តម្លៃប្រេងឥន្ធនៈនៅកម្ពុជាកំពុងហក់ឡើងខ្ពស់ ដោយសារតែតម្លៃដឹកជញ្ជូនកើនឡើងជាងមុន យ៉ាងណារដ្ឋាភិបាលបានធានាថា កម្ពុជាមានប្រេងបម្រុងគ្រប់គ្រាន់ និងជំរុញឱ្យសាធារណជនកុំមានការព្រួយបារម្ភ។
បុគ្គលិកចាក់ប្រេងនៅស្ថានីយមួយកន្លែងក្នុងទីក្រុងភ្នំពេញបានឲ្យដឹងថាសាំងធម្មតានៅស្ថានីយក្បែរគាត់បានអស់ស្តុកតាំងពីថ្ងៃអាទិត្យ និងថានៅមានលក់តែសាំងស៊ូពែរដែលមានតម្លៃ ៦ ៨០០រៀលក្នុងមួយលីត្រ ដែលតម្លៃនេះហក់ឡើងពី៤ ៧៥០រៀល។
បុគ្គលិករូបនេះ គឺឈ្មោះ ធី ប៊ុនធា បានបញ្ជាក់ថា៖ «អតិថជិនមកចាក់សាំងធម្មតាច្រើន [ធ្វើឲ្យ] សាំងធម្មតាដាច់ស្តុក»។
បើតាមសេចក្ដីប្រកាសរបស់ក្រសួងពាណិជ្ជកម្មអំពីតម្លៃប្រេងឥន្ធនៈសម្រាប់ថ្ងៃទី៨ដល់១០ ខែមីនា ឆ្នាំ២០២៦ តម្លៃប្រេងនៅកម្ពុជាហក់ឡើងយ៉ាងគំហុក។ សាំងធម្មតាឡើងពី ៣ ៨៥០រៀលក្នុងមួយលីត្រទៅ ៤ ៤០០រៀលក្នុងមួយលីត្រ ខណៈប្រេងម៉ាស៊ូតឡើងរហូតដល់១ ៣០០រៀលក្នុងមួលលីត្រ ដែលតម្លៃលក់ចេញមានរហូតដល់ ៥ ១៥០រៀលក្នុងមួយលីត្រ។
តម្លៃប្រេងលើពិភពលោកកើនឡើងដោយសារភាពតានតឹងនៅមជ្ឈិមបូព៌ា និងការបិទច្រកសមុទ្រហ័រម៉ូស ដែលជាច្រកដឹកប្រេងដ៏សំខាន់សម្រាប់ផ្គត់ផ្គង់ទីផ្សារអន្តរជាតិ។
លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ មានប្រសាសន៍ថា កម្មករក្នុងវិស័យសេដ្ឋកិច្ចក្រៅប្រព័ន្ធកំពុងព្រួយបារម្ភពីផលប៉ះពាល់មកលើជីវភាពដោយសារតែជម្លោះនៅមជ្ឈិមបូព៌ា ដែលបានធ្វើឲ្យតម្លៃប្រេង និងឧស្ម័នក្នុងស្រុកកើនឡើង។
តម្លៃសាំងធម្មតាបានឡើង២៥០០រៀលក្នុងមួយលីត្រលើតម្លៃពីមុន ខណៈសាំងស៊ុបពែរបានឡើងដល់៥ ៥០០រៀលក្នុងមួយលីត្រនៅតាមស្ថានីយប្រេងមួយចំនួន។ លោកលើកឡើងទៀតថា ស្ថានីយប្រេងក្នុងស្រុកមួយចំនួនបានបិទការលក់បណ្ដោះអាសន្ន ឬផ្អាកតែម្ដង។
លោក វន់ ពៅ ប៉ាន់ប្រមាណថា នៅទូទាំងប្រទេសកម្ពុជាមានត្រីចក្រយានយន្ត ឬតុកៗប្រហែល២សែនគ្រឿង ហើយភាគច្រើននៃអ្នកទាំងនោះកំពុងប្រឈមសម្ពាធហិរញ្ញវត្ថុ ដោយសារចំណូលមិនអាចទប់ទល់នឹងការចំណាយដែលកំពុងកើនឡើងបាន។
លោកបន្ថែមថា៖ «ពួកគាត់ចំណាយច្រើនលើប្រេងឥន្ធនៈ ខណៈប្រាក់ចំណូលនៅតែទាប ដូចនេះវាមិនមានតុល្យភាពរវាងការចំណាយ និងចំណូល។ ស្ថានភាពបែបនេះ អាចធ្វើឲ្យអត្រានៃភាពក្រីក្រកើនឡើង ខណៈតម្លៃទំនិញក៏ឡើង ហើយចំណូលនៅមានតិច ហើយតម្លៃទំនិញនានានៅតែបន្តឡើងថ្លៃ។ អ្វីទាំងនេះគឺជាការពិតដែលយើងមើលឃើញ»។
