លោកនាយករដ្ឋមន្ត្រីហ៊ុន ម៉ាណែតមានគោលដៅចង់កែប្រែសាលារដ្ឋ៧០០០កន្លែងឱ្យដូចជាសាលាបឋមសិក្សាវត្តរាជបូណ៌ ព្រោះសាលាបឋមសិក្សាវត្តរាជបូណ៌ជាសាលា«ជ័យលាភីសាលារៀនគំរូ»ដែលមានកេរ្តិ៍ឈ្មោះល្បីជាច្រើនឆ្នាំមកហើយដោយសារតែសាលាដែលស្ថិតនៅកណ្តាលក្រុងសៀមរាបមួយនេះបានផ្តល់ការអប់រំមានគុណភាពកម្រិតខ្ពស់ មានវិន័យ និងមានសីលធម៌ល្អ។
នៅក្នុងទស្សនកិច្ចក្រៅផ្លូវការ នៅសាលាបឋមសិក្សាត្រពាំងក្អែក ស្ថិតក្នុងភូមិត្រពាំងក្អែក សង្កាត់វាលពង់ ក្នុងក្រុងឧត្តុង្គម៉ែជ័យ ខេត្តកំពង់ស្ពឺ កាលពីថ្ងៃទី២៤ ខែសីហាលោក ហ៊ុន ម៉ាណែត បានថ្លែងថា លោកចង់កែប្រែសាលារដ្ឋ៧០០០កន្លែងនៅទូទាំងប្រទេសឱ្យដូចជាសាលាវត្តរាជបូណ៌។
លោកមានប្រសាសន៍ថា៖ «ព្រោះគោលដៅរបស់យើងកុំឱ្យមានតែសាលាវត្តរាជបូណ៌មួយក្នុងទូទាំងប្រទេស។ខ្ញុំចង់ឱ្យមានវត្តរាជបូណ៌៧០០០កន្លែងនៅក្នុងទូទាំងប្រទេសសម្រាប់សាលារដ្ឋ។សាលាឯកជនរដ្ឋអត់លូកទេប៉ុន្តែអ្វីដែលសំខាន់អាណត្តិនេះគឺយើងពង្រឹងមូលដ្ឋាន»។
លោកបញ្ជាក់ទៀតថា មណ្ឌលសុខភាពរដ្ឋពេទ្យបង្អែកស្រុកក៏ត្រូវពង្រឹងហើយឥឡូវការអប់រំក៏ត្រូវពង្រឹងសាលារបស់រដ្ឋជាពិសេសសាលាបឋមសិក្សា។លោកបញ្ជាក់ថា៖ «វត្តបូណ៌ជាសាលានិមិត្តរូបជាសាលាដែលមានការប្រតិបត្តិល្អ»។ទោះយ៉ាងណាលោកនាយករដ្ឋមន្ត្រីមិនបានថ្លែងឱ្យដឹងលម្អិតពីដំណើរការក្នុងការពង្រឹងគុណភាពសាលារដ្ឋឱ្យដូចសាលាវត្តរាជបូណ៌នោះទេ។
សាលាបឋមសិក្សាវត្តរាជបូណ៌ត្រូវបានក្រសួងអប់រំប្តូរឈ្មោះទៅជាសាលាបឋមសិក្សាវត្តរាជបូណ៌កាលពីថ្ងៃទី២០ខែឧសភាឆ្នាំ២០២៤។សាលានេះស្ថិតនៅភូមិវត្តបូណ៌ សង្កាត់សាលាកំរើក ក្រុងសៀមរាប។
លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានប្រាប់ខេមបូចាកាលពីថ្ងៃទី២៤ខែសីហាថា សាលាវត្តរាជបូណ៌គឺជាសាលា«ជយលាភីសាលារៀនគំរូ»ដែលត្រូវបានប្រកាសទទួលស្គាល់ជាផ្លូវការក្នុងសន្និបាតអប់រំកាលពីខែមេសាឆ្នាំ២០២៤កន្លងមក។លោកស្រីបានឱ្យដឹងថា សាលារៀនគំរូគឺសំដៅទៅលើ«លទ្ធផលសិក្សារបស់សិស្ស»«ការរៀននិងបង្រៀន»«គណនេយ្យភាពរបស់សាលារៀន»«ដំណើរប្រតិបត្តិការនិងរដ្ឋបាលសាលារៀន» និង«ការចូលរួមរបស់សហគមន៍»ដែលទទួលបានពិន្ទុជាប់ស្តង់ដារ។
លោកស្រី វិច្ឆិកា មានប្រសាសន៍ថា៖ «កន្លងមកសាធារណជនក៏បានមើលឃើញនិងទទួលស្គាល់នូវលទ្ធផលសិក្សារបស់សិស្សនៅសាលាបឋមសិក្សាវត្តរាជបូណ៌ក៏ដូចជាវិន័យអនុវត្តនៅក្នុងសាលាដែលធ្វើឱ្យសិស្សានុសិស្សហ្នឹងមិនត្រឹមតែទទួលបានលទ្ធផលសិក្សាល្អទេក៏បុន្តែចរិយាសម្បទា ក៏ដូចជាបំណិនក្នុងការរស់នៅក្នុងសង្គមការចេះជួយគ្នាទៅវិញទៅមកក៏ដូចជាការចូលរួមជួយគាំទ្រពីសហគមន៍នៅក្នុងសហគមន៍នោះមានការគាំទ្រនិងមានលទ្ធផលល្អប្រសើរ»។
ជាមួយគ្នានេះលោកគ្រូ អន គុណរ័ត្ន នាយកសាលាបឋមសិក្សាវត្តរាជបូណ៌ដែលបង្រៀននៅសាលានេះជាង២៧ឆ្នាំមកហើយ បានប្រាប់ខេមបូចាថា សាលាបានយកចិត្តទុកដាក់លើសុខុមាលភាពសិស្សានុសិស្ស និងគ្រូបង្រៀនដើម្បីធ្វើយ៉ាងណាឱ្យគុណភាពនៃការបង្រៀននិងរៀនឱ្យបានកាន់តែប្រសើរឡើង។
លោកថ្លែងថា៖ «គុណភាពនៃការរៀន និងបង្រៀនដោយផ្តោតលើសមាសភាគ៥រួមមាន ការអប់រំបញ្ញា ការអប់រំកាយ ការអប់រំសិល្បៈ ការអប់រំពលកម្ម និងការអប់រំសោភ័ណ និងមានបំណិនជីវិតប្រកបដោយចតុស្តម្ភ»។
ក្រៅពីនេះសាលាបានអប់រំឥរិយាបថដល់សិស្សានុសិស្ស ជាពិសេសអប់រំពួកគាត់ឱ្យក្លាយជាមនុស្សសកល និងជាធនធានមនុស្សដល់ប្រទេសជាតិយើងផងដែរ។សាលាបឋមសិក្សាវត្តរាជបូណ៌ក៏បានអនុវត្តតាមកម្មវិធីសិក្សាដែលក្រសួងអប់រំបានដាក់បញ្ចូលតាមគ្រឹះស្ថានសិក្សាទូទាំងប្រទេសផងដែរ។ប៉ុន្តែលោកគ្រូ អន គុណរ័ត្ន បានបញ្ជាក់ថា៖ «សាលាវត្តរាជបូណ៌បានបន្ថែមឱ្យសិស្សានុសិស្សបានរៀនភាសាបរទេស(បារាំង និងអង់គ្លេស) និងថ្នាក់កុំព្យូទ័រដោយចាប់ពីកម្រិតថ្នាក់ទី៣ ដល់ទី៦ ជាពិសេសថ្នាក់កុំព្យូទ័រសិស្សអាចសរសេរកូដ និងបង្កើតអេបបាន និងមានកម្មវិធីផ្សេងៗទៀតដែលធ្វើឱ្យមាតាបិតា និងសិស្សានុសិស្សមានទំនុកចិត្តក្នុងការមកកាន់សាលាបឋមសិក្សាវត្តរាជបូណ៌»។
ទាក់ទងនឹងមុខវិជ្ជាដែលត្រូវបង្រៀនសិស្សនេះដែរអ្នកគ្រូ រិទ្ធិ លីដា អាយុ៤១ឆ្នាំបង្រៀនថ្នាក់ទី«២គ» នៃសាលាបឋមសិក្សាវត្តរាជបូណ៌ ដែលមានសិស្សសរុប៦៤នាក់ (សិស្សស្រី២៧នាក់) បានថ្លែងកាលពីថ្ងៃទី២៤សីហាថាចាប់ពីថ្នាក់ទី៣ដល់ថ្នាក់ទី៦ សាលាមានបង្រៀនកម្មវិធីបច្ចេកវិទ្យា ដែលឱ្យសិស្សរៀនតាមបែបវិទ្យាសាស្រ្តទំនើប និងស្រាវជ្រាវផងដែរ។កម្មវិធីអប់រំកាយដែលជាកម្មវិធីគ្រឹះសម្រាប់កុមារក្នុងការអភិវឌ្ឍ ជួយដល់ផ្នែកស្មារតី ធ្វើឱ្យកុមារមានសុខភាពល្អ និងលើកកម្ពស់ការលូតលាស់តាមរយ:ការហាត់ប្រាណ។
បន្ថែមពីនេះកម្មវិធីសិល្ប:តន្រ្តីសម័យ គឺផ្តោតលើការរៀនភ្លេង និងច្រៀងនិងមានការបង្ហាញស្នាដៃតន្រ្តីមួយឆ្នាំម្តង។កម្មវិធីតន្រ្តីបុរាណ គឺការបង្រៀនរាំសិល្ប:បុរាណ ដើម្បីបណ្តុះគំនិតនៃការថែរក្សាវប្បធម៌ជាតិ។មានកម្មវិធីរៀនភាសាអង់គ្លេស និងភាសាបារាំង ដែលមានចាប់ពីថ្នាក់ទី៣ ដល់ថ្នាក់ទី៦។អ្នកគ្រូបានថ្លែងទៀតថា៖ «ចំណែកកម្មវិធីអប់រំសីលធម៌ គឺមានព្រះសង្ឈនិមន្តមកបង្រៀនរៀងរាល់ថ្ងៃព្រហស្បតិ៍។ កម្មវិធីអប់រំមនុស្សសកល មានស្អាត របៀប សុភាព ទៀងពេល និងសមាធិ (អប់រំឥរិយាបថ) ដែលប្រកាន់ភ្ជាប់នូវសីលធម៌ សុជីវធម៌ គុណធម៌ជាចម្បង។
អ្នកគ្រូ រិទ្ធិ លីដា បន្ថែមថាក្រៅពីនេះក៏មានការអប់រំតាមបែបស្ទែម បំណិនជីវិតក្នុងការផលិតផលផ្សេងៗ និងមានកម្មវិធីជាច្រើនទៀតដែលធ្វើឱ្យសាលាវត្តរាជបូណ៌កាន់តែរីកចម្រើន និងស្ថិតនៅក្នុងបេះដូងសហគន៍។
វិន័យរបស់សាលា
សម្រាប់សិស្សានុសិស្សនៅសាលាវត្តរាជបូណ៌គឺត្រូវមកដល់សាលារៀនឱ្យបានមុនម៉ោង៦និង៤៥នាទី ដើម្បីចូលរួមគោរពទង់ជាតិរៀងរាល់ព្រឹក និងនៅពេលរសៀលពួកគាត់ត្រូវមកដល់សាលាឱ្យបានមុនម៉ោង១២និង៤៥នាទី។ចំណែកលោកគ្រូ អ្នកគ្រូវិញត្រូវមកដល់សាលាពេលព្រឹកម៉ោង៦និង១៥នាទី និងរសៀលម៉ោង១២និង១៥នាទីដើម្បីរង់ចាំទទួលសិស្សានុសិស្សនៅក្លោងទ្វារសាលារៀន។នេះបើតាមលោកគ្រូ អន គុណរ័ត្ន។
លោកនាយកសាលាមានប្រសាសន៍ថា៖ «អ្វីដែលពិសេសគឺសាលាបានជំរុញ និងអប់រំបុគ្គលិកសាលារៀន និងសិស្សានុសិស្សយើងឱ្យមានឥរិយាបថ(ញញឹមស្រស់ សំពះស្អាត ប្រតិបត្តិល្អ) ដើម្បីក្លាយជាមនុស្សសកល ( ស្អាត របៀប សុភាព ទៀងពេល សមាធិ)»។
