សហជីពប្រចាំរោងចក្រកាត់ដេរសម្លៀកបំពាក់ បូវឃើរ ហ្គាមេន ហ្វេកធើរី បានប្តឹងទៅក្រសួងការងារ នៅដើមខែសីហានេះ ពាក់ព័ន្ធនឹងវិវាទការងារចំនួន១២ចំណុច រួមទាំងការបញ្ឈប់តំណាងសហជីព និងកម្មករជាច្រើននាក់កន្លងមក ប៉ុន្តែក្រសួងការងារបានឆ្លើយតបនៅថ្ងៃទី២៥ ខែសីហា ថា សហជីពត្រូវដោះស្រាយជាមួយក្រុមហ៊ុនផ្ទាល់សិន បើមិនឯកភាពគ្នា អាចប្តឹងទៅក្រសួងបន្តទៀត។
រោងចក្រកាត់ដេរសម្លៀកបំពាក់ បូវឃើរ ហ្គាមេន ហ្វេកធើរី មានទីតាំងស្ថិតនៅភូមិពងទឹក ឃុំបែកចាន ស្រុកអង្គស្នួល ខេត្តកណ្តាល បានបើកដំណើរការជាង១៣ឆ្នាំមកហើយ ជារោងចក្រផលិតខោអាវកីឡា ម៉ាក អាឌីដាស (Adidas) ដែលមាននាយកប្រតិបត្តិឈ្មោះ KHOR LAIHUAT ជាសញ្ជាតិម៉ាឡេស៊ី ។ កម្មករក្នុងរោងចក្រនេះ សរុបមានចំនួន ៣ ៥៥៦ នាក់ ក្នុងនោះស្រ្តីចំនួន ៣ ២០០ នាក់។
អនុប្រធានសហជីពកម្ពុជា ប្រចាំរោងចក្រកាត់ដេរ បូវឃើរ ហ្គាមេន ហ្វេកធើរី លោក ឈន ចាន់ បានឱ្យដឹងនៅថ្ងៃទី២៨ ខែសីហា ថា កម្មករក្នុងរោងចក្រទាំងអស់នាំគ្នាដាក់ពាក្យបណ្ដឹងទៅក្រសួងការងារ កាលពីថ្ងៃទី១ ខែសីហា ឆ្នាំ២០២៥ ដោយសារក្រុមហ៊ុននេះ មិនគោរពសិទ្ធិ និងបញ្ឈប់កម្មករជាច្រើននាក់ ដោយការរើសអើងសហជីព។
លោកបានលើកឡើងថា៖ «ពួកខ្ញុំដាក់ពាក្យបណ្ដឹងទៅក្រសួងការងារឱ្យជួយរកដំណោះស្រាយ ព្រោះម្ចាស់ក្រុមហ៊ុនតែងតែរំលោភសិទ្ធិសេរីភាពកម្មករជាច្រើនដង ប៉ុន្តែក្រសួងការងារបានទទួលនិងចេញលិខិតឆ្លើយតបមកវិញឱ្យពួកខ្ញុំដោះស្រាយជាមួយក្រុមហ៊ុនដោយខ្លួនអែងសិន» ។
លោកបានបន្តថា មកទល់ពេលនេះខាងសហព័ន្ធកំពុងតែជជែកជាមួយដៃគូរពាក់ព័ន្ធដើម្បីស្វែងរកដំណោះស្រាយ។ គួរបញ្ចាក់ផងដែរថា ខាងសហជីពការងារបានដាក់ពាក្យបណ្ដឹងទៅក្រសួងនៅដើមខែសីហា ហើយក្រសួងបានឆ្លើយតបមកវិញនៅថ្ងៃទី២៥ ខែសីហា ឆ្នាំ២០២៥ ។ ទាក់ទិននឹងបញ្ហាវិវាទការងារនេះ ក្រុមហ៊ុនខាងលើធ្លាប់បញ្ឈប់សហជីពច្រើននាក់មកហើយកាលពី៨ខែមុន ហើយមិនគោរពតាមច្បាប់ ស្ដីពីការងារ និងច្បាប់ស្ដីពីសហជីព។
