ធនាគារពិភពលោកបានអនុម័តក្នុងសប្ដាហ៍នេះលើគម្រោងពង្រឹងសេវាផ្គត់ផ្គង់ទឹកស្អាត និងអនាម័យ គិតជាទឹកប្រាក់១៦៣លានដុល្លារ ដោយផ្ដោតលើខេត្តបួនគឺបាត់ដំបង ពោធិ៍សាត់ មណ្ឌលគិរី និងខេត្តកណ្ដាល ដោយរពឹងថាប្រជាពលរដ្ឋដែលទទួលផលមានចំនួន១៧៥ ០០០នាក់។
គម្រោងមានរយៈពេលប្រាំមួយឆ្នាំនេះ នឹងជួយគាំទ្រដល់រដ្ឋាភិបាលក្នុងកិច្ចខិតខំប្រឹងប្រែងបង្កើនការទទួលបានសេវាទឹកស្អាត និងអនាម័យដល់ប្រជាជន ក៏ដូចជាការថែទាំប្រព័ន្ធទឹកស្អាត និងការរក្សាឲ្យមានចីរភាពលើសេវាទាំងនេះ។ គម្រោងនេះក៏នឹងមានការចូលរួមសហការជាមួយវិស័យឯកជន លើការគ្រប់គ្រងរៀបចំតប្រព័ន្ធទុយយោទឹកពាក់កណ្ដាលប្រទេស ដែលត្រូវចំណាយថវិកាបន្ថែមចំនួន១៧,៦លានដុល្លារអាមេរិក។
លោកស្រី ម៉ារីយ៉ាម សាលីម ប្រធានគ្រប់គ្រងធនាគារពិភពលោកប្រចាំកម្ពុជាមានប្រសាសន៍ថាគម្រោងនេះនឹងជួយដល់រដ្ឋាភិបាលកម្ពុជាក្នុងការកសាងមូលដ្ឋានគ្រឹះដ៏រឹងមាំមួយក្នុងការផ្ដល់សេវាចាំបាច់ទៅកាន់ប្រជាពលរដ្ឋកម្ពុជា។
លោកស្រីបន្តថា៖ «ការទទួលបានការផ្គត់ផ្គង់ទឹកស្អាត និងអនាម័យ គឺជាមូលដ្ឋានគ្រឹះមួយនៃសិទ្ធិមនុស្ស… [មូលនិធិនេះ]នឹងនាំមកនូវអត្ថប្រយោជន៍ភ្លាមៗទៅដល់ស្រ្តី និងប្រជាពលរដ្ឋក្រីក្រ និងនៅតាមទីជនបទ ដែលបច្ចុប្បន្ននេះនៅមិនទាន់បានទទួលសេវាទាំងនេះនៅឡើយ»។
រដ្ឋាភិបាលកម្ពុជាការកំណត់គោលដៅក្នុងការផ្ដល់សេវាទឹកស្អាត និងអនាម័យទៅកាន់ប្រជាពលរដ្ឋឲ្យបាន១០០ភាគរយនៅត្រឹមឆ្នាំ២០២៥ ទាំងអតីតនាយករដ្ឋមន្ត្រីកម្ពុជា លោក ហ៊ុន សែន និងមន្ត្រី បាននិយាយជាច្រើនលើកច្រើនសារពីបញ្ហានេះផងដែរ។ ផែនការអភិវឌ្ឍប្រកបដោយចីរភាពដំណាក់កាលទី៦(SDG 6) របស់អង្គការសហប្រជាជាតិគឺបានកំណត់ឲ្យមានការទទួលបានសេវាទឹកស្អាត និងអនាម័យជាសកលនៅត្រឹមឆ្នាំ២០៣០។
ប៉ុន្តែបើតាមធនាគារពិភពលោក ដើម្បីសម្រេចឲ្យបាននូវគោលដៅនេះ គឺត្រូវមានការខិតខំបន្ថែមទៀត។ បើតាមទិន្ន័យរបស់អង្គការសុខភាពពិភពលោក និងយ៉ូណេសេហ្វ (WHO/UNICEF JMP database) គិតត្រឹមឆ្នាំ២០២២ ប្រជាពលរដ្ឋកម្ពុជាតិចជាងមួយភាគបីប៉ុណ្ណោះដែលបានទទួលសេវាទឹកស្អាត និងសុវត្ថិភាពសម្រាប់ទទួលទាន។ សម្រាប់ប្រជាពលរដ្ឋនៅតាមទីជនបទ ការទទួលបានសេវាទឹកស្អាតមានតិចជាង១៩ភាគរយ ហើយមានប្រជាពលរដ្ឋតែជាងមួយភាគបីប៉ណ្ណោះដែលបានទទួលសេវាអនាម័យប្រកបដោយសុវត្ថិភាព។
តាមរយៈគម្រោងនេះ ក្រសួងសាធារណការ និងដឹកជញ្ជូននឹងគ្រប់គ្រងលើសេវាអនាម័យក្នុងទីក្រុង ហើយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍នឹងផ្ដោតសំខាន់លើការផ្គត់ផ្គង់សេវាទឹកស្អាត។
រដ្ឋមន្ត្រីក្រសួងឧស្សាហកម្ម លោក ហែម វណ្ណឌី មានប្រសាសន៍ថា គម្រោងរបស់ធនាគារពិភពលោកនេះនឹងជួយរដ្ឋាភិបាលអនុវត្តគោលដៅរបស់ខ្លួន និងបង្កើតផែនការគ្រប់ជ្រុងជ្រោយដើម្បីធានាពីការរីកចម្រើនប្រកបដោយចីរភាពក្នុងវិស័យឧស្សាហកម្ម។
លោកលើកឡើងក្នុងសេចក្ដីប្រកាសព័ត៌មានថា៖ «វិស័យទឹក គឺជាផ្នែកមួយអាទិភាពសម្រាប់ភាពធន់ និងការអភិវឌ្ឍប្រកបដោយចីរភាព និងដើម្បីពង្រឹងសេដ្ឋកិច្ច»។
លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន មានប្រសាសន៍ថា គម្រោងនេះនឹងជួយដល់រដ្ឋាភិបាលកម្ពុជាផ្ដោតសំខាន់លើការគ្រប់គ្រងទឹកកខ្វក់ និងប្រព័ន្ធបង្ហូរទឹក។
លោកលើកឡើងក្នុងសេចក្ដីថ្លែងការណ៍ថា៖ «ការវិនិយោគលើគម្រោងប្រព័ន្ធអនាម័យ គឺជាឧបករណ៍រក្សានូវចីរភាពសេវាអនាម័យ ដែលនឹងនាំមកនូវការផ្លាស់ប្ដូរជាវិជ្ជមានលើវិស័យមួយនេះ»។
គម្រោងនេះពិតជាមានសារសំខាន់សម្រាប់ពង្រឹងការទទួលបានសេវាទឹកស្អាតរបស់ប្រជាពលរដ្ឋនៅតំបន់ជនបទក្នុងខេត្តទាំងបួននេះ។ ប្រជាពលរដ្ឋកម្ពុជាបីភាគបួនរស់នៅទីជនបទ ហើយពួកគាត់បានទទួលសេវាទឹកស្អាត និងអនាម័យតិចតួចប៉ុណ្ណោះ។
អភិបាលរងខេត្តកណ្ដាលលោក នូវប៉េង ច័ន្ទតារា មានប្រសាសន៍ថា ការទទួលបានទឹកស្អាតក្នុងខេត្តរបស់លោក គឺជាបញ្ហាមួយដែលត្រូវការការធ្វើការរួមគ្នារវាងវិស័យឯកជននិងរដ្ឋ។
លោកបន្តថា៖ «ទឹកស្អាតក្នុងខេត្តកណ្ដាលមិនទាន់គ្រប់គ្រាន់សម្រាប់តម្រូវការប្រជាជននោះទេ ដោយសារតែប្រព័ន្ធទឹកស្អាតរបស់ឯកជន និងការផ្គត់ផ្គង់ទឹករបស់ឯកជននៅមានកម្រិតទាំងលើពេលវេលា និងបរិមាណនៃការផលិត»។
លោក ទឹម ធារ៉ា ប្រធានមន្ទីរអភិវឌ្ឍន៍ជនបទខេត្តពោធិ៍សាត់ មានប្រសាសន៍ថា ស្រុកមួយចំនួនក្នុងខេត្តនេះនៅមិនទាន់ទទួលបានទឹកស្អាតប្រើប្រាស់នៅឡើយ ហើយទឹកដែលទទួលបានគុណភាពមិនទាន់ត្រឹមត្រូវពេញលេញតាមស្ដង់ដារនៅឡើយ។ លោកបន្តថាដោយសារតែខ្វះអ្នកជំនាញធ្វើការលើប្រព័ន្ធទឹក ទើបធ្វើឲ្យមានការលំបាកក្នុងការទទួលបានជោគជ័យ។
លោកបន្ថែមថា៖ «យើងសង្ឃឹមថាក្នុងឆ្នាំ២០៣០ យើងនឹងបានដល់គោលដៅអភិវឌ្ឍន៍ដោយចីរភាពដំណាក់កាលទី៦(SDG 6)។ បញ្ហាប្រឈមរបស់ខេត្តទាំងបួនគឺថាមានតំបន់ខ្លះជាតំបន់ភ្នំ ពិបាកតប្រព័ន្ធទុយយោទឹក ខណៈតំបន់ខ្លះជាប់មាត់ស្ទឹង»។
នាយករងរដ្ឋបាលខេត្តមណ្ឌលគិរី លោក នាង វណ្ណៈ មានប្រសាសន៍ថា ភូមិសាស្រ្តក្នុងខេត្តរបស់លោក បានរួមចំណែកធ្វើឲ្យមានការលំបាកក្នុងការទទួលបានទឹកស្អាត។
លោកឲ្យដឹងថា៖ «ខេត្តមានទីតាំងនៅតំបន់ភ្នំ និងក្រុងសែនមនោរម្យ ក៏មិនទាន់មានទឹកស្អាតប្រើប្រាស់គ្រប់គ្រាន់ដែរ»។ លោកបន្តថា៖ «យើងមិនទាន់មានទឹកស្អាតគ្រប់គ្រាន់សម្រាប់ប្រជាពលរដ្ឋប្រើប្រាស់នៅឡើយតាមរយៈការផ្គត់ផ្គង់របស់រដ្ឋ និងឯកជន»។
លោក វណ្ណៈ ឲ្យដឹងទៀតថា កន្លងទៅអាជ្ញាធរបានខិតខំពង្រីកបណ្ដាញទឹកស្អាតដល់កាន់ប្រជាពលរដ្ឋឲ្យបានកាន់តែច្រើនតាមដែលអាចធ្វើបាន ហើយពេលនេះអាជ្ញាធរក៏នឹងបន្តខិតខំបន្ថែមទៀតផងដែរ។
លោកបន្តថា៖ «យើងកំពុងខិតខំបន្តផ្គត់ផ្គង់ទឹកស្អាតទៅដល់ប្រជាពលរដ្ឋ»។
រាយការណ៍បន្ថែមដោយ រ៉ាន់ ស្រីដែត
ប្រែសម្រួលពីអត្ថបទភាសាអង់គ្លេស៖ World Bank Approves $163 Million for Water and Sanitation Services in Four Provinces