លោក ដួង រួម វ័យ៤៩ឆ្នាំ ជាគ្រូបង្រៀនថ្នាក់ទី«៦ក១» និងជាប្រធានក្រុមស្វយភាពទី១នៃសាលាបឋមសិក្សាវត្តរាជបូណ៌បានឆ្លៀតប្រាប់ខេមបូចា ខណៈលោកកំពុងទទួលចុះឈ្មោះសិស្សថ្មីចូលរៀនសម្រាប់ឆ្នាំសិក្សាថ្មីកាលពីថ្ងៃទី២៤ខែសីហាថា ការដែលសាលាវត្តរាជបូណ៌មានភាពរីកចម្រើននិងទទួលបានកេរ្តិ៍ឈ្មោះល្អដូចសព្វថ្ងៃនេះមួយផ្នែកគឺដោយសារតែគណៈគ្រប់គ្រង និងលោកគ្រូអ្នកគ្រូបានចូលរួមសហការគ្នាបានល្អ«ដោយចិត្តដោយបេះដូងជ្រះថ្លា»ធ្វើជាគំរូគ្រប់យ៉ាង គោរពវិន័យនិងពេលវេលា។
លោកគ្រូ ដួង រួម ដែលបានបង្រៀននៅសាលាវត្តបូណ៌អស់រយៈពេល២៨ឆ្នាំមកហើយបញ្ជាក់ថា៖ «យើងធ្វើការដោយកំណត់ពេលវេលាបានត្រឹមត្រូវដូចជាការប្រជុំបច្ចេកទេសដូចជាការអប់រំសិស្សតាមដងទង់ជាតិរាល់ព្រឹក។អ៊ីចឹងអ្វីដែលធ្វើឱ្យសាលាវត្តរាជបូណ៌កាន់តែមានភាពល្បីល្បាញយើងកាន់តែមានបទពិសោធន៍យើងកាន់តែរិះរកគំនិតថ្មីៗដោយប្រជុំដើម្បីអភិវឌ្ឍកែលម្អគ្នាលើចំណុចខ្វះខាតមួយចំនួន»។
បច្ចុប្បន្នភាពនៃចំនួនថ្នាក់រៀននិងចំនួនសិស្ស
លោកនាយកសាលាបានឱ្យដឹងថា នៅក្នុងឆ្នាំសិក្សា២០២៣-២០២៤នេះសាលាវត្តរាជបូណ៌មានថ្នាក់រៀនសរុបចំនួន១១៦ (ព្រឹក៥៨ថ្នាក់ រសៀល៥៨ថ្នាក់ ) មានចាប់ពីថ្នាក់មត្តេយ្យកម្រិតខ្ពស់ ដល់ថ្នាក់ទី៦។ ក្នុងនោះ មត្តេយ្យមាន១៤ថ្នាក់ ថ្នាក់ទី១មាន២០ថ្នាក់ ថ្នាក់ទី២មាន១៨ថ្នាក់ ទី៣មាន១៦ថ្នាក់ ទី៤មាន១៦ច្នាក់ ទី៥មាន១៦ថ្នាក់ ទី៦មាន១៦ថ្នាក់ ហើយក្នុងមួយថ្នាក់ៗមានសិស្សចន្លោះពី៥០ទៅ៦៥នាក់។សាលាមានសិស្សសរុបចំនួន ៥៦៣៨ នាក់ និងបុគ្គលិក១២៩នាក់។
សម្រាប់ឆ្នាំសិក្សាថ្មី២០២៤-២០២៥ខាងមុខ សាលាបានកំណត់រួចជាស្រេចហើយថានឹងមិនមានការបង្កើនថ្នាក់ឬគ្រូបង្រៀនទៀតទេ បានន័យថា គឺរក្សាឱ្យនៅដដែល ឬអាចកាត់បន្ថយខ្លះដើម្បីបានចំនួនសិស្សតាមបន្ទប់រៀនឱ្យល្មមកុំឱ្យច្រើនលើសនិយាមខ្លាំងពេក។
លោកគ្រូ អន គុណរ័ត្ន បញ្ជាក់ថា៖ «សាលាបឋមសិក្សាវត្តរាជបូណ៌ មានការកៀរគរធនធានបន្ថែមពីសហគមន៍(អាណាព្យាបាលសិស្ស)។ចំពោះការចូលរៀននៅសាលាយើងគឺមិនមានការបង់ថ្លៃនោះទេ»។ដើម្បីធានាបាននូវការអប់រំប្រកបដោយគុណភាព សាលាបានជួយសិស្សដែលជួបការលំបាកផ្នែកសេដ្ឋកិច្ច ឱ្យបញ្ចប់ការសិក្សាបានដោយជោគជ័យ។
លោកលើលឡើងថា៖ «សិស្សរបស់យើងខ្លះទទួលបានការគាំទ្រផ្នែកហិរញ្ញវត្ថុពីអង្គការក្រៅរដ្ឋាភិបាលរហូតដល់ពួកគេបញ្ចប់ការសិក្សានៅវិទ្យាល័យ អ្នកខ្លះថែមទាំងទទួលបានជំនួយផ្នែកហិរញ្ញវត្ថុបន្ថែមទៀតនៅពេលពួកគេចូលរៀននៅសកលវិទ្យាល័យទៀតផង»។ បើតាមលោកគ្រូ អន គុណរ័ត្ន លោកគ្រូអ្នកគ្រូដែលបង្រៀននៅសាលាបឋមសិក្សាវត្តរាជបូណ៌ទទួលបានតែប្រាក់ខែរដ្ឋប៉ុណ្ណោះមិនទទួលបានប្រាក់ឧត្ថម្ភពិសេសអ្វីផ្សេងនោះទេ។
បញ្ហាប្រឈម
លោកគ្រូ អន គុណរ័ត្ន បានឱ្យដឹងថា សាលាបឋមសិក្សាវត្តរាជបូណ៌នៅតែប្រឈមបញ្ហាមួយចំនួនដូចជាសិស្សលើសនិយាមនិងខ្វះអគារសិក្សា (ភាគច្រើនជាអគារផ្ទាល់ដី)ជាដើម។
លោកគ្រូដួង រួមក៏បានលើកឡើងដែរថា សាលារៀនដែលមានសិស្សច្រើន(៥៦៣៨នាក់)តែងតែមានបញ្ហាប្រឈមមួយចំនួនគឺជារឿងធម្មតា ដូចជាប្រឈមជាមួយឪពុកម្តាយអាណាព្យាបាលសិស្សប្រឈមជាមួយថ្នាក់ដឹកនាំក្រសួង មន្ទីរនិងក៏ប្រឈមជាមួយកូនសិស្សផងដែរ។
លោកថ្លែងថា៖ «អ៊ីចឹងវាមានការពិបាកក្នុងការអភិវឌ្ឍដែរប៉ុន្តែទោះបីយ៉ាងណាយើងនៅតែខិតខំព្យាយាមដើម្បីធ្វើឱ្យសាលាកាន់តែមានភាពរីកចម្រើន»។
បន្ថែមពីនេះអ្នកគ្រូ រិទ្ធិ លីដា ក៏បានឱ្យដឹងថា ការលំបាកមួយផ្នែកផ្សេងទៀតគឺលោកគ្រូ អ្នកគ្រូដែលពួកគាត់មានវ័យចំណាស់ ត្រូវព្យាយាមខ្លាំងលើការស្វែងយល់ និងរៀនបន្ថែមរហូតពីវិធីសាស្រ្តថ្មីៗលើផ្នែកបច្ចេកវិទ្យា និងភាសាបរទេសដើម្បីឱ្យការបង្រៀនរបស់ពួកគាត់ដើរឱ្យទាន់សម័យកាល។
លក្ខណៈពិសេសរបស់សាលាវត្តរាជបូណ៌
អ្នកគ្រូ រិទ្ធិ លីដា បានថ្លែងថាលក្ខណៈពិសេសក្នុងការបង្រៀនរបស់លោកគ្រូអ្នកគ្រូនៅសាលាវត្តរាជបូណ៌ដែលធ្វើឱ្យសាលាវត្តរាជបូណ៌មានកេរ្តិ៍ឈ្មោះល្បីក្លាយជាសាលាគំរូ គឺដោយសារបច្ចេកទេសបង្រៀន មានវិធីសាស្រ្តក្នុងការបង្រៀនល្អ ការយកចិត្តទុកដាក់ក្នុងការបង្រៀនក្នុងនោះមានការជួយសិស្សរៀនយឺតឱ្យរៀនទាន់គ្នា មានសម្ភារសិក្សា និងមានការជំរុញលើកទឹកចិត្តសិស្សឱ្យខិតខំរៀនសូត្រ មានការធ្វើពិសោធន៍ចំពោះមុខវិជ្ជាវិទ្យាសាស្រ្ត មានការហ្វឹកហាត់លំហាត់ និងកិច្ចការផ្ទះជាដើម។
អ្នកគ្រូ រិទ្ធិ លីដា ដែលធ្វើជាគ្រូបង្រៀនរយៈពេល២០ឆ្នាំមកហើយក្នុងនោះបង្រៀននៅសាលាវត្តបូណ៌រយ:ពេល៧ឆ្នាំបញ្ជាក់ថា៖ «ទំនាក់ទំនងល្អរវាងគណៈគ្រប់គ្រង និងបុគ្គលិក ទំនាក់ទំនងល្អរវាងគ្រូ និងគ្រូ ការសាមគ្គីជាធ្លុងមួយក្នុងការដឹកដៃគ្នាឈានទៅមុខ ការបង្រៀនទៀងទាត់ពេលវេលា មានមនសិការខ្ពស់ក្នុងការបង្រៀនពិសេសគឺបង្រៀនដោយប្រើបេះដូង»។ បន្ថែមពីនេះសាលាមានទំនាក់ទំនងល្អជាមួយសហគមន៍ មាតាបិតាសិស្ស ក្នុងការផ្តល់ព័ត៌មានពីការសិក្សារបស់សិស្ស ឬព័ត៌មានអំពីកម្មវិធីផ្សេងៗ តាមរយៈក្រុមថ្នាក់រៀននីមួយៗ និងគេហទំព័ររបស់សាលារៀន។
ចំណាប់អារម្មរណ៍អ្នកផ្តល់ជំនួយនិងមាតាសិស្ស
លោកស្រី លី ពញារី ប្រធានស្ថាបនិកអង្គការមូលនិធិលីពញារី ដែលមានកូននិងក្មួយ៨នាក់ធ្លាប់រៀននៅសាលាវត្តរាជបូណ៌បានថ្លែងថា៖ «កូនក្មួយរបស់ខ្ញុំផ្ទាល់ឡើងថ្នាក់ផុតសាលាបឋមវត្តរាជបូណ៌អស់ហើយ។តែខ្ញុំមានសិស្សដែលមានជីវភាពលំបាកដែលខ្ញុំជួយកំពុងសិក្សានៅសាលានេះ។កូនៗខ្ញុំស្តាប់បង្គាប់និងរៀនពូកែ។អ្នកចេញពីសាលាវត្តរាជបូណ៌មានអត្តចរឹតល្អ»។លោកស្រីបានថ្លែងប្រាប់ខេមបូចាកាលពីថ្ងៃទី២៤ខែសីហាខណៈកំពុងជូនក្មួយបង្កើតម្នាក់ឡើងយន្តហោះទៅសិក្សានៅសហរដ្ឋអាមេរិកថា៖ «ក្មួយខ្ញុំគាត់ទទួលបានអាហារូបករណ៍។គាត់ជាអតីតសិស្សសាលាវត្តរាជបូណ៌និងសិស្សច្រើនទៀតក៏ទទួលបានអាហារូបករណ៍ដែរ។សិស្សរៀននៅសាលាវត្តរាជបូណ៌មានអនាគតល្អ»។
លោកស្រី លី ពញារី បានឱ្យដឹងទៀតថា គិតរហូតមកដល់ពេលបច្ចុប្បន្ន មូលនិធិលីពញារី បានជួយសិស្សដែលមានជីវភាពខ្វះខាតបានរាប់ពាន់នាក់ហើយគ្រាន់តែខ្លះបានជោគជ័យខ្លាំងខ្លះល្មមនិងមានខ្លះក៏បោះបង់ការសិក្សាដែរ។បច្ចុប្បន្នអង្គការមូលនិធិលីពញារីដែលទទួលបានជំនួយពីសប្បុរសជននៅក្រៅប្រទេស បាននិងកំពុងបន្តជួយឧបត្ថម្ភសម្ភារសិក្សាឯកសណ្ឋានដល់សិស្សសាលាវត្តរាជបូណ៌រហូតដល់ចប់វិទ្យាល័យនិងមានឧបត្ថម្ភកង់សម្រាប់សិស្សរៀនចប់ថ្នាក់ទី៦។សម្រាប់សិស្សពូកែអាចទទួលបានអាហារូបករណ៍ទៅសាកលវិទ្យាល័យ។ឆ្នាំនេះមានសិស្សក្នុងគម្រោងដែលសិក្សានៅសាលាវត្តរាជបូណ៌ប្រហែល៤០០នាក់។
អ្នកស្រី ឡៅ សំចរិយា ជាមាតាដែលមានកូនប្រុស ស្រី ចំនួន៣នាក់រៀននៅសាលាវត្តរាជបូណ៌កូនស្រីទី១ រៀនថ្នាក់ទី៦កូនប្រុសទី២ រៀនថ្នាក់ទី២និងកូនស្រីទី៣ រៀនថ្នាក់ទី១ បានថ្លែងថា សាលារៀនមានសុវត្ថិភាព មានសន្តិសុខ សណ្តាប់ធ្នាប់ល្អ សិស្សរៀនទទួលបានចំណេះដឹងល្អដែលធ្វើឱ្យមាតាបិតាសិស្សមានភាពកក់ក្តៅ និងមានទំនុកចិត្ត។
អ្នកស្រីបញ្ជាក់ថា៖ «សាលាបានយកចិត្តទុកដាក់លើសុខុមាលភាពសិស្សានុសិស្ស និងគ្រូបង្រៀនឱ្យកាន់តែប្រសើរឡើង។គុណភាពនៃការរៀន និងបង្រៀនដោយផ្តោតលើសមាសភាព៥រួមមាន ការអប់រំបញ្ញា ការអប់រំកាយ ការអប់រំសិល្បៈ ការអប់រំពលកម្ម និងការអប់រំសោភ័ណ និងមានបំណិនជីវិតប្រកបដោយចតុស្តម្ភ»។
ចំណែកអ្នកស្រី អ៊ុំ សុមាលី បានឱ្យដឹងថា កូនស្រីទាំង៣នាក់របស់អ្នកស្រីរៀននៅសាលាបឋមសិក្សាវត្តរាជបូណ៌តែកូនស្រីធំបានរៀនចប់នៅសាលានេះនិងបន្តទៅរៀននៅសាលា១០មករា១៩៧៩ហើយខណៈកូនទី២រៀនថ្នាក់ទី៦និងកូនទី៣រៀនថ្នាក់ទី៤។
អ្នកស្រីនិយាយថា៖ «បានជាខ្ញុំបញ្ចូនកូនៗឱ្យទៅរៀននៅសាលាវត្តរាជបូណ៌ព្រោះដោយមើលឃើញថា សាលាមានសុវត្តិភាពល្អមានរបងជុំវិញមានអ្នកយាមជាប្រចាំនិងមានសណ្ដាប់ធ្នាប់ល្អថ្នាក់ដឹកនាំសាលានិងលោកគ្រូអ្នកគ្រូមានទំនួលខុសត្រូវខ្ពស់ក្នុងការងារ»។
អ្នកស្រីបន្តថា ចំពោះកូនៗរបស់អ្នកស្រីនៅពេលដែលពួកគាត់បានទៅសិក្សានៅសាលាបឋមសិក្សាវត្តរាជបូណ៌គឺពួកគាត់មានឥរិយាបថល្អមានសុជីវធម៌ល្អនិងមានទំនួលខុសត្រូវចេះដឹងចាស់ទុំ។
អ្នកស្រីបន្ថែមថា៖ «ចំពោះការរៀនសូត្រគឺនិយាយបានថាពូកែនិងច្បាស់លាស់ដោយខាងសាលាតែងតែផ្ដល់ព័ត៌មានដល់អាណាព្យាបាលនូវបញ្ហានិងចំណុចខ្វះខាតរបស់កូនដែលអាចឱ្យនាងខ្ញុំកាន់តែងាយស្រួលក្នុងការជួយជំរុញនិងលើកទឹកចិត្តបន្ថែមទៀត»។
ផែនការទៅថ្ងៃមុខ
សម្រាប់ផែនការបន្តនៅឆ្នាំសិក្សាខាងមុខៗ លោកគ្រូ អន គុណរ័ត្ន បានឱ្យដឹងថា សាលានឹងបង្កើតថ្នាក់រៀនពេញមួយថ្ងៃ ជំរុញការប្រើប្រាស់កញ្ចប់អំណាន និងគណិតវិទ្យាកាត់បន្ថយអត្រាត្រួតថ្នាក់នៅថ្នាក់ទី១ យ៉ាងច្រើនត្រឹម ២%។លោកបន្ថែមថា៖ «បង្កើនអត្រាឡើងថ្នាក់គ្រប់កម្រិតលើស៩៨% បង្កើនការប្រើប្រាស់សម្ភារ ធនធានមនុស្ស បរិស្ថានដែលមានស្រាប់ប្រកបដោយប្រសិទ្ធភាព ពង្រឹងកិច្ចសហការ ទំនាក់ទំនងជាមួយសហគមន៍ជាតិ អន្តរជាតិ ឱ្យកាន់តែមានភាពល្អប្រសើរ»។
