សមាគមសម្ព័ន្ធអ្នកសារព័ត៌មានកម្ពុជា

បុគ្គលិកសារព័ត៌មានVOD និងសង្គមស៊ីវិលមានការសោកស្តាយយ៉ាងខ្លាំង ខណៈរដ្ឋាភិបាលបានដកអាជ្ញាប័ណ្ណ

អ្នកយកព័ត៌មានស្ត្រីម្នាក់របស់សារព័ត៌មានVOD យំអោបមន្ត្រីសមាគមការពារអ្នកសារព័ត៌មាន នៅក្នុងបន្ទប់ធ្វើការរបស់VOD ខណៈដែលអាជ្ញាធរបានចុះទៅប្រកាសលុបអាជ្ញាប័ណ្ណអង្គភាពនេះ រាជធានីភ្នំពេញ។ រូបថតនៅថ្ងៃទី១៣ ខែកុម្ភៈ ឆ្នាំ២០២៣។ ខេមបូចា/ ព្រីង សំរាំង
អ្នកយកព័ត៌មានស្ត្រីម្នាក់របស់សារព័ត៌មានVOD យំអោបមន្ត្រីសមាគមការពារអ្នកសារព័ត៌មាន នៅក្នុងបន្ទប់ធ្វើការរបស់VOD ខណៈដែលអាជ្ញាធរបានចុះទៅប្រកាសលុបអាជ្ញាប័ណ្ណអង្គភាពនេះ រាជធានីភ្នំពេញ។ រូបថតនៅថ្ងៃទី១៣ ខែកុម្ភៈ ឆ្នាំ២០២៣។ ខេមបូចា/ ព្រីង សំរាំង

អង្គភាពសារព័ត៌មានVOD ត្រូវបានដកអាជ្ញាប័ណ្ណ និងបិទការផ្សាយនៅថ្ងៃទី១៣ ខែកុម្ភៈ ឆ្នាំ២០២៣ បន្ទាប់​ពីលោកនាយក​រដ្ឋមន្ត្រី ហ៊ុន សែន បញ្ជាឱ្យលុប​អាជ្ញាប័ណ្ណ ទោះបី​មានការ​សុំទោសពីស្ថាប័ននេះ ដោយលោកយល់ថា ស្ថាប័ននេះបានចេញ​លិខិត​សុំទោស​យឺតពេល​ ខណៈបុគ្គលិកស្ថាប័ននេះមានការសោកស្តាយយ៉ាងខ្លាំង។

រឿងរ៉ាវបានកើតឡើង បន្ទាប់ពីស្ថាប័ន​វិទ្យុវីអូឌី​ ចេញផ្សាយអត្ថបទមួយកាលពីថ្ងៃទី៩ ខែកុម្ភៈ អំពីលោក ហ៊ុន ម៉ាណែត ដើរតួនាទី​ចុះហត្ថលេខាជំនួសនាយករដ្ឋមន្រ្តី ដើម្បីផ្តល់​ជំនួយ​ដល់ប្រទេសទួកគី​ដែល​រងគ្រោះរញ្ជួយ​​ដី។ ប៉ុន្តែលោក ហ៊ុន ម៉ាណែត បានបដិសេធថា លោកមិនបានចុះ​ហត្ថលេខា​ទេ។

លោក ម៉េង គ្រុយពន្លក ជាអ្នកសារព័ត៌មានវីអូឌីអស់រយៈពេល៧ខែ បានបង្ហាញការខកចិត្ត និងព្រួយបារម្ភថាសម្លេងពលរដ្ឋនឹងកាន់តែបាត់បង់ក្រោយពេលស្ថាប័នសារព័ត៌មានឯករាជ្យ​មួយនេះត្រូវបានបិទ។

