យោធាថៃបានសម្រេចបិទច្រកព្រំដែនទាំងអស់រវាងកម្ពុជា-ថៃដោយឯកតោភាគីនៅយប់ថ្ងៃទី២៣ ខែមិថុនា ដោយអនុញ្ញាតឱ្យចេញចូលតែសិស្ស និងអ្នកជំងឺ។ យោងតាមមន្ត្រីកម្ពុជាបានបញ្ជាក់។
លោក លី សុវណ្ណារិទ្ធ អភិបាលរងខេត្តបន្ទាយមានជ័យ ប្រាប់ សារព័ត៌មានខេមបូចា ថា ថៃបានសម្រេចបិទច្រកព្រំដែនទាំងស្រុងដោយឯកតោភាគី ទាំងភ្ញៀវទេសចរ មធ្យោបាយផ្សេងៗ និងការធ្វើពាណិជ្ជកម្ម។
ប្រធានប៉ុស្តិ៍ត្រួតពិនិត្យនៃច្រកទ្វារអន្តរជាតិប៉ោយប៉ែត លោក វ៉ាន់ ដារ៉ាន់ បានថ្លែងដែរថា ថៃបានបិទច្រកព្រំដែនរវាងកម្ពុជា-ថៃទាំងអស់ ព្រោះក្នុងលិខិតរបស់ភាគីថៃដែលសម្រេចបិទនេះចុះថ្ងៃទី២៣នេះ។
លោកបានបញ្ជាក់ថា៖ «បិទទាំងស្រុង លើកលែងតែសិស្ស និងអ្នកជំងឺ [អាចចេញចូលបាន]»។
យោងតាមកាសែត The Nation បានសរសេរថា យោធាថៃកាលពីថ្ងៃចន្ទបានបញ្ជាឱ្យបិទច្រកព្រំដែនជាអចិន្ត្រៃយ៍ និងបណ្តោះអាសន្ននៅតាមព្រំដែនកម្ពុជា-ថៃ ដោយមានការលើកលែងសម្រាប់តែគោលបំណងមនុស្សធម៌ប៉ុណ្ណោះ។
