មន្ត្រីជាន់ខ្ពស់ម្នាក់នៃក្រសួងអប់រំយុវជននិងកីឡាត្រូវបានសាកសួរជាសាក្សីនៅក្នុងសំណុំរឿងគម្រោងវិនិយោគដីធ្លីក្លែងបន្លំដែលបានឆបោកលុយជាង២០០លានដុល្លា បន្ទាប់ពីប្រជាពលរដ្ឋរាប់ពាន់គ្រួសារនៅក្នុងខេត្តសៀមរាបបានបាត់បង់ប្រាក់យ៉ាងច្រើននៅក្នុងគម្រោងអចលនទ្រព្យរបស់ក្រុមហ៊ុន ប្រ៊ីលាន ស៊ីធី ឬអំពីភាគលាភខ្ពស់របស់ខ្លួន។ គាត់ត្រូវបានអនុញ្ញាតឱ្យត្រឡប់ទៅផ្ទះនៅថ្ងៃទី១៨ ខែធ្នូ ឆ្នាំ២០២៤។
អ្នកនាំពាក្យតុលាការខេត្តសៀមរាប លោក យិន ស្រាង បានបញ្ជាក់ថា លោក ស៊ាន បូរ៉ាតបានបង្ហាញខ្លួននៅចំពោះមុខចៅក្រមស៊ើបសួរកាលពីថ្ងៃពុធហើយត្រូវបានអនុញ្ញាតឱ្យត្រឡប់ទៅផ្ទះវិញ។ លោកបដិសេធមិនផ្តល់ព័ត៌មានលម្អិតបន្ថែមជុំវិញការសួរក្នុងសំណុំរឿងឆបោកខាងលើនេះ។
ក្រៅពីដំណែងមន្ត្រីជាន់ខ្ពស់ក្នុងក្រមខណ្ឌរដ្ឋាភិបាលរបស់គាត់ គាត់ក៏មានដំណែងជាអនុប្រធានអង្គភាពប្រឆាំងអំពើពុករលួយ (អ.ប.ព) ផងដែរ។ លោក បូរ៉ាត មិនបានលើកទូរសព្ទទេ ទោះបីជាមានការហៅតាមទូសព្ទជាច្រើនដងដោយអ្នកយកព័ត៌មាន ខេមបូចា។
កាលពីសប្តាហ៍មុន តុលាការបានសាកសួរ លោក ស ថាវី ជាអនុរដ្ឋលេខាធិការក្រសួងការពារជាតិជាសាក្សីពាក់ព័ន្ធនឹងករណីដូចគ្នាដែលទាក់ទងនឹងការសម្អាតប្រាក់ ឆបោកមានស្ថានទម្ងន់ទោសជាក្រុមមានការចាត់តាំង និងការរំលោភលើច្បាប់ប្រតិបត្តិការទូទាត់សងប្រាក់។
អគ្គនាយិកាក្រុមហ៊ុន អ្នកស្រី ឡេង ចាន់ណា ត្រូវបានចាប់ខ្លួនកាលពីខែមីនា បន្ទាប់ពីពលរដ្ឋរាប់ពាន់គ្រួសារនៅខេត្តសៀមរាប រួមទាំងបុគ្គលិកកម្ពុជាជាង100នាក់ដែលធ្វើការនៅប្រទេសកូរ៉េ បានបាត់បង់ការវិនិយោគយ៉ាងច្រើននៅក្នុងការបោកប្រាស់ «គ្រោងការណ៍ភាគលាភខ្ពស់» ក្នុងរយៈពេលពីរឆ្នាំកន្លងមកនេះ។
លោក ឡាយ សារ័ត្ន ដែលបានអះអាងថា ជាអ្នកតំណាងក្រុមចាញ់បោក រួមនឹងជនរងគ្រោះផ្សេងទៀតដែលបានកម្ចីឯកជនចំនួន ១១ ០០០ដុល្លារ ហើយបានវិនិយោគលើគម្រោងមួយនេះ បាននិយាយថា ពួកគាត់បានជឿជាក់លើលោក ស៊ាន បូរ៉ាត ដោយសារគាត់ជាមន្ត្រីជាន់ខ្ពស់ ហើយជឿជាក់ថាការដឹកនាំរបស់គាត់នឹងធ្វើឱ្យក្រុមហ៊ុនជោគជ័យ។
លោក សារ័ត្ន បានឱ្យដឹងថា លោក បូរ៉ាត មានទំនាក់ទំនងជិតស្និទ្ធជាមួយ លោកស្រី ឡេង ចាន់ណា ព្រោះគាត់តែងតែអមដំណើរនាង ហើយគាត់ក៏មកពីសមាគមលើកកម្ពស់ពលករ និងអតីតពលករដើម្បីមនុស្សធម៌ផងដែរ។
លោកលើកឡើងថា៖ «យើងទាំងអស់គ្នាជឿជាក់លើពួកគាត់ [ការគ្រប់គ្រង] ដោយសារតែលោក ស៊ាន បូរ៉ាត គាត់ជាអ្នកធំ […] កាលពីមុនខ្ញុំមិនបានដាក់លុយដែរហ្នឹង ប៉ុន្តែបន្ទាប់ពី ស៊ាន បូរ៉ាត គាត់ចេះតែពន្យល់ពួកយើងពួកយើងឱ្យចូលរកស៊ីវិនិយោគជាមួយក្រុមហ៊ុន ហើយខ្ញុំក៏លង់ខ្លួនដាក់នឹងគេដែរទៅ ក៏ចាញ់បោកនឹងគេដែរ»។ លោកបានបន្តថា លោក សារ៉ាត បានពន្យល់ជាបន្តបន្ទាប់ដល់សាធារណជនអំពីការបង្កើនការវិនិយោគ។
លោក សារ័ត្ន បាននិយាយថា រាល់ពេលដែលលោក បូរ៉ាត ថ្លែងទៅកាន់វេទិកាសាធារណៈ និងកិច្ចប្រជុំជាមួយអ្នកវិនិយោគ គាត់តែងតែផ្សព្វផ្សាយការវិនិយោគដី ប្រ៊ីលាន ស៊ីធី ។ ការផ្សព្វផ្សាយរបស់គាត់ក៏បានផ្សព្វផ្សាយដល់ពលករខ្មែរនៅប្រទេសកូរ៉េផងដែរ។ គោលដៅចុងក្រោយគឺបង្កើនការវិនិយោគនៅក្នុងក្រុមហ៊ុនរបស់អ្នកស្រី ឡេង ចាន់ណា។
ជាក់ស្តែង លោក បូរ៉ាត បានផ្តល់ការបំភ្លឺជុំវិញការចោទប្រកាន់របស់ជនរងគ្រោះ លោក សារ័ត្ន បាននិយាយថា ជនរងគ្រោះជាច្រើនក៏បានដាក់ពាក្យបណ្តឹងលោក បូរ៉ាត់ ផងដែរ។
លោកបញ្ជាក់ថា៖ «ខ្ញុំបានឃើញគាត់ [ស៊ាន បូរ៉ាត] នៅរាល់ការប្រជុំធំៗ។ ឡេង ចាន់ណា ក៏បាននិយាយដែរថា គាត់ជាអ្នកដឹកនាំរបស់គាត់ ហើយគាត់បានផ្តល់ការពិគ្រោះយោបល់ដល់ក្រុមហ៊ុន»។
លោកបន្តថា៖ «ការឆ្លើយបំភ្លឺយ៉ាងម៉េចនឹងក៏មិនដឹងដែរ ហើយបើតាមខ្ញុំគិត បើគាត់ចូលឆ្លើយបំភ្លឺ គាត់មិនចូលខ្លួនពាក់ពន្ធ័នោះទេប្រហែលជាគាត់ឆ្លើយដោះសារ»។
មនុស្សជិត ៥ ០០០នាក់បានដាក់ពាក្យប្តឹង បើទោះបីជាវាមិនរាប់បញ្ចូលពលករនៅកូរ៉េ ថៃ និងជប៉ុន ដែលបានវិនិយោគក្នុងគម្រោងនេះក៏ដោយ។ លោក សារ័ត្ន បានបន្តទៀតថា ជីវភាពរបស់ពួកគេមិនមានភាពប្រសើរឡើងទេ ដោយសារការផ្តោតអារម្មណ៍របស់ពួកគេនៅតែផ្តោតលើការដោះស្រាយបំណុលធនាគារ។
គាត់បានទួញសោកថា៖ «បើនិយាយពីជីវិតរបស់យើង [ជនរងគ្រោះ] គ្មានអ្នកណាមានជីវិតប្រសើរទេ មានតែជំពាក់បំណុលគេប៉ុណ្ណោះ»។