លោក គ្រុយពន្លក ឱ្យដឹងថា៖ «អ៊ីចឹង បើសិនជាបាត់វីអូឌីមួយ ខ្ញុំគិតថានៅតែមានសារព័ត៌មាន​អញ្ចឹង ប៉ុន្តែអាចថាសម្លេងហ្នឹងកាន់តែតិចមួយទៀត ដែលអាចថាសារព័ត៌មានខ្លះ​ដែលគាត់​ឯករាជ្យហ្នឹង ក៏គាត់មានការភ័យខ្លាចដែរ។ ពីព្រោះកន្លងទៅនៅពេលដែល​យើងចុះទៅ​យក​ព័ត៌មានគឺយើងមានគ្នា តែនៅពេលបិទវីអូឌីទៅគឺគាត់អាចនឹងព្រួយបារម្ភជាងនេះទៀត»

លោក គ្រុយពន្លក បន្តថា បន្ទាប់ពីបិទស្ថាប័ន លោកនឹងនៅតែរក្សាជំហរក្នុងការ​ធ្វើជា​អ្នក​សារព័ត៌មានអាជីពនិងមានវិជ្ជាជីវៈដូចដែលលោកបានអនុវត្តនៅស្ថាប័នវីអូឌី ដែលវាមាន​សារៈសំខាន់ និងអាចពាំនាំសម្លេងពលរដ្ឋទន់ខ្សោយទៅកាន់សាធារណជន។

យ៉ាងណា​មិញ លោកគិតថា ស្ថាប័នសារព័ត៌មានវីអូឌីនឹងអាចដំណើរការវិញ នៅពេលដែល​សម្លេង​ពលរដ្ឋ​កាន់តែច្រើនបានបន្លឺឡើង។ លោកថា ពេលនោះរដ្ឋាភិបាលអាចនឹង​យកវា​មកគិតពិចារណាឡើងវិញអំពីតម្រូវការដែលប្រជាពលរដ្ឋចង់បាន។

លោក អ៊ិត សូធឿត នាយកនាយកដ្ឋានប្រព័ន្ធផ្សព្វផ្សាយនៃ​មជ្ឈមណ្ឌលកម្ពុជា ​ដើម្បី​ប្រព័ន្ធ​ផ្សព្វផ្សាយឯករាជ្យ(CCIM) បានឱ្យដឹងថា បច្ចុប្បន្នភាពស្ថាប័នសារព័ត៌មាន​វីអូឌីបាន​កំពុងព្យាយាម​ឱ្យអស់ពីលទ្ធភាពក្នុងការស្វែងរកដំណោះស្រាយនិងការពិភាក្សាជាមួយគ្រប់ភាគីពាក់ព័ន្ធ​ទាំងអស់ផងដែរ។

លោក សូធឿត ថ្លែងថា៖ «ដូចដែលខ្ញុំបញ្ជាក់អញ្ចឹង គឺយើងនឹងព្យាយាមឱ្យអស់ពី​លទ្ធភាព​ក្នុងការធ្វើការជាមួយភាគីពាក់ព័ន្ធ ក៏ដូចជាជាមួយរដ្ឋាភិបាលផង។ ដែលយើងសង្ឃឹមថា​នឹងមានជាដំណោះស្រាយ»

លោក អ៊ិត សូធឿត នាយកនាយកដ្ឋានប្រព័ន្ធផ្សព្វផ្សាយនៃ​មជ្ឈមណ្ឌលកម្ពុជា ​ដើម្បី​ប្រព័ន្ធ​ផ្សព្វផ្សាយឯករាជ្យ(CCIM) ផ្តល់បទ​សម្ភាសន៍ជាមួយអ្នកសារព័ត៌មាននៅមុខការិយាល័យVOD ក្នុងរាជធានីភ្នំពេញ។ រូបថតនៅថ្ងៃទី១៣ ខែកុម្ភៈ ឆ្នាំ២០២៣។ ខេមបូចា/ ព្រីង សំរាំង

យោងតាមបុគ្គលិកVOD បានបញ្ជាក់ថា បុគ្គលិកVODនៃផ្នែកប្រព័ន្ធផ្សព្វផ្សាយប្រហែល​៤០នាក់​​ត្រូវបានប៉ះពាល់ដល់ការងាររបស់ពួកគេ​ បន្ទាប់ពីអាជ្ញាប័ណ្ណស្ថាប័ននេះត្រូវបានដក។

