សកម្មជនបរិស្ថានចំនួនប្រាំមួយនាក់ដែលត្រូវបានចាប់ខ្លួនកាលពីព្រឹកថ្ងៃសៅរ៍ ទី២៣ ខែវិច្ឆិកា នៅពេលកំពុងស៊ើបអង្កេតការកាប់ឈើខុសច្បាប់នៅជិតដីសម្បទានសេដ្ឋកិច្ចក្នុងខេត្តស្ទឹងត្រែង ត្រូវបានដោះលែង បន្ទាប់ពីការសាកសួររយៈពីរថ្ងៃពីកងរាជអាវុធហត្ថខេត្ត។
អ្នកជាប់ឃុំរួមមាន អ៊ូច ឡេង ម្ចាស់រង្វាន់ Goldman Environmental Prize ដែលត្រូវធ្លាប់បានចាប់ខ្លួន ហើយត្រូវបានដោះលែងនៅឆ្នាំ២០២១ ក្នុងអំឡុងពេលស៊ើបអង្កេតអេកូឡូស៊ីដូចគ្នា ហើយក៏ដូចជាសហការីយូរឆ្នាំ ហេង ស្រស់ និង មេន ម៉ាត់ ដែលត្រូវបានឃុំខ្លួនជាមួយគាត់នៅឆ្នាំនោះ។ ក្នុងនោះក៏មានអ្នកកាសែតឯករាជ្យ និងសកម្មជនលោក តាត ឧត្តម អ្នកសម្របសម្រួលគម្រោងបណ្តាញយុវជនកម្ពុជា អូត ឡាទីន និងសកម្មជនបរិស្ថាន លោក ព្រំ ម៉ៅ ដែលដំបូងគេមិនទាន់ស្គាល់អត្តសញ្ញាណ។
លោក សេង សុភាព មេបញ្ជាការកងរាជអាវុធហត្ថខេត្តស្ទឹងត្រែងបានបញ្ជាក់ពីការដោះលែងក្រុមនេះនៅប្រហែលម៉ោង៣រសៀល នៅថ្ងៃចន្ទ ទី២៥ ខែវិច្ឆិកា។
លោក សុភាព ប្រាប់ថា៖ «យើងឱ្យគាត់ត្រទ្បប់ទៅវិញអស់ហើយ»។ លោកបានបន្តថា ការសាកសួរបន្ថែមទៅខាងអយ្យការដែលកំពុងដោះស្រាយករណីនេះ។
លោក សុភាព បានបដិសេធចំពោះការអត្ថាធិប្បាយបន្ថែម និងសំណួរទាក់ទងនឹងលក្ខខណ្ឌនៃការដោះលែងនេះ។
លោក ជា សុភ័ក្រ្ត អ្នកនាំពាក្យអយ្យការអមសាលាដំបូងខេត្តស្ទឹងត្រែង មិនបានឆ្លើយតបតាមទូរសព្ទច្រើនដង។
លោក អំ សំអាត នាយកទទួលបន្ទុកកិច្ចការទូទៅនៃអង្គការលីកាដូ បានបញ្ជាក់ការសាទរការសម្រេចដោះលែងសមកម្មជនការពារបរិស្ថាន។
លោកបានថ្លែងថា៖ «ខ្ញុំយល់ថា ពួកកាត់ជាសកម្មជនការពារព្រៃឈើបរិស្ថានធនធានធម្មជាតិ និងការសែតឯករាជ្យ មិនគួរត្រូវបានចាប់ ឬឃាត់ខ្លួនទេ សកម្មភាពរបស់គាត់ក្នុងន័យជួយការពារព្រៃឈើធនធានធម្មជាតិ។ ប៉ុន្តែការឃាត់ខ្លួនដោយសារទាក់ទងថា ការចូលតំបន់ការពារគ្មានការអនុញ្ញាតអីជាដើម ហើយមានការពាក់ព័ន្ធករណីផ្សេងៗទៀត ប៉ុន្តែតាមពិតទៅពួកគាត់មិនគួរត្រូវបានឃាត់ខ្លួនទេ។ ហើយប្រសិនជាការដែលពួកគាត់ចូលតំបន់ដោយពុំមានការអនុញ្ញាតអី ក្នុងគោលបំណងតែមួយគឺការពារព្រៃឈើធនធានធម្មជាតិ»។
បើយោងតាមលោក សំអាត ក្រុមអង្គការលីកាដូ បាននិយាយខ្លីៗជាមួយសកម្មជនបន្ទាប់ពីការដោះលែង ប៉ុន្តែមិនបានទទួលព័ត៌មានលម្អិតអំពីលក្ខខណ្ឌនៅឡើយ។
លោក ម៉ែន គុង អ្នកនាំពាក្យខេត្តស្ទឹងត្រែង មានប្រសាសន៍ថា បុគ្គលទាំងប្រាំមួយនាក់ត្រូវបានដោះលែងបន្ទាប់ពីពិភាក្សាជាមួយមេធាវីរបស់ពួកគេ ហើយបន្ទាប់ពី «ទទួលស្គាល់កំហុសចំពោះការចូលក្នុងតំបន់ហាមឃាត់»។ លោកបានបន្ថែមថា អាជ្ញាធរបានព្រមានពួកគេមិនឲ្យចូលតំបន់នោះទៀតទេ។
លោកបានថ្លែងថា៖ «ពួកគាត់បានសារភាពកំហុស និងទទួលយកនូវកំហុសដែលគាត់ពិតជាអនុវត្តខុសនឹងបម្រាមមែន»។ លោកបន្តថា៖ «ពួកគាត់បានបញ្ជាក់យ៉ាងច្បាស់ថា មិនអនុវត្តធ្វើអ្វីដែលខុសទៀតទេ ហើយទទួលយកនូវការណែនាំអប់រំរបស់មន្ត្រី និងព្រះរាជអាជ្ញា»។
ខេមបូចា ព័ត៌មាន មិនទាន់អាចផ្ទៀងផ្ទាត់បានថា តើតំបន់ដែលចោទសួរនោះត្រូវបានដាក់ជាតំបន់ច្បាស់លាស់ ដើម្បីហាមឃាត់រាល់ការចូលនោះទេ សូម្បីតែកិច្ចការពារបរិស្ថាន ឬការស៊ើបអង្កេតក៏ដោយ។
ករណីកន្លងមកពាក់ព័ន្ធនឹងការចាប់ខ្លួនសកម្មជន អ្នកសារព័ត៌មាន និងអ្នកប្រឆាំងនៅកម្ពុជា បានធ្វើឱ្យមានការរិះគន់យ៉ាងខ្លាំងពីក្រុមសិទ្ធិមនុស្ស ដោយរបាយការណ៍ប្រព័ន្ធផ្សព្វផ្សាយបានកត់ត្រាករណីដែលបុគ្គលត្រូវបានបង្ខិតបង្ខំឱ្យសារភាព ឬការសន្យាភក្តីភាពចំពោះគណបក្សកាន់អំណាច ក្រោមការគំរាមកំហែងនៃការចោទប្រកាន់ ឬបង្កគ្រោះថ្នាក់ដោយហេតុផលនយោបាយ ឬដល់គ្រួសាររបស់ពួកគេ។
អ្នកស្រី ជួប ស្រីនុត ភរិយាលោក ហេង ស្រស់ បានប្រាប់ ខេមបូចាព័ត៌មានថាអ្នកស្រីបានទៅជួបប្តីរបស់គាត់ នៅពេលគាត់ត្រូវដោះលែង ប៉ុន្តែនិយាយជាមួយគាត់បានខ្លីប៉ុណ្ណោះ។ អ្នកស្រីបាននិយាយថា លោកបានណែនាំនាងឲ្យត្រឡប់មកភ្នំពេញវិញ ប៉ុន្តែមិនបានប្រាប់ថាលោកនឹងទៅណានោះទេ។
វានៅតែមិនច្បាស់ថាតើសមាជិកនៃក្រុមដែលត្រូវបានឃុំខ្លួនបានត្រឡប់ទៅផ្ទះវិញ ឬក៏ពួកគេបានទៅទីណាចាប់តាំងពីការដោះលែងរបស់ពួកគេមក។
ខណៈ ស្រីនុត បានសម្តែងការធូរស្បើយចំពោះការដោះលែងប្តីរបស់អ្នកស្រី។ អ្នកស្រីបានសារភាពថា គាត់តែងតែព្រួយបារម្ភអំពីសុវត្ថិភាពរបស់ប្តីរបស់គាត់ ដោយសារតែការងាររបស់គាត់ជាសកម្មជនបរិស្ថាន។
លោក ហេង គឹមហុង ប្រធានបណ្តាញយុវជនកម្ពុជា (CYN) ក៏បានបញ្ជាក់ពីការដោះលែងបុគ្គលទាំង៦នាក់នេះ ប៉ុន្តែលោកបានប្រាប់ថា មិនទាន់និយាយជាមួយពួកគេនៅឡើយទេ។ លោកបានបន្ថែមថា ក្រុមនេះបានផ្តល់ស្នាមមេដៃជាផ្នែកមួយនៃដំណើរការដោះលែង។
លោកបានលើកឡើងថា៖ «ខ្ញុំជឿជាក់ថា ការងារការពារធនធានធម្មជាតិមិនគួរត្រូវបានដាក់កម្រិតទេ ប៉ុន្តែគួរតែត្រូវបានលើកទឹកចិត្ត»។ លោកបានមានប្រសាសន៍ថា ដោយយោងទៅលើភាពសំខាន់នៃការងារបរិស្ថានរបស់ក្រុម។
លោកបន្តថា៖ «ការដោះលែងពួកគេគឺជារឿងល្អ ប៉ុន្តែយើងសង្ឃឹមថានឹងមិនមានការចាប់ខ្លួនអ្នកដែលធ្វើការដើម្បីការពារបរិស្ថានទៀតទេ»។
អ្នកយកព័ត៌មាន នៅខេមបូចាព័ត៌មាន មិនអាចទាក់ទងសកម្មជនទាំង៦នាក់នោះ ដើម្បីសុំការបំភ្លឺបានទេ។
ប្រែសម្រួលពីអត្ថបទភាសាអង់គ្លេស៖ Arrested Environmental Activists Freed After Two Days of Questioning
