រដ្ឋាភិបាលថៃកំពុងសិក្សាពីលទ្ធភាពសាងសង់ជញ្ជាំងព្រំដែនជាមួយកម្ពុជា ដោយបញ្ជាក់ថាដើម្បីការពារការលួចឆ្លងដែនខុសច្បាប់ ខណៈភាគីកម្ពុជាថាមិនទាន់បានទទួលព័ត៌មានផ្លូវការណាមួយនៅឡើយ។
អ្នកនាំពាក្យរដ្ឋាភិបាលថៃ លោក Jirayu Houngsub បានលើកឡើងថា៖ «នាយករដ្ឋមន្ត្រីរបស់ខ្លួនបានបញ្ជាឲ្យគណៈរដ្ឋមន្ត្រី និងភ្នាក់ងារពាក់ព័ន្ធសិក្សាឲ្យបានល្អិតល្អន់ពីគម្រោងសង់ជញ្ជាំងព្រំដែនរវាងកម្ពុជា-ថៃ ដើម្បីការពារការលួចឆ្លងដែនខុសច្បាប់ និងការលួចធ្វើដំណើរទៅធ្វើការនៅមជ្ឈមណ្ឌលឆបោកតាមអនឡាញ ក៏ដូចជាការជួញដូរគ្រឿងញៀន និងការធ្វើពាណិជ្ជកម្មខុសច្បាប់នានា»។ នេះបើតាមការចុះផ្សាររបស់វិទ្យុអាស៊ីសេរី។
ការណ៍នេះទំនងជាផ្នែកមួយនៃកិច្ចខិតខំរបស់ថៃក្នុងការធ្វើការជាមួយប្រទេសនានាក្នុងគោលបំណង «លុបបំបាត់បណ្ដាញរបស់មជ្ឈមណ្ឌលឆបោកតាមអនឡាញ» ដែលមានមូលដ្ឋាននៅក្រៅទឹកដីថៃ។
ការពិភាក្សនេះធ្វើឡើងដោយគណៈរដ្ឋមន្ត្រីបន្ទាប់ពីអ្នកស្រីនាយករដ្ឋមន្ត្រីថៃ Paetongtarn Shinawatra បានមកធ្វើទស្សនកិច្ចនៅច្រកព្រំដែនខ្លកឡឹកក្នុងស្រុកអារញ្ញប៉ាថេត ខេត្តស្រះកែវ ប្រទេសថៃ កាលពីថ្ងៃទី១ ខែមីនា។
កម្ពុជា-ថៃ មានព្រំដែនជាប់គ្នាប្រវែង៨១៧គីឡូម៉ែត្រ និងមានបង្គោលព្រំដែន១២១ ក្នុងចំណោម១៤៥ បានបោះរួចរាល់ ដែលស្មើនឹង៨៦ភាគរយនៃបង្គោលព្រំដែនសរុប។ នេះបើយោងតាមការផ្សាយរបស់កាសែតភ្នំពេញប៉ុស្ដិ៍។
អ្នកនាំពាក្យក្រសួងការបរទេសកម្ពុជា លោក ជុំ សុន្ទរី ប្រាប់ សារព័ត៌មានខេមបូចា តាមតេឡេក្រាមថា កម្ពុជាមិនទាន់បានទទួលសំណើជាផ្លូវការណាមួយពីភាគីថៃនៅទ្បើយពាក់ព័ន្ធករណីនេះ។ លោកសរសេរទៀតថា៖ «ដូចនេះ ខ្ញុំមិនមានព័ត៌មានអ្វីផ្ដល់ជូនទេ»។
កាលពីដើមខែមីនា អគ្គនាយកដ្ឋានអន្តោប្រវេសន៍កម្ពុជា បានបញ្ជូនជនជាតិថៃចំនួន១១៩នាក់ ក្នុងនោះស្រី៥៨នាក់ តាមច្រកព្រំដែនគោកក្រុងប៉ោយប៉ែត ទៅកាន់ប្រទេសថៃវិញ។ ការបញ្ជូននេះធ្វើឡើងក្រោយពីមានការឆ្មក់ចូលទីតាំងដែលគេសង្ស័យថាជាមជ្ឈមណ្ឌលឆបោកអនឡាញ និងបានរកឃើញអ្នកទាំងនោះស្នាក់នៅ និងធ្វើការខុសច្បាប់ ដើម្បីបានប្រាក់ខែខ្ពស់ ដោយធ្វើជាអ្នកឆបោកអនឡាញ។ អាជ្ញាធរបានចុះបង្ក្រាបលើអាគារចំនួនពីរ ហើយបានរកឃើញជនបរទេស២៣០នាក់ ដែលជាប់ពាក់ព័ន្ធនឹងប្រតិបត្តិការឆបោកតាមអនឡាញ។
កាលពីថ្ងៃអាទិត្យ អនុរដ្ឋមន្ត្រីក្រសួងសន្តិសុខសាធារណៈចិន លោក Liu Zhongyi បានទៅទស្សនកិច្ចនៅច្រកទ្វារអន្តរជាតិប៉ោយប៉ែត ហើយលោកបានជួបជជែកជាមួយមន្ត្រីថ្នាក់ខេត្ត ដើម្បីដោះស្រាយបញ្ហាឆបោកតាមអនឡាញ។
ទន្ទឹមនឹងនេះដែរ ស្នងការខេត្តបន្ទាយមានជ័យ លោក សិទ្ធិ ឡោះ មានប្រសាសន៍ថាលោកមិនបានទទួលព័ត៌មានអ្វីពីភាគីថៃទាក់ទងនឹងការសាងសង់ជញ្ជាំងព្រំដែននោះទេ។
លោកប្រាប់ សារព័ត៌មានខេមបូចា ថា៖ «ខ្ញុំមិនបានចាប់អារម្មណ៍កិច្ចការរបស់ប្រទេសថៃទេ។ បើសិនជាគេចង់សាងសង់អីលើទឹកដីគាត់ឱ្យគាត់សាងសង់ចុះ ប៉ុន្តែកុំឲ្យតែប៉ះពាល់ទឹកដីកម្ពុជា និងតំបន់ព្រំដែនដែលមិនទាន់ឯកភាពគ្នា»។
លោក សិទ្ធិ ឡោះ បានបង្វែរសំណួរទាក់ទងនឹងរឿងព្រំដែននេះ ទៅរដ្ឋលេខាធិការដ្ឋានកិច្ចការព្រំដែន ប៉ុន្តែអ្នកសារព័ត៌មានខេមបូចា មិនអាចទាក់ទងរដ្ឋមន្ត្រីទទួលបន្ទុកកិច្ចការព្រំដែន លោក ឡាំ ជា បានទេ។
អ្នកសម្របសម្រួលអង្គការអាដហុកប្រចាំខេត្តបន្ទាយមានជ័យ លោក ស៊ុំ ចន្ទគា យល់ឃើញថាការសាងសង់របង ឬជញ្ជាំងព្រំដែនដើម្បីការពារបទល្មើសឆ្លងដែន គឺជាជំហានវិជ្ជមាន។
លោកមានប្រសាសន៍ថា៖ «យើងបានឃើញបទល្មើសឆ្លងដែនខុសច្បាប់ជាច្រើន ដែលវានាំឲ្យមានការរំលោភបំពានសិទ្ធិមនុស្ស មានការចាប់ចង និងធ្វើទុក្ខម្នេញដោយសារការចាប់ខ្លួនដល់ប្រជាពលរដ្ឋផ្សេងៗ»។
លោកបន្ថែមថា៖ «ពេលមានរបងនៅតាមព្រំដែន វានឹងកាត់បន្ថយការរំលោភបំពានសិទ្ធិមនុស្សទាក់ទងនឹងការលួចឆ្លងដែនខុសច្បាប់»។
លោកកត់សម្គាល់ថា ការលួចឆ្លងដែនខុសច្បាប់អាចកើតឡើងបានដោយសារមានមន្ត្រីខិលខូចមួយចំនួនរបស់កម្ពុជា និងថៃលួច «គប់គិតគ្នា» ជាពិសេសនៅតាមច្រករបៀងនានា។
លោក មឿន តុលា នាយកប្រតិបត្តិនៃអង្គការសង់ត្រាល់ បានលើកឡើងថា ការធ្វើរបងរបស់ថៃនេះ មិនមែនផ្តោតទៅលើពលករឆ្លងដែនខុសច្បាប់ដើម្បីទៅធ្វើការនៅប្រទេសថៃប៉ុន្មានទេ ព្រោះសកម្មភាពនេះជាហូរហែមកហើយ ព្រោះពលករបរទេសទៅធ្វើការងារអ្វីដែលជនជាតិថៃមិនធ្វើ គឺភាគច្រើនជាការងារប្រើកម្លាំង។
លោក តុលា ថ្លែងថា៖ «ខ្ញុំយល់ថា ការធ្វើរបងនេះមិនមែនរឿងបារម្ភពលករឆ្លងដែនដោយខុសច្បាប់នេះទេ អ្វីដែលខ្ញុំយល់ ខ្ញុំគិតថា បារម្ភខ្លាំងគឺរឿងឆបោកតាមប្រព័ន្ធអនឡាញ ដោយសារតែ អាចថា ក្រុមឧក្រិដ្ឋជនឆបោកតាមប្រអនឡាញឆ្លងដែនថៃខ្មែរៗនេះឯង មួយរយៈកន្លងមកនេះ ឃើញថៃផ្តាច់ប្រព័ន្ធទូរសព្ទ ឬប្រព័ន្ធអ៊ីនធឺណិតនេះឯង»។ លោកបន្តថា៖ «ហើយថ្មីៗនេះក៏មានជនរងគ្រោះថៃនេះដែរ ដែលគេធ្វើទារុណកម្មគាត់ស្ទើរស្លាប់យកទៅបោះចោល»។
អ្នកនាំពាក្យរដ្ឋាភិបាល លោក ប៉ែន បូណា បដិសេធអត្ថាធិប្បាយលើគម្រោងសាងសង់ជញ្ជាំងព្រំដែនរបស់ថៃនេះ។
អ្នកនាំពាក្យក្រសួងការពារជាតិ លោក ឈុំ សុជាតិ និងអគ្គនាយកនៃអគ្គនាយកដ្ឋានជនអន្តោប្រវេសន៍ លោក សុខ វាសនា មិនអាចទាក់ទងសុំការអត្ថាធិប្បាយបានទេ។
អ្នកនាំពាក្យរដ្ឋាភិបាលថៃ លោក Jirayu Houngsub ក៏មិនបានឆ្លើយតបសំណួររបស់ អ្នកសារព័ត៌មានខេមបូចា ដែរ។
ប្រែសម្រួលពីអត្ថបទភាសាអង់គ្លេស៖ Thailand Studies Border Wall Construction, Cambodia Yet to Receive Official Information
