សមាគមសម្ព័ន្ធអ្នកសារព័ត៌មានកម្ពុជា

ការផ្លាស់ប្តូររថយន្តដឹកកម្មករនៃវិស័យកាត់ដេរអាចដំណើរការលឿន លុះត្រារដ្ឋាភិបាលផ្តល់កម្ចីការប្រាក់ទាបដល់ម្ចាស់រថយន្ត

កម្មកររោងចក្រកាត់ដេរឡើងជិះរថយន្តដើម្បីត្រឡប់ទៅផ្ទះ បន្ទាប់ពីបញ្ចប់ការងារពេលល្ងាច នៅជាយរាជធានីភ្នំពេញ។ រូបថតកាលពីថ្ងៃទី២២ ខែធ្នូ ឆ្នាំ២០២២។ ខេមបូចា/ ព្រីង សំរាំង
កម្មកររោងចក្រកាត់ដេរឡើងជិះរថយន្តដើម្បីត្រឡប់ទៅផ្ទះ បន្ទាប់ពីបញ្ចប់ការងារពេលល្ងាច នៅជាយរាជធានីភ្នំពេញ។ រូបថតកាលពីថ្ងៃទី២២ ខែធ្នូ ឆ្នាំ២០២២។ ខេមបូចា/ ព្រីង សំរាំង

ការផ្លាស់ប្ដូររថយន្តដឹកកម្មករក្នុងវិស័យកាត់ដេរអាចជោគជ័យទៅបាន ទាល់តែមានការ​ចូល​រួមពីតួអង្គសំខាន់ៗពិសេសគឺរដ្ឋាភិបាលក្នុងការបញ្ចេញកញ្ចប់ថវិកា​ដែលអាចផ្ដល់​លទ្ធភាព​ដល់អ្នកបើកបរអាចខ្ចីទិញរថយន្តក្នុងការប្រាក់មួយសមរម្យ ដើម្បីជួយកាត់បន្ថយគ្រោះថ្នាក់ចរាចរណ៍លើកម្មករកាត់ដេរ។ នេះបើយោងតាមក្រុមអ្នកស្រាវជ្រាវបានលើកឡើង។

លោក ច័ន្ទ សុផល នាយក​នៃមជ្ឈមណ្ឌល​សិក្សាគោលនយោបាយ បានលើក​ឡើងថា អ្នកបើកបរមួយចំនួនពួកគេមានឡានផ្ទាល់ខ្លួន មិនមែនធ្វើការឱ្យក្រុមហ៊ុន​ដូច្នេះមាន​ការពិបាកក្នុងការដូរឡានបន្តិច ព្រោះត្រូវខ្ចីលុយធនាគារក្នុងអត្រាការប្រាក់ខ្ពស់​ដើម្បីទិញ​ឡានថ្មី ដែលពួកគេមិនអាចមានលទ្ធភាពក្នុងការដូរទេ ព្រោះឡានមានតម្លៃថ្លៃ។

 លោកសុផល មានប្រសាសន៍ថា៖ «អ្នកបើកបរដែលជ្រើសឡានដឹកទំនិញមកកែច្នៃដឹកកម្មករ​ គឺដោយសារតែ​ដឹក​មនុស្សបានច្រើនពី៦០​ទៅ៨០នាក់ជាដើម ហើយពួកគាត់ចំនួន៩០%បានខ្ចីលុយគេពី​៩ពាន់​ទៅ១ម៉ឺន៤ពាន់ដុល្លារដើម្បីទិញឡាននោះ ក្នុងការប្រាក់១៦%ក្នុងមួយឆ្នាំ»។

លោកលម្អិតថា បើមានការប្រាក់ត្រឹមតែ៥,៥%ក្នុងមួយឆ្នាំ ជាជាង១៦%ក្នុងមួយឆ្នាំ ដូចដែល​រដ្ឋាភិបាលបានលើកទឹកចិត្តដល់កសិករ អ្នកចិញ្ចឹមសត្វ សហគ្រាសធុនតូច កាលគ្រាកន្លង​មក លោកយល់ថាវាជារឿងដ៏ល្អមួយសម្រាប់ជាពន្លឺដល់ម្ចាស់រថយន្តដឹកកម្មករ។

លោកសុផលឲ្យដឹងថា៖«កន្លងមករដ្ឋាភិបាលបានផ្ដល់ជាកញ្ចប់ថវិកាឱ្យធនាគារអភិវឌ្ឍន៍​ជនបទ និងកសិកម្ម៥០លានដុល្លារឃើញថាជោគជ័យ អ៊ីចឹងក្នុងវិស័យដឹកជញ្ជូន​អ្នកកាត់ដេរ​នេះ បើរដ្ឋាភិបាលមានឆន្ទៈសម្រាប់វិស័យដឹកជញ្ជូនកម្មករដូចកសិករដាំបន្លែ ការផ្លាស់ប្ដូរនេះនឹងអាចទៅរួច ព្រោះកន្លងមករដ្ឋាភិបាលធ្វើទៅរួចហើយ»។

លោករំពឹងថា ប្រសិនបើរដ្ឋាភិបាលផ្ដល់ប្រាក់កម្ចីឱ្យក្រុមអ្នកបើកបរក្នុងវិស័យកាត់ដេរពិតមែន ការប្រាក់របស់ពួកគេនឹងថយចុះហើយអាចសល់ថវិកា។ ហើយកាន់តែប្រសើរទៀតប្រសិន​បើ​មានកម្មករយល់ព្រមថែមថ្លៃធ្វើដំណើរបន្ថែម២ដុល្លារទៀត ដូច្នេះការប្ដូររថយន្តនេះគឺអាច​ទៅ​រួច​។

លោកនាក់ ហេង ប្រធានសមាគមដឹកជញ្ជូន និងការងារក្រៅប្រព័ន្ធ លោកបានយល់ស្របនឹង​ការលើកឡើងរបស់​លោក ច័ន្ទ សុផល។

លោកហេងលើកឡើងថា៖ «អ្នកបើកបរសព្វថ្ងៃ អ្វីដែលពួកគេទាល់ហើយមានការផ្លាស់ប្ដូរ​យឺតនោះគឺ ដោយសារតែបញ្ហាថវិកា ព្រោះប្រសិនបើមានកញ្ចប់ថវិកាណាមួយពី​រដ្ឋាភិបាល ពីអង្គការដៃគូ​ ឬអ្នកវិនិយោគណាមួយដែលមានកម្ចីទាបគឺជាការល្អ»។

ប្រធានសមាគមរូបនេះបន្តថា បញ្ហាមួយទៀត គឺត្រង់ថាបើការដឹកជញ្ជូនកម្មករមិនមានការ​ឡើង​ថ្លៃទេ ការកែប្រែរថយន្តនៅតែយឺតដដែល ព្រោះអ្នកបើកបរក៏ត្រូវការប្រាក់បន្ថែម​សម្រាប់​ការ​ទិញរថយន្ត ចំណាយថ្លៃប្រេងសាំង គ្រឿងបន្លាស់ ការបង់ពន្ធផ្លូវជាដើម។

បើតាមការសិក្សាស្រាវជ្រាវរបស់មជ្ឈមណ្ឌល​សិក្សាគោលនយោបាយ បានឱ្យដឹងថា ប្រសិន​ជា​រដ្ឋាភិបាលចាត់វិធានការតឹងរឹងលើអ្នកបើកបរឡានទ្រុង ពួកគេប្រមាណ៤៥%​នឹងផ្លាស់ប្ដូរ​ឡាន ប៉ុន្តែអ្នកបើកបរចំនួន២៧%ទៀតថាពួកគេនឹងឈប់ប្រកបរបរនេះ ខណៈអ្នកបើកបរ​ចំនួន២៤%ទៀតបានផ្លាស់ប្ដូរឡានទ្រុងមកជាឡានក្រុងរួចហើយ។

កម្មកររោងចក្រកាត់ដេរអង្គុយក្នុងរថយន្តដែលបើកបរចេញពីរោងចក្រមួយ បន្ទាប់ពី​បញ្ចប់ការងារពេលល្ងាច នៅជាយរាជធានីភ្នំពេញ។ រូបថតកាលពីថ្ងៃទី២២​ ខែធ្នូ ឆ្នាំ២០២២។ ខេមបូចា/ ព្រីង សំរាំង

