សមាគមសម្ព័ន្ធអ្នកសារព័ត៌មានកម្ពុជា

អង្គការសារព័ត៌មាន និងម្ចាស់ជំនួយ ចាប់ផ្តើមពិភាក្សាពីការបង្កើតក្រុមប្រឹក្សាសារព័ត៌មានជាតិនៅកម្ពុជា

ក្រុមសង្គមស៊ីវិល និងបុគ្គលិកអង្គការសហប្រជាជាតិថ្លែងក្នុងកិច្ចពិភាក្សាពីការបង្កើតក្រុមប្រឹក្សាសារព័ត៌មានកម្ពុជា នៅរាជធានីភ្នំពេញ នាថ្ងៃទី១៦ ខែកញ្ញា ឆ្នាំ២០២២។ ខេមបូចា/ព្រីង សំរាំង
ក្រុមសង្គមស៊ីវិល និងបុគ្គលិកអង្គការសហប្រជាជាតិថ្លែងក្នុងកិច្ចពិភាក្សាពីការបង្កើតក្រុមប្រឹក្សាសារព័ត៌មានកម្ពុជា នៅរាជធានីភ្នំពេញ នាថ្ងៃទី១៦ ខែកញ្ញា ឆ្នាំ២០២២។ ខេមបូចា/ព្រីង សំរាំង

ក្រុមអង្គការលើកកម្ពស់សេរីភាពសារព័ត៌មាន និងម្ចាស់ជំនួយបរទេសកាលពីថ្ងៃសុក្រ បានពិភាក្សាអំពីអត្ថប្រយោជន៍ និងគោលបំណងនៃការបង្កើតក្រុមប្រឹក្សាសារព័ត៌មានជាតិដែលក្នុងនោះរួមមានការបង្កើតក្រមសីលធម៌ស្តង់ដារសម្រាប់អ្នកសារព័ត៌មានទូទាំងប្រទេសកម្ពុជា ដើម្បីលើកកម្ពស់ទំនុកចិត្តសាធារណៈ ក៏ដូចជាស្វ័យគ្រប់គ្រងក្នុងប្រព័ន្ធផ្សព្វផ្សាយ។

ក្រុមប្រឹក្សាសារព័ត៌មានជាតិជាធម្មតាមានសមាជិកជាអ្នកធ្វើការផ្នែកប្រព័ន្ធផ្សព្វផ្សាយឯករាជ្យ និងអ្នកសារព័ត៌មាន​ ដែលក្រុមប្រឹក្សានេះនឹងកំណត់ស្តង់ដារវិជ្ជាជីវៈក្នុងវិស័យនេះ ក៏ដូចជាធ្វើឱ្យម្ចាស់ស្ថាប័នសារព័ត៌មានមានទំនួលខុសត្រូវតាមរយៈការគ្រប់គ្រងដោយខ្លួនឯងជាមធ្យោបាយមួយដើម្បីជៀសវាងការជ្រៀតជ្រែករបស់រដ្ឋាភិបាល។

លោក អ៊ិត សូធឿត នាយកស្តីទីនៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ(CCIM)​បានមានប្រសាសន៍ថា ក្រុមប្រឹក្សាសារព័ត៌មាននឹងបង្កើនសមត្ថភាពរបស់វិស័យនេះក្នុងស្វ័យគ្រប់គ្រងនៅក្នុងបរិយាកាសប្រព័ន្ធផ្សព្វផ្សាយមួយ ដែលបញ្ហានេះកន្លងមកត្រូវបានដោះស្រាយជាប្រចាំដោយរដ្ឋាភិបាលនៅក្នុងតុលាការ ឬតាមរយៈក្រសួងព័ត៌មាន។

លោក សុធឿត មានប្រសាសន៍ថា៖ «បរិបទនៅកម្ពុជា ប្រព័ន្ធផ្សព្វផ្សាយ និងអ្នកសារព័ត៌មានត្រូវបានយាយីដោយរដ្ឋាភិបាល និងប្រព័ន្ធតុលាការ។ អ៊ីចឹងនេះគឺជាពេលវេលាដ៏សំខាន់មួយ ដែលយើងត្រូវមានក្រុមប្រឹក្សាសារព័ត៌មាន»។

កាលពីខែសីហា អ្នកសារព័ត៌មាន ៥នាក់ មកពីអង្គភាពសារព័ត៌មានឯករាជ្យ VOD ដែលចំណុះឱ្យCCIM ត្រូវបានឃុំខ្លួនអស់ជាច្រើនម៉ោង ដោយអ្នកថតវីដេអូសារព័ត៌មានម្នាក់ត្រូវបានមន្ត្រីម្នាក់ទះកំផ្លៀង នៅពេលដែលអ្នកកាសែតរូបនោះបដិសេធមិនប្រគល់ទូរសព្ទដែលគាត់កំពុងប្រើដើម្បីថតសកម្មភាពសមត្ថកិច្ចសាកសួរសហការីរបស់ខ្លួន។