លោកបានប្រមូលមតិរបស់អ្នកនៅក្នុងក្រុម ដើម្បីស្វែងរកដំណោះស្រាយ ជាពិសេសដើម្បីយកមកវិញនូវការវិនិយោគដើមទុនក្នុងអចលនទ្រព្យ និងស្នើសុំជំនួយពីតុលាការដើម្បីពន្លឿនដំណើរការនេះ ខណៈដែលជនរងគ្រោះមួយចំនួនប្រឈមមុខនឹងកាលៈទេសៈដ៏លំបាកបំផុត។
ជនរងគ្រោះម្នាក់ទៀតឈ្មោះ យ៉ា សំអេង ដែលត្រូវបានក្រុហ៊ុនឆបោកចំនួន២ម៉ឺនដុល្លារ តាមរយៈកម្ចីឯកជនបានចែករំលែកថា គាត់បានស្តាប់ការពន្យល់របស់ ស៊ាន បូរ៉ាត និងទទួលបានការណែនាំពីគាត់អំពីការវិនិយោគ។
លោកបាននិយាយថា ក្រុមហ៊ុន ប្រ៊ីលាន ស៊ីធី តែងតែចាក់ផ្សាយវីដេអូ និងនិយាយអំពីលោក ស៊ាន បូរ៉ាត ដើម្បីផ្សព្វផ្សាយអំពីវត្តមានរបស់បុគ្គលមានអំណាចនៅក្នុងក្រុមហ៊ុន ដើម្បីទទួលបានការជឿទុកចិត្តពីប្រជាពលរដ្ឋ ដែលក្នុងនោះក៏មានការបង្ហោះតាមបណ្តាញសង្គមបង្ហាញពីការចូលរួមរបស់គាត់នៅក្នុងសកម្មភាពរបស់ក្រុមហ៊ុនផងដែរ។
លោក សំអេង បានឱ្យដឹងថា៖ «រឿងពាក់ព័ន្ធ ឫមិនពាក់ព័ន្ធខ្ញុំអត់បានស៊ីជម្រៅទេ ប៉ុន្តែបើរឿងសកម្មភាពផ្សេងៗ ខ្ញុំធ្លាប់ឃើញក្រុមការងាររបស់ពួកគេតែងតែផ្ញើ [ឃ្លីបវីដេអូ] ឬបង្ហាញឱ្យយើងមើលដើម្បីនិយាយទាក់ទាញឱ្យយើងមានទំនុកចិត្តហ៊ានយកលុយទៅដាក់ជាមួយក្រុមហ៊ុន»។
លោកបានបន្តថា៖ «ខ្ញុំឃើញគាត់ [ស៊ាន បូរ៉ាត] ចូលរួមគ្រប់សកម្មភាពជារឿយៗ ព្រោះអីក្រុមការងាររបស់ក្រុមហ៊ុន ប្រ៊ីលាន ស៊ីតធី បានប្រាប់យើង ដើម្បីឱ្យយើងមានទំនុកចិត្តហ៊ានដាក់លុយជាមួយក្រុមហ៊ុន គេណែនាំប្រាប់យើងថា ពួកគេមានទំនួលខុសត្រូវ គេមានថ្នាក់ដឹកនាំល្អផងដែរ ទើបយើងមានទំនុកចិត្តក្នុងការវិនិយោគ»។
លោក សំអេង បានបន្តទៀតថា៖ «ទី២ ពួកគេមានខ្នងបង្អែករឹងមាំ ហើយឃើញសកម្មភាពឯកឧត្តម ស៊ាន បូរ៉ាត ចូលរួមរឿយៗ»។
លោកបានចែករំលែកថា លុយដែលគាត់បានវិនិយោគគឺបានមកពីការខិតខំប្រឹងប្រែងអស់រយៈពេល៨ឆ្នាំ ប៉ុន្តែបន្ទាប់ពីត្រូវបានចាញ់បោកមក វានាំឱ្យមានបញ្ហារួមទាំងការខាតបង់ពេលវេលា និងកេរ្តិ៍ឈ្មោះរបស់គាត់។ អាជីវកម្មរបស់គាត់ប្រឈមនឹងហានិភ័យ ហើយគាត់តស៊ូជាមួយការចំណាយប្រចាំថ្ងៃ។ លើសពីនេះ គាត់ត្រូវផ្លាស់ប្តូរទៅខេត្តផ្សេងដើម្បីធ្វើការ។