លោកបានលើកឡើងថា ការបញ្ឈប់មេដឹកនាំសហជីព និងកម្មករ គឺដោយសារការរើសអើងសហជីព ព្រោះក្រុមហ៊ុនដាក់លក្ខខណ្ឌការងារកាន់តែពិបាក ក្រុមហ៊ុនកាន់តែរឹតបន្តឹងការងារលើកម្មករធ្វើឱ្យកម្មករខ្លះលែងចង់ចូលធ្វើការងារ ព្រោះក្នុងក្រុមហ៊ុន តែងមានបញ្ហាច្រើនលើកច្រើនសារ ។
លោក ឈន ចាន់ បានបញ្ជាក់ថា៖ «ការបញ្ឈប់កម្មករពីការងារនេះជាការរើសអើងសហជីព កម្មករ សហជីពណាដែលមិនទៅអែបអបថៅកែខាងរោងចក្រមិនសូវពេញចិត្ត ខឹងកម្មករមិនធ្វើការ»។ លោកបានបន្តថា ក្នុងរោងចក្រនេះមេកាគាបសង្កត់រឹតបន្តឹងការងារកម្មករ តាមដានគ្រប់សកម្មភាព ដូច្នេះកម្មករប្រឈមនឹងអត់ការងារធ្វើ ។
លោកបានរៀបរាប់ថា សកម្មភាពតាមថតតាមសួរនាំនេះ កើតឡើងរយៈពេលជាងកន្លះឆ្នាំមកហើយ សកម្មភាពនេះធ្វើឲ្យកម្មករមួយចំនួនភ័យខ្លាចមិនហ៊ានចូលធ្វើការ។ លោកបន្តទៀតថា នេះមិនមែនជាលើកទី១ទេ ដែលរោងចក្របញ្ឈប់កម្មករ ដោយសារតែការរើសអើងសហជីព។ កន្លងមក បានបញ្ឈប់ថ្នាក់ដឹកនាំសហជីពជាង៥នាក់ហើយ ក្នុងនោះមានសហជីពកម្ពុជា សហជីពសេរីភាពកម្មករខ្មែរ សហជីពសេរីឯករាជ្យ សហជីពអភិវឌ្ឍន៍កម្មករកម្ពុជា។
លោក ឈន ចាន់ បញ្ជាក់ថា ថ្នាក់ដឹកនាំសហជីព៤នេះ ត្រូវបានរោងចក្របញ្ឈប់ភ្លាមៗក្នុងចំណោមសហជីពទាំង១៣។ លោក ឈន ចាន់ បានលើកឡើងថា៖ «នេះជាការកេងប្រវ័ញ្ចរំលោភបំពានសិទ្ធិរបស់កម្មករ»។ លោកបន្ថែមថា ក្នុងនាមលោកជាតំណាងកម្មករម្នាក់ សូមឱ្យរដ្ឋាភិបាលជួយគិតគូរ និងដោះស្រាយ ជូនកម្មករនៅរោងចក្រខាងលើនេះផង កុំឱ្យក្រុមហ៊ុនបន្តសកម្មភាពរំលោភសិទ្ធិរបស់កម្មករទៀត។
អ្នកស្រី ចេន ចាន់ទី ជាកម្មករធ្វើការនៅរោងចក្រខាងលើរយៈពេលជាង១១ឆ្នាំ បានឱ្យដឹងថា ម្ចាស់ក្រុមហ៊ុនខាងលើតែងតែគាបសង្កត់លើកម្លាំងកម្មករ និងរើសអើងការងារសហជីពកម្មករ។
អ្នកស្រី ចាន់ទី បានលើកឡើងថា៖ «ថៅកែរោងចក្រជាជនជាតិ ចឹងពួកគេកាន់ជើងតែគ្នាគេទេ ចំពោះកម្មករខ្មែរវិញរើសអើងណាស់ កម្មករខ្មែរធ្វើអីខុសតិចតួចបញ្ឈប់ចេញពីការងារភ្លាមៗ បើខាងជនជាតិវិញធ្វើខុសច្បាប់កម្រិតណាក៏មិនបញ្ឈប់ទេ លើកលែងរហូត លើសពីនេះថៅកែធ្លាប់ប្រើអំពើហិង្សាលើកម្មករ»។
អ្នកស្រីបានបន្តថា រាល់ថ្ងៃនេះធ្វើការទាំងភ័យព្រួយបើថៅកែរើសអើងចឹង កម្មករមួយចំនួនឈប់បណ្ដើៗហើយ ដោយសារតែថៅកែគាបសង្កត់កម្មករពេក មិនលើកលែងសូម្បីស្រ្តីពោះធំ។