លោក​នាយករដ្ឋមន្ត្រី ហ៊ុន សែន បានមានប្រសាសន៍នៅក្នុងហ្វេសប៊ុកផ្លូវការ​របស់​គាត់នៅ​ម៉ោងជាង២ព្រឹកថ្ងៃទី១៣ ខែកុម្ភៈ ថា ការសុំទោសរបស់មជ្ឈមណ្ឌល ដើម្បីប្រព័ន្ធផ្សព្វផ្សាយ​ឯករាជ្យ​(CCIM) គឺវាយឺតពេលហើយ លោក ហ៊ុន សែន បានសួរជាសំនួរថា ហេតុអ្វីមិន​សូម​ទោស​ពីល្ងាចនិងមកសុំទោស​ពេល​​យប់ជ្រៅក្រោយម៉ោង១២យប់ទៅវិញ។​

លោក ហ៊ុន សែន បានបញ្ជាក់ថា៖ «យើងពិតជាមិនមែនកូនក្មេងបៀមដៃនោះឡើយ។ ហេតុអ្វី​មិនសូមទោសពីល្ងាចនិងមកសូមទោសពេលយប់ជ្រៅក្រោយម៉ោង១២​យប់ទៅវិញ។ តើឈឺ​ណាស់​ទៅឬក្រោយត្រូវមួយកំភ្លៀង? មុនត្រូវមួយកំភ្លៀងគិតណាស់រឿងកិត្តិយសសូម្បី​ពាក្យ​សូមទោសមួយម៉ាត់មិនហ៊ាននិយាយផងតែក្រោយត្រូវមួយកំភ្លៀងបែរជាភ្លេចអស់កិត្តិយស​មក​​សូមទោសជាងពាក់កណ្តាលអាធ្រាតទៅវិញ»

លោកនាយករដ្ឋមន្ត្រី បានបន្តថា៖ «ខ្ញុំ ហ៊ុន សែន នាយករដ្ឋមន្ត្រីនៃកម្ពុជា មិនផ្លាស់ប្តូរការ​សម្រេចចិត្តបិទចោលវិទ្យុវីអូឌីនោះឡើយ។ ស្ថាបន័មានសមត្ថកិច្ច​ត្រូវអនុវត្តភារកិច្ចដូចដែលបានប្រគល់កាលពីល្ងាចថ្ងៃ១២កុម្ភៈ២០២៣ដោយគ្មានការកែប្រែ»

លោក ហ៊ុន​ សែន ក៏បានបន្ថែមថា សម្រាប់បងប្អូនដែលបាត់បង់ការងារត្រូវបន្ទោស​មេដឹកនាំ​បងប្អូនឬប្រទេសម្ចាស់លុយដែលកសាងកំហុស​តាំងពីការផ្សាយព័ត៌មានមូលបង្កាច់​រហូត​ដល់​ល្ងង់មិនចេះទទួលខុសត្រូវលើការសូមទោសធ្វើឱ្យបងប្អូនបាត់បង់ការងារធ្វើ។

បន្ទាប់ពីមានប្រតិកម្មពីលោក ហ៊ុន ម៉ាណែត បេក្ខភាពនាយករដ្ឋមន្រ្តី អំពីព័ត៌មាន​ដែល​ស្ថាប័ន​វីអូឌី បានចុះផ្សាយ។ លោកនាយករដ្ឋមន្រ្តី ក៏បានប្រតិកម្មយ៉ាងខ្លាំងពីករណី​នេះ ហើយនៅព្រឹកថ្ងៃទី១២​ ខែកុម្ភៈ នេះ លោកបានឱ្យពេលវេលាដល់វិទ្យុVOD ធ្វើការសុំទោស​ជាសាធារណៈត្រឹមរយៈពេល២៤ម៉ោង អំពីការផ្សាយអត្ថបទរបស់ខ្លួន បើមិនដូច្នេះ នឹង​លុប​អាជ្ញាប័ណ្ណស្ថាប័ននេះនៅព្រឹកស្អែក។