លោកបានលើកឡើងថា៖ «ខ្ញុំសង្ឃឹមបន្តិចបន្តួចដែរដោយសារតែលុយដែលយើងដាក់នៅខាងក្រមហ៊ុន យើងដាក់ពាក្យបណ្តឹងជាមួយមេធាវីរបស់សម្តេច [ហ៊ុន សែន] ហើយមេធាវីសម្តេចក៏ទម្លាក់មេធាវីការពារក្តីឱ្យជនរងគ្រោះ យើងមានក្តីសង្ឃឹតិចតួចនឹងអាចបានប្រាក់ពីក្រុមហ៊ុនវិញតិច ឬច្រើនដើម្បីបន្តប្រកបរបរអាជីវកម្ម» ដោយស្នើសុំឱ្យអាជ្ញាធរពាក់ព័ន្ធដោះស្រាយរឿងរបស់លោកស្រី ឡេង ចាន់ណា ក្នុងករណីដើម្បីពន្លឿនដំណើរការដោះស្រាយបញ្ហានេះឱ្យមានប្រសិទ្ធភាពតាមដែលអាចធ្វើទៅបាន។
វាចាំបាច់ណាស់ក្នុងការកំណត់អត្តសញ្ញាណអ្នកទទួលខុសត្រូវ និងនាំពួកគេទៅកាន់យុត្តិធម៌។ លោកបានបន្ថែមថា ប្រសិនបើករណីនេះនៅតែមិនអាចដោះស្រាយបាន វាអាចកំណត់បានថាជាគំរូដ៏គ្រោះថ្នាក់ ដែលអាចបណ្តាលឱ្យមានជនរងគ្រោះកាន់តែច្រើននាក់ ស្រដៀងទៅនឹងអ្វីដែលគាត់បានរងទុក្ខ។
អ្នកនាំពាក្យរដ្ឋាភិបាលលោក ប៉ែន បូណា បដិសេធមិនផ្តល់ព័ត៌មានលម្អិតទេ ដោយគ្រាន់តែបញ្ជាក់យ៉ាងខ្លីថា៖ «ប្រទសមានច្បាប់ត្រូវអនុវត្តច្បាប់ដោយមិនលើកលែង»។ លោកបន្ថែមថា៖ «នេះជាដំណើរការធម្មតានៃនីតិរដ្ឋ»។
លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា និងលោក សយ ច័ន្ទវិចិត្រ អ្នកនាំពាក្យនៃអង្គភាពប្រឆាំងអំពើពុករលួយមិនអាចទាក់ទងសុំការបំភ្លឺបានទេ។
លោក ស ថាវី អនុរដ្ឋលេខាធិការក្រសួងការពារជាតិបានបដិសេធមិនធ្វើអត្ថាធិប្បាយទេនៅពេលដែលអ្នកយកព័ត៌មានពី ខេមបូចា ទាក់ទងលោកតាមទូរសព្ទ។
ការបង្រ្កាបនេះហាក់ដូចជាផ្នែកនៃយុទ្ធនាការរបស់រដ្ឋាភិបាលដើម្បីបង្ហាញពីរូបភាពនៃអភិបាលកិច្ចល្អ ចំពេលមានការខកចិត្តកាន់តែខ្លាំងឡើងជាមួយនឹងភាពល្បីល្បាញថ្នាក់ឧកញ៉ាចំពោះការរំលោភដីធ្លី និងការលាងលុយ។ អ្នកសង្កេតការណ៍អន្តរជាតិបានកត់សម្គាល់នៅពេលចាប់ផ្តើមនៃករណីនេះ។
រឿងអាស្រូវក្លែងបន្លំបានជាប់ពាក់ព័ន្ធនឹងឥស្សរជនកម្ពុជាដ៏លេចធ្លោក្នុងប៉ុន្មានឆ្នាំថ្មីៗនេះ ជាមួយនឹងរាប់រយគ្រួសារដែលដាក់ពាក្យបណ្តឹងចោទប្រកាន់ការក្លែងបន្លំដីធ្លី ដែលមួយក្នុងចំណោមពួកគេប្រឆាំងនឹងឧកញ៉ា ហ៊ី គឹមហុង។
