ការប្រកួតជម្រើសជើងឯកកម្ពុជាលីគ២ (Cambodian League 2) ត្រូវបានផ្អាករៀបចំការប្រកួតនៅរដូវកាលថ្មី ឆ្នាំ២០២៤-២០២៥ ខណៈលីគនារីដែលបានផ្អាកការប្រកួតចូល៣ឆ្នាំមកហើយនោះ ត្រូវសហព័ន្ធកីឡាបាល់ទាត់កម្ពុជា សម្រេចរៀបចំឱ្យមានការប្រកួតឡើងវិញ ចាប់ពីថ្ងៃទី១៧ ខែសីហា ឆ្នាំ២០២៤ រហូតដល់ថ្ងៃទី៨ ខែកុម្ភៈ ឆ្នាំ២០២៥ ដែលមាន១០ក្រុមបានចូលរួម។
ការប្រកួតជម្រើសជើងឯកកម្ពុជាលីគ២ (Cambodian League 2) ដែលបានរៀបចំឱ្យមានឡើងតាំងពីឆ្នាំ២០១៦មកនោះ មិនត្រូវបានក្រុមហ៊ុនខេមបូឌានព្រីមៀរលីគ Cambodian Premier League (CPL) ដែលទទួលសិទ្ធិរៀបចំការប្រកួតលីគជំនួសសហព័ន្ធកីឡាបាល់ទាត់កម្ពុជា (FFC) រៀបចំឱ្យមានការប្រកួតនៅរដូវកាលថ្មី ឆ្នាំ២០២៤-២០២៥នេះទេ។
ការសម្រេចមិនរៀបចំការប្រកួតលីគ២នេះ ត្រូវបានលោក កាំង សេន ប្រធានក្លឹបបាល់ទាត់ ISI ដង្កោសែនជ័យ ដែលទើបឡើងជាអនុប្រធានក្រុមប្រឹក្សាភិបាលក្រុមហ៊ុន CPL អះអាងថា ដោយសារមិនមានចំនួនក្រុមចូលរួមគ្រប់គ្រាន់ ហើយលោកក៏មិនបានបង្ហើបពីតម្រុយច្បាស់លាស់ក្នុងការរៀបចំឱ្យមានលីគ២ឡើងវិញ នៅពេលណានោះដែរ។
នៅក្នុងសន្និសីទសារព័ត៌មានស្តីពី «ការធ្វើបច្ចុប្បន្នភាពកំណែទម្រង់ និងការប្រកាសតែងតាំងសមាសភាពនាយកគ្រប់គ្រងទូទៅ» របស់ក្រុមហ៊ុន CPL កាលពីថ្ងៃទី១៩ ខែកក្កដា លោក កាំង សេន បានឱ្យដឹងថា ការប្រកួតលីគ២ នឹងអាចបង្កើតឱ្យមានវិញ នៅពេលណា CPL មានManual ឬសៀវភៅក្បួនច្បាប់ថ្មី ដើម្បីឱ្យការបង្កើតក្លឹបបាល់ទាត់នៅកម្ពុជា កាន់តែមានភាពរឹងមាំ និងមានស្ថិរភាព ចៀសវាងបង្កើតក្លឹបបានរយៈពេលខ្លី រួចក៏បិទទៅវិញ ដោយសារមិនអាចរកចំណូលទ្រទ្រង់បាន។
លោកបញ្ជាក់ថា៖ «ការបង្កើតលីគទី២នេះ វាសុទ្ធតែជាការចំណាយដូចគ្នា ហើយស្របពេលលីគកំពូលរបស់យើង អត់ទាន់រឹងមាំ និងមានស្ថិរភាពផង អ៊ីចឹងយើងក៏សម្រេចចិត្តផ្តោតទៅលើលីគកំពូលសិន ជួនពេលដែលលីគ២ ក៏អត់ទាន់មានចំនួនក្រុមគ្រប់គ្រាន់ក្នុងការចូលរួមប្រកួតប្រជែងដែរ។ នៅពេលយើងមាន Manual ថ្មី ដែលអាចបង្កើតក្លឹបផ្សេងៗនៅថ្ងៃអនាគតបានហើយ យើងនឹងចាប់ផ្តើមលីគ២ឡើងវិញ»។
