សមាគមសម្ព័ន្ធអ្នកសារព័ត៌មានកម្ពុជា

ជនជាតិវៀតណាមនៅលើផ្ទះបណ្ដែតទឹកដែលបណ្តេញចេញពីភ្នំពេញអាចរស់នៅរយៈពេលបីឆ្នាំបន្តទៀត

ផ្ទះបណ្តែតទឹកជនជាតិវៀតណាមដែលបានបណ្តេញចេញពីទីក្រុងភ្នំពេញទៅរស់នៅតាមដងទន្លេសាប រវាងព្រំប្រទល់ខេត្តកណ្តាលនិងក្រុងភ្នំពេញ។ រូបភាពថតនៅថ្ងៃទី១៤ ខែមិនា ឆ្នាំ២០២២។ ខេមបូចា/ វ៉ា សុភានុត
ផ្ទះបណ្តែតទឹកជនជាតិវៀតណាមដែលបានបណ្តេញចេញពីទីក្រុងភ្នំពេញទៅរស់នៅតាមដងទន្លេសាប រវាងព្រំប្រទល់ខេត្តកណ្តាលនិងក្រុងភ្នំពេញ។ រូបភាពថតនៅថ្ងៃទី១៤ ខែមិនា ឆ្នាំ២០២២។ ខេមបូចា/ វ៉ា សុភានុត

ជនជាតិវៀតណាមដែលរស់នៅលើផ្ទះបណ្តែតទឹកត្រូវបានបណ្តេញចេញពីភូមិសាស្រ្តរាជធានីភ្នំពេញទៅរស់នៅរវាងព្រំប្រទល់ខេត្តកណ្តាល និងរាជធានីភ្នំពេញត្រូវបានអនុញ្ញាតឱ្យបន្ត​រស់​នៅរយៈពេលបីឆ្នាំទៀត បើតាមការលើកឡើងរបស់អាជ្ញាធររាជធានីភ្នំពេញ ខណៈពួកគេ​បាន​ត្អូញត្អែរថា​ ពួកគេកំពុងតែ​ប្រឈមនឹងបញ្ហាលំបាកផ្សេងៗក្នុងការរស់នៅ​។

 លោក កើត ឆែ អភិបាលរងរាជធានីភ្នំពេញ បានថ្លែងនៅក្នុង​សន្និសីទ​កាសែត​ស្តីពីវឌ្ឍនភាព​រាជធានី​ភ្នំពេញ កាលពីដើមខែនេះ បច្ចុប្បន្ននេះមានផ្ទះបណ្ដែតទឹកប្រមាណជិត២០០ ដែលស្ថិតនៅក្នុងខណ្ឌព្រែកព្នៅ និងព្រំប្រទល់ខេត្តកណ្ដាល។

 លោក ឆែ បានថ្លែងថា៖«ពីររយបែយើងបានធ្វើការណែនាំគាត់ឱ្យចិញ្ចឹមត្រីបញ្ចប់ហើយ​នឹង​ឱ្យរក​មុខរបរពីរទៅបីឆ្នាំដើម្បីបញ្ចប់ការងារនេះ»។

 លោក កើត​ ឆែ ឱ្យដឹងទៀតថា បន្ទាប់ពីរុះរើផ្ទះបណ្ដែតទឹករួច តាមដងទន្លេក៏ចាប់ផ្ដើមមាន​ទេសភាពស្រស់ស្អាតជាងមុន។ លោកបន្តថា ប្រជាពលរដ្ឋមួយចំនួនឃើញគេដាក់បែ​ចិញ្ចឹម​ត្រីពីក្រោយផ្ទះពួកគាត់ ក៏សម្រេចដាក់ចិញ្ចឹមតាមដែរ ដូច្នេះចំពោះ​អ្នកមិន​មានអាជីព​ជាអ្នក​ចិញ្ចឹមត្រី គឺអាជ្ញាធររុះរើគាត់តែម្ដង។