សមាគមសម្ព័ន្ធអ្នកសារព័ត៌មានកម្ពុជា (CamboJA) ដែលបានចូលរួមក្នុងកិច្ចពិភាក្សាកាលពីថ្ងៃសុក្រ បានឱ្យដឹងថា កាលពីឆ្នាំមុន ចំនួនអ្នកសារព័ត៌មានដែលត្រូវបានចាប់ខ្លួន និងបៀតបៀនក្នុងពេលកំពុងធ្វើការបានកើនឡើងជិត៥០% បើធៀបនឹងឆ្នាំ២០២០។

កាលពីឆ្នាំមុនអ្នកសារព័ត៌មានជិត១០០ នាក់បានប្រឈមមុខនឹងការយាយីក្នុង៤៩ករណីដែលក្នុងនោះមានការវាយប្រហារលើរាងកាយ ការគំរាមកំហែងថានឹងប្រើហិង្សា ការចាប់ខ្លួន ការជាប់ពន្ធនាគារ និងចំណាត់ការផ្លូវច្បាប់។ អ្នក​សារព័ត៌មានចំនួន ៣៧​នាក់ ត្រូវ​បាន​ចាប់​ដាក់​ពន្ធនាគារ​ក្រោម​បទ​ចោទ​ញុះញង់ ជំរិត​ទារ​ប្រាក់ និង​បទ​ឧក្រិដ្ឋ​ផ្សេងៗ។

អ្នកស្រី Susanna Elmberger លេខាទី២ ទទួលបន្ទុកសិទ្ធិមនុស្ស លទ្ធិប្រជាធិបតេយ្យ និងនីតិរដ្ឋនៅការិយាល័យស្ថានទូតស៊ុយអែតនៅភ្នំពេញ មានប្រសាសន៍ថា ក្រុមប្រឹក្សាសារព័ត៌មានអាចរួមចំណែកក្នុងការពង្រឹងឯករាជ្យភាពប្រព័ន្ធផ្សព្វផ្សាយ សេរីភាពសារព័ត៌មាន និងសុវត្ថិភាពអ្នកសារព័ត៌មាន។

អ្នកស្រី Elmberger បានលើកឡើងក្នុងកិច្ចពិភាក្សានោះថា៖ «យន្តការស្វ័យគ្រប់គ្រងនៃប្រព័ន្ធផ្សព្វផ្សាយ ដូចជាក្រុមប្រឹក្សាសារព័ត៌មាន គឺជាឧបករណ៍ដ៏ល្អបំផុតមួយដែលយើងមានដើម្បីការពារសេរីភាពសារព័ត៌មាន ហើយត្រូវប្រាកដថាប្រព័ន្ធផ្សព្វផ្សាយអាចបំពេញភារកិច្ចរបស់ពួកគេបានដោយឯករាជ្យ ដោយគ្មានការភ័យខ្លាច និងមិនមានឧបសគ្គ»។

អ្នកស្រី Elmberger បាននិយាយថា ក្នុងរយៈពេលប៉ុន្មានឆ្នាំចុងក្រោយនេះ អ្នកសារព័ត៌មានបានឈានមុខគេក្នុងការប្រយុទ្ធប្រឆាំងនឹងកូវីដ-១៩ ដោយផ្តល់ឱ្យសាធារណៈជននូវព័ត៌មានសំខាន់ៗស្តីពីការវិវត្តនៃជំងឺរាតត្បាតនេះ។ ប៉ុន្តែ​ការ​ផ្សព្វផ្សាយ​ព័ត៌មាន​មិន​ពិត និង​ពាក្យ​ដែលនាំឱ្យមានការស្អប់ខ្ពើមតាម​អ៊ីនធឺណិត​​ក៏បាន​បំផ្លាញ​ការ​ជឿជាក់​របស់​សាធារណជន​ចំពោះ​ប្រព័ន្ធ​ផ្សព្វផ្សាយផងដែរ។

អ្នកស្រី​បាន​បន្ត​ថា​៖ «​វា​សំខាន់​ណាស់​ដែល​សហគមន៍​ប្រព័ន្ធ​ផ្សព្វផ្សាយ​ប្រឹងប្រែង​រួម​គ្នា​ដើម្បី​លើក​កម្ពស់​ស្តង់ដារ​ក្រមសីលធម៌​ខ្ពស់​បំផុត​របស់​ប្រព័ន្ធ​ផ្សព្វផ្សាយ​»​

លោក ណុប វី នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជា បានយល់ស្របថា គោលដៅនៃក្រុមប្រឹក្សាសារព័ត៌មានគឺកំណត់ និងកែលម្អស្តង់ដារក្រមសីលធម៌ក្នុងវិស័យសារព័ត៌មាន។

លោក ណុប វី បានមានប្រសាសន៍ថា៖ «វាជាពេលវេលាដ៏សមស្របមួយដែលយើងគួរតែបង្កើតក្រុមប្រឹក្សាសារព័ត៌មាន ហើយពួកគាត់អាចបង្កើតក្រមសីលធម៌ស្តង់ដារដែលអាចអនុវត្តបានសម្រាប់អ្នកសារព័ត៌មានទាំងអស់ដែលកំពុងធ្វើការនៅក្នុងប្រទេសកម្ពុជា»។