គួរបញ្ជាក់ថា ស្ថាប័នCCIM បានចេញលិខិតសោកស្តាយនិងអធ្យាស្រ័យលើកទី១ នៅថ្ងៃ​ទី១២ ខែកុម្ភៈ បន្ទាប់ពី​លោកនាយករដ្ឋមន្ត្រី បានកំណត់ពេលវេលាឱ្យ២៤ម៉ោងដើម្បីសុំ​ទោស ប៉ុន្តែលិខិតទី១​នេះមិនបាន​ប្រើពាក្យ​ «សុំទោស» ដោយគ្រាន់តែប្រើពាក្យសុំ​សោក​ស្តាយ​និង​អធ្យាស្រ័យ។ ក្នុងពេលនោះដែរ លោក ហ៊ុន សែន បានតបថា លោកមិនអាច​ទទួល​យក​បាន​ទេ ពីព្រោះស្ថាប័ននេះ មិនបាន​សុំពាក្យ។

ស្ថាប័នCCIM បានចេញលិខិតសុំទោសលើកទី២ ចុះថ្ងៃទី១២ ខែកុម្ភៈ ដោយប្រើ​ពាក្យ​«សុំទោស»ដល់លោកនាយករដ្ឋមន្ត្រី និងលោក ហ៊ុន ម៉ាណែត ប៉ុន្តែលោក ហ៊ុន សែន បានតបថា លោកពិតជាមិនមែនកូនក្មេងបៀមដៃនោះឡើយ។ ហេតុអ្វី​មិនសូមទោស​ពីល្ងាចនិងមកសូមទោសពេលយប់ជ្រៅក្រោយម៉ោង១២​យប់ទៅវិញ។

​ក្រសួងព័ត៌មានបានចេញលិខិតលុបអជ្ញាប័ណ្ណសារព័ត៌មានVOD​ នៅថ្ងៃទី១៣ ខែកុម្ភៈ ឆ្នាំ២០២៣ ដោយលើកមូលហេតុថា ពីព្រោះតែ«អង្គភាពសារព័ត៌មាន​នេះបាន​រំលោភ​យ៉ាង​ធ្ងន់ធ្ងរលើវិជ្ជាជីវៈសារព័ត៌មានធ្វើឱ្យប៉ះពាល់ដល់កិត្តិយសនិងកិត្យានុភាពរបស់រាជរដ្ឋាភិបាលកម្ពុជា ហើយមិនព្រមធ្វើការកែសម្រួលតាមបទប្បញត្តិច្បាប់ស្តីពីរបបសារព័ត៌មាន»

ទន្ទឹមនឹងនេះ កញ្ញា ភួន កែវរស្មី ជាសកម្មជនបរិស្ថានក្នុងចំណោមប្រជាពលរដ្ឋជាង៣០នាក់​បានទាមទារ​ឱ្យរដ្ឋាភិបាលផ្ដល់​នូវអាជ្ញាប័ណ្ណ​សារព័ត៌មាន​ដល់វីអូឌីឡើងវិញ។ ដោយថាកន្លង​មកមាន​តែ​ស្ថាប័នសារព័ត៌មាន​មួយ​ចំនួនតូចប៉ុណ្ណោះដែលឈរលើគោលការណ៍​សារព័ត៌មាន​ឯករាជ្យ​ក្នុងការពាំនាំ និង​ផ្សព្វផ្សាយព័ត៌មានប្រកបដោយវិជ្ជាជីវៈដែលមានភាពពិតប្រាកដ មិន​លំអៀង និងផ្ដល់​ជាប្រយោជន៍ដល់សង្គមជាតិ។

កញ្ញាបញ្ជាក់ថា៖ «ខ្ញុំនៅតែស្នើសុំដដែលហើយដដែលទៀតថាផ្ដល់អាជ្ញាប័ណ្ណឱ្យ​វីអូឌី​ឡើង​វិញ។ សូម​បន្តឱ្យវីអូឌីដំណើរការដើម្បីប្រយោជន៍ប្រទេសកម្ពុជា។ ជាពិសេសវីអូឌីបាន​ចូល​រួមខ្លាំង​មែន​ទែន​មិនថាលើរឿងបរិស្ថាន រឿងសំរាម រឿងភ្នំតាម៉ៅ រឿងរបងដែល​បាន​សាង​សង់​​រំលោភ​ដីឆ្នេរ រឿងកាប់បំផ្លាញព្រៃឈើផ្សេងៗ»

