ចំនួនអ្នកជាប់ឃុំនៅតាមពន្ធនាគារទូទាំងប្រទេសកម្ពុជាបានកើនឡើងដល់កម្រិតមួយដែល «គួរឱ្យព្រួយបារម្ភ» ដោយសារការអនុវត្តច្បាប់កាន់តែតឹងរ៉ឹងលើបទល្មើសពាក់ព័ន្ធនឹងគ្រឿងញៀន ការឆបោកតាមអនឡាញ ក្រុមក្មេងទំនើង និងបទល្មើសផ្សេងៗទៀតដែលនាំឱ្យមានការកកស្ទះក្នុងពន្ធនាគារ។ មន្ត្រីជាន់ខ្ពស់នៃអគ្គនាយកដ្ឋានពន្ធនាគារបានលើកឡើងថា ស្ថានភាពនេះអាចបង្កឱ្យមានភាពតានតឹងផ្លូវចិត្ត និងក្តីបារម្ភផ្នែកសន្តិសុខ។
លោក ឈន សាណាត អគ្គនាយកនៃអគ្គនាយកដ្ឋានពន្ធនាគារ ក្រសួងមហាផ្ទៃ បានថ្លែងកាលពីថ្ងៃទី៤ ខែកក្កដា ថា នៅកម្ពុជា មន្ត្រីអនុរក្សពន្ធនាគារម្នាក់ត្រូវទទួលបន្ទុកមើលអ្នកជាប់ឃុំចន្លោះពី២០ទៅ២៥នាក់ ខណៈនៅប្រទេសកូរ៉េខាងត្បូង មន្ត្រីម្នាក់ទទួលខុសត្រូវលើអ្នកជាប់ឃុំត្រឹមតែ៣នាក់ប៉ុណ្ណោះ។
លោក សាណាត បានឱ្យដឹងថា ចំនួនអ្នកជាប់ឃុំបានកើនឡើងជាបន្តបន្ទាប់ក្នុងរយៈពេលប៉ុន្មានខែកន្លងមកនេះ ដោយគិតត្រឹមថ្ងៃទី៣០ ខែមិថុនា ឆ្នាំ២០២៦ មានអ្នកជាប់ឃុំសរុបចំនួន ៦៧ ៦៧៧ នាក់ ក្នុងនោះមានស្ត្រីចំនួន ៤ ៥៣០ នាក់ អនីតិជនចំនួន ៣ ០៤៧ នាក់ និងជនបរទេសចំនួន ៧ ៤៣៤ នាក់។ ចំណោមអ្នកជាប់ឃុំនោះមាន ៥១ភាគរយ ជាប់ពាក់ព័ន្ធនឹងបទល្មើសគ្រឿងញៀន ខណៈ ២ ៥៥៤នាក់ ត្រូវបានឃុំខ្លួនក្នុងសំណុំរឿងឆបោកតាមអនឡាញ និង ៣ ០១០ នាក់ ពាក់ព័ន្ធនឹងករណីក្មេងទំនើង។
លោក សាណាត មានប្រសាសន៍ថា៖ «ក្នុងរយៈពេលត្រឹម៦ខែកន្លងមកនេះ ចំនួនអ្នកជាប់ឃុំបានកើនឡើងជិត ៥ ០០០ នាក់»។ លោកបន្ថែមថា៖ «នៅចុងឆ្នាំ២០២៨ ចំនួនអ្នកជាប់ឃុំសរុបអាចនឹងកើនឡើងដល់ប្រមាណ ៨៥ ០០០ នាក់»។
លោកបានបន្តថា ការកកស្ទះនៅក្នុងពន្ធនាគារបានធ្វើឱ្យពិបាកក្នុងការបែងចែកអ្នកជាប់ឃុំទៅតាមប្រភេទបទល្មើស កម្រិតហានិភ័យផ្នែកសន្តិសុខ និងស្ថានភាពសុខភាព ស្របតាមស្តង់ដារច្បាប់ ហើយថែមទាំងបង្កើនហានិភ័យសន្តិសុខនៅក្នុងពន្ធនាគារទៀតផង។
ស្ថានភាពនេះក៏បានធ្វើឱ្យមន្ត្រីអនុរក្សពន្ធនាគារម្នាក់ត្រូវទទួលបន្ទុកមើលអ្នកជាប់ឃុំពី២០ទៅ២៥ នាក់ ដែល «លើសឆ្ងាយពីចំនួនដែលត្រូវបានណែនាំគឺពី៦ទៅ១០នាក់»។ ជាមួយគ្នានេះ អ្នកជាប់ឃុំម្នាក់ៗមាន «ទំហំកន្លែងរស់នៅត្រឹមតែ១.០៥ម៉ែត្រការ៉េប៉ុណ្ណោះ» ខណៈស្តង់ដារអប្បបរមារបស់អង្គការសហប្រជាជាតិ កំណត់ថា គួរមានទំហំយ៉ាងហោចណាស់៣.៤ម៉ែត្រការ៉េសម្រាប់អ្នកជាប់ឃុំម្នាក់។
លោក សាណាត បានថ្លែងថា៖ «ការដាក់អ្នកជាប់ឃុំជាច្រើននាក់ក្នុងបន្ទប់ឃុំតែមួយ បានបង្កឱ្យមានសម្ពាធផ្លូវអារម្មណ៍ និងផ្លូវចិត្ត»។ លោកបន្ថែមថា អ្នកជាប់ឃុំមួយចំនួនបានបង្ហាញគំនិតចង់ធ្វើអត្តឃាត ប៉ុនប៉ងរត់គេចពីពន្ធនាគារ ឬមានគំនិតបះបោរនៅក្នុងពន្ធនាគារ។
លោក អំ សំអាត នាយកប្រតិបត្តិនៃអង្គការការពារសិទ្ធិមនុស្ស លីកាដូ បានលើកឡើងថា ការពង្រីកអគារពន្ធនាគារបន្ថែមតែមួយមុខ មិនអាចដោះស្រាយបញ្ហាកកស្ទះរ៉ាំរ៉ៃនៅក្នុងពន្ធនាគារបានឡើយ។
ផ្ទុយទៅវិញ លោកថា អាជ្ញាធរគួរពង្រឹងវិធានការទប់ស្កាត់បទល្មើសពាក់ព័ន្ធនឹងគ្រឿងញៀន ខណៈតុលាការគួរកាត់បន្ថយការបញ្ជូនជនសង្ស័យទៅឃុំខ្លួនបណ្តោះអាសន្ន ពង្រីកការផ្តន្ទាទោសដោយការបម្រើការងារសហគមន៍ និងបង្កើនការដោះលែងដោយមានលក្ខខណ្ឌសម្រាប់អ្នកជាប់ឃុំដែលមានលក្ខណៈសម្បត្តិគ្រប់គ្រាន់។
លោក សំអាត ក៏បានផ្ដល់អនុសាសន៍ឱ្យដោះលែងសកម្មជនដែលត្រូវបានឃុំខ្លួន ដោយសារការអនុវត្តសិទ្ធិ និងសេរីភាពដែលត្រូវបានធានាដោយរដ្ឋធម្មនុញ្ញផងដែរ។
លោកបានថ្លែងថា៖ «យើងបន្តមើលឃើញថា ការឃុំខ្លួនបណ្តោះអាសន្ននៅតែត្រូវបានអនុវត្តជាទូទៅ ដែលជាកត្តារួមចំណែកយ៉ាងសំខាន់ដល់ការកកស្ទះនៅក្នុងពន្ធនាគារ»។ លោកបន្ថែមថា៖ «តុលាការគួរវាយតម្លៃដោយប្រុងប្រយ័ត្នថា តើជនជាប់ចោទអាចស្ថិតនៅក្រៅពន្ធនាគារ ក្រោមការត្រួតពិនិត្យរបស់តុលាការ បានដែរឬទេ»។
អ្នកនាំពាក្យក្រសួងមហាផ្ទៃ លោក ទូច សុខៈ មិនទាន់បានឆ្លើយតបនឹងសំណើសុំអត្ថាធិប្បាយរបស់ខេមបូចានៅឡើយទេ គិតត្រឹមពេលចុះផ្សាយអត្ថបទនេះ៕