 លោក ឆែ ឱ្យដឹងថា៖ «អ្នកខ្លះគាត់ចាប់​[ដីទន្លេ]ហើយ គាត់មកជួល[ឱ្យ]គេ អានឹងខុសច្បាប់ យកដីទន្លេមកជួលចំណូល​ត្រូវបានទៅ​រដ្ឋ មិនមែនទៅគាត់ទេ ប៉ុន្តែយើងប្រើប្រាស់​វិធានការ​អប់រំច្រើនជាងវិធានការច្បាប់»។ លោកបន្ថែមថា៖«ព្រោះបើយើងឱ្យគាត់មួយឆ្នាំគាត់មិន​អាច​ប្ដូរមុខរបរ គ្រាន់តែយើងរៀនអស់២៤ឆ្នាំមិនទាន់មានអាជីពល្អផង ចឹងយើងទុកពេល​ឱ្យគាត់​បីឆ្នាំដើម្បីឱ្យគាត់ប្ដូរមុខរបរ»

 លោក តូ យ៉ាងភ័ណ មន្ត្រីនៃសមាគមជនជាតិវៀតណាមប្រចាំកម្ពុជា មានប្រសាសន៍ថា ជនជាតិវៀតណាមដែលរស់នៅក្រោយវត្តគ្រួសបានស្នើសុំទៅស្ថានទូតវៀតណាមឱ្យស្នើទៅអាជ្ញាធរកម្ពុជាដោយទុករយៈពេល៣ឆ្នាំ ដើម្បីឱ្យពួកគេដែលមានត្រីតូចអាច​ចិញ្ចឹមឱ្យ​ធំនឹង​លក់បាន។

 លោកថ្លែងថា ជនជាតិវៀតណាមរស់លើផ្ទះបណ្ដែតទឹកទាំងនោះ មានបណ្ណអន្តោប្រវេសន៍​ដែលអនុញ្ញាតឱ្យពួកគេអាចរស់នៅគ្រប់ខេត្តក្រុងក្នុងប្រទេសកម្ពុជា ប៉ុន្តែពុំមានសិទ្ធិ ទិញដី​ឬផ្ទះឡើយ។

 លោកនិយាយថា៖«បីឆ្នាំនេះខាងទូតវៀតណាមស្នើសុំអាជ្ញាធរខ្មែរដើម្បីឱ្យពួកគាត់នៅម្ដុំវត្ត​គ្រួស ដើម្បីគាត់ចិញ្ចឹមត្រីចិញ្ចឹមអីហើយបានចាកចេញ»។

បុរសចំណាស់ជនជាតិវៀតណាមម្នាក់កំពុងអង្គុយក្បែរទូកនៅតាមដងទន្លេសាប រវាងព្រំ​ប្រទល់​ខេត្តកណ្តាលនិងក្រុងភ្នំពេញ។ រូបភាពថតនៅថ្ងៃទី១៤ ខែមិនា ឆ្នាំ២០២២។ ខេមបូចា/​ វ៉ា​​​​​ សុភានុត​

ដោយឡែកចំពោះជនជាតិវៀតណាមកំពុងរស់នៅឃុំក្អមសំណ ស្រុកលើកដែក ខេត្ត​កណ្ដាល លោក យ៉ាងភ័ណ ថា ជនជាតិវៀតណាមទាំងនោះ នៅតែបន្តរស់លើទឹកដី​កម្ពុជា ដោយសារ​តែអាជ្ញាធរវៀតណាមមិនទាន់អនុញ្ញាតឱ្យចូលឡើយ។ លោកបន្ថែមថា ជនជាតិ​វៀតណាម​ទាំងនោះ មិនអាចចូលទៅប្រទេសវៀតណាមដោយខ្លួនឯងបាន ដោយសារ​តែពុំ​មាន​ឯកសារ​ផ្លូវច្បាប់ណាមួយ បញ្ជាក់ថាពួកគេជាពលរដ្ឋវៀតណាមឡើយ លុះត្រាតែមានការ​ស្នើសុំពី​ស្ថានទូតវៀតណាមប្រចាំកម្ពុជា។