កញ្ញាបន្ថែមថា វាជាការសហការដ៏ល្អមួយ ដោយកន្លងមកប្រជាពលរដ្ឋមូលដ្ឋានបាន​ខិតខំ​ធ្វើ​ការ​អស់ពីសមត្ថភាព ហើយមានសារព័ត៌មានឯករាជ្យចាំចុះជួយក្នុងការផ្សព្វផ្សាយ ដែលវា​ជា​ចំណែកមួយក្នុងការការពារធនធានធម្មជាតិនៅកម្ពុជាផងដែរ។

លោកស្រី ចក់ សុភាព នាយិការមជ្ឈមណ្ឌលសិទ្ធិមនុស្សកម្ពុជាបានបង្ហាញការសោកស្ដាយ និងអំពាវនាវឱ្យនាយករដ្ឋមន្រ្តីព្រមទាំងស្ថាប័នពាក់ព័ន្ធទាំងអស់ជួយគិតពិចារណាឡើងវិញ​ចំពោះការបិទស្ថាប័នសារព័ត៌មានឯករាជ្យវីអូឌីនេះ ដោយថាកន្លងមករដ្ឋាភិបាលតែង​ប្រកាស​ថាកម្ពុជា ជាឋានសួគ៌នៃសង្គមស៊ីវិលដូច្នេះមិនគួរធ្វើឱ្យវាមានភាពចលាចលនោះឡើយ។

លោកស្រីមានប្រសាសន៍ថា៖ «ខ្ញុំសង្ឃឹមថារដ្ឋាភិបាលគាត់នឹងពិចារណាឡើងវិញ ពីព្រោះ​ថាយើង[ប្រទេសកម្ពុជា]បានប្រកាសថាជាឋានសួគ៌នៃសង្គមស៊ីវិល។ ដូច្នេះប្រសិនបើ​ជា​ឋានសួគ៌មែនគឺយើងមិនត្រូវធ្វើឱ្យវាចលាចលបែបនេះឡើយ។ ហើយវីអូឌីគាត់បាន​បំពេញ​នូវភារកិច្ចប្រកបដោយវិជ្ជាជីវៈ ហើយបើសិនជាមានបញ្ហាដោយសារអត្ថបទមួយហ្នឹង វាមិន​គួរមានការឈានដល់ការបិទវិទ្យុវីអូឌីនេះទេ»

លោកស្រី សុភាព បានបញ្ជាក់ផងដែរថា ក្នុងពេលកន្លងមកនេះវិទ្យុវីអូឌី បានដើរតួនាទីយ៉ាង​សំខាន់ក្នុងការបំពេញចន្លោះ និងការផ្ដល់ព័ត៌មានពិតដល់ប្រជាពលរដ្ឋ និងរដ្ឋាភិបាល ខណៈ​លំហូរសេរីភាពសារព័ត៌មានបានមានការរួមតូចដោយសារការបាត់បង់នូវស្ថាប័នឯករាជ្យមួយចំនួន។

លោកស្រីបន្ថែមថា៖ «ដូច្នេះការបាត់បង់វីអូឌីវានឹងជាការបាត់បង់នូវសច្ចៈភាពមួយនៅក្នុង​សង្គម»

ប្រជាពលរដ្ឋរងគ្រោះដែលអង្គភាពសារព័ត៌មានVODធ្លាប់បានផ្សព្វផ្សាយកន្លងមក បានលើកបដាតវ៉ាស្នើឱ្យរដ្ឋាភិបាល​កុំឱ្យ​បិទ​អង្ភភាពVOD នៅខាងមុខការិយាល័យVOD ក្នុងរាជធានីភ្នំពេញ។ រូបថតនៅថ្ងៃទី១៣ ខែកុម្ភៈ ឆ្នាំ២០២៣។​ ខេមបូចា/ ព្រីង សំរាំង

