យុវជនមួយចំនួនចាត់ទុកការប្រើប្រាស់បារីអេឡិចត្រូនិក(E-Cigarette) អាចជួយកាត់បន្ថយភាពតានតឹងមួយកម្រិត និងខ្លះទៀតថាបានបង្ហាញពីភាពហ៊ឺហាក្នុងនាមយុវវ័យសម័យថ្មី ប៉ុន្តែពួកគេថាពុំបានដឹងពីផលប៉ះពាល់របស់វាឡើយ ខណៈក្រសួង និងអង្គការជាតិ-អន្តរជាតិពាក់ព័ន្ធអះអាងថាឧបករណ៍នេះផ្ដល់ផលប៉ះពាល់ធ្ងន់ធ្ងរដល់សុខភាពអ្នកប្រើប្រាស់។
យុវជនដែលនិយមប្រើប្រាស់បារីអេឡិចត្រូនិកមួយចំនួនបានអះអាងថា មិនបានដឹងពីផលប៉ះពាល់នៃការប្រើប្រាស់ឧបករណ៍នេះទេ ដោយពួកគេសង្កេតឃើញថាមិនមានឥទ្ធិពលដល់សុខភាពនោះឡើយ តាំងពីចាប់ផ្តើមប្រើប្រាស់មក។ ផ្ទុយទៅវិញ ពួកគេបានចាត់ទុកថាឧបករណ៍នេះជាវត្ថុជំនួយដើម្បីកាត់បន្ថយអារម្មណ៍តប់ប្រមល់ និងកាត់ផ្តាច់ការជក់បារីធម្មតា រួមទាំងបង្ហាញពីភាពហ៊ឺហានៅពេលដែលបានប្រើប្រាស់វាថែមទៀត។ ជាមួយគ្នា យុវជនខ្លះថាប្រើប្រាស់វាដោយចង់សប្បាយតាមមិត្តភក្តិ។
យុវតីម្នាក់ គឺកញ្ញា ពិសី (ឈ្មោះអ្នកសារព័ត៌មានដាក់ឱ្យ) ដែលទើបនឹងបញ្ចប់ការប្រឡងសញ្ញាបត្រមធ្យមសិក្សាទុតិយភូមិ(បាក់ឌុប)ឱ្យដឹងថា នាងបានប្រើប្រាស់បារីអេឡិចត្រូនិករយៈពេលប្រមាណកន្លះឆ្នាំមកហើយ ដោយភាគច្រើនពេលនៅជាមួយមិត្តភក្តិ។ កញ្ញាចាត់ទុកថា បារីអេឡិចត្រូនិកនេះជាឧបករណ៍សម្រាប់កម្សាន្តសប្បាយ ហើយក៏ជួយជាដោះស្រាយនៅពេលពិបាកចិត្ត និងស្មុគស្មាញដែរ។
កញ្ញា ពិសី ឱ្យដឹងថា៖ «បើសិនជាយើងប្រើវាពេលណាដែលយើងពិបាកចិត្ត យើងគិតច្រើន យើងស្មុគស្មាញអ៊ីចឹងទៅ យើងប្រើវាម្តងម្កាលទៅវាជួយបន្ធូរអារម្មណ៍យើងកុំឱ្យយើងតានតឹងពេក ធ្វើឱ្យយើងរកដំណោះស្រាយបាន»។
យុវតីវ័យ២0ឆ្នាំរូបនេះ បានរម្លឹកដែរថា កាលពីចាប់ផ្តើមប្រើប្រាស់ដំបូងអំឡុងពាក់កណ្តាលឆ្នាំ២០២២ កញ្ញាមិនបានគិតដល់ការជួយដោះស្រាយបញ្ហាតប់ប្រមល់អ្វីនោះទេ គិតតែម្យ៉ាងប៉ុណ្ណោះគឺដោយសារឃើញមិត្តភក្តិប្រើប្រាស់ហាក់ដូចហ៊ឺហា ហើយក៏បញ្ជាទិញតាមអនឡាញប្រើដែរ។ ពិសី បានអះអាងថា ឧបករណ៍នេះប្រសិនបើអ្នកដែលមិនធ្លាប់នោះប្រាកដជាញៀននឹងរសជាតិប្លែកៗរបស់វាជាក់ជាមិនខាន។
កញ្ញាបញ្ជាក់ថា៖ «ពីដំបូងឡើយខ្ញុំអត់មានថាចង់ប្រើវាដើម្បីបន្ធូរអារម្មណ៍អីទេ ដូចថាខ្ញុំឃើញពួកម៉ាកខ្ញុំប្រើឡូយ ខ្ញុំចង់ធ្វើតាមគេដែរ។ អានេះបើសិនជាសម្រាប់អ្នកអត់ធ្លាប់(ប្រើប្រាស់) ប្រសិនជាគាត់សាកហើយដឹងតែញ៉ាមហើយ»។
យុវតីដែលមានស្រុកកំណើតនៅរាជធានីភ្នំពេញរូបនេះឱ្យដឹងថា នាងមិនបានដឹងថាការប្រើប្រាស់បារីអេឡិចត្រូនិកនេះមានផលប៉ះពាល់ដល់សុខភាពនោះទេ ដោយកញ្ញាយល់ឃើញថា ឧបករណ៍នេះទំនងជាមិនប៉ះពាល់ទេ ព្រោះមិនដែលឃើញអ្នកប្រើមានបញ្ហាអ្វីដូចបារីធម្មតា។
កញ្ញា ពិសី បន្ថែមថា៖ «បើបារីខ្ញុំដឹងថាវាធ្វើឱ្យប៉ះពាល់[…] ប៉ុន្តែអានេះ(បារីអេឡិចត្រូនិក)ខ្ញុំអត់ដែលដឹងហ្មង ព្រោះថាអ្នកដែលប្រើហ្នឹង អត់ដែលឃើញមានបញ្ហាអីដោយសារ Vape ហ្នឹងផង»។
មិនខុសពីកញ្ញា ពិសី នោះទេ យុវជនម្នាក់ដែលបំពេញការងារជាបុគ្គលិកគ្រឹះស្ថានមីក្រូហិរញ្ញវត្ថុមួយកន្លែងនៅខេត្តបាត់ដំបង បានចាប់ផ្តើមប្រើប្រាស់ឧបករណ៍នេះតាមមិត្តភក្តិតាំងពីអំឡុងឆ្នាំ២០២០ នោះ គឺលោក ចិត្រ្តា (ឈ្មោះអ្នកសារព័ត៌មានដាក់ឱ្យ)។ លោកបានឱ្យដឹងថា រយៈពេលប្រមាណជាង២ឆ្នាំមកនេះ មិនដែលមានបញ្ហាអ្វីសោះ ដែលលោកចាត់ទុកថា ឧបករណ៍នេះមិនមានផលប៉ះពាល់ដល់សុខភាព។
លោកបញ្ជាក់ថា៖ «ជក់ទៅយើងអត់មានផលប៉ះពាល់ដល់សុខភាពទេអាហ្នឹងហ៎! បើខ្ញុំជក់ច្រើនឆ្នាំដែរ អត់មានឃើញអីផង»។
យុវជនវ័យ២២ឆ្នាំរូបនេះបានឱ្យដឹងថា មានហេតុផលនៃការសម្រេចចិត្តប្រើប្រាស់ឧបករណ៍នេះគឺដោយសារចង់សប្បាយ និងបង្ហាញពីភាពហ៊ឺហាដូចមិត្តភក្តិក្នុងនាមយុវវ័យសម័យថ្មី។
លោក ចិត្ត្រាថា៖ «អាហ្នឹងវាសប្បាយដែរ វាជួយយើងកុំឱ្យជក់បារីអីចឹងហា៎ស»។
ស្រដៀងនឹងយុវជនទាំង២ខាងលើដែរ យុវជនវ័យ ២៣ឆ្នាំម្នាក់ទៀត លោក មករា (ឈ្មោះអ្នកសារព័ត៌មានដាក់ឱ្យ) បានឱ្យដឹងដែរថា លោកបានប្រើប្រាស់បារីអេឡិចត្រូនិកនេះរយៈពេលប្រមាណជាងកន្លះឆ្នាំមកហើយ។ លោកថាឧបករណ៍នេះបានជួយបន្ធូរអារម្មណ៍ពេលមានបញ្ហាតប់ប្រមល់ និងគិតមិនចេញ ឱ្យមានដំណោះស្រាយ។ មិនត្រឹមតែជួយកាត់បន្ថយអារម្មណ៍តានតឹងនោះទេ ប៉ុន្តែលោក មករា ថាឧបករណ៍នេះបានជួយគាត់ឱ្យផ្តាច់បារីដែលធ្លាប់ជក់២កញ្ចប់ ជំនួសដោយការជក់បារីអេឡិចត្រូនិកនេះតែប្រមាណ៥ដងក្នុងមួយថ្ងៃវិញ។
លោកបន្តថា៖ «ខ្ញុំសាកល្បងប្រើវា! មែនវាផ្តាច់បារីបានមែន! ខ្ញុំឈប់ជក់បារី ហើយមកប្រើវាវិញ»។
យុវជនរូបនេះយល់ថា បារីអេឡិចត្រូនិក និងបារីធម្មតា សុទ្ធតែមានផលប៉ះពាល់ដូចគ្នា គ្រាន់តែលោកមើលឃើញថាឧបករណ៍នេះល្អ និងមានផលប៉ះពាល់តិចជាងបារីធម្មតា។ ទោះបីដឹងថាមានផលប៉ះពាល់សម្រាប់សុខភាព ប៉ុន្តែលោក មករា ថាមិនចង់ឈប់ប្រើប្រាស់បារីអេឡិចត្រូនិកនេះទេ ដោយសារឧបករណ៍នេះជារបស់តែម្យ៉ាងដែលតែងតែនៅជាប់ខ្លួនលោកជានិច្ច។
លោកបន្ថែមថា៖ «អត់ដែលចង់ឈប់ផង! ដោយសារពេលខ្លះដូចដែលខ្ញុំនិយាយអ៊ីចឹង ថាពេលខ្ញុំធ្វើការ ខ្ញុំស្រ្តេសគឺមានតែវាៗជួយខ្ញុំ»។
វេជ្ជបណ្ឌិតសាធារណៈលោក គួច ម៉េងលី បានចាត់ទុកថា ការអះអាងរបស់យុវជនថា ប្រើប្រាស់ឧបករណ៍នេះផ្តាច់បារីគ្រាន់ជាលេសមួយ ដើម្បីងាកទៅប្រើប្រាស់របស់ថ្មីប៉ុណ្ណោះ។ ផ្ទុយទៅវិញលោកថា ឧបករណ៍នេះមានផលប៉ះពាល់ទ្វេដង បើធៀបនឹងបារីធម្មតា ដោយសារមានផ្ទុកជាតិនីកូទីនខ្ពស់។
លោកបន្ថែមថា ឧបករណ៍នេះនឹងធ្វើឱ្យអ្នកប្រើប្រាស់ញៀន និងបណ្តាលឱ្យមានផលប៉ះពាល់ដល់សរីរាង្គទូទៅខ្លាំងជាងបារីធម្មតា ជាពិសេសការអភិវឌ្ឍខួរក្បាល និងសួត។ វាក៏បង្កផលអាក្រក់ដល់ការវិវត្តរបស់ទារកក្នុងករណីស្ត្រីមានផ្ទៃពោះប្រើប្រាស់។
លោក ម៉េងលី ថ្លែងថា៖ «ការប្រើប្រាស់ E-Cigarette នេះគឺខ្លាំងជាង(បារីធម្មតា) គឺនីកូទីនវាខ្ពស់ជាង វាធ្វើឱ្យមានការញៀនខ្លាំងជាង ហើយជាតិពុលក៏ច្រើនជាងផងដែរនៅក្នុងហ្នឹង»។
ក្រសួងសុខាភិបាលក៏ធ្លាប់បានគូសបញ្ជាក់កាលពីថ្ងៃទី២៤ ខែមិថុនាកន្លងទៅថា ការប្រើប្រាស់បារីអេឡិចត្រូនិកក្នុងចំណោមកុមារ និងមនុស្សវ័យជំទង់ មានផលប៉ះពាល់ធ្ងន់ធ្ងរដល់ការអភិវឌ្ឍខួរក្បាល មានអារម្មណ៍ឆាប់មួរម៉ៅ ឆាប់ខឹង បាត់បង់ការចងចាំ និងមានជំងឺថប់អារម្មណ៍ជាដើម។ លើសពីនេះ ពួកគេនឹងបន្តញៀនជក់បារី និងប្រើប្រាស់គ្រឿងញៀន នៅពេលពួកគេធំដឹងក្តីឡើង។
កាលពីថ្ងៃទី៥ ខែធ្នូ អង្គការចលនាសុខភាពកម្ពុជា(CMH) រកឃើញថា បណ្ដាញទំនាក់ទំនងសង្គមដូចជា Facebook Tik Tok និងTelegram ប្រមាណ ២០០គណនីដែលផ្សព្វផ្សាយលក់ឧបករណ៍នេះ ដោយបាន និងកំពុងអូសទាញឱ្យយុវជន និងកុមារចង់ប្រើប្រាស់ តាមរយៈផ្សព្វផ្សាយពីរសជាតិ និងក្លិនឈ្ងុយជាដើម។
លទ្ធផលបឋមនៃការសិក្សាស្រាវជ្រាវអង្គការដដែលបានបង្ហាញថា យុវជន និងកុមារដែលជាសិស្សភាគច្រើន បានឃើញ បានស្គាល់ ជាពិសេសបានទិញបារីអេឡិចត្រូនិកមកប្រើប្រាស់ តាមរយៈបណ្ដាញទំនាក់ទំនងសង្គម។
ប្រធានមជ្ឈមណ្ឌលប្រជាពលរដ្ឋដើម្បីការអភិវឌ្ឍ និងសន្តិភាព លោក យ៉ង់ គឹមអេង បានសង្កេតឃើញថា ទោះបីអាជ្ញាធរពាក់ព័ន្ធធ្លាប់បានទប់ស្កាត់ជាបន្តបន្ទាប់ក្តី ប៉ុន្តែមួយរយៈចុងក្រោយនេះ បារីអេឡិចត្រូនិកមានការផ្សព្វផ្សាយលក់ជាច្រើន ដែលរដ្ឋាភិបាលគួរមានវិធានការជាក់លាក់ ដើម្បីទប់ស្កាត់កុំឱ្យមានផលប៉ះពាល់ដល់អ្នកប្រើប្រាស់ ជាពិសេសយុវជន។
លោកមានប្រសាសន៍ថា៖ «រឿងបារីអេឡិចត្រូនិចនេះវាមិនមែនជារឿងធម្មតានោះទេ! ហើយក៏គួរតែមានការទប់ស្កាត់ គួរតែមានការហាមឃាត់កុំឱ្យមានការប្រើប្រាស់ដែរ ដើម្បីជាការជួយទៅដល់យុវជនកុំឱ្យនាំគ្នាភ្លើតភ្លើនទៅប្រើប្រាស់បារីអីហ្នឹង នេះជារឿងសំខាន់។ អ៊ីចឹង! ខ្ញុំស្នើសុំឱ្យរាជរដ្ឋាភិបាលពិចារណាចាត់វិធានការចំពោះបញ្ហាហ្នឹងផងដែរ»។
អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន លោក មាស វីរិទ្ធ បានឱ្យដឹងថា មកទល់ពេលនេះលោកពុំទាន់ទទួលបានព័ត៌មានកើនឡើងនៃការប្រើប្រាស់បារីអេឡិចត្រូនិកនៅឡើយទេ។ យ៉ាងណាមិញ លោកបានអះអាងថា ចំពោះករណីរីករាលដាលនៃការលក់ដោយបើកចំហគឺពុំមានការកើនឡើងនោះឡើយ។ ប៉ុន្តែលោកទទួលស្គាល់ថា មានការចរាចរលក់នៅលើបណ្ដាញសង្គមអនឡាញ ដែលលោកចាត់ទុកថាជាករណីពិបាកគ្រប់គ្រង។
លោក វីរិទ្ធ ថ្លែងថា៖ «ក្នុងព័ត៌មានដែលយើងទទួលបានគឺមិនមានការរីករាលដាលពាក់ព័ន្ធទៅនឹងការដាក់តាំងលក់ជាចំហជាអីទេ។ ប៉ុន្តែលឺតែនិយាយថាដាក់លក់តាមអនឡាញ […] យើងទទួលស្គាល់ថាតាមប្រព័ន្ធអនឡាញមានការលំបាក ព្រោះមានបញ្ហាច្រើន យើងមិនទាន់អាចគ្រប់គ្រងបានទាំងស្រុង»។
មាត្រា៩ និង៣៩នៃច្បាប់ស្តីពីការត្រួតពិនិត្យផលិតផលថ្នាំជក់បានចែងថា ការប្រើប្រាស់ពាក្យដែលទាក់ទាញ និងធ្វើឱ្យយល់ច្រឡំដូចជា ក្លិនឈ្ងុយ រសជាតិស្រាល រសជាតិវីតាមីន ឬកាហ្វេអ៊ីននៅក្នុងផលិតផលថ្នាំជក់ត្រូវបានហាមឃាត់។ ក្នុងករណីជួញដូរ និងប្រើប្រាស់ នឹងត្រូវពិន័យជាប្រាក់ពី១ទៅ៤លានរៀល ហើយប្រសិនបើធ្លាប់ត្រូវបានផ្តន្ទាទោសពិន័យនេះ ហើយនៅតែល្មើសដដែលក្នុងអំឡុងពេល២ឆ្នាំ នឹងត្រូវផ្តន្ទាទោសទ្វេដង។
លោក វីរិទ្ធ បានលើកឡើងថា កន្លងមកអាជ្ញាធរបានរួមសហការ និងផ្ដល់ជាព័ត៌មានក្នុងការបង្រ្កាបទៅកាន់អង្គភាពពាក់ព័ន្ធទាំង២៥ខេត្តក្រុងរួចមកហើយ។ យ៉ាងណា លោកថា ប្រសិនបើមានការរកឃើញបន្ថែមនោះលោកនឹងក្រើនរំលឹកទៅកាន់អង្គភាពទៅតាមខេត្តគោលដៅដើម្បីចុះអន្តរាគមន៍។
ជាមួយគ្នា លោកក៏បានបញ្ជាក់ដែរថា ប្រសិនបើមានការរកឃើញថាមានការកើនឡើងណាមួយនោះ គួរតែដាក់ពាក្យស្នើសុំមកកាន់អង្គភាពផ្ទាល់ដើម្បីឱ្យមានការជំរុញ និងចូលរួមសហការក្នុងការបង្រ្កាបដោយលោកអះអាងថាខាងអង្គភាពតែងតែចាំទទួល ក៏ដូចជាធ្វើការឆ្លើយតបយ៉ាងសមប្រកបជានិច្ច។
លោកបន្ថែមថា៖ «ពួកយើងណែនាំទៅអស់ហើយ ទៅតួអង្គអនុវត្តច្បាប់អស់ហើយ ខ្ញុំបានណែនាំអស់ហើយ។ អញ្ចឹងបើមានអីទៀតយើងក្រើនរម្លឹកគេទៀត ដាស់តឿនគេទៀត។ ខ្ញុំអត់ទាន់ឃើញមានព័ត៌មានគាត់ថាកើនឡើងតាមរយៈអ្វី? តាមតែមាត់អត់បានដឹងផង។ បើមានលិខិតស្នើសុំមក ចេះតែជំរុញបង្កើនការយកចិត្តទុកដាក់ក្នុងការអនុវត្ត ការបង្ការទប់ស្កាត់»។
