ស្ត្រីមានផ្ទៃពោះរួមប្តីនិងកូនស្រីបានស្លាប់នៅស្រុកវាលវែង ខេត្តពោធិសាត់ ដោយសារជំនន់ទឹកភ្លៀងហូរកួចចូលស្ទឹង កាលពីថ្ងៃទី១២ ខែកក្កដានេះ ខណៈគណៈកម្មាធិការជាតិគ្រប់គ្រងគ្រោះមហន្តរាយនិងអភិបាលខេត្តមួយចំនួនស្នើឱ្យពលរដ្ឋមានការប្រុងប្រយ័ត្ននិងត្រៀមខ្លួនចំពោះទឹកជំនន់ក្នុងរដូវវស្សា។
ព្រឹកថ្ងៃទី១៣ ខែកក្កដា ឆ្នាំ២០២២នៅភូមិឯកភាព ឃុំថ្មដា ស្រុកវាលវែង ខេត្ដពោធិសាត់ មានករណីស្លាប់មនុស្ស៣នាក់ រួមទាំងស្រ្ដីមានផ្ទៃពោះប្រាំពីរខែ កូនស្រីអាយុ៣ឆ្នាំម្នាក់និងបុរសជាប្ដី ដោយសារត្រូវទឹកកួចក្បែរជើងភ្នំ១៥០០ ត្រង់ចំណុចស្ទឹងកាច់ព្រោះមានភ្លៀងខ្លាំងដោយសារតែពួកគាត់់បានធ្វើដំណើរនៅពេលយប់ថ្ងៃទី១២ខែកក្កដាពេលកំពុងភ្លៀងធ្លាក់ខ្លាំង។
ជនរងគ្រោះដែលស្លាប់រួមមានឈ្មោះ ជា សុខគឿន ភេទប្រុស អាយុ៣៩ឆ្នាំ និងប្រពន្ធឈ្មោះ ចាន់ ភក្ដី ភេទស្រី អាយុ៣៥ឆ្នាំ មានផ្ទៃពោះប្រាំពីរ ព្រមទាំងកូនស្រីឈ្មោះ លី ចាន់ថា ហៅ ឈៀងម៉ៃ អាយុ៣ឆ្នាំម្នាក់ទៀត។ ជនរងគ្រោះទាំងអស់រស់នៅភូមិឈើទាល ឃុំត្នោតជុំ ស្រុកក្រគរ ខេត្តពោធិ៍សាត់ ប៉ុន្ដែសាកសពរកមិនទាន់ឃើញនិងមានផ្ទៃ៧ខែ។ យោងតាមសមត្ថកិច្ចប៉ូលិស។
ចំណែកលោក សូ សាហុង អភិបាលស្រុកវាលវែង បានប្រាប់ ខេមបូចា នៅថ្ងៃស្រុកថា ករណីមនុស្សស្លាប់ចំនួន៣នាក់ក្នុងនោះមានស្រី២នាក់និងប្រុស១នាក់ដោយសារនៅថ្ងៃទី១២ខែកក្កដាមានភ្លៀងខ្លាំងនៅជ្រលងភ្នំ១៥០០ត្រង់ចំណុចស្ទឹងកាច់ ឃុំថ្មដាហ្នឹងដែលជាកន្លែងកើតហេតុស្លាប់គឺពួកគាត់នាំគ្នាធ្វើដំណើរពេលយប់ ប៉ុន្ដែមិនដឹងថាគោលបំណងពួកគាត់ទៅណាឬក៏ធ្វើអីនោះទេ ទើបព្រឹកឡើងថ្ងៃទី១៣ ខែកក្កដា ទឹកក៏បានស្រកវិញ ប្រជាពលរដ្ឋក៏បានប្រទះឃើញសាកសពបុរសជាប្ដីនិងកូនស្រីម្នាក់អាយុ៣ឆ្នាំ។
លោក សាហុងបន្តថា រីឯសពប្រពន្ធនិងមានផ្ទៃពោះ០៧ខែផងលោកថាអាជ្ញាធរកំពុងស្វែងរកជាបន្ដបន្ទាប់ ចំណែកសពដែលបានរកឃើញអាជ្ញាធរបានប្រគល់ទៅសាច់ញាតិយកទៅធ្វើបុណ្យនៅឯស្រុកកំណើតនៅភូមិឈើទាល ឃុំត្នោតជុំ ស្រុកក្រគរ ខេត្តពោធិ៍សាត់។
អភិបាលស្រុកមានប្រសាសន៍ថា៖ «ដោយសារតែពេលយប់អត់មានអ្នកណាដឹងថាមានមនុស្សស្លាប់ទេ ដល់ពេលម្សិលមិញនេះពេលព្រឹកបានមានគេឃើញ បានគេដឹងថាមានមនុស្សស្លាប់ បាននាំគ្នាដើរទៅរក ដើរទៅមើលទៅឃើញមានបណ្ណមានអីគឺនៅស្រុកក្រគរ គេស្គាល់អត្ដសញ្ញាណគាត់ ក៏ប្រគល់សពដែលរកឃើញឲ្យសាច់ញាតិគាត់ទៅ»។