Phil Robertson នាយក​រង​នៃ​អង្គការ​ឃ្លាំ​មើល​សិទ្ធិ​មនុស្ស​អន្តរជាតិ (Human Rights Watch) ប្រចាំអាស៊ី បានលើកឡើងនៅក្នុងសេចក្តីថ្លែងការណ៍ថា រដ្ឋាភិបាល​កម្ពុជា​មិន​ដែល​ចូលចិត្ត​ការ​រាយការណ៍​របស់ VoD ទេ ហើយ​លោក​នាយក​រដ្ឋមន្ត្រី ហ៊ុន សែន តែងតែ​រឹតត្បិតចំពោះ​ប្រព័ន្ធ​ផ្សព្វផ្សាយ​ឯករាជ្យ។ ប៉ុន្តែនោះមិនមែនជាលេសសម្រាប់ខឹងសម្បារ និងគួរឱ្យ​អស់​សំណើច ដើម្បី​បិទពួកគេ​ដោយផ្អែក​ទៅលើហេតុផល​មិនសមរម្យអំពី​អ្នកដែល​បានចុះ​ហត្ថលេខា​លើ​ឯកសារ​រដ្ឋាភិបាល​​ដើម្បីផ្តល់ជំនួយដល់ប្រទេសតួកគី។

លោក Robertson ថ្លែងថា៖ «ការសម្រេច​ចិត្ត​ដ៏ស្រពេចស្រពិល និង​មិន​សមហេតុផលនេះ ស្ទើរតែបិទបាំងចេតនាពិតប្រាកដ​របស់​រដ្ឋាភិបាល​ក្នុងការគាបសង្កត់​លើសេរីភាព​សារព័ត៌មាន»

សេចក្តីថ្លែងការណ៍រួមចុះថ្ងៃទី១៣​ ខែកុម្ភៈ របស់ស្ថាប័នសារព័ត៌មាន និងអង្គការសង្គមស៊ីវិល ចំនួន៩៣ រួមមាន សមាគមសម្ព័ន្ធ​អ្នក​សារព័ត៌មាន​កម្ពុជា(CamboJA) បណ្ដាញអ្នក​សារព័ត៌មាន​ស្ត្រី​កម្ពុជា(CFJ) ក្លឹបអ្នក​សារព័ត៌មាន​បរទេសនៃកម្ពុជា(OPCC) សម្ព័ន្ធខ្មែរ​ជំរឿន​និងការពារសិទ្ធិមនុស្ស​ លីកាដូ សមាគមការពារសិទ្ធិមនុស្ស និងអភិវឌ្ឍន៍នៅកម្ពុជា​(អាដហុក) គណៈកម្មាធិការ​ដើម្បីការ​បោះឆ្នោតដោយសេរី និងយុត្តិធម៌នៅកម្ពុជា​(COMFREL) ព្រមទាំងស្ថាប័នជាតិ និង​អន្តរជាតិ​ដទៃទៀត បានសម្ដែង ការសោកស្ដាយ​យ៉ាង​​ខ្លាំង ចំពោះការសម្រេចរបស់​សម្ដេចនាយក​រដ្ឋមន្ត្រី ហ៊ុន សែន ក្នុងការលុបចោលអាជ្ញា-ប័ណ្ណសារព័ត៌មាន​វីអូឌី ដែលជា​សារព័ត៌មាន​ឯករាជ្យ​ចុងក្រោយមួយនៅក្នុងប្រទេសកម្ពុជា។

សេចក្តីថ្លែងការណ៍រួមបានលើកឡើងថា៖ «យើងខ្ញុំ ក៏សូមថ្កោលទោសផងដែរ ចំពោះការ​បៀត​បៀន​ផ្លូវភេទ និងការគំរាមកំហែងថ្មីៗនេះ ទៅលើស្ត្រីអ្នកសារព័ត៌មានវីអូឌីម្នាក់»