សហជីពបានដាក់ពាក្យបណ្ដឹងទៅក្រសួងការងារ កាលពីថ្ងៃទី១ ខែសីហា ឆ្នាំ២០២៥ ស្នើសុំឱ្យក្រសួងជួយដោះស្រាយបញ្ហាចំនួន១២ចំណុចក្នុងនោះ រួមមាន ក្រុមហ៊ុនត្រូវជួយរៀបចំធ្វើយ៉ាងណាដើម្បីកាត់បន្ថយការហុយខ្លាំង នៃកម្ទិចក្រណាត់នៅក្នុងអគារោងចក្រ។ សុំឱ្យក្រុមហ៊ុនទទួលយកលោក ឌុក សាវិន ចូលធ្វើការងារវិញ។ សុំឱ្យក្រុមហ៊ុនទូទាត់ប្រាក់បំណាច់ឆ្នាំដែលគាត់ប្រើមិនអស់ ដល់ប្រធានស៊ុប ប្រធានផ្នែក និងបុគ្គលិក។ ក្រុមហ៊ុនត្រូវបញ្ឈប់ជនបរទេស ឈ្មោះ ឈើររី ដែលបានប្រើប្រាស់អំពើហិង្សាមកលើថ្នាក់ដឹកនាំសហជីព។
ក្រសួងបានទទួលពាក្យបណ្ដឹង និងបានឆ្លើយតបមកវិញតាមលិខិតឆ្លើយតបរបស់ក្រសួងការងារ ដោយចុះហត្ថលេខាដោយ ប្រធាននាយកដ្ឋានវិវាទការងារ លោក អាំង សេងលី ចុះថ្ងៃទី២៥ ខែសីហា ឆ្នាំ២០២៥ ថា នាយកដ្ឋានពិនិត្យឃើញថា ការទាមទារទាំង១២ចំណុចនោះ មានការទាមទារភាគច្រើនទាក់ទងទៅនឹងអត្ថប្រយោជន៍លើសពីច្បាប់។
នាយកដ្ឋានវិវាទការងារបានបន្តថា ទន្ទឹមនឹងនេះ សហជីពអព្យាក្រឹត្យអភិវឌ្ឍន៍សិទ្ធិការងារ មានភាពជាតំណាងបំផុតនៅក្នុងក្រុមហ៊ុន បូវយើរ ហ្គាមេន ហ្វេកធើរី ។ យោងមាត្រា៥៥ (ថ្មី) នៃច្បាប់ស្តីពីសហជីព កថាខណ្ឌទី២ ចែងថា សហជីពដែលមានភាពជាតំណាងបំផុតមានសិទ្ធិផ្តាច់មុខក្នុងការតំណាងឱ្យកម្មករនិយោជិតទាំងអស់ដើម្បីធ្វើការចរចាចុះអនុសញ្ញារួម ឬដោះស្រាយវិវាទការងាររួមជាមួយនិយោជក ឬសមាគមនិយោជកនៃវិជ្ជាជីវៈ ឬសកម្មភាពសេដ្ឋកិច្ច ឬវិស័យនោះ។
នាយកដ្ឋានវិវាទការងារបានបញ្ជាក់ថា៖ «ខ្ញុំសូមជម្រាប លោក-លោកស្រីថា គួរយកចំណុចទាមទារទាំងនោះទៅពិភាក្សាជាមួយសហជីព អព្យាក្រឹត្យអភិវឌ្ឍន៍សិទ្ធិការងារ និងចូលរួមជាមួយសហជីពនេះដើម្បីដោះស្រាយជាមួយនិយោជកនៅកម្រិត សហគ្រាសជាមុនសិន»។ នាយកដ្ឋានបន្តថា៖ «ក្នុងករណីពុំទទួលបានលទ្ធផលសះជានឹងគ្នា សហជីពដែលមានភាពជាតំណាងបំផុត»។
នាយកដ្ឋានបានបន្ថែមថា ចំពោះចំណុចទាមទារផ្សេងទៀតក្នុងពាក្យបណ្ដឹង ដែលពាក់ព័ន្ធនឹងសិទ្ធិមានចែងក្នុងច្បាប់ និងបទប្បញ្ញត្តិពាក់ព័ន្ធ ក្រុមអធិការកិច្ចការងារនឹងចុះធ្វើអធិការកិច្ច ដើម្បីពិនិត្យឱ្យបានច្បាស់លាស់តាមនីតិវិធី និងដើម្បីដោះស្រាយបន្តតាមនីតិវិធីច្បាប់។