ជាមួយគ្នានេះ លោកស្រី ឃួន វិច្ឆិកា ថ្លែងថា៖ «តាមរយៈលទ្ធផលល្អ(ការសិក្សាល្អ បង្រៀនល្អ)នេះហើយបានធ្វើឱ្យមាតាបិតាជាច្រើននាំកូនទៅចុះឈ្មោះចូលរៀននៅសាលាវត្តរាជបូណ៌មានចំនួនច្រើនហើយដើម្បីឆ្លើយតបនូវតម្រូវការការចុះឈ្មោះចូលរៀនបន្ថែមច្រើននេះក្នុងឆ្នាំនេះក្រសួងក៏មានផែនការសាងសង់អគារសិក្សាថ្មី១ខ្នងដែលមាន២៤បន្ទប់»។លោកស្រីលើកឡើងថា បើទោះបីជាសាលាវត្តរាជបូណ៌មានចំនួនសិស្សចុះឈ្មោះចូលរៀនច្រើនយ៉ាងណាក្តីក៏ក្រសួងមើលឃើញថា សាលានៅតែបានដើរតួនាទីយ៉ាងល្អនៅក្នុងការគ្រប់គ្រងទាំងវិន័យ ទាំងការទទួលបានលទ្ធផលសិក្សាល្អរបស់សិស្ស។
បើតាមលោកស្រី ឃួន វិច្ឆិកា គិតត្រឹមឆ្នាំ២០២៤នេះក្រសួងអប់រំបានទទួលស្គាល់សាលារៀនគំរូមានចំនួន១២០សាលាដែលនៅក្នុងនោះមានទាំងកម្រិតមត្តេយ្យសិក្សា បឋមសិក្សានិងអនុវិទ្យាល័យផងដែរ។ទាក់ទងទៅនឹងការលើកឡើងរបស់លោកហ៊ុន ម៉ាណែតដែលថារដ្ឋាភិបាលមានគោលដៅចង់កែប្រែសាលារដ្ឋចំនួន៧០០០កន្លែង ឱ្យមានគុណភាពខ្ពស់ដូចសាលាវត្តរាជបូណ៌លោកស្រី ឃួន វិច្ឆិកាបានបដិសេធធ្វើអត្ថាធិប្បាយដោយណែនាំឱ្យសួរទៅអ្នកនាំពាក្យផ្ទាល់របស់លោកហ៊ុន ម៉ាណែត។
លោក ប៉ា ចន្ទរឿន ប្រធានវិទ្យាស្ថានប្រជាធិបតេយ្យកម្ពុជា បានសរសេរនៅពីលើឃ្លីបវីដេអូរបស់លោកនាយករដ្ឋមន្ត្រីដែលនិយាយពីការចង់កែប្រែសាលារដ្ឋ៧០០០កន្លែងឱ្យដូចសាលារៀនវត្តរាជបូណ៌ថា៖ «ខ្ញុំជឿថាសម្តេចអាចធ្វើបាន ប៉ុន្តែត្រូវប្តូរអ្នកគ្រប់គ្រងនិងការដឹកនាំនៅសាលារដ្ឋទាំងនោះ។ការផ្លាស់ប្តូររបៀបគ្រប់គ្រងនិងភាពជាអ្នកដឹកនាំគឺជាមូលដ្ឋានគ្រឹះនៃកំណែទម្រង់វិស័យអប់រំនៅថ្នាក់ក្រោមជាតិ»។
លោកលើកឡើងថា ហេតុដូច្នេះក្រសួងអប់រំត្រូវរៀបចំបោះឆ្នោតជ្រើសរើសនិងកំណត់អាណត្តិរបស់អ្នកដឹកនាំនៅក្នុងវិស័យអប់រំដូចជានាយកសាលាប្រធានដេប៉ាតឺម៉ង់ ព្រឹទ្ធបុរស, និងសាកលវិទ្យាធិការ…យ៉ាងយូរបំផុតត្រឹមតែ២អាណត្តិ ឬ១០ឆ្នាំ។
លោក ចន្ទរឿន ថ្លែងថា៖ «ប្រទេសមួយចំនួននៅអាស៊ានដូចជាម៉ាឡេស៊ី, ឥណ្ឌូនេស៊ីនិងសិង្ហបុរី ជាដើមបានអនុវត្តគោលនយោបាយបែបនេះច្រើនឆ្នាំមកហើយ។ ហេតុនេះវិស័យអប់រំរបស់គេមានគុណភាពនិងរីកចម្រើនទៅមុខ»៕