លោក យង់ សេរី ជាប្រធានគ្រប់គ្រងអ្នកបើកបរឡានដឹកម្មកររោងចក្រ បានគាំទ្រប្រសិនបើ​មានការផ្ដល់កម្ចីឱ្យទិញឡានថ្មីក្នុងការប្រាក់ទាប តែអ្នកបើកបរអាចនឹងបោះបង់របរនេះ​ចោល​ដោយសារបញ្ហាប្រឈមមួយចំនួន។

លោក សេរី ក៏បានលើកពីបញ្ហាលំបាករបស់អ្នកបើកបរ៤ចំណុច ប្រសិនបើប្ដូរទៅជា​ឡាន​ក្រុង  ទី១បញ្ហាផលចំណេញប្រសិនបើដូររថយន្ត អ្នកបើកបរនឹងបាត់ចំណូលមិនអាច​ទប់​ទល់នឹងចំណាយរួច បញ្ហាទី២គឺ កត្តាផ្លូវ ជាពិសេសគឺខែវស្សា ខណៈឡានក្រុងមិនអាច​បើកបរក្នុងស្ថានភាពផ្លូវភូមិស្រុកស្រែជនបទបានទេ ចំណែកបញ្ហាទី៣គឺ កម្មករភាគច្រើន​ពុលឡាន ដោយសារតែការជិះឡានក្រុង ព្រោះតាមបទពិសោធជិះឡានទ្រុងកម្មករ​អាចស្រូប​ខ្យល់អាកាសបានស្រស់ស្រាយ និងបញ្ហាចុងក្រោយបើមានការផ្លាស់ប្ដូរឡាន អ្នកបើកបរ​ពិបាករកទីផ្សារលក់ឡានចាស់ចេញ។

លោកប្រាប់ឱ្យដឹងថា៖ «បញ្ហាវាមាន៤ធំៗហ្នឹង ដែលខ្ញុំបានសាកសួរអ្នកបើកបរ ហើយខ្ញុំឆ្លង​កាត់ផ្ទាល់គឺពិបាកមែន! បើប្ដូរឡានទៅ អ្នកបើកដឹងតែរត់ហើយ ព្រោះវាមិនចំណេញ ដោយ​អ្នក​ខ្លះខ្ចីលុយ»។

ចំណែកលោក ច័ន្ទ សុផល បានលើកឡើងថា៖ «កត្តាដែលរារាំងក្នុងការប្ដូរឡានរបស់អ្នក​បើកបរមាន៤១% និយាយអំពីបញ្ហាពន្ធផ្លូវរបស់រថយន្តក្រុងមានតម្លៃថ្លៃជាង រីឯអ្នកបើកបរ​២៤,៥%ទៀតអះអាងថាឡានក្រុងអាចដឹកមនុស្សបានតិចជាងឡានទ្រុង អ្នកបើកបរផ្សេង​ទៀតនិយាយថាក្រុងមិនអាចប្រើប្រាស់លើស្ថានភាពផ្លូវតាមភូមិស្រុក អ្នកខ្លះទៀតថា​មកពីឡានក្រុងស៊ីប្រេងជាង និងកម្មករខ្លះថាមិនចង់ចំណាយលុយបន្ថែមជិះឡានក្រុង»។

លោក អ៊ិត សំហេង រដ្ឋមន្រ្តីក្រសួងការងារ បានមានប្រសាសន៍ថា ក្នុងឆ្នាំ២០២១ គ្រោះថ្នាក់​ចរាចរណ៍ផ្លូវគោកទូទាំងប្រទេសកើនឡើងគួរឱ្យព្រួយបារម្ភដោយក្នុងមួយថ្ងៃមានមនុស្សស្លាប់ជាមធ្យម៦នាក់ និងរបួសពី៨ទៅ៩នាក់ ក្នុងនោះអ្នកស្លាប់ និងរបួសក៏មានកម្មករក្នុងវិស័យ​កាត់ដេរផងដែរ។