លោកបន្ថែមថា ពីមុនមកនៅស្រុកវាលវែងមិនធ្លាប់មានករណីអ៊ីចឹងទេ នេះទើបតែជាលើកទី១ ដែលពីមុនមកធ្លាប់តែស្លាប់ដោយតែស្រវឹងហើយលង់ទឹកស្លាប់ដោយខ្លួនឯង ហើយគាត់ក៏សុំអំពាវនាវឲ្យប្រជាពលរដ្ឋទាំងអស់ឲ្យមានការប្រុងប្រយ័ត្នឲ្យបានខ្ពស់ពីព្រោះរដូវនេះជារដូវវស្សាអាចនឹងមានបញ្ហាប្រឈមច្រើនដោយទឹកជំនន់។
លោក ព្រហ្ម ងន មេឃុំថ្មដា ស្រុកវាលវែង បានបញ្ជាក់ប្រាប់ថា អាជ្ញាធរមូលដ្ឋានទើបតែរកឃើញសពបាន២នាក់ទេ ចំណែកស្រ្ដីម្នាក់ទៀតអាជ្ញាធរកំពុងព្យាយាមស្វែងរកបន្ដទៀត ហើយក្នុងករណីនេះអាជ្ញាធរក៏បានអំពាវនាវដល់ប្រជាពលរដ្ឋនៅមូលដ្ឋានទាំងអស់និងតំបន់ផ្សេងៗទៀតសុំឲ្យមានការប្រុងប្រយ័ត្ន បើមានភ្លៀងធ្លាក់អីសុំកុំចេញពីផ្ទះវាអាចមានបញ្ហាណាមួយកើតឡើង។
មេឃុំថ្មដាបន្ដថា៖ «ក្នុងនាមខ្ញុំបាទជាអាជ្ញាធរមូលដ្ឋានក៏សុំអំពាវនាវដល់បងប្អូនដែលនៅក្នុងឃុំថ្មដាទាំងមូល ក៏ដូចជាប្រជាពលរដ្ឋដែលមកលេងនៅរមណីយដ្ឋានទឹកធ្លាក់ថ្មដានេះ គួរតែមានការប្រុងប្រយ័ត្នពីភ្លៀង ពេលភ្លៀងកុំចេញពីផ្ទះកុំឲ្យកើតហេតុដូចករណីនេះចឹង»។
លោក វ៉ី សំណាង អភិបាលខេត្តកំពង់ស្ពឺ បានមានប្រសាសន៍ថា កន្លងមករដ្ឋបាលខេត្ដបានចេញសេចក្ដីប្រកាសប្រាប់ពលរដ្ឋដែលឆ្លងកាត់ផ្លូវជាតិលេខ៤ត្រង់ចំណុចគីឡូលេខ១១៥ដល់គីឡូលេខ១១៦ ឲ្យពួកគាត់វាងទៅធ្វើដំណើរតាមផ្លូវជាតិលេខ៣វិញក្រោយពីភ្លៀងខ្លាំងធ្វើឲ្យលិចផ្លូវជាតិលេខ៤និងបានផ្អាករយៈពេល១ថ្ងៃទើបតែបើកឲ្យដំណើរការវិញហើយ ប៉ុន្ដែយ៉ាងណាលោកក៏បានប្រកាសប្រាប់ទៅដល់អាជ្ញាធរធនធានទឹកនិងមន្ទីរសុខាភិបាលត្រៀមរបស់របរសម្រាប់ជួយសង្រ្គោះពេលមានទឹកជំនន់កើតឡើងវាអាចមានពស់ មានអីផ្សេងនិងប្រជាពលរដ្ឋអាចរងរបួស។
លោកសំណាងថ្លែងថា៖«ខ្ញុំសុំឲ្យអាជ្ញាធរទាំងអស់ត្រៀមខ្លួននិងរាយការណ៍មករដ្ឋបាលភ្លាមៗពេលដែលហេតុការណ៍ទឹកជំនន់ណាមួយកើតឡើងនិងត្រូវយកចិត្តទុកដាក់ពិនិត្យមើលឲ្យបានគ្រប់ជ្រុងជ្រោយ ជាពិសេសពេលដែលមានទឹកជំនន់ត្រូវបញ្ចាសពលរដ្ឋទៅកាន់ទីទួលឬក៏ទីសុវត្ថិភាព នេះជាកត្ដាចម្បងដែលអាជ្ញាធរត្រូវអនុវត្តន៍»។
