មន្ត្រីគណបក្សភ្លើងទៀន២រូបទៀត ត្រូវបានចាប់ខ្លួនពីបទប្រើប្រាស់លិខិតក្លែងដើម្បីចុះបញ្ជីឈ្មោះប្រជាជនដោយគ្មានការយល់ព្រមរបស់ពួកគេ ដើម្បីដាក់ជាបេក្ខជនបម្រុងសម្រាប់មុខតំណែងក្រុមប្រឹក្សា។ ការចាប់ខ្លួននេះបាននាំឱ្យចំនួនសរុបនៃការឃុំខ្លួនមេដឹកនាំគណបក្សប្រឆាំងកើនឡើងដល់៤នាក់ហើយ នៅក្នុងខែមករា ឆ្នាំ២០២៤នេះ។
យោងតាមដីកាបង្គាប់ឱ្យនាំខ្លួនដែលចេញដោយសាលាដំបូងរាជធានីភ្នំពេញដែល ខេមបូចា ទទួលបាន ចៅក្រមស៊ើបសួរ យី សុខវួច បានបង្គាប់ឱ្យចាប់ និងនាំខ្លួនឈ្មោះ ហាក់ កុសល និង ឈ្មោះ ម៉ា ចិន្ដា ពីបទក្លែងបន្លំ និងបទប្រើប្រាស់លិខិតក្លែង ប្រព្រឹត្តនៅរាជធានីភ្នំពេញ កាលពីអំឡុងខែវិច្ឆិកា ឆ្នាំ២០២៣ ។
លោក កុសល មានតំណែងជាលេខាធិការនៃគណៈកម្មាធិការប្រតិបត្តិខណ្ឌជ្រោយចង្វាររបស់គណបក្សភ្លើងទៀន ចំណែកឯលោក ចិន្ដា ជាអនុប្រធានគណៈកម្មាធិការប្រតិបត្តិគណបក្សសម្រាប់ខណ្ឌដូនពេញ ។
កាលពីខែមុន ប្រធានស្តីទីគណបក្សភ្លើងទៀនរាជធានីភ្នំពេញ លោក ខឹម ចាន់វណ្ណៈ និងលោកស្រី ឆាយ ចិន្ដា ប្រធានចលនាស្ត្រីប្រចាំខណ្ឌឫស្សីកែវ ត្រូវបានដាក់ឱ្យស្ថិតក្រោមការឃុំឃាំងរង់ចាំការជំនុំជម្រះទោសពីបទដូចគ្នាខាងលើដែរ ។
ស្នងការនគរបាលរាជធានីភ្នំពេញ លោក ជួន ណារិន្ទ បានបញ្ជាក់ពីការចាប់ខ្លួនលោក កុសល និងលោក ចិន្ដា ។
លោក ណារិន្ទ ថ្លែងថា៖ «[យើង]អនុវត្តតាមដីការបស់តុលាការពីបទក្លែងលិខិតសាធារណៈ ដែលជាបទល្មើសព្រហ្មទណ្ឌ»។
លោក សំ វិច្ឆិកា អ្នកនាំពាក្យស្នងការនគរបាលរាជធានីភ្នំពេញ បានឱ្យដឹងថា លោក កុសល និងលោក ម៉ា ចិន្ដា ត្រូវបានចាប់ខ្លួននៅទីតាំងពីរដាច់ដោយឡែកពីគ្នា–ខណ្ឌជ្រោយចង្វារ និងខណ្ឌសែនសុខ–កាលពីថ្ងៃពុធ ។
លោកបញ្ជាក់ថា៖ «ពួកគេទាំងពីរនាក់ជាប់ពាក់ព័ន្ធនឹងការក្លែងបន្លំ ជាមួយនឹងប្រធានស្ដីទីនៃគណបក្សភ្លើងទៀនប្រចាំរាជធានីភ្នំពេញ លោក ខឹម ចាន់វណ្ណៈ ដែលយើងបានចាប់ខ្លួនកាលពីសប្ដាហ៍មុន»។
ជនសង្ស័យទាំងពីររូបត្រូវបានបញ្ជូនទៅកាន់តុលាការដើម្បីសាកសួរបន្ថែម ។
លោក វិច្ឆិកា បានបន្ថែមថា៖ «ពួកគេដាក់ឈ្មោះជនរងគ្រោះបីនាក់ ក្លែងស្នាមមេដៃ និងហត្ថលេខាដើម្បីចុះឈ្មោះពួកគេជាបេក្ខជនបម្រុងសម្រាប់ក្រុមប្រឹក្សាគណបក្សភ្លើងទៀនប្រចាំសង្កាត់ផ្សារថ្មី៣ ដោយគ្មានការយល់ព្រមពីអ្នកទាំងនោះ»។
លោកបានបន្ថែមថា ប៉ូលិសបានធ្វើការស៊ើបអង្កេតបន្ទាប់ពីទទួលបានពាក្យបណ្ដឹងពីជនរងគ្រោះទាំងបីរូប ដែលអះអាងថា ឈ្មោះរបស់ពួកគេត្រូវបានប្រើប្រាស់ជាបេក្ខជនបម្រុងដោយគ្មានការយល់ព្រមពីពួកគេ ប៉ុន្តែលោកបានបដិសេធមិនបញ្ចេញឈ្មោះរបស់អ្នកដាក់ពាក្យបណ្ដឹងទាំងនោះទេ ។
ប្រធានគណបក្សភ្លើងទៀន លោក ទាវ វណ្ណុល បានថ្កោលទោសការចាប់ខ្លួនមន្ត្រីគណបក្សរបស់លោក ដោយលោកថ្លែងថា វាជាសកម្មភាព«បំភិតបំភ័យ» និងជាការប៉ុនប៉ងបំបាក់ស្មារតីប្រជាពលរដ្ឋមិនឱ្យចូលរួមនៅក្នុងសកម្មភាពនយោបាយនៅក្នុងដំណើរការឆ្ពោះទៅរកការបោះឆ្នោតព្រឹទ្ធសភា។
លោកបានថ្លែងយ៉ាងដូច្នេះថា៖ «ខ្ញុំគិតថា ពួកគេគំរាមកំហែងទៅដល់ដំណើរការប្រជាធិបតេយ្យនៅក្នុងប្រទេសកម្ពុជានៅមុនការបោះឆ្នោតព្រឹទ្ធសភា»។ លោកបន្តថា៖ «ការចាប់ខ្លួននេះនឹងបំភិតបំភ័យសកម្មជនគណបក្សភ្លើងទៀន មានការរអាមិនអាចចេញធ្វើការឃោសនាបោះឆ្នោត ឬចូលរួមនៅក្នុងសកម្មភាពរបស់គណបក្ស»។
ទាំងលោក កុសល និងលោក ម៉ា ចិន្ដា បានចុះបញ្ជីឈ្មោះជាអ្នកសង្កេតការណ៍បោះឆ្នោតរបស់គណបក្ស។ ការបោះឆ្នោតនឹងប្រព្រឹត្តទៅនៅថ្ងៃទី២៥ ខែកុម្ភៈខាងមុខ។
អ្នកនាំពាក្យគណបក្សកាន់អំណាច លោក សុខ ឥសាន បានច្រានចោលការលើកឡើងថា ការចាប់ខ្លួនសមាជិកគណបក្សប្រឆាំងគឺជារឿងនយោបាយ ឬជាប់ពាក់ព័ន្ធនឹងការបោះឆ្នោតព្រឹទ្ធសភា ។
លោកបានមានប្រសាសន៍ថា៖ «វា[ការចាប់ខ្លួន]មិនមែនធ្វើឡើងតែទៅលើ[សមាជិក]បក្សប្រឆាំងទេ ប៉ុន្តែ ទៅលើមន្ត្រីបក្សកាន់អំណាចដូចគ្នា ចំពោះអ្នកណាដែលបានរំលោភច្បាប់។ ពួកគេក៏ត្រូវតែប្រឈមមុខចំពោះច្បាប់ [ដែរ]»។
លោក ឥសាន លើកឡើងថា៖ «នេះមិនមែនជាការគំរាមកំហែងទេ»។ លោកបានបន្ថែមថា ការចាប់ខ្លួនពុំមានអ្វីពាក់ព័ន្ធនឹងការបោះឆ្នោតឡើយ ប៉ុន្តែថា ពួកគេពិតជាបានប្រព្រឹត្តបទល្មើសមែន។ «ចូរកុំប្រើលេសដើម្បីបំភ្លៃការពិត»។
លោក អំ សំអាត នាយកចាត់ការទូទៅនៃអង្គការសិទ្ធិមនុស្ស លីកាដូ បានចោទប្រកាន់ថា «យុទ្ធសាស្ត្រដូចគ្នា»កំពុងត្រូវបានគេប្រើប្រាស់ដើម្បីចាប់ខ្លួនសមាជិក និងសកម្មជនគណបក្សប្រឆាំងនៅមុនការបោះឆ្នោត ។
លោកបានថ្លែងថា៖ «យើងបានឃើញរឿងនេះ[ពីមុនមក]។ ការចាប់ខ្លួននិងការឃុំខ្លួន គឺពាក់ព័ន្ធនឹងរឿងនយោបាយច្រើនជាងការអនុវត្តច្បាប់»។ លោកបន្តថា៖ «វាជាការធ្វើទុក្ខបុកម្នេញ និងការរឹតត្បិតលើសេរីភាពនិងសិទ្ធិនយោបាយរបស់ប្រជាពលរដ្ឋ។ វានឹងមានការរិះគន់កាន់តែច្រើនឡើង ខណៈដែលសេរីភាពនយោបាយកាន់តែត្រូវបានរឹតត្បិត»។
អគ្គលេខាធិការគណបក្សភ្លើងទៀន លោក លី សុធារ៉ាយុត្តិ បានប្រាប់ ខេមបូចា ថា ចាប់តាំង ពីឆ្នាំ២០២៣មក មន្ត្រីគណបក្ស ១២រូបបានត្រូវជាប់ឃុំឃាំងនៅក្នុងពន្ធនាគារ ។ លោកបានបន្តថា ការចាប់ខ្លួនគឺជាប់ពាក់ព័ន្ធនឹងសកម្មភាពនយោបាយ។
អ្នកនាំពាក្យទាំងពីររូបនៃសាលាដំបូងរាជធានីភ្នំពេញ លោក អ៊ី រិន្ទ និងលោក ប្លង់ សុផល មិនអាចទាក់ទងសុំការអត្ថាធិប្បាយបានទេ៕
ប្រែសម្រួលពីអត្ថបទភាសាអង់គ្លេស៖ Police Arrests Two More Candlelight Officials for Alleged Document Forgery As Senate Election Nears