លោកសំហេងថ្លែងថា៖ «ដើម្បីកាត់បន្ថយគ្រោះថ្នាក់ចរាចរណ៍ក្នុងប្រទេសកម្ពុជា ក្រសួង​ការងារ និងបណ្ដុះបណ្ដាលវិជ្ជាជីវៈ បានយកចិត្តទុកដាក់ផ្ដល់សុវត្ថិភាពដល់កម្មករនិយោជិត និងធ្វើការជំរុញឱ្យកាន់តែប្រសើរឡើងនូវមធ្យោបាយធ្វើដំណើរមកជារថយន្តដឹកអ្នកដំណើរមានសុវត្ថិភាព»។

តែយ៉ាងណាមិញ លោកប្រធានសមាគមដឹកជញ្ជូន មើលឃើញថា ក្នុងការផ្លាស់ប្ដូរឥរិយាបទ​អ្នកបើកបរមួយចំនួនក្នុងតំបន់គោលដៅ គឺទាមទារឱ្យមានកញ្ចប់ថវិកាដើម្បីចុះអប់រំ​ផ្សព្វផ្សាយ​ ដោយសារតែតាមបទពិសោធកន្លងមកការចុះអប់រំផ្ទាល់មានប្រសិទ្ធភាព​ជាង​ផ្សាយតាមប្រព័ន្ធផ្សព្វផ្សាយ បើទោះបីប្រព័ន្ធផ្សព្វផ្សាយទាំងនោះបានផ្សាយច្រើនមកហើយ​ក្ដីអំពីសុវត្ថិភាពចរាចរណ៍ផ្លូវគោក និងច្បាប់នានា តែកម្មករនិងអ្នកបើកបរហាក់មិនយកចិត្ត​ទុកដាក់ស្ដាប់។

លោកប្រាប់ឱ្យដឹងថា៖ «ទាល់តែចុះទៅអប់រំផ្ទាល់ទៅកន្លែងដែលគាត់ចត(អ្នកបើកបរ)​ ទើប​មានប្រសិទ្ធភាពក្នុងការកាត់បន្ថយគ្រោះថ្នាក់ចរាចរណ៍»។ លោកបន្តថា៖«បញ្ហាអត្តចរិកតែង​កើតរើយៗទៅអ្នកបើកបរ ជាក់ស្ដែងពេលចុះទៅជួបអ្នកបើកបរចឹង ពេលខ្លះគាត់កំពុងតែកាន់​ស្រាបៀហូបក៏មាន ឬជួនកាលការលេងសើចពេលកំពុងបើកបរជាដើម ហើយអាហ្នឹង​គឺជា​បញ្ហា»។

សូមជម្រាបជូនថា តាមការសិក្សាមួយរបស់UNDP​បានឱ្យដឹងថា ក្នុងមួយឆ្នាំបើគិតក្នុង​ឆ្នាំ​២០១៩ ប្រទេសកម្ពុជាអាចមានការខាតបង់ជាទឹកប្រាក់រហូតដល់៦៤៦,៨លានដុល្លារ ក្នុងការ​រកចំណូលចំពោះអ្នកជួបនឹងគ្រោះថ្នាក់ចរាចរណ៍បាត់បង់ជីវិត និងថ្លៃព្យាបាលនានា។

ដោយឡែកក្នុងឆ្នាំ២០២០ គ្រោះថ្នាក់ចរាចរណ៍កើតឡើងចំពោះកម្មករនិយោជិតក្នុងវិស័យ​កាត់ដេរសម្លៀកបំពាក់ និងផលិតផលស្បែកជើងមានចំនួន២២០៦លើក ស្មើនឹងជាង​១៨៣​លើកក្នុងមួយខែ។ គួរឱ្យសោកស្ដាយកម្មករនិយោជិតចំនួន៣០នាក់បានស្លាប់ និង៤៦៧នាក់​ទៀតបានរងរបួសធ្ងន់ក្នុងករណីគ្រោះថ្នាក់ចរាចរណ៍ទាំងនេះ។នេះបើតាមការស្រាវជ្រាវរបស់អង្គការបង្ការបួសអាស៊ី៕

119 views

ព័ត៌មានថ្មីៗ

អត្ថបទពេញនិយម