្បាប់អនុញ្ញាត ប៉ុន្តែដើម្បីឲ្យពិតប្រាកដ ត្រូវប្តឹងទៅឧទ្ធរណ៍ ព្រោះនេះយើងត្រូវអនុវត្តឱ្យតឹងរ៉ឹង»។
លោក ហ៊ុន ម៉ាណែត មានប្រសាសន៍ថា ប្រសិនបើច្បាប់កំណត់ត្រឹម៥ឆ្នាំ នោះត្រូវតែពិចារណាធ្វើវិសោធនកម្មច្បាប់ ដើម្បីបង្កើនទម្ងន់ទោស ដើម្បីការពារកុំឱ្យបញ្ហាស្រដៀងគ្នានេះកើតឡើងម្តងទៀត។
លោកបញ្ជាក់ថា វាជាការល្អក្នុងការពិនិត្យមើលលើចំណុចនេះ ខណៈក្រសួងយុត្តិធម៌ក៏កំពុងពិនិត្យមើលក្រមព្រហ្មទណ្ឌ និងក្រមនីតិវិធីព្រហ្មទណ្ឌ ដើម្បីធ្វើវិសោធនកម្ម។
លោកបានបន្ថែមថា៖ «យើងមិនអាចបញ្ជាទៅតុលាការបានទេ ហើយតុលាការក៏មិនអាចកាត់ទោសលើសអ្វីដែលច្បាប់មានដែរ ប៉ុន្តែយើងត្រូវពិនិត្យមើល»។
លោក ហ៊ុន ម៉ាណែត ក៏បានអំពាវនាវឲ្យស្ថាប័នតុលាការទូទាំងប្រទេសអនុវត្តច្បាប់ឲ្យបានម៉ឺងម៉ាត់ចំពោះជនដែលបង្កគ្រោះថ្នាក់ធ្ងន់ធ្ងរដល់សង្គម។
បន្ទាប់ពីមានការលើកឡើងរបស់លោកនាយករដ្ឋមន្ត្រី លោក អ៊ុក សាវុធ អគ្គព្រះរាជអាជ្ញាអមសាលាឧទ្ធរណ៍ភ្នំពេញបានប្តឹងទៅសភាព្រហ្មទណ្ឌរបស់សាលាឧទ្ធរណ៍នៅថ្ងៃទី២៦ ខែកញ្ញា ពិនិត្យមើលសាលក្រមរបស់សាលាដំបូងរាជធានីភ្នំពេញ។
លោក ជិន ម៉ាលីន អ្នកនាំពាក្យក្រសួងយុត្តិធម៌ មិនបានឆ្លើយតបទេ។
លោក ឃុន លាងម៉េង អ្នកនាំពាក្យសាលាឧទ្ធរណ៍បានប្រាប់ ខេមបូចា ថា អគ្គព្រះរាជអាជ្ញាអាចប្តឹងទៅសាលាឧទ្ធរណ៍បាន។ ទោះជាយ៉ាងណា លោកមិនប្រាកដថា តើទោសហ្នឹងត្រូវបង្កើន បន្ទាប់ពីការប្តឹងឧទ្ធរណ៍ ឬយ៉ាងណានោះទេ។
ទាក់ទិននឹងសំណុំរឿងនេះ លោក សុក សំអឿន ប្រធានក្រុមអ្នកច្បាប់អមរិន្ទ បានប្រាប់ ខេមបូចា ថា តុលាការបានកាត់ទោសលោក នាង សំអូន ឱ្យជាប់ទោសអតិបរមារួចហើយ ដូច្នេះអគ្គព្រះរាជអាជ្ញាមិនអាចប្តឹងទៅសាលាឧទ្ធរណ៍បានទេ។ លោកបានពន្យល់ថា អគ្គព្រះរាជអាជ្ញាអាចប្តឹងឧទ្ធរណ៍បានលុះត្រាតែការផ្តន្ទាទោសរបស់តុលាការមានកម្រិតទាបជាងអតិបរមា។
