លោកនាយករដ្ឋមន្ត្រី ហ៊ុន ម៉ាណែត បានអំពាវនាវឱ្យធ្វើទំនើបកម្ម និងពិពិធកម្មសេវាសុខាភិបាលថ្នាក់ជាតិឱ្យកាន់តែទំនើប មុនពេលបង្កើតមន្ទីរពេទ្យថ្នាក់តំបន់។ មន្ទីរពេទ្យទាំងនេះនឹងត្រូវបានរចនាឡើងដើម្បីធ្វើវិមជ្ឈការលើការព្យាបាលជម្ងឺសំខាន់ៗនៅក្នុងតំបន់រៀងៗខ្លួន។
ក្នុងពិធីបើកការដ្ឋានសាងសង់អគារថ្មីនៅមន្ទីរពេទ្យកាល់ម៉ែត នៅថ្ងៃទី១៦ ខែកញ្ញា ឆ្នាំ២០២៤ លោកមានប្រសាសន៍ថា ការកែលម្អសេវាថែទាំសុខភាពជាប្រចាំ គឺមានសារៈសំខាន់ណាស់ ដើម្បីបំពេញតាមការរំពឹងទុករបស់អ្នកជំងឺ និងបង្កើនទំនុកចិត្តរបស់សាធារណជនលើប្រព័ន្ធថែទាំសុខភាព។ លោកក៏បានលើកឡើងពីសារៈសំខាន់នៃការលើកកម្ពស់យន្តការក្នុងការតាមដាន និងវាយតម្លៃគុណភាពនៃសេវាកម្មលើបញ្ហាសុខភាពនៅនឹងកន្លែងផងដែរ។
បន្ថែមលើការកែលម្អទាំងនេះ ក្រសួងសុខាភិបាលត្រូវតែធ្វើទំនើបកម្ម និងពិពិធកម្មសេវាថែទាំសុខភាពពីថ្នាក់ជាតិឱ្យកាន់តែទំនើប រហូតដល់មណ្ឌលសុខភាពនៅតាមមូលដ្ឋាន ដោយលោកបានសង្កត់ធ្ងន់ថា ការពង្រឹងសមត្ថភាពសេវាសុខភាពនៅតាមមូលដ្ឋានគឺជាគន្លឹះដ៏សំខាន់។
ការធ្វើទំនើបកម្ម និងពិពិធកម្មនៃមន្ទីរពេទ្យថ្នាក់ជាតិនឹងអនុញ្ញាតឱ្យមានវិមជ្ឈការនៃការព្យាបាលជំងឺធ្ងន់ធ្ងរនៅក្នុងមន្ទីរពេទ្យថ្នាក់តំបន់។ រដ្ឋាភិបាលគ្រោងនឹងបង្កើតមន្ទីរពេទ្យថ្នាក់តំបន់ នៅក្នុងខេត្តកំពង់ចាម និងសៀមរាប ដែលនឹងអាចកាត់បន្ថយតម្រូវការរបស់អ្នកជំងឺក្នុងការធ្វើដំណើរផ្លូវឆ្ងាយមកកាន់រាជធានីភ្នំពេញ ដើម្បីស្វែងរកការព្យាបាលជំងឺដែលមានលក្ខណៈធ្ងន់ធ្ងរ។
លោក ហ៊ុន ម៉ាណែត មានប្រសាសន៍ថា៖ «នៅពេលអនាគត [អ្នកជំងឺ] នឹងមិនចាំបាច់ទៅកន្លែងដដែល [មន្ទីរពេទ្យថ្នាក់ជាតិនៅភ្នំពេញ] នោះទេ។ ជំហានបន្ទាប់គឺបង្កើតមន្ទីរពេទ្យថ្នាក់តំបន់ ដូច្នេះប្រជាជននឹងមិនចាំបាច់ធ្វើដំណើរផ្លូវឆ្ងាយ ហើយនឹងមានការកកស្ទះកាន់តែតិចនៅក្នុងរាជធានីភ្នំពេញ»។
លើសពីនេះ លោកបានបន្ថែមថា សមត្ថភាពរបស់មន្ទីរពេទ្យថ្នាក់តំបន់ត្រូវតែពង្រឹង ខណៈស្ថានភាពទូទៅនៃមន្ទីរពេទ្យក្នុងប្រទេសត្រូវការការកែលម្អបន្ថែម។ កត្តាទាំងនេះនឹងអាចជួយកាត់បន្ថយការពឹងផ្អែករបស់ប្រជាជនលើសេវាសុខភាពនៅក្រៅប្រទេសផងដែរ។
