ស្រ្តីកម្ពុជាមួយចំនួន ពិសេសស្រ្តីជាសកម្មជន និងស្រ្តីជាអ្នកសារព័ត៌មានកំពុងប្រឈមនឹង ការកើនឡើងនូវការគំរាមកំហែងនៃអំពើហិង្សាផ្តោតលើយេនឌ័រ នេះបើតាមរបាយការណ៍មួយចេញផ្សាយដោយបណ្ដុំអង្គការសង្គមស៊ីវិលមួយឈ្មោះថាមជ្ឈមណ្ឌលអាស៊ី (Asia Center)។
ខណៈដែលស្រ្តីជាសកម្មជនការពារសិទ្ធិមនុស្ស និងអ្នកសារព័ត៌មានជាស្រ្តីជាច្រើនបានប្រើប្រាស់ប្រព័ន្ធឌីជីថលដើម្បីធ្វើការតស៊ូមតិ ក្រុមអ្នកវាយប្រហារអ្នកទាំងនោះក៏បានប្រើប្រាស់បណ្ដាញទាំងនេះដូចគ្នាដែរ។ នេះបើតាមរបាយការណ៍របស់មជ្ឈមណ្ឌលអាស៊ី។ របាយការណ៍នេះបានគូសបញ្ជាក់ពីករណីអំពើហិង្សាផ្តោតលើយេនឌ័រតាមប្រព័ន្ធបច្ចេកវិទ្យា ឬហៅកាត់ថា TFGBV ដែលការបៀតបៀនទាំងនោះកើតឡើងដោយផ្អែកទៅលើយេនឌ័រ តាមរយៈការប្រើប្រាស់ប្រព័ន្ធឌីជីថល។
មជ្ឈមណ្ឌលអាស៊ីលើកឡើងថា៖ «ថ្វីបើបញ្ហានេះធ្ងន់ធ្ងរ ក៏ករណីស្រ្តីដែលបានជួបអំពើហិង្សាផ្តោតលើយេនឌ័រតាមប្រព័ន្ធបច្ចេកវិទ្យាមិនសូវមានការកត់ត្រានោះទេ»។ មជ្ឈមណ្ឌលនេះបានសម្ភាសស្រ្តីចំនួន១២នាក់ រួមមានសកម្មជនលេចធ្លោមួយចំនួន ស្រ្តីធ្វើការលើប្រព័ន្ធផ្សព្វផ្សាយ និងសង្គមស៊ីវិល ក៏ដូចជាការស្រាវជ្រាវតាមឯកសារជាច្រើនទៀត។
អំពើហិង្សាផ្តោតលើយេនឌ័រ ឬហៅកាត់ថាGBV គឺជាបញ្ហាកើតមានឡើងយូរមកហើយនៅកម្ពុជា និងទម្រង់នៃអំពើហិង្សាផ្តោតលើយេនឌ័រកាន់តែមានបរិបទធំឡើងៗ។ គិតពីឆ្នាំ២០២១ដល់ឆ្នាំ២០២៤ មានការប៉ាន់ប្រមាណថា៣៤%នៃស្រ្តីកម្ពុជាអាយុចន្លោះពី១៥ទៅ៤៩ឆ្នាំ ដែលមានចំនួនជាងពាក់កណ្ដាលនៃប្រជាជនសរុប បានជួបអំពើហិង្សាផ្តោតលើយេនឌ័រ។ នេះបើតាមវិទ្យាស្ថានជាតិស្ថិតិ។
អំពើហិង្សាប្រភេទនេះគឺជាបញ្ហាសកល ដោយស្ត្រីប្រហែលម្នាក់ក្នុងចំណោមបីនាក់ដែលមានអាយុចាប់ពី១៥ឆ្នាំឡើងទៅត្រូវបានប៉ាន់ប្រមាណថាបានជួបប្រទះការរំលោភបំពានផ្អែកលើយេនឌ័រ ដោយផ្អែកទៅតាមអាយុ ទីតាំង និងប្រាក់ចំណូល។ នេះបើតាមអង្គការសុខភាពពិភពលោក។
ការសិក្សាមួយរបស់អង្គការយូណេស្កូក្នុងឆ្នាំ២០២៣ បានធ្វើការស្ទង់មតិលើស្រ្តីជាអ្នកសារព័ត៌មាននៅទូទាំងពិភពលោក ដោយមានទាំងកម្ពុជាផង។ ការសិក្សារកឃើញថា ៧៣%នៃស្រ្តីទាំងនោះធ្លាប់ជួបអំពើហិង្សាតាមប្រព័ន្ធអនឡាញ។
ក្រុមអ្នកវាយប្រហារទាំងនោះបានកំណត់មុខសញ្ញាលើស្រ្តីដែលមានសកម្មភាពការងារលេចធ្លោ ដោយចង់បំបិទសំឡេងពួកគេ និងធ្វើឲ្យកិត្តិយសអ្នកទាំងនោះធ្លាក់ចុះ។ ក្រុមអ្នកវាយប្រហារបានធ្វើឲ្យសេរីភាពបញ្ចេញមតិ ជំនឿ សិទ្ធិទទួលបានសុវត្ថិភាព និងឯកជនភាពរបស់ស្រ្តីទាំងនោះជួបការគំរាមកំហែង។
កញ្ញា ជា សុខនី អ្នកសារព័ត៌មាននៅមជ្ឈមណ្ឌលព័ត៌មានស្រ្តីកម្ពុជា បានឲ្យដឹងថា បន្ទាប់ពីធ្វើការបានបួនឆ្នាំក្នុងវិស័យនេះ កញ្ញាបានឃើញ និងបានជួបការបៀតបៀនតាមពាក្យសម្ដីជារឿយៗ ហើយការបៀតបៀននោះផ្ដោតលើយេនឌ័រ និងការប្រើប្រាស់ភាសាមិនសមរម្យ។
កញ្ញាយល់ឃើញថា៖ «ស្ថានភាពអ្នកសារព័ត៌មានស្រ្តីហាក់មិនទាន់ល្អប្រសើរខ្លាំងទេ វានៅតែមានក្ដីបារម្ភ…ពេលយើងចុះរាយការណ៍ព័ត៌មាន ពួកយើងត្រូវគេមើលឃើញថាជាភេទទន់ខ្សោយ ដោយវាយតម្លៃ ឬនិយាយលែបខាយ។ ពេលខ្លះខ្ញុំមានអារម្មណ៍ចង់បោះបង់អាជីពនេះម្ដងម្កាលដែរ»។
អ្នកសារព័ត៌មានជាស្រ្តីម្នាក់ទៀត គឺកញ្ញា ផុន សុទ្ធីរ័ត្ន បានលើកឡើងពីកង្វល់ និងបទពិសោធន៍ប្រហាក់ប្រហែលគ្នានេះដែរ។
កញ្ញា សុទ្ធីរ័ត្ន ជាអ្នករាយការណ៍ព័ត៌មានផ្នែកសិទ្ធិមនុស្ស។ កញ្ញាលើកឡើងថា កញ្ញាប្រឈមនឹងការបំពារបំពានពីអាជ្ញាធរពេលចុះយកព័ត៌មាន។ កញ្ញាជំរុញឲ្យបញ្ឈប់នូវការបំពារបំពានទាំងនេះ និងថាស្រ្តីបានដើរតួរយ៉ាងសំខាន់ក្នុងវិស័យសារព័ត៌មាន។
លើសពីនេះទៅទៀត ការគំរាមកំហែង ជាពិសេសការបៀតបៀនតាមប្រព័ន្ធអនឡាញ គឺនៅតែជាបញ្ហាមួយសម្រាប់វិស័យសារព័ត៌មានទាំងមូល ដែលនៅតែបន្តកើតមាន ដោយអ្នកសារព័ត៌មានប្រឈមនឹងការចាប់ខ្លួន ឃុំខ្លួន ដាក់ចូលក្នុងបញ្ជីខ្មៅ និងអ្នកខ្លះឈានដល់បាត់បង់ជីវិតក៏មាន។
ក្រៅពីអ្នកសារព័ត៌មាន ស្រ្តីកម្មជនផ្សេងទៀត ជាពិសេសសកម្មជនដីធ្លី ដែលមានជម្លោះជាមួយរដ្ឋាភិបាល និងក្រុមហ៊ុនឯកជន ក៏ប្រឈមនឹងអំពើហិង្សាផ្តោតលើយេនឌ័រនេះដែរ។ នេះបើតាមមជ្ឈមណ្ឌលអាស៊ីដដែល។
សកម្មនជនដីធ្លីមកពីខេត្តកោះកុង អ្នកស្រី ផាវ ញ៉ើង បានឲ្យដឹងថា អ្នកស្រីបានទទួលការគំរាមកំហែងដោយផ្ទាល់ និងតាមអនឡាញជាញឹកញាប់ ពេលដែលអ្នកស្រីទាមទាររកយុត្តិធម៌លើការរំលោភបំពានដីធ្លីក្នុងសហគមន៍។
អ្នកស្រីឲ្យដឹងថា៖ «ពេលខ្ញុំនិយាយនៅលើបណ្ដាញសង្គម មានគណនីខ្មោចជាច្រើនចេញមកវាយប្រហារខ្ញុំ ដោយថាខ្ញុំសមតែនឹងជាប់គុកម្ដងទៀត។ សារខ្លះបានព្រមានឲ្យខ្ញុំឈប់ធ្វើសកម្មភាព បើខ្ញុំបារម្ភពីសុខទុក្ខរបស់ប្ដី និងកូនៗ»។
របាយការណ៍កម្រាស់ជិត៤៥ទំព័រនេះ បានលើកពីយុទ្ធសាស្រ្តគន្លឹះ និងបញ្ហាប្រឈមដើម្បីដោះស្រាយទាក់ទងនឹងអំពើហិង្សាផ្តោតលើយេនឌ័រតាមប្រព័ន្ធបច្ចេកវិទ្យានៅកម្ពុជា។
របាយការណ៍នេះ បានអំពាវនាវឲ្យភាគីពាក់ព័ន្ធរួមគ្នាចាប់ផ្ដើមលើកកម្ពស់ការយល់ដឹងឲ្យបាននៅគ្រប់កម្រិត។ ក្រុមអ្នកស្រាវជ្រាវលើកឡើងថា គួរតែមានការដាក់បញ្ចូលរឿងយេនឌ័រក្នុងកម្មវិធីសិក្សានៅតាមសាលារៀន ពង្រឹងគោលនយោបាយ ពង្រឹងប្រព័ន្ធរាយការណ៍ និងធ្វើការជាមួយក្រុមហ៊ុនបច្ចេកវិទ្យា ឬប្រព័ន្ធផ្សព្វផ្សាយដើម្បីបិទខ្ទប់មាតិកាគ្រោះថ្នាក់ទាំងនេះ។
ប៉ុន្តែបើទោះបីជាយុទ្ធសាស្រ្តមានហើយក្ដី ការរីកចម្រើនលឿននៃបច្ចេកវិទ្យា និងផលវិបាកដែលកើតមានដោយចៃដន្យនៅតែជាបញ្ហាប្រឈម។
ការរីកចម្រើនជឿនលឿននៃប្រព័ន្ធបច្ចេកវិទ្យា ដូចជាបញ្ញាសិប្បនិម្មិត ឬហៅកាត់ថា AI អាចនឹងធ្វើឲ្យបញ្ហាកាន់តែអាក្រក់ឡើង។ របាយការណ៍ចង្អុលបង្ហាញថាការក្លែងបន្លំសំឡេង ឬសាររបស់នរណាម្នាក់ វាធ្វើឲ្យមានភាពស្មុគស្មាញក្នុងការតាមដាន និងបង្ការការបំពានតាមអនឡាញ៕
ប្រែសម្រួលពីអត្ថបទភាសាអង់គ្លេស៖ Report Warns of Rising Online Abuse Targeting Women Journalist, Activists