 លោកនិយាយថា៖ «ព្រោះខ្ញុំធ្វើការនៅទូតវៀតណាម ស្ថានទូតវៀតណាមគេក៏ស្នើសុំឱ្យ​ប្រជាពលរដ្ឋចូលវៀតណាមដែរក៏ប៉ុន្តែខាងរដ្ឋវៀតណាមគេមិនទាន់ឱ្យចូលគេថាកូវីដតែម្ដង មានតែប៉ុណ្ណឹង។ គេមិនចាត់ទុកគាត់ជាពលរដ្ឋវៀតណាមទេ ព្រោះគាត់រស់នៅស្រុកខ្មែរ​តាំងប៉ុន្មានជំនាន់នោះ ប៉ុន្តែគាត់ជាជនជាតិវៀតណាមមែនតាមយើងមើល»។

 នៅពេលដែលធ្វើដំណើរដល់ខាងក្រោយវត្តជេដ្ឋាឧត្តម ហៅវត្តគ្រួស ស្ថិតក្នុងសង្កាត់សំរោង ខណ្ឌព្រែកព្នៅ យើងនឹងមើលឃើញផ្ទះបណ្ដែតទឹករបស់ជនជាតិវៀតណាម នៅរាយប៉ាយ​តាមដងទន្លេ មានទាំងផ្ទះតូច និងផ្ទះធំ។

អ្នកស្រី ថូ ធីវ៉ា​ ដែលអះអាងថាជាតំណាងជនជាតិវៀតណាមប្រមាណ១០០គ្រួសារ រស់នៅ​ក្រោយវត្តគ្រួស ឱ្យដឹងថា ជនជាតិវៀតណាមដែលរស់នៅទីនេះ  ភាគច្រើននៅតែបន្ត​ប្រកប​របរនេសាទត្រី និងចិញ្ចឹមត្រី។

 អ្នកស្រី និយាយថា៖«ពិបាកច្រើនណាស់រកត្រីរកអីអត់បានទេ ពិបាកមែនទែន។ [៣ឆ្នាំ​ក្រោយ]ពេលគេដេញចេញអត់ទាន់ដឹងធ្វើអ្វី ចាំតិចទៀតគិតទៀត»។​

 កំពុងអង្គុយលើទូកត្នោតជាប់ច្រាំងទន្លេ ដោយជុំវិញសុទ្ធតែកំប្លោក បុរសជនជាតិវៀតណាម អាយុ៣៨ឆ្នាំ លោក សុខ ចំរើន និយាយថា លោកទើបតែត្រលប់មកពីបោះដុំកាហ្វេឱ្យភ្ញៀវ។

លោក ចំរើន ប្រាប់ថា លោកបានសម្រេចចិត្តឈប់ចិញ្ចឹមត្រីដោយសារការចំណាយថ្លៃ​ដើម​ខ្ពស់ ហើយត្រូវអូសបែត្រីចុះ​ឡើងដើម្បីគេចចេញពីទឹកស្អុយដែលបង្ហូរ​ចេញពីរោងចក្រ​ស្រាបៀដោយមានទីតាំងស្ថិតនៅផ្លូវគីឡូលេខ៦ និងគីឡូលេខ៩។

 លោកនិយាយថា៖«[ចំណី]ក្បាលមាន់មួយ១៣០០៛ ពោះវៀនមាន់១៤០០៛ ស្បែកកង្កែប​៨០០៛ ឥលូវឡើង១០០០៛។ យើងកុងត្រាជាមួយគេ ត្រីយើងស៊ីមិនស៊ីក៏ត្រូវយកដែរ ដល់​ទឹកជន់ទឹកនាចនេះ ត្រីអត់ស៊ីក៏យកដែរ»។

លោកបន្តថា ខណៈរដូវវស្សាចូលមកដល់ហើយចាប់ផ្ដើមមានភ្លៀងធ្លាក់ដំបូងៗ ទឹកស្អុយ​ដែលហូរចេញពីរោងចក្របានងើបឡើងមកផ្ទៃទឹកខាងលើ បណ្ដាលឱ្យត្រីក្នុងបែត្រូវងាប់​ទាំង​អស់។