ប្រជាជនកម្ពុជាខ្លះបានសម្រេចចិត្តទៅព្យាបាល និងពិនិត្យសុខភាពនៅក្រៅប្រទេស ខណៈមានការរិះគន់ជាច្រើនទៅលើមន្ទីរពេទ្យមួយចំនួននៅក្នុងប្រទេសកម្ពុជា ដែលបានផ្តល់ការថែទាំសុខភាពដោយខ្វះគុណភាព រួមទាំងការព្រួយបារម្ភអំពីក្រមសីលធម៌ និងវិជ្ជាជីវៈរបស់គ្រូពេទ្យ ដែលមិនបានបំពេញតម្រូវការរបស់ប្រជាជន។
យោងតាម រដ្ឋមន្ត្រីក្រសួងសុខាភិបាល លោក ឈាង រ៉ា បានឱ្យដឹងថា អគារមួយក្នុងចំណោមអគារដែលទើបសម្ពោធថ្មីនៅមន្ទីរពេទ្យកាល់ម៉ែត គឺជាអគារ «ស៊ីក្លូតុ្រង» ដែលនឹងផ្តល់អត្ថប្រយោជន៍ដ៏សំខាន់សម្រាប់អ្នកជំងឺ ជាពិសេសអ្នកដែលមានជំងឺមហារីក។
អគារថ្មីនេះ នឹងត្រូវបំពាក់ដោយម៉ាស៊ីនស៊ីក្លូតុ្រងដ៏ទំនើប ដែលកន្លែងនេះនឹងផលិតឱសថវិទ្យុសកម្ម ដើម្បីធ្វើរោគវិនិច្ឆ័យ និងព្យាបាលជំងឺមហារីក ជំងឺបេះដូង ជំងឺសរសៃប្រសាទ និងជំងឺផ្សេងៗទៀត តាមរយៈបច្ចេកទេសវេជ្ជសាស្ត្រនុយក្លេអ៊ែរទំនើប។
ខណៈពេលដែលទំនើបកម្មបរិក្ខារពេទ្យមានសារៈសំខាន់នោះ លោក ហ៊ុន ម៉ាណែត បានថ្លែងថា ការលើកកម្ពស់ធនធានមនុស្សក្នុងវិស័យសុខាភិបាល គឺមានសារៈសំខាន់ដូចគ្នា។ ដូច្នេះហើយ លោកបានអំពាវនាវឱ្យមានស្តង់ដារតឹងរ៉ឹងនៅពេលជ្រើសរើសបុគ្គលិកថែទាំសុខភាព ដោយធានាថាមានតែអ្នកដែលមានជំនាញត្រឹមត្រូវប៉ុណ្ណោះ នឹងត្រូវបានជ្រើសរើសឱ្យចូលបម្រើការងារ។
លោកមានប្រសាសន៍ថា៖ «ការបណ្តុះបណ្តាលត្រូវតែធានាគុណភាព ពីព្រោះគុណភាពគឺការពារអាយុជីវិតមនុស្ស និងកេរ្តិ៍ឈ្មោះនៃវិស័យសុខាភិបាលរបស់យើង។ បើយើងចង់ឱ្យវិស័យសុខាភិបាលរីកចម្រើន និងទទួលបានការទុកចិត្តពីសាធារណជន យើងត្រូវពង្រឹងសមត្ថភាពរបស់យើងក្នុងការថែទាំមនុស្ស។ ការបណ្តុះបណ្តាលត្រូវតែទៀងទាត់ និងមានគុណភាពខ្ពស់ ដោយផ្តោតលើជំនាញសង្គ្រោះជីវិត ជាជាងបរិមាណ»។
