មន្ទីរសុខាភិបាលខេត្តតាកែវ និងអាជ្ញាធរពាក់ព័ន្ធ បានចុះពិនិត្យគ្លីនិកឯកជនក្នុងខេត្តតាកែវ បន្ទាប់ពីគ្លីនិកមួយបានចាក់ថ្នាំខុសបច្ចេកទេស បណ្តាលឱ្យស្ត្រីម្នាក់ស្លាប់កាលពីខែវិច្ឆិកា។ ក្រុមគ្រួសារជនរងគ្រោះឈ្មោះ ណាំ ចន្ធូ បានជំរុញឱ្យមន្ត្រីសុខាភិបាលអនុវត្តច្បាប់ឱ្យបានម៉ឺងម៉ាត់ និងអនុវត្តការងារប្រកបដោយវិជ្ជាជីវៈ ព្រោះមិនចង់ឃើញជនរងគ្រោះផេ្សងទៀតស្លាប់ដោយសារគ្លីនិកខុសច្បាប់។
យោងតាមរដ្ឋបាលក្រុងដូនកែវ គណៈបញ្ជាការឯកភាពបានបើកការចុះត្រួតពិនិត្យលុបបំបាត់សេវាសុខាភិបាលឯកជនខុសច្បាប់ក្នុងក្រុងដូនកែវ កាលពីថ្ងៃទី២២ ខែវិច្ឆិកា។
ពួកគេបានពិនិត្យមន្ទីរពេទ្យធំចំនួន១២ និងមន្ទីរពេទ្យសម្ភពនៅដូនកែវ។ ក្នុងចំណោមនោះ អាជ្ញាធរបានរកឃើញគ្លីនិកចំនួន៥ ដែលគ្មានការអនុញ្ញាតត្រឹមត្រូវពីក្រសួងសុខាភិបាល។ ម្ចាស់ទីតាំងទាំងប្រាំបានចុះកិច្ចសន្យាបិទទ្វារទាំងស្រុង។
ពាក់ព័ន្ធនឹងការចុះពិនិត្យនេះ ប្រធានមន្ទីរសុខាភិបាលខេត្តតាកែវ លោក ផាន់ វ៉ាន់ មានប្រសាសន៍ថា បន្ទាប់ពីស្ត្រីអាយុ៤១ឆ្នាំបានស្លាប់ដោយសារ «កំហុសបច្ចេកទេស» ពេលចាក់ថ្នាំនោះ អភិបាលខេត្តតាកែវ បានបង្កើតគណៈកម្មការមួយ ដើម្បីត្រួតពិនិត្យក្របខណ្ឌបច្ចេកទេស និងវិជ្ជាជីវៈនៃការថែទាំសុខភាពទូទាំងតំបន់ និងខេត្តក្រុង។
លោក វ៉ាន់ ថា មិនទាន់មានរបាយការណ៍លម្អិតនៅឡើយទេ ព្រោះការត្រួតពិនិត្យកំពុងដំណើរការ ប៉ុន្តែនឹងជូនដំណឹងដល់ សារព័ត៌មានខេមបូចា នៅពេលក្រោយពីបញ្ចប់។
សារព័ត៌មានខេមបូចា បានព្យាយាមទាក់ទងអ្នកនាំពាក្យក្រសួងសុខាភិបាល លោក លី សុវណ្ណ និងអភិបាលក្រុងដូនកែវ លោក កង អាណាន់ ដើម្បីសុំការអត្ថាធិប្បាយ ប៉ុន្តែអ្នកទាំងពីរមិនបានឆ្លើយតប។
កាលពីថ្ងៃទី២០ ខែវិច្ឆិកា ឆ្នាំ២០២៤ ក្រសួងបានចេញសេចក្តីប្រកាសស្តីពីការពង្រឹងបទប្បញ្ញត្តិនៃសេវាសុខាភិបាលឯកជន និងអ្នកជំនាញសុខាភិបាលនៅតាមគ្រឹះស្ថានសុខាភិបាលឯកជន និងលុបបំបាត់គ្រឹះស្ថានសុខាភិបាលឯកជនខុសច្បាប់ក្នុងរាជធានី-ខេត្ត។