 លោកបន្ថែមថា លោកធ្លាប់ព្យាយាមសណ្ដោងបែត្រីដើម្បីគេចចេញពីទឹកស្អុយទាំងនេះ ប៉ុន្តែ​ពេលខ្លះសណ្ដោងទៅក៏ប៉ះខ្សែទឹកដែលស្អុយបណ្ដាលឱ្យត្រីងាប់ដដែល។

 លោកនិយាយថា៖ «ពិបាកណាស់ត្រីខ្ញុំងាប់៣តោនជាងដោយសារទឹកស្អុយសណ្ដោង​[បែ]ចេញអត់ទាន់។ កាកសំណល់វារាបនៅបាតទន្លេដល់ភ្លៀងបីបួនមេវាចាប់ផ្ដើម​រើឡើង​ហើយ ស្អុយទឹកពេញទន្លេអស់»

ស្ត្រីជនជាតិវៀតណាមពីរនាក់កំពុងអង្គុយនៅក្នុងផ្ទះពួកគេនៅតាមដងទន្លេសាប រវាង​ព្រំ​ប្រទល់​ខេត្តកណ្តាលនិងក្រុងភ្នំពេញ។ រូបភាពថតនៅថ្ងៃទី១៤ ខែមិនា ឆ្នាំ២០២២។ ខេមបូចា/​ វ៉ា​​​​​ សុភានុត​

លោក យ៉ វឹងវិន ជនជាតិវៀតណាមកំពុងរស់នៅលើផ្ទះបណ្ដែតទឹកនៅឃុំក្អមសំណ ស្រុក​លើកដែក ខេត្តកណ្ដាល និយាយថា លោកបានសម្រេចចិត្តឈប់ចិញ្ចឹមត្រីដោយសារតែ​ពុំមានថវិកាសម្រាប់ទិញចំណីឱ្យត្រីស៊ី។

 លោកនិយាយថា៖«រាល់ថ្ងៃមានបាយមានទឹកអីហូបហ្នឹង។ ប្រជាជន[វៀតណាម]គេឱ្យ​អង្ករ​ហូបរាល់ថ្ងៃ  គេអាណិតយើង ដល់គេទិញអង្ករមកគេចែកយើងដែរ ១០គីឡូៗចឹង»។

 លោក វឹងវិន អះអាងថា លោកមានបំណងលក់បែចិញ្ចឹមត្រីដើម្បីបានថវិការសម្រាប់​ធ្វើទុន​ប្រកបរបរផ្សេង ប៉ុន្តែអាជ្ញាធរមិនអនុញ្ញាតឱ្យសណ្ដោងបែឡើងគោកដើម្បីលក់ឡើយ។

 លោក អ៊ាង សុគុណ មេឃុំក្អមសំណ ទទួលស្គាល់ថា ជនជាតិវៀតណាមដែលរស់​នៅក្នុង​ឃុំក្អមសំណប្រឈមនឹងការខ្វះចំណីឱ្យត្រី ក្រោយផ្លាស់ទីមករស់នៅតំបន់ថ្មី។ លោកបន្តថា ជនជាតិវៀតណាមដែលរស់នៅទីនោះនៅតែស្ថិតក្នុងចំនួនដដែល។

 លោក សុគុណ និយាយថា៖ «ចិញ្ចឹមត្រីទៀតបានអីឱ្យស៊ី បើពួកគាត់អត់មាននុយ[ចំណីត្រី]​ផង ពួកគាត់មកខុសពីតំបន់ដែលធ្លាប់នៅឱ្យទៅរកនុយនៅណា។ (ដំណោះស្រាយ) ជារឿង​របស់គាត់យើងអត់ដឹងដែរ ព្រោះការចិញ្ចឹមជារឿងអាជីវកម្មរបស់គាត់​មិនមែន​រឿង​អាជ្ញាធរ​ទេ»។