ការមើលឃើញពីហានិភ័យ ចំពោះការបង្កើតក្លឹបបាល់ទាត់នៅកម្ពុជា រហូតឈានដល់ផ្អាកការប្រកួតលីគ២ជាបណ្តោះអាសន្ននេះ ក៏ព្រោះតែក្លឹបមួយចំនួន ដែលធ្លាប់លេងនៅលីគ២ និងលីគកំពូល ដូចជាក្រុមព្រៃវែងអេហ្វស៊ី អគ្គិសនីកម្ពុជា អាស៊ីអឺរ៉ុប សូលទីឡូអង្គរ កោះកុងអេហ្វស៊ី និងក្រុមណិចស្តិបអេហ្វស៊ី ជាដើម សុទ្ធតែបានប្រកាសរំសាយក្លឹបទៅវិញ ហើយបញ្ហាចម្បង គឺមិនមានលទ្ធភាពរកចំណូល ក្នុងការចំណាយបន្តទៅមុខទៀត។
បន្ថែមលើនេះ ការសម្រេចមិនរៀបចំលីគ២នៅឆ្នាំនេះ ក៏អាចមកពីក្រុមយុជនរបស់ក្លឹបកំពុងលេងនៅលីគកំពូលមួយចំនួន ហើយធ្លាប់ចូលលេងលីគ២កន្លងមក បានងាកទៅចូលរួមការប្រកួតជម្រើសជើងឯកខេមបូឌានលីគយុវជនអាយុក្រោម១៩ឆ្នាំ នៅឆ្នាំនេះវិញ ធ្វើឱ្យចំនួនក្រុមធ្លាប់លេងនៅលីគ២ បានធ្លាក់ចុះ។
យ៉ាងណាក៏ដោយ ការប្រកាសមិនរៀបចំការប្រកួតលីគ២ នៅឆ្នាំនេះ ត្រូវបានគ្រូបង្វឹក និងថ្នាក់ដឹកនាំក្លឹបមួយចំនួន ដែលធ្លាប់លេងនៅលីគ២ អះអាងថា ជាការប្រកាស «ដោយទាន់ហន់» គឺមិនបានជូនដំណឹងទៅសាមីក្លឹប ដែលត្រៀមខ្លួនសម្រាប់ការប្រកួតនេះឱ្យបានមុន២ខែនោះទេហើយបញ្ហានេះបានធ្វើឱ្យក្លឹបដែលបានចំណាយទាំងកម្លាំង និងថវិកា សម្រាប់ត្រៀមលីគ២នេះ មានការខកចិត្តខ្លាំង។
ជាក់ស្តែងក្លឹបបាល់ទាត់ខេត្តសៀមរាប ដែលបានចូលរួមប្រកួតលីគ២ តាំងពីឆ្នាំ២០១៩មកនោះ បានអះអាងថា ពួកគេបានត្រៀមខ្លួនសម្រាប់ចូលរួមការប្រកួតលីគ២ នារដូវកាលថ្មីនេះ តាំងពីការប្រកួតរដូវកាលចាស់បានបញ្ចប់ ព្រោះខាងក្រុមហ៊ុន CPL មិនបានប្រកាស ឬជូនដំណឹងចំពោះការមិនរៀបចំលីគ២នៅឆ្នាំនេះទេ។
លោក ហ៊ឹម ឧត្តម ជាអគ្គលេខាធិការ និងជាអ្នកចាត់ការទូទៅរបស់ក្លឹបបាល់ទាត់សៀមរាប បានប្រាប់ថា៖ «ក្រុមរបស់យើងបានត្រៀម តាំងពីការប្រកួតលីគ២ឆ្នាំចាស់ បានបញ្ចប់ ដោយយើងបានរក្សាទុកកីឡាករល្អៗមិនឱ្យទៅលេងក្លឹបផ្សេងទេ គឺយើងបានផ្តោតខ្លាំងសម្រាប់ការប្រកួតនៅរដូវកាលថ្មីនេះ ប៉ុន្តែនៅពេលខាង CPL ប្រកាសមកបែបនេះ ធ្វើឱ្យខកចិត្តទាំងអស់គ្នា»។
ជាមួយគ្នានេះ ក្រុមសៀមរាបអេហ្វស៊ី ដែលបានត្រឹមចំណាត់ថ្នាក់លេខ៦ សម្រាប់ការប្រកួតលីគ២ កាលពីឆ្នាំ២០២៣នោះ បានដាក់គោលដៅច្បាស់លាស់ ក្នុងការប្រជែងយកពានសម្រាប់ការប្រកួតនៅឆ្នាំនេះ ដើម្បីបានឡើងទៅលេងនៅលីគកំពូលកម្ពុជាឆ្នាំក្រោយ ទៅតាមមហិច្ឆតារបស់ពួកគេ។
លោក ហ៊ឹម ឧត្តម បញ្ជាក់ថា៖ «តាមពិតនៅឆ្នាំនេះ យើងមានគម្រោងរួចហើយ សម្រាប់ឈ្នះការប្រកួតលីគ២ ដើម្បីបានឡើងទៅលេងនៅលីគទី១ ហើយភាពជឿជាក់នេះ ដោយសារយើងបានត្រៀមទាំងគ្រូបង្គោល និងកីឡាករ តាំងពីមុនបញ្ចប់ការប្រកួតលីគ២ ឆ្នាំ២០២៣មកម្ល៉េះ»។
ទន្ទឹមនឹងនេះ លោក ឧត្តម បានមើលឃើញថា ការមិនរៀបចំលីគ២ នឹងធ្វើឱ្យប៉ះពាល់ដល់ការបណ្តុះធានធានកីឡាករនៅតាមខេត្ត។ លោកថា៖ «ធនធានកីឡាករមានសមត្ថភាព នៅខេត្តសៀមរាប មានច្រើន អ៊ីចឹងនៅពេលលីគ២ អត់រៀបចំបែបនេះ នឹងមានការប៉ះពាល់ ជាពិសេសក្លឹប ដែលប៉ះពាល់ទាំងទៅលើការចំណាយក្នុងក្លឹប និងចំណាយទៅលើកីឡាករ»។
យ៉ាងណាក៏ដោយ ក្លឹបបាល់ទាត់សៀមរាប នឹងមិនរំសាយក្រុមនោះទេ ព្រោះក្លឹបនេះ នៅតែចិញ្ចឹមចិត្តចូលរួមប្រកួតលីគ២ ហើយពួកគេក៏កំពុងទន្ទឹងរង់ចាំមើលភាពប្រែប្រួលរបស់លីគកម្ពុជា។ នៅក្នុងចំណុចនេះ លោក ហ៊ឹម ឧត្តម បានបង្ហើបថា បើសិនជាមានព័ត៌មានណាមួយ ឱ្យក្រុមរបស់លោកបានលេងនៅលីគកំពូលនៅឆ្នាំក្រោយ ដោយមិនចាំបាច់លេងលីគ២ គឺសៀមរាបអេហ្វស៊ី នឹងរៀបចំចាប់ពីពេលនេះទៅ ដើម្បីចូលរួម។
លោក ឧត្តម បញ្ជាក់ថា៖ «នាយកប្រតិបត្តិក្លឹបរបស់យើង បានប្រកាសថ្ងៃមុនរួចហើយថា យើងអត់បោះបង់នោះទេ គឺថ្ងៃណាមួយយើងនឹងត្រឡប់មកវិញ។ បើមានការប្រកួតលីគ២ នៅឆ្នាំក្រោយ យើងនឹងចូលរួមប្រកួតវិញ ប៉ុន្តែបើមានតែលីគទី១ទេ យើងនឹងដាក់ពាក្យស្នើសុំទៅលេងនៅលីគទី១»។
ចំណែកគ្រូបង្វឹក និងថ្នាក់ដឹកនាំក្លឹបបាល់ទាត់មួយចំនួនទៀត ដែលធ្លាប់ចូលរួមការប្រកួតលីគ២កន្លងមក បានយល់ឃើញថា ការផ្អាកការប្រកួតលីគ២ វាបានបង្ហាញឱ្យឃើញពីការដើរថយក្រោយនៃការអភិវឌ្ឍវិស័យបាល់ទាត់នៅកម្ពុជា ព្រោះលីគ២ ជាការប្រកួតដ៏សំខាន់ ដើម្បីស្វែងរកក្រុមជើងឯក និងជើងឯករង ឡើងទៅលេងនៅលីគកំពូលកម្ពុជា ជំនួសក្រុមដែលត្រូវកាត់ចេញ។
ជាក់ស្តែងការប្រកួតលីគ២ រដូវកាលឆ្នាំ២០២៣ ក្រុមម្ចាស់ជើងឯកឡាយហ្វខេត្តព្រះសីហនុ (Life FC) និងក្រុមជើងឯករងសមាគមកីឡាបាល់ទាត់ក្រសួងមហាផ្ទៃ ត្រូវបានដំឡើងឱ្យទៅលេងនៅលីគកំពូលកម្ពុជា ឆ្នាំ២០២៤-២០២៥ ដែលទើបបានចាប់ដំណើរការប្រកួត កាលថ្ងៃទី១០ ខែសីហា ដោយមាន១១ក្រុមចូលរួម ហើយគ្រោងបញ្ចប់នៅថ្ងៃទី១៧ ខែឧសភា ឆ្នាំ២០២៥។
លោក ឡុង ឬទ្ធា អតីតគ្រូបង្វឹកក្រុមព្រៃវែងអេហ្វស៊ី បានបញ្ចេញទស្សនៈផ្ទាល់ខ្លួនថា ការមិនមានក្រុមគ្រប់គ្រាន់ សម្រាប់ចូលរួមប្រកួតលីគ២ ដោយសារក្លឹបមួយចំនួនមានការលំបាករកចំណូល សម្រាប់ទ្រទ្រង់ដល់ការចំណាយ នៅក្នុងក្លឹបផ្ទាល់ផង និងចំណាយទៅលើការរៀបចំការប្រកួតទាំងក្នុងទឹកដី និងក្រៅទឹកដី ដែលត្រូវចំណាយច្រើន។
តែទោះបីជាយ៉ាងណា លោកនៅតែគាំទ្រឱ្យរៀបចំការប្រកួតលីគ២ឡើងវិញ ដើម្បីពង្រឹងគុណភាពលេងនៅលីគកំពូល។ លោកនិយាយថា៖ «មានលីគ២ នឹងធ្វើឱ្យក្រុមលេងនៅលីគកំពូល មានការប្រឹងប្រែង ដើម្បីធ្វើម៉េចកុំឱ្យខ្លួនឯងធ្លាក់ទៅលីគ២ ប៉ុន្តែនៅពេលអត់មានលីគ២ នឹងធ្វើឱ្យក្រុមមួយចំនួនលែងសូវខំប្រឹងប្រកួត ព្រោះទោះបីជាស្ថិតនៅចំណាត់ថ្នាក់ក្រោយគេ ក៏មិនត្រូវបានកាត់ចេញ ដល់អ៊ីចឹងការប្រកួតប្រជែងនៅលីគកំពូល ក៏លេងសូវល្អមើលទៅតាមហ្នឹងដែរ»។
ជាមួយគ្នានេះ លោក ឡុង ឬទ្ធា បានស្វាគមន៍ ដែលសហព័ន្ធកីឡាបាល់ទាត់កម្ពុជា បានបង្កើតឱ្យមានលីគយុវជនអាយុក្រោម១៩ឆ្នាំ ប៉ុន្តែលោកបានលើកជាយោបល់ថា សហព័ន្ធគួរបង្កើតឱ្យមានលីគសម្រាប់ក្រុមអាយុក្រោម២១ឆ្នាំ (U21) និង U23 ដើម្បីឱ្យកីឡាករ អាចលេងបានជាប់ៗគ្នាពីអាយុក្រោម១៩ឆ្នាំ ដល់អាយុក្រោម២៣ឆ្នាំ ក្នុងការរក្សាកម្រិតលេងរបស់ពួកគាត់ ក្នុងពេលដែលមិនមានលីគ២។
លោកបានបញ្ជាក់ថា៖ «ការមិនមានលីគ២ នៅតែជាកង្វល់ ព្រោះបើយើងមានលីគ២ យើងអាចដាក់កីឡាករជាយុវជនល្អៗរបស់យើងចូលលេង ដើម្បីទទួលបានបទពិសោធន៍បន្ថែម ក្នុងការអភិវឌ្ឍខ្លួនឡើងទៅលេងនៅលីគកំពូល ព្រោះតាមរយៈការប្រកួតលីគ២កន្លងមកនេះ យើងឃើញមានកីឡាករយុវជនរបស់យើងមួយចំនួនធំ បានឡើងទៅលេងនៅលីគកំពូល»។
ចំពោះលោក ឈឹម យៀក គ្រូបង្វឹកក្រុមបន្ទាយមានជ័យអេហ្វស៊ី វិញ បានចាត់ទុកការមិនរៀបចំលីគ២ ជាសកម្មភាពមួយដែលបង្ហាញឱ្យឃើញពីការដើរថយក្រោយរបស់វិស័យបាល់ទាត់នៅកម្ពុជា។ ទោះបីជាក្រុមបន្ទាយមានជ័យ មិនទាន់មានលទ្ធភាពចូលរួមការប្រកួតលីគ២វិញ ប៉ុន្តែលោក យៀក បានបង្ហើបថា ក្រុមនៅតាមខេត្តមួយចំនួនទៀត បានកំពុងនឹងត្រៀមខ្លួនសម្រាប់ការប្រកួតនេះ ហេតុនេះវាជារឿងដ៏គួរឱ្យសោកស្តាយ ដែលគ្មានការប្រកួតលីគ២។
លោក ឈឹម យៀក បាននិយាយថា៖ «ក្រុមមួយចំនួន និងគ្រូបង្វឹក ដែលខ្ញុំធ្លាប់ស្គាល់ គឺពួកគាត់បានត្រៀមកីឡាករលេងលីគ២ ប៉ុន្តែបែរជាអត់មានលីគ២។ សហព័ន្ធបានងាកទៅរៀបចំការប្រកួត U16 និង U19 ចំណែកកីឡាមហាជន (លីគ២) អត់មានរៀបចំឱ្យគាត់លេង ធ្វើឱ្យការចំណាយយ៉ាងច្រើនរបស់ពួកគាត់ សម្រាប់ត្រៀមរដូវកាលថ្មីនេះ ក្លាយជាមោឃទាំងអស់»។
នៅក្នុងបញ្ហានេះ លោក ឈឹម យៀក បានស្នើទៅសហព័ន្ធកីឡាបាល់ទាត់កម្ពុជា និងក្រុមហ៊ុន CPL គួរពិចារណា និងគិតគូរបង្កើតឱ្យមានការប្រកួតលីគ២វិញ ដើម្បីរក្សាបាននូវតុល្យភាពនៃការអភិវឌ្ឍបាល់ទាត់នៅកម្ពុជាទាំងនៅរាជធានីភ្នំពេញ និងនៅតាមខេត្តនានា។
លោកបញ្ជាក់ថា៖ «លីគ២ ជាការប្រកួតបន្ទាប់ពីលីគទី១ អ៊ីចឹងវាអាចប្រម៉ូតក្រុមឡើងបណ្តើរៗ ដើម្បីឱ្យមានតុល្យភាពគ្នា។ បើគាត់ឡើងទៅលេងនៅលីគកំពូល ហើយមានអ្នកគាំទ្រធំៗជួយ នោះគាត់នឹងមានលទ្ធភាពបណ្តុះបណ្តាលកីឡាករថ្មីៗ និងយុវជនបន្តទៀត ប៉ុន្តែឥឡូវនេះចប់ហើយ! បើមិនរៀបចំលីគ២ គឺបាល់ទាត់យើង ប្រហែលជាដើរថយក្រោយហើយ។ យើងផ្តោតតែលើលីគទី១ពេក ក៏អត់បានដែរ»។
ស្រដៀងគ្នានេះ គ្រូបង្វឹកនៅតាមខេត្តមួយចំនួនទៀត ក៏បានបង្ហាញក្តីកង្វល់ នៅពេលក្រុមហ៊ុន CPL បានប្រកាសដោយមិនបានជូនដំណឹងជាមុន ចំពោះការមិនរៀបចំការប្រកួតលីគ២ ដែលធ្វើឱ្យប៉ះពាល់ដល់ការខិតខំរបស់ក្លឹបនៅតាមខេត្ត ក៏ដូចជាកីឡាករ ដែលបានប្រឹងប្រែង សម្រាប់ត្រៀមការប្រកួតនេះ។
គ្រូបង្វឹកទាំងនោះ បាននិយាយដោយសុំមិនបញ្ចេញឈ្មោះថា៖ «ប្រទេសជិតខាងយើង គេរៀបចំដល់លីគទី៣ និងលីគទី៤ទៅហើយ ប៉ុន្តែយើងវិញគ្រាន់តែលីគទី២បំបិទចោល រកតែអ្នកឧបត្ថម្ភដល់គ្នាមិនបាន។ យើងអាណិតដល់កីឡាករ ព្រោះអ្នកខ្លះមានប្រាក់ខែត្រឹម១៥០ដុល្លារ ហើយសួរថាយកទៅធ្វើអីកើត? ប៉ុន្តែសំខាន់ពួកគេស្រឡាញ់បាល់ទាត់ ទើបនៅខំប្រឹងប្រែងបន្ត»។
ប្រភពជាគ្រូបង្វឹកទាំងនោះ ក៏បានសម្តែងការខកចិត្តទៅដល់ថ្នាក់ដឹកនាំនៅតាមខេត្តមួយចំនួន ដែលមិនសូវខ្វល់ខ្វាយចូលរួមជួយដល់ក្រុមបាល់ទាត់តំណាងឱ្យខេត្តរបស់ខ្លួន។ ពួកគាត់បញ្ជាក់ថា៖ «បើសិនជាថ្នាក់ដឹកនាំនៅគ្រប់ខេត្តទាំងអស់ ដាក់ចិត្តជួយដល់ក្លឹបបាល់ទាត់នៅក្នុងខេត្តរបស់ខ្លួន នោះវិស័យបាល់ទាត់របស់យើងនឹងរីកចម្រើនជាងហ្នឹង ប៉ុន្តែសំខាន់ចៅហ្វាយខេត្តខ្លះ សម្ងំឈឹង»។
ចំណែកលោក ជា ម៉េងលី ដែលធ្លាប់បំពេញការងារនៅក្លឹបសូលទីឡូអង្គរ ក្នុងតួនាទីជាអ្នកចាត់ការទូទៅ និងធ្លាប់ជាអគ្គលេខាធិការក្លឹបណិចស្តិបផងនោះ បានអះអាងថា ក្លឹបនីមួយៗដែលបានលេងនៅលីគ២ គឺចំណាយច្រើន។ លោកថា គ្រាន់តែរៀបចំការប្រកួតនៅក្នុងទឹកដីខ្លួនឯង ទាបបំផុត១លើកក៏អស់១៥០០ដុល្លារដែរ ចំណែកការធ្វើដំណើរចេញទៅប្រកួតនៅក្រៅទឹកដី គឺមួយលើកៗ អាចអស់ចាប់ពី២ពាន់ដុល្លារឡើងទៅ។
ជាមួយហេតុផលនេះ លោក ម៉េងលី បានលើកជាគំនិតថា៖ «ការផ្អាករៀបចំលីគ២ វាជារឿងដ៏គួរឱ្យសោកស្តាយមួយ ដែលយើងមិនមានការប្រកួតច្រើន ពិសេសយើងមានការសោកស្តាយទៅលើក្លឹបដែលមានលទ្ធភាព និងធនធានក្នុងការចូលរួម ព្រោះនៅពេលក្លឹបមានសកម្មភាព កីឡាករក៏មានចំណូលប្រាក់ខែ ហើយបានបញ្ចេញសមត្ថភាព ប៉ុន្តែនៅពេលអត់អ៊ីចឹង គឺពិបាកទាំងអស់គ្នា»។
យ៉ាងណាក៏ដោយ លោក ជា ម៉េងលី យល់ថា ក្រុមដែលលេងនៅលីគ២ភាគច្រើន ក៏នៅមានកម្រិតដែរ បើធៀបទៅនឹងក្រុមលេងនៅលីគកំពូល ព្រោះលក្ខខណ្ឌប្រកួតរបស់លីគទាំង២នេះខុសគ្នា អ៊ីចឹងការរៀបចំក៏ខុសគ្នាដែរ ហើយលើសពីនេះលក្ខខណ្ឌប្រកួតរបស់លីគកំពូល តែងបត់បែនទៅតាមចំនួនក្លឹប។ សម្អាងលើហេតុផលនេះ លោក ម៉េងលី បញ្ជាក់ថា៖ «យើងមិនទាន់អាចនិយាយបានថា ការមិនរៀបចំលីគ២ វានឹងប៉ះពាល់ ឬមិនប៉ះពាល់ដល់លីគកំពូលនោះទេ គឺវាអាស្រ័យលើការបត់បែនរបស់CPL»។
ចំពោះការធ្វើបច្ចុប្បន្នភាពកំណែទម្រង់នៃការប្រកួតលីគនៅកម្ពុជា លោក កាំង សេន បានឱ្យដឹងថា ទិសដៅរបស់ CPL នៅដដែល គឺយើងចង់ក្លាយជាលីគដែលមានការប្រកួតប្រជែងខ្ពស់ គ្រាន់តែការអនុវត្តលើកនេះ យើងនឹងធ្វើឱ្យប្រសើរជាងមុន ព្រោះការអនុវត្តពីមុន ដោយសារយើងខ្វះចំណេះដឹងធ្វើការជាមួយគ្នានៅក្នុងស្រុក គឺការងារខ្លះបានធ្វើដោយតក់ក្រហល់ពេក ដូចជាការកំណត់ឱ្យក្លឹបនីមួយៗត្រូវមានអាជ្ញាបណ្ណក្លឹប (Club Licensing) ជាដើម។
អនុប្រធានក្រុមប្រឹក្សាភិបាលក្រុមហ៊ុន CPL រូបនេះបានបញ្ជាក់ថា៖ «យើងដឹងថា Club Licensing ត្រូវចំណាយច្រើន និងត្រូវប្រើពេលយូរ អ៊ីចឹងពេលខ្លះយើងមិនគួរជំរុញខ្លាំងពេកទេ។ យើងត្រូវជំរុញតាមដំណាក់កាលៗ តាមរយៈពេល និងតាមធនធានដែលយើងមាន ប៉ុន្តែឱ្យវាមានស្ថិរភាព កុំឱ្យយើងខំប្រឹងជំរុញហើយ វាធ្លាក់មកវិញ»។
លោកបន្ថែមថា៖ «គោលដៅ CPL នៅដដែល ប៉ុន្តែការអនុវត្តរបស់យើងនឹងខំប្រឹងឱ្យបានប្រសើរជាងមុន ដោយយើងនឹងទទួលយកមតិរបស់ក្លឹបឱ្យបានច្រើន ដើម្បីសម្រេចធ្វើការងារអ្វីមួយឱ្យបានល្អជាងមុន ក្នុងការគ្រប់គ្រងលីគរបស់យើង។ នៅពេលយើងចាប់ផ្តើមលីគ២ឡើងវិញ ខ្ញុំជឿថា ពេលនោះ CPL របស់យើងមានភាពរឹងមាំស្រេចទៅហើយ»។
ចំណែក លោក Peter Koo ដែលទើបត្រូវបានតែងតាំងជានាយកគ្រប់គ្រងទូទៅរបស់ក្រុមហ៊ុន CPL ជំនួសលោក Satoshi Saito ដែលផុតកិច្ចសន្យាពីតួនាទីជានាយកប្រតិបត្តិ កាលពីខែតុលា ឆ្នាំ២០២៣ បានបង្ហាញជំហរច្បាស់លាស់ក្នុងការដឹកនាំលីគកម្ពុជាឆ្ពោះទៅរកភាពរីកចម្រើន ហើយលោកក៏បានប្រកាសឈប់ពីតួនាទីជាអគ្គលេខាធិការក្លឹបកីឡាបាល់ទាត់ឡាយហ្វខេត្តព្រះសីហនុ (Life FC) ដើម្បីផ្តោតឱ្យបានខ្លាំងលើការងារថ្មីនេះផងដែរ។
បុរសសញ្ជាតិកូរ៉េខាងត្បូង លោក Peter Koo បាននិយាយថា៖ «នៅពេលខ្ញុំគ្រប់គ្រងក្លឹប ខ្ញុំបានដឹងពីស្ថានភាពបាល់ទាត់នៅស្រុកខ្មែរ។ ខ្ញុំចាប់ផ្តើមដឹកនាំក្រុម Life FC មិនមែនដើម្បីខ្លួនខ្ញុំទេ ប៉ុន្តែដើម្បីសង្គមកំពង់សោម ហើយឥឡូវនេះខ្ញុំអាចដកដៃចេញបានហើយ។ ចាប់ពីពេលនេះទៅខ្ញុំនឹងខិតខំដើម្បី CPL ព្រមទាំងក្លឹប និងកីឡាករនៅស្រុកខ្មែរយើងឱ្យបានល្អ ព្រោះចិត្តរបស់ខ្ញុំ ពិតជាស្រឡាញ់កីឡាករស្រុកខ្មែរមែនទែន»៕