ដោយឡែកលោក ឡុង ឌីម៉ង់ អភិបាលរងខេត្តព្រះសីហនុ បានលើកឡើងថា រដ្ឋបាលខេត្តបានចេញសេចក្ដីប្រកាសមួយដើម្បីឲ្យអាជ្ញាធរមូលដ្ឋានណែនាំដល់ប្រជាពលរដ្ឋដែលមកកម្សាន្ដទាំងអស់ហ្នឹងឲ្យបានដឹងពីអាកាសធាតុដែលវាមិនទាន់អំណោយផល ហើយជាពិសេសរដ្ឋបាលបានណែនាំទៅប្រជានេសាទសុំឲ្យមានការប្រុងប្រយ័ត្នឲ្យបានខ្ពស់និងហាមចេញទូកនៅពេលមានភ្លៀងខ្យល់ខ្លាំង។
ម្យ៉ាងវិញទៀត លោក ឌីម៉ង់ ឱ្យដឹងទៀតថា ពីខាងកោះរុងក៏ហាមមិនឲ្យមានការចេញទូកផងដែរ គឺឱ្យផ្អាកប៉ុន្មានថ្ងៃសិន និងចាំមើលស្ថានភាពជាក់ស្ដែងថាយ៉ាងម៉េចរដ្ឋបាលខេត្តនឹងចេញសេចក្ដីណែនាំបន្ដទៀត។
លោក ឌីម៉ង់ បន្ដថា រដ្ឋបាលខេត្តក៏បានណែនាំវិធានការដល់អាជ្ញាធរក្រុងស្រុកនិងកងរាជអាវុធហត្ថខេត្តនិងស្នងការនគរបាលខេត្តទាំងអស់ឲ្យត្រៀមលក្ខណៈសម្បត្ដិ ជាពិសេសការជួយសង្រ្គោះប្រជាពលរដ្ឋក្នុងករណីដែលមានហានិភ័យអ្វីកើតឡើងនិងកន្លងទៅដូចជាផ្លូវជាតិលេខ៤ត្រង់ចំណុច១១៥-១១៦ដោយសារមានកម្រិតទឹកហូរមកខ្លាំងក៏រដ្ឋបាលខេត្តសម្រេចឱ្យប្រជាពលរដ្ឋផ្អាកធ្វើដំណើរ១យប់ ទើបថ្ងៃបន្ទាប់ក៏បានបើកឲ្យដំណើរការវិញដោយសារស្ថានភាពទឹកលែងអី។
លោកបានមានប្រសាន៍ថា៖ «យើងមានការអំពាវនាវដល់ប្រជាពលរដ្ឋជាប់រហូតជូនបងប្អូនទាំងអ្នករស់នៅខេត្តព្រះសីហនុនិងតាមបណ្ដារខេត្តដែលត្រូវធ្វើដំណើរមកលេងខេត្ដព្រះសីហនុឬក៏មានកិច្ចការរវល់អីផ្សេង គឺសុំឲ្យមានការប្រុងប្រយ័ត្នចំពោះភ្លៀងខ្យល់ទាំងអស់គ្នា ជាពិសេសការប្រើប្រាស់ទួកកាណូតសុំឲ្យផ្អាកដំណើរការប៉ុន្មានថ្ងៃសិន»។
លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានប្រាប់ ខេមបូចា ថា ដោយសារបិមាណភ្លៀងចាប់ពីថ្ងៃ១១ដល់១២ខែកក្កដាច្រើននិងបានរាយប៉ាយនៅតំបន់មួយចំនួន ជាពិសេសតំបន់តាមមាត់សមុទ្រនិងតំបន់កំពង់រាបដែលបង្កឱ្យមានទឹកជំនន់ទឹកភ្លៀងនិងបានប៉ះពាល់ទៅលើខេត្តមួយចំនួនដូចជាខេត្តព្រះសីហនុត្រង់ចំណុចផ្លូវជាតិលេខ៤ក្នុងស្រុកកំពង់សិលាដែលធ្វើឱ្យលិចលង់ផ្ទះប្រជាពលរដ្ឋនិងលិចផ្លូវ ហើយខេត្តក្រចេះក៏បានលិចស្រូវនៅស្រុកចិត្របុរីនិងនៅអន្លង់វែងខេត្តឧត្តរមានជ័យធ្វើឲ្យលិចផ្លូវធ្វើឲ្យប៉ះពាល់ស្ពានមួយកន្លែងផងដែរ ក្រៅពីនេះខេត្តមួយចំនួនផ្សេងទៀតក៏រងឥទ្ធិពលទឹកជំនន់ ប៉ុន្ដែមួយរយៈខ្លីក៏ស្រកទៅវិញនិងមិនធ្វើឲ្យប៉ះពាល់ធ្ងន់ធ្ងរអ្វីទេ។