ក្រសួងបានជំរុញឱ្យម្ចាស់គ្លីនិកក្នុងខេត្ត-ក្រុង ត្រូវចុះពិនិត្យសុខភាពឯកជនទាំងអស់ជាបន្ទាន់ និងទៀងទាត់ ដើម្បីឱ្យមានជំនាញវិជ្ជាជីវៈ និងបច្ចេកទេសក្នុងការព្យាបាលអ្នកជំងឺ។ ទីតាំងដែលគ្មានការអនុញ្ញាតនឹងត្រូវបិទ ដើម្បីធានាសុវត្ថិភាពប្រជាពលរដ្ឋ។
មន្ទីរសុខាភិបាលតាមខេត្តត្រូវបញ្ជូនរបាយការណ៍ធ្វើបច្ចុប្បន្នភាពអំពីការចុះពិនិត្យគ្រឹះស្ថានសុខាភិបាលឯកជនរបស់ខ្លួនទៅក្រសួងត្រឹមថ្ងៃទី៣០ ខែធ្នូ ឆ្នាំ២០២៤ ហើយត្រូវដាក់របាយការណ៍រៀងរាល់ត្រីមាស។
ជាមួយគ្នានេះ អ្នកនាំពាក្យសាលាដំបូងខេត្តតាកែវ លោក ង៉ែត សាវុធ មានប្រសាសន៍ថា ម្ចាស់គ្លីនិកឯកជនពីរនាក់ប្តីប្រពន្ធ ត្រូវបានបញ្ជូនទៅតុលាការ ហើយតុលាការបានសម្រេចឃុំខ្លួន។
យោងតាមសេចក្តីថ្លែងការណ៍របស់តុលាការ ស្ត្រីឈ្មោះ ស៊ុន ហាក់ ម៉ារីណា ត្រូវបានចោទប្រកាន់ពីបទមនុស្សឃាតដោយអចេតនា ហើយប្តីរបស់គាត់ឈ្មោះ ហៀង សុងហាក់ ត្រូវបានចោទប្រកាន់ពីបទប្រកបវិជ្ជាជីវៈសុខាភិបាលដោយគ្មានអាជ្ញាបណ្ណប្រកបវិជ្ជាជីវៈសុខាភិបាល គប់គិតលាក់បាំងសាកសព និងសមគំនិតធ្វើទារុណកម្ម និងអំពើឃោរឃៅធ្ងន់ធ្ងរលើជនរងគ្រោះ។
លោក សៅ ផាន ប្តីរបស់អ្នកស្រី ចន្ធូ បាននិយាយថា លោកមានការសោកស្ដាយយ៉ាងខ្លាំងចំពោះការបាត់បង់ភរិយា។
លោក ផាន បានគាំទ្រចំពោះការចុះពិនិត្យគ្លីនិកឯកជនក្នុងខេត្តតាកែវ ប៉ុន្តែលោកចង់ឲ្យមានការត្រួតពិនិត្យនេះធ្វើឡើងនៅទូទាំងប្រទេស។ លោកក៏បានជំរុញឱ្យក្រសួង មន្ទីរនានា ជាពិសេសមន្ត្រីពាក់ព័ន្ធ ត្រូវត្រួតពិនិត្យ និងត្រួតពិនិត្យគ្លីនិកទាំងអស់ឱ្យបានហ្មត់ចត់ ដើម្បីធានាថាមានអាជ្ញាបណ្ណត្រឹមត្រូវ និងមានលក្ខណៈសម្បត្តិត្រឹមត្រូវ។
លោក ផាន បាននិយាយថា៖ «ខ្ញុំមិនចង់ឃើញអ្វីដែលបានកើតឡើងចំពោះគ្រួសាររបស់ខ្ញុំកើតឡើងម្តងទៀតទេ ហើយខ្ញុំសុំឱ្យក្រសួងពាក់ព័ន្ធ [អនុវត្ត] លើមន្ទីរពេទ្យដែលខុសច្បាប់ ព្រោះប្រជាជនមិនដឹងថាគ្លីនិកណាស្របច្បាប់ទេ»។
លោកបន្តថា៖ «នៅពេលដែលមនុស្សឃើញផ្ទាំងបដាធំៗនៅលើគ្លីនិក ពួកគេគិតថាគ្លីនិកទាំងនោះល្អ និងមានគ្រូពេទ្យជំនាញ។ ប៉ុន្តែនៅពេលដែលគ្លីនិកមិនមានច្បាប់ និងមានលក្ខណៈគ្រប់គ្រាន់ ហើយមិនមានបច្ចេកវិទ្យាគ្រប់គ្រាន់ [ហេតុអ្វីបានជាពួកគេដំណើរការ] ឬពួកគេចេះតែសម្រេចចិត្តបើករហូតដល់មានបញ្ហា ហើយត្រូវបានត្រួតពិនិត្យ»។
បន្ថែមពីលើការចង់ឃើញគុណភាពគ្លីនិកឯកជននៅតាមជនបទមានភាពប្រសើរឡើង រួមទាំងវិជ្ជាជីវៈ និងច្បាប់ លោក ផាន ក៏ចង់បានយុត្តិធម៌សម្រាប់គ្រួសាររបស់គាត់ដែរ ដោយសារគាត់មិនទាន់ទទួលបានសំណងពីអ្នកប្រព្រឹត្តខុសមកទល់ពេលនេះ។ លោកសង្ឃឹមថា ប្ដីប្រពន្ធទាំងពីរនឹងត្រូវទទួលទោសតាមច្បាប់។
លោកបន្ថែមថា៖ «ខ្ញុំសុំឲ្យផ្នែកច្បាប់ជួយរកយុត្តិធម៌ឲ្យគ្រួសារខ្ញុំផង ព្រោះខ្ញុំមិនដឹងទៅណាទេ។ វាស្ងប់ស្ងាត់ណាស់ យើងមានអារម្មណ៍មិនសប្បាយចិត្ត។ យើងចង់បានសំណង និងយុត្តិធម៌»។
លោក ជា ចា ត្រូវជាបងប្អូនរបស់ជនរងគ្រោះ បានប្រាប់ សារព័ត៌មានខេមបូចា ថា គាត់មានការខកចិត្ត និងសោកស្ដាយជាខ្លាំងចំពោះមរណភាពរបស់ប្អូនស្រីរបស់គាត់។
លោកសង្ឃឹមថា ក្រសួងសុខាភិបាលនឹងចាត់វិធានការជាក់លាក់ ដើម្បីរឹតបន្តឹងការត្រួតពិនិត្យគ្លីនិក និងអាជ្ញាបណ្ណនៅទូទាំងប្រទេស ដើម្បីឲ្យប្រជាពលរដ្ឋជឿជាក់លើការព្យាបាលវេជ្ជសាស្ត្រ។
លោក ចា លើកឡើងថា៖ «ខ្ញុំស្នើឱ្យមន្ទីរសុខាភិបាលកែទម្រង់ ឬចាត់វិធានការទប់ស្កាត់កុំឱ្យមានករណីនេះកើតឡើងម្តងទៀត។ បើមិនមានច្បាប់ប្រឆាំងនឹងវាទេ។ ច្បាប់មិនទាន់ត្រូវបានអនុវត្តនៅឡើយទេ»។
លោក អ៊ូច វុទ្ធី ប្រធានសមាគមគ្រូពេទ្យគុណធម៌ បានប្រាប់ សារព័ត៌មានខេមបូចា ថា ការស្លាប់របស់អ្នកជំងឺ គឺជាការបំពានលើក្រមសីលធម៌វិជ្ជាជីវៈពេទ្យ។