លោក ហ៊ុន ម៉ាណែត ក៏បានណែនាំផងដែរអំពីកិច្ចសហប្រតិបត្តិការជាមួយក្រសួងប្រៃសណីយ៍ និងទូរគមនាគមន៍ ដើម្បីពន្លឿនលើបដិវត្តន៍ឌីជីថលក្នុងវិស័យសុខាភិបាល ក្នុងការកែលម្អមូលដ្ឋានទិន្នន័យសុខភាពជាតិ លើកកម្ពស់ប្រសិទ្ធភាពនៃការព្យាបាល ការត្រួតពិនិត្យសុខភាព និងការពិគ្រោះយោបល់។
អគ្គនាយកបច្ចេកទេសនៃក្រសួងសុខាភិបាលកម្ពុជា វេជ្ជបណ្ឌិត ហុក គឹមចេង មិនបានឆ្លើយតបលើរឿងនេះទេ។
រីឯប្រធានមន្ទីរសុខាភិបាលខេត្តសៀមរាប លោក ក្រុស សារ៉ាត់ បានបដិសេធធ្វើអត្ថាធិប្បាយចំពោះរឿងនេះ ដោយបញ្ជាក់ថា លោកមិនឆ្លើយតបជាមួយអ្នកសារព័ត៌មានតាមទូរសព្ទទេ។
ដោយឡែក ប្រធានមន្ទីរសុខាភិបាលខេត្តកំពង់ចាម លោក គឹម សួរភិរុណ ក៏មិនបានឆ្លើយតបដែរ។
នាយកអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ បាននិយាយាថា វាជារឿងល្អមួយដែលរដ្ឋាភិបាលគ្រោងនឹងបង្កើតមន្ទីរពេទ្យថ្នាក់តំបន់ឡើង។
ទោះជាយ៉ាងនេះក្តី លោកបានបន្ថែមថា ការបង្កើតមន្ទីរពេទ្យថ្នាក់តំបន់នេះ គួរតែផ្តោតលើតម្រូវការ និងធានាលើការផ្តោតទៅលើជំងឺធំៗ ដោយមិនត្រូវឱ្យត្រួតស៊ីគ្នាជាមួយនឹងឯកទេសនានាដែលផ្តល់ជូនក្នុងមន្ទីរពេទ្យខេត្តនោះទេ។
លោកនិយាយថា៖«ខ្ញុំគិតថាមន្ទីរពេទ្យថ្នាក់តំបន់គួរតែមានដោយផ្អែកលើតម្រូវការ»។ ការសិក្សាអំពីឯកទេសដែលមន្ទីរពេទ្យក្នុងតំបន់អាចផ្តោតទៅលើនោះ គឺគួរតែត្រូវបានធ្វើឡើង ដោយសារតែមន្ទីរពេទ្យខេត្តជាច្រើនបានផ្តោតលើឯកទេសផ្សេងៗរួចហើយដែរ។
លោកបន្តថា៖ «ដូច្នេះហើយ មន្ទីរពេទ្យថ្នាក់តំបន់ក៏គួរពិចារណាផងដែរ ថាតើជំនាញពិសេសណាដែលត្រូវផ្តោតលើ។ ប្រសិនបើអ្នកជំងឺអាចស្វែងរកសេវាព្យាបាលឯកទេសផ្សេងទៀត [នៅមន្ទីរពេទ្យខេត្ត] មន្ទីរពេទ្យថ្នាក់តំបន់មិនគួរត្រូវបានចាត់ទុកថាជាអាទិភាពនោះទេ»។
លោក ជ័យ បានបន្ថែមថា ប្រសិនបើមន្ទីរពេទ្យថ្នាក់តំបន់ផ្តល់សេវាព្យាបាលសំខាន់ៗបាន ស្របពេលដែលមន្ទីរពេទ្យខេត្តមិនមាននោះ វាក៏អាចជួយដល់ប្រជាជនដែលមិនមានលទ្ធភាពគ្រប់គ្រាន់ ដើម្បីទៅរកការព្យាបាលនៅរាជធានីភ្នំពេញ ព្រោះការព្យាបាលមានតម្លៃខ្ពស់៕
ប្រែសម្រួលពីអត្ថបទភាសាអង់គ្លេស៖ PM Pushes for Modernization, Decentralized Healthcare with Plan of Regional Hospitals
