លោកនាយករដ្ឋមន្ដ្រី ហ៊ុន សែនបានសម្រេចតាមការស្នើសុំរបស់ម្ចាស់រថយន្ដចង្កូតស្ដាំដែលបានតវ៉ាបិទផ្លូវកាលពីថ្ងៃអង្គារនៅចំណុចរង្វង់មូលកួរស្រូវថាសុំត្រឹមបង់ពន្ធតែសុំមិនកែចង្កូត ប៉ុន្ដែលោកមិនអនុញ្ញាតឱ្យមានការនាំចូលរថយន្ដចង្កូតស្ដាំចាប់ពីថ្ងៃដែលគាត់មានប្រសាសន៍ គឺថ្ងៃទី៦ ខែកក្កដានេះតទៅ។
នៅព្រឹកថ្ងៃទី៦ ខែកក្កដា ឆ្នាំ២០២២នេះ លោកបានលើកឡើងក្នុងពិធីសំណេះសំណាលជាមួយគណៈប្រតិភូកីឡា អាស៊ានប៉ារ៉ាហ្គេម(ASEA PARA GAME)ថា លោកយល់ព្រមតាមសំណូមពរប្រជាពលរដ្ឋ និងអនុញ្ញាតឲ្យរថយន្ដចង្កូតស្ដាំ អាចបង់ពន្ធដោយមិនបាច់កែចង្កូតពីស្ដាំទៅឆ្វេងនោះឡើយ។
លោកបានមានប្រសាសន៍ថា៖ «អនុញ្ញាតឲ្យរថយន្ដចង្កូតស្ដាំ អាចបង់ពន្ធដោយមិនចាំបាច់កែចង្កូតពីស្ដាំទៅឆ្វេងនោះឡើយ»។ លោកបន្តថា៖ «អ្នកមិនបានមកបង់ពន្ធ ត្រូវមកបង់ពន្ធ អ្នកដែលបានកក់ប្រាក់ពន្ធត្រូវទៅបង់បង្រ្គប់ប្រាក់បង់ពន្ធ ដើម្បីទទួលបានស្លាកលេខមកប្រើប្រាស់»។
លោកនាយករដ្ឋមន្ត្រីបានបន្ថែមថា៖ «ត្រឹមថ្ងៃទី៦ខែកក្កដា ២០២២នេះ មិនអនុញ្ញាតដាច់ខាតនូវការនាំចូលបន្ដនូវឡានចង្កូតស្ដាំនេះ ការអនុញ្ញាតខាងលើសម្រាប់តែឡានដែលបានចរាចរនៅក្នុងកម្ពុជារួចហើយប៉ុណ្ណោះ»។
លោក ឡុង សំបូរ អាយុ៣៧ឆ្នាំ ម្ចាស់រថយន្ដចង្កូតស្ដាំម្នាក់ រស់នៅក្នុងឃុំសៀមរាបស្រុកកណ្ដាលស្ទឹង បានរៀបរាប់ថា លោកពិតជាសប្បាយចិត្តនឹងការសម្រេចរបស់លោកនាយករដ្ឋមន្ដ្រី ហ៊ុន សែន ខ្លាំងណាស់ដែលលោកបានយល់ពីសុខទុក្ខរបស់ប្រជាពលរដ្ឋ ហើយការសម្រេចនេះវាបានជួយបញ្ហាជីវភាពលោកបានច្រើន។ លោកបន្តថា លោកនឹងទៅបង់ពន្ធជូនរដ្ឋក្នុងពេលឆាប់ៗ ហើយបើក្រសួងប្រកាសថ្ងៃណាលោកនឹងទៅបង់ភ្លាម។
សំបូរបញ្ជាក់ថា៖ «មិនសប្បាយចិត្តយ៉ាងម៉េចបង បើការសម្រេចនេះវាបានផ្ដល់ផលប្រយោជន៍និងកាត់បន្ថយការចំណាយរបស់ពួកខ្ញុំបានច្រើន ខ្ញុំសុំអរគុណដល់សម្ដេចដែលដឹងសុខទុក្ខកូនចៅ»។
រីឯលោក ផល ប្រុសណុច អាយុ២៤ឆ្នាំ បើកឡានដឹកដីថ្មរឺខ្សាច់នេះរយៈពេល៣ឆ្នាំ រស់នៅភូមិអំពៅព្រៃ ឃុំអំពៅព្រៃ ស្រុកកណ្ដាលស្ទឹង បានប្រាប់ ខេមបូចាថា លោកសូមអរគុណដល់លោកនាយករដ្ឋមន្ត្រីដែលបានអនុគ្រោះនិងដឹងពីការលំបាករបស់ប្រជាពលរដ្ឋ។ លោកបន្តថា ក្រសួងប្រកាសឲ្យបង់ពន្ធពេលណាលោកនឹងទៅបង់ពន្ធពេលហ្នឹង ប៉ុន្ដែលោកសុំឱ្យក្រសួងមេត្ដាទុករយៈពេលក្នុងការបង់ពន្ធយូរបន្ដិច ដោយសារតែត្រូវដើររកលុយឬក៏ខ្ចីគេដើម្បីមកបង់ពីព្រោះពេលនេះលោកមិនទាន់មានលុយគ្រប់គ្រាន់ក្នុងការបង់ពន្ធទេ។
លោកបន្ថែមថា៖ «ខ្ញុំរកលុយសិនប៉ុន្ដែខ្ញុំនឹងបង់ គ្រាន់តែសុំខាងក្រសួងទុកពេលឱ្យខ្ញុំបន្ដិចសិន ពីព្រោះខ្ញុំគ្មានលុយទេដោយសារបញ្ហាកូវីដនិងប្រេងឡើងថ្លៃ ខ្ញុំរកលុយអត់បានទេ សុំក្រសួងយោគយល់ផងចុះ»។
មិនខុសពីម្ចាស់រថយន្តចង្កូតស្តាំមុនៗនោះទេ លោក ឌឿន បណ្ឌិត អាយុ២៧ឆ្នាំ រស់នៅក្នុងឃុំព្រែកស្លែង ស្រុកកណ្ដាលស្ទឹង បានលើកឡើងថា លោកត្រេកអរណាស់ពេលលឺដំណឹងថាឱ្យត្រឹមតែបង់ពន្ធនិងមិនបាច់កែចង្កូត ពីព្រោះជីវភាបលោកកំពុងតែខ្វះខាតផង ហើយវាជួយជីវភាពលោកបានច្រើន។
លោកបានឱ្យដឹងថា៖ «ពេលគាត់(នាយករដ្ឋមន្ដ្រី)មិនឲ្យកែចឹង យើងវាធូរក្នុងការកែ ហើយយើងវាអត់ភ័យខ្លាចថាខូចឡានខូចអី យើងបានដឹកឡានស្ដង់ដាមកពីស្រុកគេម៉េច គឺយើងបានបើកចឹងបង។ បើយើងចំណាយកែផង បង់ពន្ធផង វាចំណាយច្រើន»។
បើតាមលោក គង់ វិមាន អនុរដ្ឋលេខាអិការនៃក្រសួងសាធារណការនិងដឹកជញ្ជូន បានមានប្រសាសន៍ថា ក្រោយពីនាយករដ្ឋមន្ត្រីប្រកាសកាលពីព្រឹកមិញនេះ ក្រសួងនឹងរៀបចំអនុវត្ដន៍ជូនបងប្អូនប្រជាពលរដ្ឋដែលជាម្ចាស់រថយន្ដចង្កូតស្ដាំទាំងអស់អាចទៅបង់ពន្ធនៅពន្ធដារ រួចប្រមូលឯកសារទាំងអស់មកស្នើសុំធ្វើស្លាកលេខនៅមន្ទីរឬក៏ក្រសូងសាធារណការ ដើម្បីបានស្លាកលេខយកទៅប្រើប្រាស់។ បើពួកគាត់បានបង់ពន្ធហើយ ប៉ុន្តែមិនមកស្នើសុំស្លាកលេខពីមន្ទីរឬក៏ក្រសួងទេ គឺមិនអនុញ្ញាតឲ្យធ្វើចរាចរលើដងផ្លូវនោះទេ បើហ៊ានតែបើកគឺគយនឹងចាប់។
លោក វិមាន បន្តថា ការផ្ដល់ស្លាកលេខនិងបង់ពន្ធមិនមានរយៈពេលកំណត់ទេតាមជាក់ស្ដែង។ លោកសង្ឃឹមថា ម្ចាស់រថយន្ដទាំងអស់នឹងចូលរួមសហការឱ្យបានល្អ។
លោកបញ្ចាក់ថា៖ «វាជាការអនុគ្រោះដ៏ធំធេងណាស់របស់សម្ដេច ហ៊ុន សែន ហើយយើងខ្ញុំរង់ចាំបំពេញកាតព្វកិច្ចជូនបងប្អូនប្រជាពលរដ្ឋដែលយកឯកសារមកគ្រប់គ្រាន់»។
លោក វ៉ន ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ បានថ្លែងថា លោកពិតជាសប្បាយចិត្តនិងអបអរសាទរចំពោះការសម្រេចរបស់លោកនាយករដ្ឋមន្ដ្រី ហ៊ុន សែន ដែលបានសម្រេចតាមការស្នើសុំរបស់ប្រជាពលរដ្ឋនិងបានយល់ពីទុក្ខលំបាករបស់ពួកគាត់។
លោកមានប្រសាសន៍ថា៖ «ខ្ញុំសប្បាយហើយដែលសម្ដេចលោកបានសម្រេចតាមសំណើររបស់ប្រជាពលរដ្ឋ ប៉ុន្ដែសម្ដេចក៏គួរគិតគូររឿងប្រេងសាំងឡើងថ្លៃនិងដោះស្រាយដូចករណីនេះផងចុះ ហើយក្នុងនាមជាអង្គការសង្គមស៊ីវិលយើងអបអរសាទរចំពោះការដោះស្រាយនេះ»។
កាលពីព្រឹកថ្ងៃអង្គារម្ចាស់រថយន្ដចង្កូតស្ដាំប្រមាណ៣០០នាក់បាននាំគ្នាបិទផ្លូវជាតិលេខ២ត្រង់ចំណុចរង្វង់មូលកួរស្រូវ ដើម្បីស្នើសុំលោកនាយករដ្ឋមន្ដ្រី ហ៊ុន សែន ត្រឹមបង់ពន្ធតែសុំមិនកែចង្កូតដោយសារតែវាអាចបង្កគ្រោះថ្នាក់ពេលធ្វើចរាចរណ៍លើដងផ្លូវ។