អ្នកសារព័ត៌មាន និងអ្នកធ្វើការសង្គមស៊ីវិលចូលរួមកិច្ចប្រជុំស្តីពីការបង្កើតក្រុមប្រឹក្សាសារព័ត៌មាននៅកម្ពុជា នៅរាជធានីភ្នំពេញ ថ្ងៃទី១៦ ខែកញ្ញា ឆ្នាំ២០២២។ ខេមបូចា/ព្រីង សំរោង

លោក Mikel Aguirre Idiaquez មន្ត្រីទំនាក់ទំនងនៅអង្គការយូណេស្កូ បាននិយាយថាគោលបំណងនៃក្រុមប្រឹក្សាសារព័ត៌មាន ក៏ដើម្បីឱ្យប្រព័ន្ធផ្សព្វផ្សាយមានទំនួលខុសត្រូវ និងលើកកម្ពស់តម្លាភាពផងដែរ។ លោក​បាន​លើកឡើង​ថា ក្រុមប្រឹក្សា​នេះអាចមានតួនាទី​ធានា​ថា​ប្រព័ន្ធ​ផ្សព្វផ្សាយ​ជា​ច្រើន​ក្នុង​ប្រទេស​មិន​ស្ថិត​នៅ​ក្នុង​ដៃ​នរណាមួយ។

លោកបានបន្តថា៖ «អ៊ីចឹងមិនមានទស្សនៈនិងគំនិតណាមួយផ្តាច់មុខ[នៅក្នុងប្រព័ន្ធផ្សព្វផ្សាយ] ហើយត្រូវប្រាកដថាមានភាពចម្រុះគ្រប់គ្រាន់នៅក្នុងប្រព័ន្ធផ្សព្វផ្សាយ។ នោះហើយជា​មធ្យោបាយ​ផ្សេង​ទៀត​ដើម្បី​ធានា​ថា​មាន​ឯករាជ្យភាព​នៃ​ប្រព័ន្ធ​ផ្សព្វផ្សាយ»

លោក គិន វិបុល អគ្គនាយករងនៃនាយកដ្ឋានព័ត៌មាន និងសោតទស្សន៍ នៃក្រសួងព័ត៌មាន បានចូលរួមសិក្ខាសាលានេះ ប៉ុន្តែបានបដិសេធមិនធ្វើអត្ថាធិប្បាយអំពីលទ្ធភាពនៃការបង្កើតក្រុមប្រឹក្សាសារព័ត៌មានដោយនិយាយថាលោកនឹងរាយការណ៍ត្រឡប់ទៅមន្រ្តីជាន់ខ្ពស់របស់លោកវិញអំពីខ្លឹមសារនៃកិច្ចប្រជុំនេះ។

លោក មាស សោភ័ណ្ឌ អ្នក​នាំ​ពាក្យ​ក្រសួងព័ត៌មាន ​មិន​អាច​ទាក់​ទង​សុំអត្ថាធិប្បាយជុំវិញបញ្ហានេះបាន​ទេ។

លោក វណ្ណ វិចារ អ្នកសារព័ត៌មានឯករាជ្យដែលបានចូលរួមក្នុងព្រឹត្តិការណ៍នេះ បាននិយាយថា លោកគាំទ្រគំនិតរបស់ក្រុមប្រឹក្សាសារព័ត៌មាន ប៉ុន្តែនឹងរង់ចាំមើលថាតើវានឹងដំណើរការដើម្បីផលប្រយោជន៍អ្នកសារព័ត៌មានយ៉ាងដូចម្តេច។

លោក​បានថ្លែង​ថា​៖ «​ស្ថានភាព​បច្ចុប្បន្ន​សម្រាប់​អ្នក​សារព័ត៌មាន យើង​នៅ​តែ​ត្រូវ​បាន​គេ​យាយី ឬ​មាន​ការ​រឹតត្បិត​សេរីភាព​របស់​យើង ប៉ុន្តែ​ប្រសិន​បើ​មាន​ក្រុម​ប្រឹក្សា​សារព័ត៌មាន​ប្រហែល​ជា​អាច​ដោះស្រាយ​បញ្ហា​ទាំង​នោះ​បាន​ល្អ​ជាង»

អ្នក​សារព័ត៌មាន​រូប​នេះ​បន្ថែម​ថា អង្គការ​សេរីភាព​សារព័ត៌មាន​ក៏​គួរ​ពង្រឹង​សមាគម​សារព័ត៌មាន​ដែល​មាន​ស្រាប់ ដើម្បី​គាំទ្រ​អ្នក​សារព័ត៌មាន។

លោកបានបន្ថែមថា៖ «យើងគួរតែពង្រឹងក្លឹបសារព័ត៌មានដែលមានស្រាប់ ដើម្បីជួយអ្នកសារព័ត៌មានឱ្យបានច្រើនតាមដែលអាចធ្វើទៅបាន និងលើកកម្ពស់សេរីភាពសារព័ត៌មានផងដែរ»៕​

ប្រែសម្រួលពីអត្ថបទភាសាអង់គ្លេស៖ Press Freedom Groups, Donors Tout Benefits of a National Press Council

456 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម