សមាគមសម្ព័ន្ធអ្នកសារព័ត៌មានកម្ពុជា

របាយការណ៍សង្គមស៊ីវិលបង្ហាញថាចំនួនកុមារជាប់ឃុំឃាំងមានការកើនឡើង

ខ្លោងទ្វារចូលមណ្ឌលអប់រំកែប្រែទី១ ក្នុងរាជធានីភ្នំពេញ។ រូបថតកាលពីថ្ងៃទី១១ ខែវិច្ឆិកា ឆ្នាំ២០២១។ (ខេមបូចា/ ព្រីង សំរាំង)
ខ្លោងទ្វារចូលមណ្ឌលអប់រំកែប្រែទី១ ក្នុងរាជធានីភ្នំពេញ។ រូបថតកាលពីថ្ងៃទី១១ ខែវិច្ឆិកា ឆ្នាំ២០២១។ (ខេមបូចា/ ព្រីង សំរាំង)

សង្គម​ស៊ីវិល​ថា «ចំនួន​អនីតិជនជាប់​ឃុំ​កើន​ឡើង​» ​នៅ​​តាម​ពន្ធនាគារ​ភាគ​ច្រើន​ដែល​នេះជា​ «អត្រាគួរ​ឱ្យ​ព្រួយបារម្ភ»។ នេះ​បើ​តាម​របាយការណ៍​របស់​អង្គការ​សិទ្ធិ​មនុស្ស​ លីកាដូ ដែល​បាន​ចេញ​ផ្សាយ​នៅ​ថ្ងៃ​ប្រារព្ធ​ទិវា​កុមារ​អន្តរជាតិ​។​

ចំនួន​អ្នក​ទោស​ដែល​មាន​អាយុ​ក្រោម​១៨​ឆ្នាំ​បាន​កើន​ឡើង​ច្រើន​ជាង​៣០​ភាគ​រយ​បើ​ធៀប​នឹង​ឆ្នាំ​កន្លងទៅ​​នៅ​ក្នុង​ពន្ធនាគារ​ចំនួន​១៩ ចំណោម​ពន្ធនាគារ​ទាំង​៣០​ ដែល​អង្គការ​លីកាដូ​បាន​តាម​ដាន​ឃ្លាំ​មើល។ របាយការណ៍​របស់​អង្គការ​ លីកាដូ នេះ ​ធ្វើ​ឡើង​ដោយ​ផ្អែក​លើ​ការ​ «ផ្ដល់​ព័ត៌មាន​ពី​មន្ត្រី​ពន្ធនាគារ»។ អង្គការ​ លីកាដូ លើក​ឡើង​ថា ​ចំនួន​អ្នក​ទោស​វ័យ​ក្មេង​​ជា​ច្រើន​ត្រូវ​បាន​ជាប់​ពន្ធនាគារ​ទំនង​ដោយសារ​យុទ្ធនាការ​បង្ក្រាប​គ្រឿង​​ញៀន​​ដែល​កំពុង​អនុវត្ត​។​

​អង្គការ​លីកាដូ​ឱ្យ​ដឹងថា ​ក្នុង​ខែ​មេសា អនីតិជន​ចំនួន ​១ ៦៥៨​នាក់​ត្រូវ​បាន​ឃុំ​ខ្លួន ដែល​ភាគ​ច្រើន​ជា​ក្មេង​ប្រុស​។ អង្គការ​ដដែល​បញ្ជាក់​ថា​ស្ទើរ​​តែ​​ពាក់​កណ្ដាល​នៃ​ពួក​គេ​កំពុង​ជាប់​ឃុំ​បណ្ដោះ​អាសន្ន ខណៈ​មាន​៣៧​ភាគ​រយ​កំពុង​រង់​ចាំ​ការ​ប្រកាស​សាលក្រម​ពី​តុលាការ​។​ ក្នុង​ចំណោម​អនីតិជន​ទាំង​នោះ មាន​៨២​នាក់ជា «កុមារតូច» ​រស់​នៅ​ក្នុង​ពន្ធនាគារ និង​មាន​៣០​នាក់​ផ្សេង​ទៀត​ជា​ស្រ្តី​មាន​ផ្ទៃ​ពោះ និង​ក្មេង​ស្រី​។​

​អ្នក​នាំ​ពាក្យ​ក្រ​សួង​យុត្តិធម៌ លោក ជិន ម៉ាលីន មាន​ប្រសាសន៍​ថា តុលាការ​​ធ្វើ​ទៅតាម​ច្បាប់​ពេល​ដែល​អនុវត្ត​នីតិវិធី​ឃុំខ្លួន​បណ្ដោះ​អាសន្ន​។​

លោក ជិន ម៉ាលីន លើក​ឡើង​ថា៖ «​បើ​តាម​អ្វី​ដែល​យើង​បាន​កត់ត្រា [អនីតិជន] ដែល​ជាប់​ឃុំ​ក្នុង​ពន្ធនាគារ គឺ​មិន​មាន​ការ​កើន​ឡើងទេ វា​ដូច​ជា​នៅ​ដដែល ឬ​ធ្លាក់ចុះ»។ យ៉ាង​ណា​លោក​មិន​បាន​ផ្ដល់​ជា​តួលេខ​នោះ​ទេ​។​

​បើ​តាម​អង្គការ ​លីកាដូ ពន្ធនាគារ​ជា​ច្រើន​បាន​ដាក់​អ្នក​ជាប់ឃុំ​លើស​ចំណុះ​​ជាក់​ស្ដែង​រហូត​ដល់​ទៅ​២៥០​ភាគ​រយ​។​

​អ្នក​នាំពាក្យ​អគ្គនាយក​ដ្ឋាន​ពន្ធនាគារ​នៃ​ក្រ​សួង​មហាផ្ទៃ​​លោក នុត សាវនា មាន​ប្រសាសន៍​ថា ខាង​ពន្ធនាគារ​គ្រាន់​តែ​ទទួល​អ្នក​ជាប់​ចោទ​ពី​តុលាការ​​តែ​ប៉ុណ្ណោះ​។​

លោក​ថ្លែថា៖ «​កន្លែង​ខ្ញុំ​គឺ​គ្រាន់​តែ​ទទួល​ពួកគាត់​មក​ឃុំឃាំង»។​ លោកបន្តថា៖ «ចំពោះ​ [អ្នក​ជាប់​​ឃុំ​ជាអនីតិជន] មាន​ការ​កើន​ឡើង យើង​មិន​មាន​លទ្ធភាពធ្វើ​អ្វី​បាន​ក្រៅ​តែពី​ទទួល​ពួក​គេ។ ពេល​ដែល​គេ​បញ្ជូន​ [ជន​ជាប់​ចោទ​] មក​យើង នោះ​យើង​ក៏​ដាក់​ពួកគេ​ក្នុង​ពន្ធនាគារ»។​

លោក​លើកឡើងថា៖ «​ស្ថាន​ភាព​​ក្នុង​ពន្ធនាគារ​មិន​ចង្អៀត​ដូច​ពេល​មុន​ទេ ហើយ​ស្ថានភាព​នៃ​ការ​ឃុំ​ឃាំង​អនីតិជន​ក៏មាន​ភាព​ល្អ​ប្រសើរ​ឡើង​ដែរ»។ យ៉ាង​ណា លោក​មិន​បាន​ផ្ដល់​តួ​លេខ​ជាក់​លាក់​នោះ​ទេ​។ លោក​បន្ថែមថា៖ «​យើង​មិន​បាន​ឃុំ​ពួកគាត់​ជាមួយ​អ្នក​ជាប់ឃុំ​ ​ផ្សេង​ទៀត​ដូច​ពី​មុនទេ​» ដែល​លោក​ចង់​សម្ដៅ​ថា​អនីតិជន​​ដែល​ជាប់​ឃុំ​គឺ​ត្រូវ​បាន​ដាក់​នៅកន្លែង​​មួយ​ដូច​មនុស្ស​ពេញ​វ័យ​ដែរ​​។

​យ៉ាងណា របាយការណ៍​អង្គការ ​លីកាដូ​ បង្ហាញ​ថា ពន្ធនាគារ​ខ្លះ​បាន​​ឃុំ​ខ្លួន​អនីតិជន​ជាមួយ​នឹង​អ្នក​ជាប់ឃុំ​ពេញ​វ័យ​ដែរ​។​

​ដោយ​យក​ចិត្ត​ទុក​ដាក់​ទៅ​នឹងការ​ជាប់​ឃុំ​របស់​កុមារ​ ​រដ្ឋាភិបាល​បាន​កសាង​មណ្ឌល​យុវនីតិ​សម្បាទា​មួយ​នៅ​ខេត្ត​កណ្ដាល កាល​ពី​ខែ​ធ្នូ ឆ្នាំ​២០២១​ ដើម្បី​​ដាក់​អ្នក​ត្រូវ​ឃុំ​ខ្លួន​ដែល​ជា​កុមារ និង​មនុស្ស​វ័យ​ក្មេង​​មាន​អាយុ​ត្រឹម​២៤​ឆ្នាំ​។​ បើ​តា​ម​អង្គការ លីកាដូ មណ្ឌល​នេះ​បាន​​ឃុំ​ខ្លួន​ក្មេង​ប្រុស​ដែល​មាន​ទោស​យ៉ាង​តិច​១៣០​នាក់​។​

អង្គការ ​លីកាដូ ​អះអាង​ថា​កិច្ចខិត​ខំ​ប្រឹង​ប្រែង​កាត់​បន្ថយ​ភាព​ណែណាន់​តាន់​តាប់​ក្នុង​ពន្ធនាគារ​គឺ​ «បរាជ័យ» និង​បាន​ព្រមាន​ថា​ការ​យក​កុមារ​មក​ដាក់​នៅ​កន្លែង​តែ​មួយ​​នឹង​បង្ក​​ការ​លំបាក​​ដល់​សមាជិក​គ្រួសារ ហើយ​អ្នក​ទាំង​នោះ «​អាច​ប្រឈម​នឹង​ការ​មិន​អាច​ទាក់ទង ឬ​ផ្ដល់​ការគាំទ្រ​ចាំ​បាច់​ដល់​កូន​ៗ​របស់​ពកគេ»។​

អង្គការ​ដដែល​គូសបញ្ជាក់​ថា ​ការ​ទទួល​បាន​អ្នក​តំណាង​ផ្នែក​ច្បាប់​គឺ​ជា​រឿង​ចាំបាច់​សម្រាប់​អនីតិជនដែល​កំពុង​ប្រឈម​នឹង​បទ​ល្មើស​ព្រហ្មទណ្ឌ ប៉ុន្តែថា «កុមារ​ជាច្រើន​បាន​ប្រាប់​អង្គការ​លីកាដូថា​ខ្លូន​មិន​មាន​ឱកាស​ជួបមេធាវី ឬ​ការស្នើ​សុំ​នៅក្រៅឃុំនោះទេ»។​

អ្នក​នាំពាក្យ​សាលាដំបូង​រាជធានី​ភ្នំពេញ លោក អ៊ី រិន្ទ មិន​អាច​ទាក់​ទង​សុំ​ការ​អត្ថាធិប្បាយ​បាន​ទេ​។​

អង្គការ ​លីកាដូ ​ក៏​បាន​អំពាវ​នាវ​ឱ្យ​មានការ​ដោះ​លែង​ឱ្យ​នៅ​ក្រៅ​ឃុំ​បណ្ដោះ​អាសន្ន​ចំពោះ​កុមារ​ ស្រ្តី​ជា​ម្ដាយ​ និង​ស្រ្តី​មាន​ផ្ទៃ​ពោះ​ដែល​ស្រប​តាម​លក្ខខណ្ឌ​​ច្បាប់​។ មួយ​វិញ​ទៀត​ចំពោះ​កុមារ​ដែល​ជាប់​ចោទ​ពី​បទ​ល្មើស​ព្រហ្ម​ទណ្ឌ​ត្រូវ​ឱ្យមាន​មេធាវី ហើយ​ថា​ស្ថាន​ភាព​នៅ​ពន្ធនាគារ​​​គួរ​តែ​ធ្វើ​ឱ្យ​បាន​ល្អ​ប្រសើរ​ឡើង​ដើម្បី​ឱ្យ​ប្រាកដ​ថា​អ្នកជាប់ឃុំ​អាច​ទទួល​បាន​សេវាសុខាភិបាល និង​តម្រូវការចាំ​បាច់​ផ្សេងៗ​ទៀត​។​

សម្រាប់​ផែន​ការ​យុទ្ធសាស្រ្ត​របស់​រដ្ឋាភិបាល គឺ​ព្យាយាម​កាត់​បន្ថយ​ចំនួន​អ្នក​ជាប់​ឃុំ​ដែល​ជា​អនីតិជន​។​

ផែនការ​អនុវត្ត និង​យុទ្ធសាស្រ្ត​ច្បាប់​​យុត្តិធម៌​សម្រាប់​អនីតិជន​ដែល​គាំទ្រ​ដោយ​អង្គការ​យូនីសេហ្វ បាន​លើក​ឡើង​ថា៖ «​ក្នុង​ការ​គិត​បែប​ទំនើប ដែល​ទទួល​ស្គាល់​ដោយ​ច្បាប់​ថ្មី គឺ​ថា​ការ​ដាក់​ទណ្ឌកម្ម​កុមារ​តាម​រយៈការ​ដាក់​ទោស​ព្រហ្ម​ទណ្ឌ​ គឺ​ពិត​ជា​អាច​ធ្វើ​ឱ្យ​ក្មេង​ធ្លាក់​ចូល​ទៅ​ក្នុង​គំនិត​មួយ​ថា​ខ្លួន​ជា​ឧក្រិដ្ឋ​ជន និង​ងាយ​នឹង​បង្ក​បទ​ល្មើស​ជា​ថ្មី ហើយ​ទំនង​ជា​អាច​​​ជា​បទ​ល្មើស​កាន់​តែ​ធ្ងន់​ធ្ងរ​ថែម​ទៀត​ផង​។​

របាយការណ៍​២៤០​ទំព័រ​ដែល​រៀបចំ​ដោយ​ក្រ​សួង​យុត្តិធម៌ និង​ក្រ​សួង​សង្គម​កិច្ច បាន​កត់​សម្គាល់​ថា៖ «​នេះ​ហើយ​ជា​ហេតុ​ផល​សំខាន់​ដែល​ត្រូវ​អន្តរាគមន៍​ឱ្យ​បាន​ទាន់ពេល​ដើម្បី​ចូល​រួម​ការពារ​ ​ស្ដារឡើងវិញ និង​បញ្ចូល​ក្មេងៗ​ទាំង​នោះ​ទៅ​ក្នុង​សង្គម​វិញ​មុន​នឹង​ពួកគេ​ក្លាយ​ជា​ឧក្រិដ្ឋ​ជន​»។​​

ខណៈ​ដែល​ច្បាប់​ស្ដី​អំពី​យុត្តិធម៌​អនីតិជនឆ្នាំ​២០១៦ បាន​ចែង​ថា ការ​បម្រើ​សេវា​សហគមន៍​ ការ​ព្យួរទោស និង​​ការ​ដោះ​លែងតាម​លក្ខខណ្ឌ​អាច​ត្រូវ​ប្រើ​ជំនួស​រយៈពេល​ជាប់ពន្ធនាគារ ប៉ុន្តែ​​អង្គការ​លីកាដូថា «អ្វី​ទាំង​នេះ​មិន​ត្រូវ​បាន​អនុវត្តទេ»​។​

អ្នក​សារព័ត៌មានកាល​ពី​រសៀល​ថ្ងៃព្រហស្បតិ៍​​បាន​ទាក់​ទង​ទៅ​អ្នកនាំពាក្យ​អង្គការ​យូនីសេហ្វ​ប្រចាំ​កម្ពុជា​ លោក Hadrien Bonnaud ​ដោយ​លោក​មាន​ប្រសាសន៍​ថា​អង្គការ​មិន​អាច​ឆ្លើយ​តប​មុន​មាន​ការ​បោះ​ពុម្ព​ផ្សាយ​នោះ​ទេ​។​

​ក្រសួង​យុត្តិធម៌​បាន​ប្រាប់​ខេមបូចា​ ថា ខ្លួន​បដិសេធ​ទៅ​នឹង​ការ​ទាម​ទារ​របស់​អង្គការ ​លីកាដូ និង​ថា​​មាន «​វិធានការ​ច្រើន និង​វិធីសាស្ត្រ​ច្រើន​ដោយ​ផ្អែក​លើ​ច្បាប់​» ដើម្បី​ដោះស្រាយ​បញ្ហា​នេះ ប៉ុន្តែ​មិន​បាន​បញ្ជាក់​លម្អិត​នោះទេ​។​

​លោក ជិន ម៉ាលីន បញ្ជាក់​ថា៖ «ដោយបារម្ភពី​បញ្ហា​សន្តិសុខ និង​សុវត្ថិភាព​សាធារណៈ យើង​មិន​អាច​យក​នូវ​អ្វី​ដែល​អង្គការ ​លីកាដូ ​​ទាម​ទារ​ឱ្យ​ដោះ​លែង​អ្នក​ជាប់​ឃុំ​ដើម្បី​បន្ថូរ​បន្ថយ​ភាព​ណែនណាន់​តាន់​តាប់​ក្នុង​ពន្ធនាគារ​នោះទេ»។​

អ្នកនាំពាក្យ​ក្រសួង​សង្គមកិច្ច លោក តូច ចាន់​នី អះអាង​ថា​ បញ្ហា​ដែល​ថា​ចំនួន​កុមារ​ជាប់​ឃុំ​មាន​ការ​កើន​ឡើង​គឺ​មិន​មែន​ជា​កំហុស​របស់​ក្រ​សួង​លោក​នោះទេ​។​

​លោក​ថ្លែង​ថា៖ «​ការ​ឃុំ​ខ្លួន​អនីតិជន និង​កុមារ​គឺ​មិន​មែន​ជា​បញ្ហា​របស់​យើង​ទេ មណ្ឌល​របស់​ខ្ញុំ ​[មណ្ឌល​យុវនីតិសម្បទា] គ្រាន់​តែ​ទទួល [អ្នកត្រូវ​ជាប់​ឃុំ] ពី​ពន្ធនាគារ»។​

លោក​បន្ត​ថា៖ «​​យើង​គ្រាន់​តែ​ចាំ​ទទួល​ពេល​គេ​បញ្ជូន​ពួក​គេ​មក»។ លោក​បន្ថែម​ថា​មិន​មាន​ការ​ឃុំ​ខ្លួន​អនីតិជន​ក្នុង​ស្ថាន​ភាព​ណែណាន់​តាន់​តាប់​ទេ​នៅ​មណ្ឌល​ខេត្ត​កណ្ដាល ដោយ​ថា​មាន​អ្នក​ជាប់ឃុំ​ប្រហែល​១០០​នាក់​ប៉ុណ្ណោះ​។​

អង្គការ លីកាដូ ​ព្រមាន​ថា ការ​ឃុំ​ខ្លួន​ «លើស​កម្រិត» នឹង​ធ្វើ​ឱ្យកុមារ​ និង​គ្រួសារ​ពួកគេ​រង​គ្រោះ​។​

អង្គការ​ លីកា​ដូ​ បន្ថែម​ថា៖ «​យើង​ទាម​ទារ​ឱ្យបញ្ចប់​វិធី​មិន​សម​ហេតុ​ផល​​នៃ​ការ​ឃុំ​ខ្លួននេះ វា​បាន​បំពាន​ទៅ​នឹង​សិទ្ធិ​អនីតិជន និង​ផល​ប្រយោជន៍​ផ្សេងៗ​របស់​កុមារ»

ប្រែសម្រួលពីអត្ថបទអង់គ្លេស៖ “Soaring Number” of Children Detained in Prisons, Rights Group Reports

120 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម