ក្រោយពីបានផ្ទុះការតវ៉ាអស់រយៈពេលពីរថ្ងៃកន្លះ ដើម្បីទាមទារលក្ខខណ្ឌការងារសមរម្យ កម្មករនៅរោងចក្រកាត់ដេរតារ៉ាល់អន្តរជាតិដែលមានទីតាំងក្នុងខេត្តកំពង់ស្ពឺ បានយល់ព្រមចូលធ្វើការវិញដូចធម្មតា។ យ៉ាងណា នៅមានចំណុចមួយដែលកម្មករទាមទារនៅមិនទាន់បានដោះស្រាយ នោះគឺបញ្ហាថ្លៃបាយថ្ងៃត្រង់ និងថាពួកខ្លួននឹងបន្តទាមទារលើចំណុចនេះទៀត។
ការតវ៉ានេះកើតឡើងកាលពីថ្ងៃទី២ ខែតុលា បន្ទាប់ពីភាគីរោងចក្របានបញ្ចប់កិច្ចសន្យាការងារលើអ្នកបើកបររថយន្តសម្រាប់កម្មករ។ ការតវ៉ានេះបានរីករាលដាលកាន់តែធំនៅថ្ងៃបន្ទាប់ ដោយកម្មករបានបិទផ្លូវជាតិលេខ៣ បន្ទាប់ពីបានដឹងថាប្រាក់ខែរបស់ពួកគាត់នឹងត្រូវកាត់បើសិនជាឈប់ធ្វើការដើម្បីចូលរួមការតវ៉ា។ បន្ថែមពីជំទាស់ទៅនឹងការកាត់ប្រាក់ខែ កម្មករក៏បានទាមទារលក្ខខណ្ឌការងារល្អប្រសើរ រួមទាំងប្រាក់ថ្លៃបាយថ្ងៃត្រង់២ពាន់រៀលផងដែរ។
នៅថ្ងៃតវ៉ាទីពីរ មន្ត្រីក្រសួងការងារបានចុះអន្តរាគមន៍ ដោយបានសម្របសម្រួលរវាងកម្មករ និងអ្នកគ្រប់គ្រងរោងចក្រ។ ការទាមទារភាគច្រើនរបស់កម្មករត្រូវបានទទួលយក លើកលែងតែប្រាក់ថ្លៃបាយថ្ងៃត្រង់ និងបញ្ហាកាត់ប្រាក់ខែដោយសារចូលរួមការតវ៉ា។ ដោយនៅតែមិនពេញចិត្ត កម្មករបានបន្តការតវ៉ានៅព្រឹកថ្ងៃទី៤ ខែតុលា ទៀត។
លោក ថន ធុន មន្ត្រីសហព័ន្ធសហជីពសេរីកម្មករ នៃព្រះរាជាណាចក្រកម្ពុជា(FTUWKC) បានឲ្យ សារព័ត៌មានខេមបូចា ដឹងថា កម្មករបានវិលចូលធ្វើការវិញហើយក្រោយពីភាគីរោងចក្រយល់ព្រមមិនកាត់ប្រាក់ឈ្នួលពួកគេអំឡុងថ្ងៃតវ៉ា។ លោកថាកម្មករបានវិលចូលធ្វើការវិញនៅព្រឹកថ្ងៃសៅរ៍។
លោក ណាក់ ជាកម្មករម្នាក់ក្នុងរោងចក្រតារ៉ាល់ ប្រាប់ សារព័ត៌មានខេមបូចា ថា លោកពេញចិត្តទៅនឹងលទ្ធផលដែលសម្រេចបានក្រោយការពិភាក្សាគ្នារវាងថ្នាក់ដឹកនាំរោងចក្រ និងភាគីពាក់ព័ន្ធ ហើយថាកម្មករបានវិលចូលធ្វើការវិញហើយ។
យ៉ាងណា លោក និងកម្មករផ្សេងទៀតគឺ «មិនពេញចិត្តទាំងស្រុងទេ» ព្រោះថាបញ្ហាថ្លៃបាយថ្ងៃត្រង់នៅមិនទាន់បានដោះស្រាយ។
លោកឲ្យដឹងថា៖ «ខាងរោងចក្រនៅពិភាក្សាលើថ្ងៃបាយថ្ងៃត្រង់នៅឡើយ…យើងមិនច្បាស់ថាយើងនឹងតវ៉ាទៀតឬអត់ទេ។ សម្រាប់ពេលនេះ យើងធ្វើតាមសំណើឲ្យវិលចូលធ្វើការវិញដូចធម្មតា។ ខ្ញុំគ្រាន់តែសង្ឃឹមថាពួកគាត់នឹងដោះស្រាយបញ្ហានេះឆាប់ៗ វានឹងធ្វើឲ្យយើងមានអារម្មណ៍ធូរចិត្ត និងមានកម្លាំងចិត្តធ្វើការ»។
បើតាមសៀវភៅណែនាំអំពីច្បាប់ស្តីពីការងារនៃប្រទេសកម្ពុជាសម្រាប់វិស័យកាត់ដេរ មានតែកម្មករធ្វើការថែមម៉ោងប៉ុណ្ណោះដែលនឹងត្រូវទទួលបានថ្លៃបាយចំនួន២ពាន់រៀល ឬទទួលបានអាហារញ៉ាំមួយពេលនៅថ្ងៃដែលធ្វើការថែមម៉ោង។
លោក ចឹក បូរិន ប្រធានមន្ទីរការងារខេត្តកំពង់ស្ពឺ ប្រាប់ សារព័ត៌មានខេមបូចា ថា បញ្ហានៃជម្លោះភាគច្រើនបានដោះស្រាយរួចរាល់ នៅសល់តែបញ្ហាថ្លៃបាយថ្ងៃត្រង់។ យ៉ាងណាលោកថាការទាមទាររបស់កម្មករលើអត្ថប្រយោជន៍បន្ថែមនេះមិនស្របទៅតាមច្បាប់ស្ដីពីការងារនោះទេ។
លោកបន្ថែមថា ក្រុមហ៊ុនបានយល់ព្រមពិចារណាលើសំណើរ ហើយថានឹងពិភាក្សាបន្តទៀតជាមួយប្រធានក្រុមប្រឹក្សាភិបាល រួចនឹងធ្វើការសម្រេចតាមក្រោយ៕
ប្រែសម្រួលពីអត្ថបទភាសាអង់គ្លេស៖ Taral Factory Workers Return to Work After Protest, Lunch Allowance Issue Unresolved