បុគ្គលចំនួន៥នាក់ រួមទាំងមន្ត្រីជាន់ខ្ពស់រដ្ឋាភិបាល អ្នកជំនួញ ក៏ដូចជាមេធាវី ត្រូវបានចាប់ខ្លួន និងចោទប្រកាន់ពីបទពុករលួយ និងការក្លែងបន្លំពាក់ព័ន្ធនឹងការកាត់ទោសដាក់ពន្ធនាគារអតីតជំនួយការពីររូបរបស់លោក ហ៊ុន សែន គឺលោក លី សាម៉េត និងលោក ដួង តារា។
ជាងនេះទៅទៀត តុលាការខេត្តកំពង់ឆ្នាំង បានរកឃើញថាលោក ព្រំ សុផល អតីតអភិបាលរងស្រុកកំពង់លែង មានទោសពីបទគប់គិត និងបំផ្លាញព្រៃលិចទឹក ហើយផ្តន្ទាទោសដាក់ពន្ធនាគាររយៈពេល៣ឆ្នាំ។ លោក លឹម ដានីន អតីតប្រធានការិយាល័យប្រជាពលរដ្ឋស្រុក និងលោក ជួន តុំ ដែលប្រព្រឹត្តបទល្មើសព្រៃលិចទឹក ត្រូវបានតុលាការកាត់ទោសឲ្យជាប់ពន្ធនាគារចំនួន៤ឆ្នាំ កាលពីថ្ងៃទី១២ ខែធ្នូ។
លោកនាយករដ្ឋមន្ត្រី ហ៊ុន ម៉ាណែត ក្នុងសារអបអរសាទរទិវាជាតិ និងអន្តរជាតិ ប្រឆាំងអំពើពុករលួយ៩ធ្នូ បានអំពាវនាវដល់អង្គភាពប្រឆាំងអំពើពុករលួយ និងអ្នកពាក់ព័ន្ធជំរុញស្មារតី «ប្រឆាំងអំពើពុករលួយ» គ្រប់ទម្រង់ និងពង្រឹងការអប់រំប្រឆាំងអំពើពុករលួយ។
លោក គី តិច ប្រធានក្រុមមេធាវីរបស់រដ្ឋាភិបាល ដែលជាតំណាងជនរងគ្រោះបានបដិសេធមិនធ្វើអត្ថាធិប្បាយទេ ប៉ុន្តែក្នុងសន្និសីទសារព័ត៌មានកាលពីខែតុលា ដែលបង្ហោះលើ Freshnews លោកមានប្រសាសន៍ថា មានជនរងគ្រោះចំនួន ៤ ៩២៩នាក់ ដែលស្ម័គ្រចិត្តស្នើសុំមេធាវីដើម្បីការពារសំណុំរឿងរបស់ពួកគេ។ ចំណែកពលករនៅបរទេសវិញ ក្រុមការងារលោកកំពុងចាត់ការតាមនីតិវិធី។
នាយកប្រតិបត្តិអង្គការតម្លាភាពកម្ពុជា ប៉ិច ពិសី ស្វាគមន៍ចំពោះនីតិវិធីរបស់ ACU និងតុលាការខេត្តសៀមរាប ក្នុងការស៊ើបអង្កេតលើការចោទប្រកាន់ពីការក្លែងបន្លំវិនិយោគ និងសាកសួរសាក្សីបន្ថែមទៀត។
លោកបានមានប្រសាសន៍ថា ដើម្បីឲ្យការវិនិយោគផ្ទាល់ក្នុងស្រុក និងបរទេសមានភាពរីកចម្រើន រដ្ឋាភិបាលគួរតែកាត់បន្ថយរបាំងនៃការធ្វើអាជីវកម្ម ដោយដោះស្រាយបញ្ហាអំពើពុករលួយដែលរីករាលដាល ភាពទន់ខ្សោយនៃនីតិរដ្ឋ និងកម្រិតនៃការប្រកួតប្រជែងក្នុងមុខជំនួញនៅក្នុងព្រះរាជាណាចក្រ៕
ប្រែសម្រួលពីអត្ថបទភាសាអង់គ្លេស៖ Another Senior Ministry Official Questioned Over $200 Million Land Investment Fraud
