អាជ្ញាធរមូលដ្ឋាន និងសារព័ត៌មានថៃបានរាយការណ៍ថា ផ្ទះយ៉ាងហោចណាស់មួយខ្នងដែលជាកម្មសិទ្ធិរបស់អ្នកភូមិខ្មែរនៅតំបន់ព្រំដែនមានជម្លោះក្នុងខេត្តបន្ទាយមានជ័យ ត្រូវបានអាជ្ញាធរថៃរុះរើកាលពីថ្ងៃអង្គារ ទី២១ ខែតុលា ឆ្នាំ២០២៥។
គ្រឿងចក្រដែលអមដោយទាហានថៃបានចាប់ផ្តើមឈូសឆាយផ្ទះអ្នកភូមិខ្មែរមួយខ្នងនៅល្ងាចថ្ងៃអង្គារ ក្នុងភូមិជោគជ័យ ដែលស្ថិតនៅខាងក្រោយរបាំងបន្លាលួសតាមបណ្តោយព្រំដែនខេត្តបន្ទាយមានជ័យ។ ថៃអះអាងថា តំបន់នេះជាផ្នែកមួយនៃភូមិបានណងចាន់ ក្នុងខេត្តស្រះកែវ។
ភូមិជោគជ័យ និងភូមិព្រៃចាន់ដែលនៅក្បែរនោះ បានក្លាយជាចំណុចក្ដៅចាប់តាំងពីមានបទឈប់បាញ់ដែលបានបញ្ចប់ការប៉ះទង្គិចគ្នារយៈពេល៥ថ្ងៃនៅតាមព្រំដែនរវាងប្រទេសជិតខាងទាំងពីរដែលបណ្ដាលឱ្យមនុស្សរាប់សិបនាក់ស្លាប់ និងធ្វើឱ្យប្រជាជនរាប់សែននាក់ត្រូវបង្ខំចិត្តចាកចេញពីផ្ទះសម្បែង។ ចាប់តាំងពីពេលនោះមក កងកម្លាំងថៃបានសង់រនាំងនៅក្នុងភូមិខ្មែរដែលប្រជាជនបានរស់នៅជាយូរលង់មកហើយ ហើយបានបញ្ជាឱ្យអ្នកភូមិចាកចេញពីលំនៅឋាន ដោយពួកគេមិនត្រូវបានអនុញ្ញាតឱ្យត្រឡប់ចូលទៅផ្ទះវិញអស់រយៈពេលជាងពីរខែមកហើយ។
ភាពតានតឹងនេះក៏បានបង្កឱ្យមានការប៉ះទង្គិចគ្នាដោយហិង្សារវាងទាហានថៃនិងជនស៊ីវិលកម្ពុជាផងដែរ។
លោកប៉ែន រិទ្ធី មេភូមិជោគជ័យបានលើកឡើងថា ពលរដ្ឋខ្មែរចំនួន៦គ្រួសារត្រូវបានកងកម្លាំងថៃបណ្ដេញចេញពីផ្ទះរបស់ពួកគេ។ លោកបានបញ្ជាក់ថា ផ្ទះយ៉ាងហោចណាស់មួយខ្នងត្រូវបានឈូសឆាយចាប់តាំងពីថ្ងៃអង្គារ ប៉ុន្តែបដិសេធមិនធ្វើអត្ថាធិប្បាយបន្ថែមទេ។
លោក លី សុវណ្ណារិទ្ធ អភិបាលរងខេត្តបន្ទាយមានជ័យក៏បានបញ្ជាក់ថាពិតជាមានការរុះរើផ្ទះអ្នកភូមិខ្មែរមួយខ្នងពិតមែន។
អ្នកនាំពាក្យរដ្ឋាភិបាលលោកប៉ែន បូណា បដិសេធមិនធ្វើអត្ថាធិប្បាយ ដោយបង្វែរសំណួរទៅអាជ្ញាធរខេត្តបន្ទាយមានជ័យវិញ។
