កម្មករជាងមួយពាន់នាក់មកពីរោងចក្រកាត់ដេរ Dignity Knitter និងរោងចក្រ ECO Base Factory មិនទាន់ទទួលបានប្រាក់សំណងនៅឡើយនោះទេ ដែលមានរយៈពេលជិតមួយឆ្នាំហើយ បន្ទាប់ពីម្ចាស់រោងចក្របានបង្កកទុកប្រាក់ខែរបស់ពួកគេ និងបានបិទរោងចក្រក្រោយមក។
ម្ចាស់រោងចក្រទាំងពីរខាងលើបានកាត់បន្ថយការងារ និងមិនបានបើកប្រាក់ឈ្នួលទៅឲ្យកម្មករកាលពីខែធ្នូឆ្នាំមុន ហើយបន្ទាប់ពីផ្អាកការងារអស់រយៈពេលបីខែចាប់តាំងពីខែមីនាឆ្នាំនេះមក រោងចក្រត្រូវបានបិទដំណើរការជាស្ថាពរ។ រោងចក្រមួយចំនួនបានផ្អាកដំណើរការ ឬបិទទ្វារដោយសារតែវិបត្តិការរាតត្បាតជំងឺកូវីដ១៩ ដែលបានប៉ះពាល់ទៅដល់ខ្សែសង្វាក់ផ្គត់ផ្គង់នៅលើពិភពលោក។
លោក ភិន សុភា តំណាងសហជីពនៅសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ដែលប្រចាំការនៅរោងចក្រ Dignity Knitter អស់រយៈពេល១៤ឆ្នាំមកនេះ បាននិយាយថា អនុប្រធានតុលាការខេត្តកណ្តាល លោកស្រី ពេជ្រ ម៉ារ៉ែន និងអភិបាលខេត្តកណ្តាលលោក គង់ សោភ័ណ្ឌ បានជួបជាមួយនឹងកម្មករ និងតំណាងរោងចក្រនៅក្នុងកិច្ចប្រជុំមួយកាលពីថ្ងៃទី២៥ ខែវិច្ឆិកា។
លោក សុភា បានថ្លែងថា ឥឡូវនេះ ក្រុមហ៊ុនពីអឺរ៉ុបមួយកំពុងវាយតម្លៃ និងដាក់ដេញថ្លៃទ្រព្យសម្បត្តិរបស់រោងចក្រ ដែលនឹងត្រូវយកទៅផ្តល់ម្ចាស់បំណុល និងកម្មករ។
លោកសុភាបាននិយាយថា៖ «អ៊ីចឹង ពួកគេត្រូវការពេលដើម្បីវាយតម្លៃលម្អិត ពីព្រោះថា ប្រសិនបើយើងចង់ឲ្យឆាប់រហ័សជាងនេះ យើងនឹងមិនទទួលបានព័ត៌មានគ្រប់គ្រាន់នោះទេ។ ដូច្នេះ នៅពេលដែលពួកគេលក់ យើងនឹងទទួលបានតម្លៃថោក»។
លោកបានបន្តថា ប្រាក់ទទួលបានពីការលក់ដេញថ្លៃនឹងផ្តល់ឲ្យកម្មករ មុនពេលចែកទៅកាន់ភាគីដទៃទៀត។ លោកសុភាបានបន្ថែមថា រឿងក្តីនេះមានសភាពយឺតយ៉ាវជាងធម្មតា ពីព្រោះភាគីម្ចាស់បំណុលផ្សេងទៀតបានប្តឹងទៅតុលាការ។
លោកបានលើកឡើងថា កម្មករចំនួន ១០នាក់បានយាមកាមនៅខាងក្រៅរោងចក្រ ដើម្បីការពារការចូលយកសម្ភារ និងវត្ថុធាតុដើមចេញ ហើយកម្មករដទៃទៀតត្រូវស្វែងរកការងារធ្វើនៅរោងចក្រផ្សេង។ កាលពីឆ្នាំមុន ពួកគេបានរៃអង្គាសប្រាក់ផ្គត់ផ្គង់ដល់កម្មករចំនួន ១០នាក់ ដែលឈរយាមរោងចក្រ។
លោកសុភាបាននិយាយថា៖ «ខ្ញុំសូមអំពាវនាវទៅកាន់អភិបាលខេត្តកណ្តាល តុលាការខេត្តកណ្តាល និងអាជ្ញាធរពាក់ព័ន្ធ ឲ្យជួយដោះស្រាយបញ្ចប់រឿងក្តីនេះនៅខែធ្នូ ឆ្នាំ២០២០នេះ ពីព្រោះពួកយើងកំពុងប្រឈមនឹងបញ្ហាជីវភាព»។
កាលពីពាក់ណ្តាលខែកក្កដា កម្មករបានដាក់ញ្ញត្តិទៅកាន់រដ្ឋបាលខេត្តកណ្តាលស្នើសុំដកដីការក្សាការពារ ដែលរារាំងមិនឲ្យមានការលក់សម្ភារនៅរោងចក្រទាំងពីរ។ ដីការក្សាការពារ នោះត្រូវបានដាក់ស្នើដោយក្រុមហ៊ុនចិន ដែលអះអាងថា ម្ចាស់រោងចក្រ Dignity Knitter និង ECO Base ក៏ជំពាក់បំណុលខ្លួនដែរ។
លោក អ៊ុក រី មេធាវីចាត់តាំងតំណាងឲ្យរោងចក្រ បាននិយាយថា លោកកំពុងគោរពតាមនីតិវិធីដើម្បីស្វែងរកដំណោះស្រាយជូនកម្មករ។ លោកបានបន្តថា ក្រុមហ៊ុន ECO Base ផ្ទាល់មានអ្នកប្តឹងពី០៨ ទៅ១០ ក្រៅពីកម្មករដែលខ្លួនជំពាក់ប្រាក់ខែ។
លោក អ៊ុក រី បាននិយាយថា៖ «ហេតុផលដែលជម្លោះនេះត្រូវបានអូសបន្លាយ ពីព្រោះមានដីការរក្សាការពារជាច្រើនពីម្ចាស់បំណុល» ដោយបន្ថែមថា លោករំពឹងថា នឹងមានដំណោះស្រាយនៅចុងខែធ្នូនេះ។
អ្នកស្រី សួរ សុជាតិ អាយុ ៤០ឆ្នាំ កម្មករនៅរោងចក្រ Dignity Knitter អស់រយៈពេល ១៦ឆ្នាំមកនេះ បាននិយាយថា កម្មករទាំងអស់កំពុងជួបបញ្ហាជីវភាព ដោយសារតែពួកគេមិនទទួលបានសំណងអស់រយៈពេលជិតមួយឆ្នាំមកនេះ។
អ្នកស្រី សុជាតិ បានថ្លែងថា៖ «សម្រាប់ខ្ញុំ ខ្ញុំត្រូវការចាយវាយប្រចាំថ្ងៃ ហើយដូចនេះ ខ្ញុំត្រូវការលុយដើម្បីជួយចិញ្ចឹមក្មេងៗជិតដប់នាក់ក្នុងសហគមន៍ ដោយសារតែគ្រួសាររបស់ពួកគេក្រីក្រ»។
សុជាតិ បានបន្តថា អ្នកស្រីត្រូវជិះម៉ូតូលក់បន្លែ និងជ្រក់ ដើម្បីរកប្រាក់ចំណូលខ្លះ។
អភិបាលខេត្តកណ្តាលលោក គង់ សោភ័ណ្ឌ បានបញ្ជាក់ថា ករណីជម្លោះនេះជិតត្រូវបានដោះស្រាយរួចរាល់ ពីព្រោះក្រុមហ៊ុនទីបីកៀកនឹងបញ្ចប់ដំណើរការវាយតម្លៃ។
លោក សោភ័ណ្ឌ មានប្រសាសន៍ថា៖ «សូមអធ្យាស្រ័យ យើងព្យាយាមធ្វើការដោះស្រាយបញ្ហាជូនកម្មករ ហើយយើងក៏ចង់ឲ្យស្មើភាពសម្រាប់នយោជកផងដែរ»។
អនុប្រធានតុលាការខេត្តកណ្តាល លោកស្រី ពេជ្រ ម៉ារ៉ែន មានប្រសាសន៍ថា អាជ្ញាធរនឹងត្រូវការពេល១០ថ្ងៃដើម្បីដាក់ដេញថ្លៃទ្រព្យសម្បត្តិរបស់រោងចក្រ។ លោកស្រី
បានបន្ថែមថា៖ «ដូច្នេះ យើងនឹងអនុវត្តតាមនីតិវិធីច្បាប់»។
អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ មិនទាក់ទងសុំការអធិប្បាយបាននោះទេកាលពីថ្ងៃសុក្រ៕
ប្រែសម្រួលពីអត្ថបទភាសាអង់គ្លេស៖ CamboJA News