អ្នកស្រី ចាន់ វាសនា ជាប្រធានផ្នែកធនធានមនុស្សប្រចាំក្រុមហ៊ុន បូវឃើរ បានថ្លែងថា បញ្ហានេះមិនទាន់ដោះស្រាយបាននៅឡើយទេ ដោយខាងរោងចក្ររង់ចាំចម្លើយពីក្រសួងការងារវិញ។
ជុំវិញរឿងនេះ អ្នកស្រី យ៉ាង សុភ័ណ្ឌ ប្រធានសហជីពការងារកម្ពុជា បានលើកឡើងថា បញ្ហានេះកើតឡើងជាទូទៅក្នុងបរិបទការងារក្នុងស្រុកខ្មែរ ពិសេសតាមរោងចក្រសហគ្រាស។
អ្នកស្រីបានថ្លែងថា៖ «បើយើងនិយាយតាមច្បាប់ កម្មករនិយោជិតមានសិទ្ធិក្នុងការចងក្រងបង្កើតសហជីពដោយសេរី ប៉ុន្តែជាក់ស្ដែងការអនុវត្ត គឺផ្ទុយពីច្បាប់នៅពេលសហជីពពួកគាត់ចាប់ផ្ដើមចងក្រងក្រុមថៅកែរោងចក្រតែងបញ្ឈប់ថ្នាក់ដឹកនាំពីការងារ ប្រើសិទ្ធិគំរាមកំហែងបណ្ដេញ ក្រុមហ៊ុនខ្លះចោទប្រកាន់ពាក់ព័ន្ធការប្រើប្រាស់គ្រឿងនេះជាក់ស្ដែងកើតឡើងទូទៅក្នុងស្រុកខ្មែរ»។
អ្នកស្រីបានបន្តថា នេះជាការទង្វើក្នុងការចោទប្រកាន់សុទ្ធសាធទៅលើកម្មករនិយោជិតនៅពេលកម្មករនិយោជិតព្យាយាមប្រើប្រាស់សិទ្ធិក្នុងការចងក្រងសហជីព ដើម្បីការពារសិទ្ធិពួកគាត់។
អ្នកស្រី សុភ័ណ្ឌ បានបញ្ជាក់ថា ដើម្បីបញ្ឈប់បញ្ហានៃការរើសអើងសហជីព មានការចូលរួមពីគ្រប់ភាគីពាក់ព័ន្ធ ភាគីនិយោជកគួរតែគោរពអនុវត្តច្បាប់ឱ្យបានត្រឹមត្រូវ ក្រុមហ៊ុនគោរពអនុវត្តច្បាប់ដូចគ្នាដែរ ក្រសួងការងារមានជាយន្តការតាមដានពិនិត្យមើលក្រុមហ៊ុននានា ប្រសិនបើក្រុមហ៊ុនមិនព្រមគោរពច្បាប់ត្រូវចាប់បង្ខំឱ្យគោរពច្បាប់ មិនមែនគ្រាន់តែរកឃើញពិន័យយកជាសាច់ប្រាក់ក៏រួចរាល់នោះទេ។
អ្នកស្រីបានបន្ថែមថា ក្រសួងការងារគួរតែគិតគូររឿងនេះបើនៅបណ្ដោយទៀតនោះអ្នករងគ្រោះ គឺជាកម្មករនិយោជិត និងប្រជាពលរដ្ឋដែលធ្វើការក្នុងរោងចក្រនឹងឈានដល់បាត់បង់ការងារធ្វើ ហើយកម្មករអាចនឹងបាត់បង់សិទ្ធិទាមទាការងាររបស់ពួកគាត់។
អ្នកសារព័ត៌មានខេមបូចា មិនអាចទាក់ទងសុំការអត្ថាធិប្បាយពីលោក ខេន លូ អគ្គលេខាធិការនៃសមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC) បានទេ មុនថ្ងៃចុះផ្សាយព័ត៌មាននេះ ៕