លោក គឹមកុលមុនី បន្ដថា៖ «ប៉ុន្ដែតាមការព្យាករណ៍របស់ក្រសួងធនធានទឹកបានបញ្ជាក់ថាភ្លៀងនៅតែបន្ដទៅទៀតពីថ្ងៃទី១៤ដល់ថ្ងៃទី១៩ខាងមុខនេះ អ៊ីចឹងទេបើសិនជាភ្លៀងនៅតែបន្ដធ្លាក់និងមានបរិមាណច្រើនទៀតនឹងអាចបង្កនូវជំនន់ទឹកភ្លៀងនៅតំបន់មួយចំនួន ជាពិសេសតំបន់មាត់សមុទ្រនិងតំបន់មួយចំនួនទៀតតាមដងទន្លេ»។ លោកបន្ដថា៖ « គណៈកម្មាធិការជាតិគ្រប់គ្រងគ្រោះមហន្តរាយសុំធ្វើការអំពាវនាវដល់អាជ្ញាធរ អង្គការដៃគូរ ស្ថាប័នពាក់ព័ន្ធទាំងអស់ផ្នែកឯកជននិងប្រជាពលរដ្ឋមេត្តាចូលរួមបន្ដការប្រុងប្រយ័ត្ននិងតាមដានសភាពការវិវឌ្ឍទឹកភ្លៀងឱ្យបានជាប់ជាប្រចាំនិងត្រៀមលក្ខណៈ»។
លោកសង្ឃឹមថា អាជ្ញាធរនិងដៃគូស្ថាប័នទាំងអស់និងចូលរួមការពារប្រជាពលរដ្ឋរងគ្រោះនៅពេលដែលមានបង្ហាញខាងមុខនេះ និងជាពិសេសប្រជាពលរដ្ឋដែលនៅតាមតំបន់ឆ្នេរសមុទ្រនៅខេត្តព្រះសីហនុ ខេត្តកំពត ខេត្តកែប ខេត្តកោះកុងក៏ទាមទារឲ្យមានការប្រុងប្រយ័ត្នខ្ពស់ ពីព្រោះស្ថានភាពអាចនឹងមានការប្រែប្រួលដោយទឹកភ្លៀងនឹងបន្ដដល់ថ្ងៃទី១៩ និងការបញ្ចៀសទៅកាន់ទីទួលសុវត្ថិភាព។
គឹមកុលមុនី បានបញ្ជាក់បន្ថែមថា ចាប់ពីខែមករាដល់ខែមិថុនាឆ្នាំ២០២២នេះមិនទាន់មានករណីអ្នកស្លាប់ដោយទឹកជំនន់នោះទេ រីឯករណីស្លាប់៣នាក់នៅឃុំថ្មដា ស្រុកវាលវែងនឹងត្រូវបញ្ចូលក្នុងរបាយការណ៍ខែកក្កដាដល់ខែធ្នូឆ្នាំ២០២២។
បើយោងតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយស្ដីពី លទ្ធផលការងារគ្រប់គ្រងគ្រោះមហន្ដរាយចាប់ពីខែមករាដល់ខែមិថុនា ឆ្នាំ២០២២ បានបង្ហាញថា បរិមាណទឹកភ្លៀងធ្លាក់ច្រើនជាបន្ដបន្ទាប់ចាប់ពីដំណាច់ខែឧសភាមកដល់ដើមខែមិថុនាក្រៅពីបង្កការជន់លិចនៅតាមតំបន់ទំនាប និងទីប្រជុំជនក្នុងរយៈពេលខ្លីក៏បង្កឲ្យមានការប៉ះពាល់ និងខូចខាតដំណាំស្រូវនិងដំណាំរួមផ្សំរបស់ពលរដ្ឋមួយចំនួនផងដែរ។
របាយការណ៍នេះបញ្ជាក់ថា មានខ្យល់កន្រ្ទាក់កើតមានចំនួន៦៧លើក នៅ២៥រាជធានីខេត្តនិងផ្ទះរលំនិងខូចខាតធ្ងន់ធ្ងរ៦៨៥ខ្នង ផ្ទះរបើកដំបូលនិងខូចខាតមធ្យម២៣៧៤ខ្នង និងសាលារៀន១៩ខ្នង និងប៉ះពាល់របស់របរនិងទ្រព្យសម្បត្តិមួយចំនួនទៀត ព្រមទាំងរងរបួស១២នាក់។ ក្នុងរបាយការណ៍ដដែលបានបង្ហាញទៀតថា រន្ទះបាញ់កើតមានចំនួន៦១លើកបណ្តាលឱ្យមនុស្សស្លាប់ចំនួន៣២នាក់និងរងរបួស២៦នាក់និងងាប់គោក្របី៦៩ក្បាលផងដែរ។