អ្នកស្រីនាត សុខុម ជាអ្នកភូមិជោគជ័យបាននិយាយថា អ្នកស្រីបារម្ភថា ផ្ទះរបស់ខ្លួនអាចនឹងត្រូវគេរុះរើដែរ ទោះបីជាវាស្ថិតនៅចម្ងាយប្រហែល ៣០០ ម៉ែត្រពីមុខរបាំងដែលសង់ឡើងដោយទាហានថៃក៏ដោយ។
គាត់បាននិយាយថា៖ «ខ្ញុំបារម្ភថា ទាហានថៃអាចបន្តរុលទៅមុខទៀត ហើយវាយកម្ទេចផ្ទះរបស់ខ្ញុំដែរ»។
ការរុះរើនេះធ្វើឡើងស្របពេលដែលគណៈកម្មាធិការព្រំដែនចម្រុះនៃប្រទេសទាំងពីរកំពុងបន្តប្រជុំគ្នា ដែលមានទាំងកិច្ចប្រជុំនៅថ្ងៃពុធផងដែរ ហើយកម្ពុជាបាននិយាយថា កិច្ចព្រមព្រៀងសន្តិភាពត្រូវបានគេរំពឹងថានឹងត្រូវចុះហត្ថលេខានៅក្នុងកិច្ចប្រជុំកំពូលអាស៊ានដែលនឹងប្រព្រឹត្តទៅនៅប្រទេសម៉ាឡេស៊ីនៅចុងសប្តាហ៍នេះ។
បន្ទាប់ពីកិច្ចចរចាកាលពីថ្ងៃទី១៧ ខែតុលា នៅប្រទេសម៉ាឡេស៊ី រដ្ឋមន្ត្រីការបរទេសកម្ពុជាលោកប្រាក់ សុខុន បានមានប្រសាសន៍ថា កិច្ចព្រមព្រៀងនេះនឹងរួមបញ្ចូលការដោះលែងទាហានកម្ពុជាចំនួន១៨នាក់ដែលកំពុងឃុំខ្លួននៅក្នុងប្រទេសថៃចាប់តាំងពីបទឈប់បាញ់ចូលជាធរមានកាលពីខែកក្កដា។
មន្ត្រីថៃបានលើកឡើងនៅពេលក្រោយថា ការដោះលែងទាហានទាំងនោះ គឺអាស្រ័យលើលក្ខខណ្ឌមួយចំនួន ដែលរួមមាន ការដកកងទ័ពកម្ពុជាចេញពីទីតាំងនៅតាមព្រំដែន និងអ្វីដែលជាបញ្ហាចម្រូងចម្រាសបំផុតនោះ គឺការរៀបចំទីលំនៅថ្មីដល់ពលរដ្ឋកម្ពុជា ដែលរដ្ឋាភិបាលបាងកកចោទថា បានចូលកាន់កាប់ដីថៃដោយខុសច្បាប់។ ក្នុងបរិបទដែលមានការព្រួយបារម្ភជាសាធារណៈកាន់តែខ្លាំងឡើងថាកម្ពុជាអាចនឹងបាត់បង់ទឹកដី។ លោកនាយករដ្ឋមន្ត្រី ហ៊ុន ម៉ាណែត បានចេញសេចក្តីថ្លែងការណ៍មួយកាលពីចុងសប្តាហ៍មុន ដោយបញ្ជាក់យ៉ាងច្បាស់ថា កិច្ចព្រមព្រៀងនេះនឹងមិនធ្វើឱ្យបាត់បង់ដែនអធិបតេយ្យភាពនិងបូរណភាពទឹកដីស្របច្បាប់របស់កម្ពុជាទេ៕
ប្រែសម្រួលពីអត្ថបទភាសាអង់គ្លេស៖ Thai Authorities Tear Down Cambodian Home in Tense Border Zone