ផលិតផលបារីអេឡិចត្រូនិក ជាផលិតផលដែលត្រូវបានហាមឃាត់ការចែកចាយ ការធ្វើអាជីវកម្ម និងប្រើប្រាស់នៅកម្ពុជា យោងតាមសេចក្ដីណែនាំស្ដីពីការចាត់វិធានការបង្ការ បញ្ឈប់ការប្រើប្រាស់ ការធ្វើអាជីវកម្ម និងការនាំចូលផលិតផលស៊ីហ្សា (Sisha) និងបារីអេឡិចត្រូនិក (E-Cigarette) នៅកម្ពុជាចុះឆ្នាំ២០១៤។
សមត្ថកិច្ចជំនាញនៃមន្ទីរប្រឆាំងបទល្មើសគ្រឿងញៀន កាលពីថ្ងៃទី១៣ ខែកក្កដា ឆ្នាំ២០២២ បានចុះបង្ក្រាបទីតាំងចែកចាយបារីអេឡិចត្រូនិកមួយកន្លែងស្ថិតក្នុងខណ្ឌច្បារអំពៅ រាជធានីភ្នំពេញ ដកហូតបានម៉ាស៊ីនបារីអេឡិចត្រូនិកចំនួន ៩០កេស និងទឹកបារីអេឡិចត្រូនិកចំនួន១៣៨កេស។
ក្រសួងសុខាភិបាល និងក្រសួងអប់រំ កាលពីថ្ងៃទី២៤ ខែមិថុនា កន្លងទៅ បានចេញសេចក្តីណែនាំព្រមគ្នា ដោយអំពាវនាវដល់យុវជន និងពលរដ្ឋ ឱ្យបញ្ឈប់ការប្រើប្រាស់បារីអេឡិចត្រូនិច (E-cigarette) ជាបន្ទាន់។ នេះក៏មិនមែនជាលើកទី១ដែរ ដោយក្រសួងសុខភិបាលធ្លាប់បានប្រកាសហាមឃាត់ការប្រើប្រាស់ និងការធ្វើអាជីវកម្ម ចែកចាយឧបករណ៍នេះកាលពីឆ្នាំ២០១៤ និងបានចេញសេចក្តីប្រកាសណែនាំបន្ថែមកាលពីឆ្នាំ២០២១ ជុំវិញគ្រោះថ្នាក់នៃឧបករណ៍ប្រភេទអេឡិចត្រូនិកនេះ។
វិលមកវេជ្ជបណ្ឌិតសាធារណៈ លោក គួច ម៉េងលី បានជំរុញ និងទទូចស្នើឱ្យអាជ្ញាធរពាក់ព័ន្ធពង្រឹងវិធានការទប់ស្កាត់កុំឱ្យមានការនាំចូលនូវផលិតផល ឬឧបករណ៍ដែលប៉ះពាល់ដល់សុខភាពបែបនេះតទៅទៀត។ លោកអះអាងថា ជារឿងមួយដែលមិនអាចទប់ស្កាត់ទៅរួច ប្រសិនបើហាមឃាត់ការប្រើប្រាស់ ប៉ុន្តែអនុញ្ញាតឱ្យមានការនាំចូល។
លោក ម៉េងលី បន្ថែមទៀតថា៖ «បើចង់កុំឱ្យប្រជាពលរដ្ឋយើងជក់ យើងហាមកុំឱ្យនាំចូល! ហើយបើយើងមិនចង់ឱ្យជក់ យើងចេះតែឱ្យនាំចូលបាន អាហ្នឹងមិនបាច់ទប់ស្កាត់អី វាអត់ទៅមុខទេ»៕