កន្លងមក លោក ចាប ច័ន្ទវិទ្យា អភិបាលស្រុកលើកដែក ធ្លាប់ប្រាប់សារព័ត៌មានខេមបូចាថា មានជនជាតិវៀតណាមមកពីខេត្តកំពង់ឆ្នាំង ខេត្តពោធិសាត់ ខេត្តកណ្តាល និង​រាជធានី​ភ្នំពេញ ចំនួនជាង១០០គ្រួសារ ដែលមានបែត្រីសរុបចំនួន១១៩ បានបណ្តែត​ផ្ទះ​មកសំចត​នៅលើទឹកទន្លេក្បែរព្រំដែនវៀតណាម ក្នុងឃុំក្អមសំណ។

លោក ចាប វន្នី ប្រធានមន្ទីរព័ត៌មានខេត្តកណ្ដាល មានប្រសាសន៍ថា ជនជាតិវៀតណាម​ដែលរស់​នៅ​ក្នុង​ឃុំក្អមសំណ នៅតែបន្តប្រកបរបរចិញ្ចឹមត្រីជាធម្មតា និងមានសមត្ថភាព​គ្រប់គ្រាន់អាចចិញ្ចឹមខ្លួនឯង។

លោកបន្ថែមថា មកទល់ពេលនេះ ខាងអាជ្ញាធរវៀតណាមពុំទាន់មានការឆ្លើយតបណាមួយ​ជុំវិញការអនុញ្ញាតឱ្យជនជាតិវៀតណាមទាំងនេះអាចត្រលប់ទៅប្រទេសវៀតណាមបានវិញឡើយ។

 លោកនិយាយថា៖«បញ្ហារបស់គាត់ដូចជាមិនធំដំអីឱ្យយើងពិបាកទេ។ការចែកអំណោយអី អភិបាលស្រុក ចុះសួរសុខទុក្ខញឹកញាប់ដែរ ពួកគាត់រស់នៅខ្លួនគាត់បាន ចិញ្ចឹមជីវិតខ្លួនគាត់ អាចមានលទ្ធភាពរកត្រី រកអី ការងារផ្សេងៗរបស់គាត់បាន ពេលយើងទៅជួបគាត់»។

លោក គ្រុយ ម៉ាឡែន នាយករដ្ឋបាលខេត្តកណ្ដាល មានប្រសាសន៍ថា អាជ្ញាធរកំពុង​ពិនិត្យ​មើលលទ្ធភាពណែនាំឱ្យជនជាតិវៀតណាមដែលរស់នៅឃុំក្អមសំណតាមដងទន្លេមេគង្គ ឱ្យឡើងលើគោក ឱ្យបានឆាប់។

លោកនិយាយថា៖ «ស្រុកលើកដែកមិនមែនទីតាំងដូចនៅរាជធានីភ្នំពេញទេ ដែលគាត់​ស្នាក់​នៅយូអង្វែងនោះ ចឹងអាជ្ញាធរខេត្តពុំមានកំណត់ឱ្យមួយឆ្នាំ ពីរឆ្នាំទេ ឡើងឆាប់កាន់តែល្អ ព្រោះវាមិនមែនជាទីតាំងល្អដែលពលរដ្ឋ[ជនជាតិវៀតណាម] គួរស្នាក់នៅបណ្ដោះអាសន្នទេ»។

 នាយករដ្ឋបាលខេត្តកណ្ដាលរូបនេះ អះអាងថា ជនជាតិវៀតណាមដែលរស់នៅ​ក្នុង​ឃុំ​ក្អមសំណ មួយចំនួនធំបានសម្រេចឡើងមករស់នៅលើគោក ហើយនៅតែអ្នកដែលមានត្រី​ត្រូវចិញ្ចឹមឱ្យធំដើម្បីអាចលក់បានប៉ុណ្ណោះ។

សកម្មភាពជនជាតិវៀតណាមដែលកំពុងរស់នៅតាមដងទន្លេសាប រវាង​ព្រំ​ប្រទល់​ខេត្តកណ្តាលនិងក្រុងភ្នំពេញ។ រូបភាពថតនៅថ្ងៃទី១៤ ខែមិនា ឆ្នាំ២០២២។ ខេមបូចា/​ វ៉ា​​​​​ សុភានុត​

ប្រធានសមាគមវៀតណាមប្រចាំកម្ពុជា លោក ស៊ឹម ជី ធ្លាប់សារព័ត៌មានខេមបូចាថា មាន​ជនជាតិវៀតណាមប្រមាណ១០០០គ្រួសារដែលជម្លៀសចេញពីផ្ទៃទឹក​ក្នុងរាជធានីភ្នំពេញ​នោះគឺ១០០គ្រួសារជាប់គាំងនៅព្រំដែនវៀតណាម និងខេត្តកណ្ដាល ខណៈជាង៤០០គ្រួសារ​ឡើងគោក​ជួលផ្ទះស្នាក់នៅក្នុងរាជធានីភ្នំពេញ និងផ្សេងៗទៀតរស់នៅលើផ្ទៃទឹក​ក្នុង​ខេត្ត​កណ្តាល ក្បែរព្រំប្រទល់រាជធានីភ្នំពេញ។

កាលពីថ្ងៃទី២ ខែមិថុនា ឆ្នាំ២០២១ រដ្ឋបាលរាជធានីភ្នំពេញ បានចេញសេចក្តី​ជូន​ដំណឹង​មួយដោយតម្រូវ​ឱ្យប្រជាពលរដ្ឋដែលរស់នៅលើផ្ទះ​បណ្តែត​ទឹក បែ​ចិញ្ចឹម​ត្រី​ និង​សំណង់​មិន​រៀបរយតាមដងទន្លេក្នុងភូមិសាស្រ្តរាជធានីភ្នំពេញ ត្រូវរុះរើចេញយ៉ាងយូរ​មួយសប្តាហ៍​តែ​ប៉ុណ្ណោះ។ លុះដល់ថ្ងៃកំណត់ឱ​សាន​វាទ ពោលគឺថ្ងៃទី៩ ខែមិថុនា ឆ្នាំ២០២១ អាជ្ញាធរបាន​ពន្យា​ពេលឱ្យ​ពលរដ្ឋ​៣ថ្ងៃទៀត រហូតដល់ថ្ងៃទី១២ ខែ​មថុនា ដោយបញ្ជាក់ថា បើប្រជា​ពលរដ្ឋ​ណាដែលមិនរុះរើនោះទេ អាជ្ញាធរនឹងទៅរុះរើដោយផ្ទាល់ ហើយ​រាល់ការខូចខាតទ្រព្យសម្បត្តិ មិនទទួល​ខុសត្រូវនោះទេ។

ប្រភពដដែលឱ្យដឹងទៀតថា ការ​រស់នៅ ​និង​ប្រកប​មុខរបរ​លើ​ផ្ទៃ​ទឹកទន្លេ​​នេះបាន​ធ្វើឱ្យ​ផល​ប៉ះពាល់​ដល់​ប្រព័ន្ធ​អេកូ​ឡូ​ស៊ី មាន​ចរន្តទឹក​ហូរ​ គោក​រាក់​ ពិសេស​​ការ​ប្រើប្រាស់​ចំណី​សម្រាប់​​ចិញ្ចឹម​ត្រី​ និង​ការ​បញ្ចេញ​កាក​សំណល់​ ការ​បន្ទោបង់​ពាស​វាល​ពាស​កាល​ក្នុង​ទន្លេ​ ធ្វើ​ឱ្យ​ខូចខាត​ធ្ងន់ធ្ងរ​ដល់​ជីវចម្រុះ​ក្នុង​ទឹក​ ខូចគុណភាព​ទឹក​ បំពុលបរិស្ថាន​ ប៉ះពាល់​សោភ័ណ​ភាព​​រាជធានី​ភ្នំពេញ​ និង​ព្រមទាំង​ប៉ះពាល់​ដល់​សុខភាព​ប្រជាពលរដ្ឋ​ដែល​ប្រើប្រាស់​ទឹក​មិន​ស្អាត​​ផង​ដែរ​។

ក្នុងពិធីបូកសរុបលទ្ធផលនៃអង្គសន្និបាត របស់ក្រសួងមហាផ្ទៃ ប្រចាំឆ្នាំ២០២១ និងលើក​ទិសដៅការងារឆ្នាំ២០២២ លោក ប៉ោ ភក្ដិ អគ្គលេខាធិការនៃអគ្គលេខាធិការដ្ឋាន​ក្រសួង​មហាផ្ទៃ   ជុំរុញឱ្យធ្វើវិសោធនកម្មច្បាប់ស្ដីពីអន្តោប្រវេសន៍ឆ្នាំ១៩៩៤ ឱ្យបានឆាប់​ត្រឹម​ចុង​ឆ្នាំ២០២២នេះ ដើម្បីងាយស្រួលក្នុងការអនុវត្តនិងគ្រប់គ្រងជនអន្តោប្រវេសន៍ឆ្លងដែន​ខុសច្បាប់។

លោក ភក្ដិ បានលើកឡើងទៀតថា នៅតែមានជនបរទេសឆ្លងដែនខុសច្បាប់ចូលមកកម្ពុជា​ដែលបង្កឱ្យមានផលប៉ះពាល់សណ្ដាប់ធ្នាប់សង្គម។

លោកបន្ថែមថា អាជ្ញាធរវៀតណាមមិនទទួលយកជនអន្តោប្រវេសន៍វៀតណាម​ដែលមាន​បំណងចង់ត្រលប់ទៅប្រទេសវៀតណាមវិញឡើយ។

អគ្គលេខាធិការដ្ឋានក្រសួងមហាផ្ទៃរូបនេះ ឱ្យដឹងទៀតថា ការបន្លាស់ទីពីផ្ទះបណ្ដែតទឹកមក​លើគោកនៅខេត្តកំពង់ឆ្នាំងកន្លងមក ពុំបានអនុវត្តត្រឹមត្រូវតាមការកំណត់របស់ក្រសួង​ឡើយ។

លោកបន្តថា បញ្ហាប្រឈមក្នុងការគ្រប់គ្រងជនបរទេសអន្តោប្រវេសន៍ នោះគឺជនបរទេស​អន្តោប្រវេសន៍ចំនួន ៩​ ៩២៤នាក់ ​មិនបានសូមបណ្ណស្នាក់នៅថ្មី ឬសូមបន្តរយៈពេល​ប្រើ​ប្រាស់ និងជនបរទេសអន្តោប្រវេសន៍គ្រប់អាយុ១៨ឆ្នាំមួយចំនួន​មិនបានមក​សូមប័ណ្ណ​ស្នាក់​នៅតាមច្បាប់កំណត់។ ជាមួយគ្នានេះ ម្ចាស់គ្រិះស្ថានមិនបានសហការក្នុងការ​ផ្ដល់​ដំណឹង​ដល់​អាជ្ញាធរ​ថាមានជនអន្តោប្រវេសន៍កំពុងស្នាក់នៅឡើយ។

លោកបន្ថែមថា ក្នុងឆ្នាំ២០២១ កន្លងទៅអាជ្ញាធរកម្ពុជាបង្ក្រាបបានករណីលួចឆ្លងដែន​ខុសច្បាប់ចំនួន៦៦៧លើក ឃាត់ខ្លួនមនុស្ស ៤ ៣៣៣នាក់ ដែលមាន៨សញ្ជាតិ ក្នុងនោះ​ធ្វើការបណ្ដេញចេញតាមច្រកទ្វាព្រំដែនចំនួន៣៧៩៤នាក់ ខណៈផ្សេងទៀតបញ្ចូនទៅ​ពន្ធនាគារ និងខ្លះដាក់ឱ្យស្នាក់នៅបណ្ដោះអាសន្នដើម្បីត្រៀមបណ្ដេញចេញ៕

573 views

ព័ត៌មានថ្មីៗ

អត្ថបទពេញនិយម