លោកថា ករណីនេះអាចពាក់ព័ន្ធនឹងអំពើពុករលួយជាប្រព័ន្ធតាំងពីថ្នាក់មូលដ្ឋានរហូតដល់ថ្នាក់ស្រុក និងខេត្ត ហើយត្រូវមានការស៊ើបអង្កេតជាប្រព័ន្ធ ដើម្បីដាក់ទោសម្ចាស់គ្លីនិក និងមន្ត្រីពាក់ព័ន្ធដែលអនុញ្ញាតឱ្យដំណើរការគ្លីនិកគ្មានច្បាប់អនុញ្ញាត ដែលបណ្តាលឲ្យមានមនុស្សស្លាប់។
លោក វុទ្ធី ថ្លែងថា៖ «មន្ទីសុខាភិបាលខេត្តតាកែវ បានលើកឡើងថា មន្ទីសម្រាកព្យាបាលមួយនឺងអត់មានច្បាប់បើកទេ។ ចឹងហេតុអ្វីបានជាគេហ៊ានដាក់ស្លាកសញ្ញាមន្ទីសម្រាកព្យាបាល? វាមិនមែនជារឿងតូចតាចទេ ចឹងទេវាពាក់ពន្ធ័ទៅនឹងប្រធានប្រតិបត្តិការស្រុក»។ ក្រសួង និងភាគីពាក់ព័ន្ធត្រូវចាត់វិធានការចំពោះមន្ត្រីថ្នាក់ក្រោមដែលអនុញ្ញាតឲ្យគ្លីនិកនេះដំណើរការដោយគ្មានការអនុញ្ញាត។
លោកជឿជាក់ថា ប្រសិនបើករណីបែបនេះនាំឱ្យបាត់បង់ជីវិតបន្ត នោះការជឿទុកចិត្តរបស់សាធារណជនលើវិស័យវេជ្ជសាស្ត្រនឹងធ្លាក់ចុះយ៉ាងខ្លាំង។
លោកបានជំរុញឲ្យអ្នកដែលមានវិជ្ជាជីវៈត្រូវប្រកាន់ខ្ជាប់យ៉ាងតឹងរ៉ឹងទៅនឹងច្បាប់ និងស្តង់ដារសីលធម៌ ហើយធានាថាគ្រូពេទ្យត្រូវបំពេញវិជ្ជាជីវៈកម្រិតខ្ពស់បំផុត។
លោក សន ជ័យ ប្រធានសម្ព័ន្ធគណនេយ្យភាពសង្គមកម្ពុជា បានប្រាប់ សារព័ត៌មានខេមបូចា ថា ករណីនេះទាមទារឱ្យមានការស៊ើបអង្កេតឱ្យបានហ្មត់ចត់បន្ថែមទៀត ជាពិសេសគ្លីនិកដែលគ្មានអាជ្ញាបណ្ណនៅតែបន្តដំណើរការ។
លោកបញ្ជាក់ថា បញ្ហានេះមិនត្រឹមតែនៅជាប់ខេត្តតាកែវប៉ុណ្ណោះទេ ប៉ុន្តែបញ្ហាត្រូវដោះស្រាយទូទាំងប្រទេស ដោយសារភាពមានសេវាសុខាភិបាល និងតម្រូវការការពារអាយុជីវិតប្រជាពលរដ្ឋ។
លោក សន ជ័យ មានប្រសាសន៍ថា៖ «ប្រសិនជារកឃើញមន្ទីសម្រាកព្យាបាល ឬគ្លីនិកឯកជនណាមួយ ត្រូវបានគេរកឃើញថាដំណើរការដោយខុសច្បាប់ ត្រូវតែមានការស៊ើបអង្កេតស៊ីជម្រៅ ថាតើកើតឡើងនៅស្រុកណា? មូលហេតុអីដែលនៅពីក្រោយដែលមានការបង្កើតគ្លីនិកឯកជនដោយខុសច្បាប់ ប្រសិនជារកឃើញពីការរំលោភអំណាច ឬអំពើពុករលួយ»៕