លោកមានប្រសាសន៍ថា ប្រសិនបើលោកនាយករដ្ឋមន្ត្រីជឿថា ការសម្រេចរបស់តុលាការក្នុងករណីនេះនៅមានកម្រិត ដំណោះស្រាយមានតែមួយគត់គឺត្រូវធ្វើវិសោធនកម្មច្បាប់។ ទោះបីជាយ៉ាងណា បើទោះជាច្បាប់ត្រូវបានធ្វើវិសោធនកម្មក៏ដោយ ក៏មិនអាចអនុវត្តអនុភាពប្រតិសកម្មចំពោះលោក សំអូន បានដែរ ដោយសារករណីនេះបានបញ្ចប់ហើយ។
ខឹម ហ៊ីង សាច់ញាតិរបស់ ង៉ែត ស្រីម៉ៅ ដែលបានស្លាប់ក្នុងឧប្បត្តិហេតុគ្រោះថ្នាក់ចរាចរណ៍នេះ បានឱ្យដឹងថា ការផ្តន្ទាទោសរយៈពេល៥ឆ្នាំគឺខ្លី ដោយសារមានមនុស្ស៤នាក់បានស្លាប់ក្នុងគ្រោះថ្នាក់ចរាចរណ៍នេះ។
លោក គង់ សុវណ្ណ នាយកអង្គការខេមសេហ្វ (CAMSAFE) បានប្រាប់ ខេមបូចា ថា សាលក្រមនេះគឺជាឆន្ទានុសិទ្ធិរបស់តុលាការ។ ប៉ុន្តែលោកបានគាំទ្រយ៉ាង «ខ្លាំង» ចំពោះការអំពាវនាវរបស់លោក ហ៊ុន ម៉ាណែត ឲ្យពិនិត្យមើលករណីនេះ។
លោកបានមានប្រសាសន៍ថា៖ «នេះជាសញ្ញានៃការយកចិត្តទុកដាក់របស់ថ្នាក់ដឹកនាំ [ចំពោះបញ្ហា] និងជាការអំពាវនាវ ដើម្បីជំរុញឱ្យស្ថាប័ននីតិបញ្ញត្តិអនុវត្តការរឹតត្បិត ឬដាក់ទោសជនល្មើស តឹងរឹងជាងមុន»។ លោកបានបន្ថែមថា ការលើកឡើងរបស់លោក ហ៊ុន ម៉ាណែត ក៏ជាការព្រមានដល់អ្នកដែលបើកបរក្រោមឥទ្ធិពលនៃគ្រឿងស្រវឹងផងដែរ។
លោកក៏បានលើកឡើងពីករណីថ្មីៗ ដែលតុលាការអូស្ត្រាលីបានកាត់ទោសលោក ឌឿន ឧត្តម ជាកូនប្រុសរដ្ឋលេខាធិការក្រសួងមហាផ្ទៃម្នាក់ឲ្យជាប់ពន្ធនាគាររយៈពេល១២ឆ្នាំ បន្ទាប់ពីបានបើករថយន្តបុករថយន្តមួយទៀតបណ្តាលឱ្យមនុស្សពីរនាក់ស្លាប់កាលពីថ្ងៃទី១៥ ខែឧសភា ឆ្នាំ២០២៣។ លោក សុវណ្ណ បានបន្ថែមថា ការផ្តន្ទាទោសដ៏តឹងរ៉ឹងផ្តល់តម្លៃខ្ពស់លើជីវិតមនុស្ស។
នៅក្នុងឆមាសទីមួយនៃឆ្នាំ២០២៤ មានគ្រោះថ្នាក់ចរាចរណ៍ចំនួន១ ៥៣៤ ករណីគឺតិចជាងរយៈពេលដូចគ្នាក្នុងឆ្នាំ២០២៣ ចំនួន១៤ករណី ។ ប៉ុន្តែចំនួនជនរងគ្រោះបានកើនឡើង ដោយចំនួនអ្នកស្លាប់បានកើនឡើងដល់ ៧៩ ៣៣៧នាក់ គឺខ្ពស់ជាងឆមាសទីមួយនៃឆ្នាំ២០២៣៕
ប្រែសម្រួលពីអត្ថបទភាសាអង់គ្លេស៖ PM Orders Justice Ministry To Review Drunk Driver’s Five-Year Sentence in Fatal Crash