សេចក្តីថ្លែងការណ៍នេះបញ្ជាក់ថា ការបិទសារព័ត៌មានវីអូឌី និងការប្រើភាសាបៀតបៀន​ផ្លូវភេទ​ទៅលើស្រ្តីអ្នកសារព័ត៌មានវីអូឌី បានធ្វើឱ្យបាត់បង់ទំនុកចិត្ត​ទៅលើការអះអាង​របស់​រាជរដ្ឋាភិបាល​ខ្លួនឯង​ពាក់ព័ន្ធនឹងការគោរពសិទ្ធិសេរីភាពសារព័ត៌មាននៅកម្ពុជា និងហាក់​ដូចជាកំពុងឆ្លុះបញ្ចាំងពីការខកខានក្នុងការគោរពច្បាប់ស្ដីពីរបបសារព័ត៌មាន ដែលបាន​បង្កើតឡើងក្នុងឆ្នាំ១៩៩៥។

សេចក្តីថ្លែងការណ៍នេះបន្ថែមថា៖ «ការសម្រេចចិត្តលុបចោលអាជ្ញាប័ណ្ណផ្សាយព័ត៌មានរបស់​វីអូឌី នៅមុនការបោះ-ឆ្នោតថ្នាក់ជាតិ​ឆ្នាំ២០២៣នេះ បង្ហាញពីរលកថ្មីមួយនៃមធ្យោបាយ​គំរាម​កំហែងប្រឆាំងនឹង​សារព័ត៌មាន​ឯករាជ្យ​ដែលកំពុងមានតិចស្រាប់ ដែលស្រដៀងគ្នា​ទៅនឹង​ការ​បិទកាសែតខេមបូឌា ដេលី ក្នុងឆ្នាំ២០១៧ និងការលក់កាសែតភ្នំពេញប៉ុស្ដិ៍ ក្នុងឆ្នាំ២០១៨»

ស្ថានទូតសហរដ្ឋអាមេរិក ស្ថានទូតអង់គ្លេស និងប្រទេសជាង១០​របស់សហភាពអឺរ៉ុប​បាន​សំដែងការព្រួយបារម្ភយ៉ាងខ្លាំងចំពោះបញ្ហាដែល​រដ្ឋាភិបាលបានសមេ្រច​ដក​អាជ្ញាប័ណ្ណ​សារព័ត៌មាន VOD ដែលជាប្រព័ន្ធផ្សព្វផ្សាយឯករាជ្យ​ក្នុងប្រទេស។

សេចក្តីថ្លែងការណ៍របស់ស្ថានទូតអាមេរិក​ បានសរសេរថា៖ «សារព័ត៌មានដែលមានភាពសេរី និងឯករាជ្យ ដើរតួនាទី​សំខាន់ចាំបាច់ នៅក្នុងលទ្ធិប្រជាធិបតេយ្យត្រឹមត្រូវមួយ ដោយផ្តល់ឱ្យ​សាធារណជន និងអ្នក​សម្រេចចិត្ត ឱ្យដឹងការពិត ហើយធ្វើឱ្យរដ្ឋាភិបាលមាន​ការទទួលខុស​ត្រូវ»។ សេចក្តីថ្លែង​ការណ៍​បន្ថែមថា៖ «អស់រយៈពេលជាង២០ឆ្នាំមកហើយ ដែលសារព័ត៌មាន​ VOD បានធ្វើ​សេចក្តីរាយការណ៍ដោយមិនលម្លៀង ហើយឈរលើការពិត លើបញ្ហាដែល​បម្រើ​ប្រយោជន៍ប្រជាជនកម្ពុជា»

សេចក្តីថ្លែងការណ៍របស់សហភាពអឺរ៉ុប បានលើកឡើងថា៖ «ការសម្រេចចិត្តនេះប៉ះពាល់​យ៉ាង​ធ្ងន់ធ្ងរដល់សេរីភាពប្រព័ន្ធផ្សព្វផ្សាយ និងពហុនិយម ដែលមានសារៈសំខាន់​សម្រាប់​សង្គម​បើកចំហ និងសេរីណាមួយ។ ការទទួលបានព័ត៌មាន និងសេរីភាពនៃការបញ្ចេញមតិ គឺជា​គោល​ការណ៍ជាមូលដ្ឋាននៃសង្គមប្រជាធិបតេយ្យ និងជាមូលដ្ឋានគ្រឹះ​សម្រាប់ការ​បោះឆ្នោត​ដោយសេរី និងយុត្តិធម៌»

1,331 views

ព័ត៌មានថ្មីៗ

អត្ថបទពេញនិយម