លោក វន់ ពៅ ជំរុញឲ្យរដ្ឋាភិបាលពិនិត្យតាមដានលើក្រុមហ៊ុននាំចូលប្រេង និងឧស្ម័ន ដើម្បីការពារកុំឲ្យអ្នកទាំងនោះកេងចំណេញពីការឡើងថ្លៃប្រេងឥន្ធនៈហួសហេតុ។ បើសិនជាអាចលោកថា រដ្ឋាភិបាលគួរតែពិចារណាជួយបន្ថែមការឧបត្ថម្ភធនលើតម្លៃប្រេង ដើម្បីស្តារទំនុកចិត្តសាធារណជន និងការពារផលពិបាកផ្នែកសេដ្ឋកិច្ចលើប្រជាពលរដ្ឋ។
លោកបន្ថែមថា រដ្ឋាភិបាលគួរតែពិនិត្យមើលថាខ្លួនមានលទ្ធភាពនាំប្រេងចូលដោយផ្ទាល់ដើម្បីជៀសវាងវិស័យឯកជនយកផ្ដាច់មុខ ហើយរដ្ឋអាចធ្វើការលក់ដោយផ្ទាល់ទៅប្រជាពលរដ្ឋក្នុងតម្លៃសមរម្យមួយ។
អ្នកបើកកង់បី លោក ប៊ុន សឿន ប្រាប់សារព័ត៌មានខេមបូចាថា តាំងពីប្រេង និងហ្គាសឡើងថ្លៃ ចំណូលរបស់លោកបានធ្លាក់ចុះ និងធ្វើឲ្យប៉ះពាល់ដល់ការផ្គត់ផ្គង់ជីវភាពគ្រួសារ។
លោកឱ្យដឹងថា ពីមុនលោកចំណាយ១ ៥០០រៀលក្នុងការបញ្ចូលហ្គាសសម្រាប់ធ្វើការប្រចាំថ្ងៃ ប៉ុន្តែតាំងពីតម្លៃកើនឡើងមក លោកត្រូវបន្ថែម១ម៉ឺនរៀលទៀតដើម្បីបញ្ចូលហ្គាសសម្រាប់ដឹកអ្នកដំណើរ ហើយចំនួនអ្នកធ្វើដំណើរទៀតសោតក៏ធ្លាក់ចុះដូចគ្នា។
លោកឲ្យដឹងថា៖ «កន្លែងខ្លះលក់ហ្គាសចន្លោះពី២៥០០រៀល ទៅ៣០០០រៀល។ ឥឡូវខ្ញុំចំណាយលើសមុន១ម៉ឺនរៀល។ វាប៉ះពាល់ដល់ជីវភាព ព្រោះអ្វីៗឡើងថ្លៃ»។
លោក សឿន ស្នើឲ្យរដ្ឋាភិបាលចាន់វិធានការលើការឡើងថ្លៃប្រេងនេះ និងពិនិត្យមើលលើក្រុមហ៊ុនក្នុងស្រុកដែលលក់ប្រេងឥន្ធនៈខ្ពស់ជាងតម្លៃដែលក្រសួងកំណត់។
លោកបន្ថែមថា៖ «ខ្ញុំស្នើឲ្យរដ្ឋាភិបាល និងក្រសួងពាក់ព័ន្ធពិនិត្យលើបញ្ហានេះ និងពិចារណាបញ្ចេញថវិកាជាតិជួយរក្សាស្ថិរភាពតម្លៃប្រេងឥន្ធនៈ។ បើមិនដូចនោះទេ វានឹងប៉ះពាល់ខ្លាំងដល់ជីវភាពប្រជាជន ព្រោះថាកន្លែងខ្លះបានដំឡើងតម្លៃច្រើន រហូតដល់១ ០០០រៀល»។
លោក កែវ រតនៈ រដ្ឋមន្ត្រីក្រសួងរ៉ែ និងថាមពល បានជំរុញកុំឲ្យសារធាណជនមានការព្រួយបារម្ភ ដោយថាកម្ពុជាមានប្រេងបម្រុងគ្រប់គ្រាន់សម្រាប់រយៈពេល២១ថ្ងៃ ក្នុងករណីគ្មានការនាំចូលប្រេងបានទាល់តែសោះ។
លោកបន្ថែមថា៖ «យើងមិទាន់ឈានដល់ស្ថានភាពនៃការខ្វះប្រេងផ្គត់ផ្គង់នៅឡើយទេ។ កម្ពុជាបច្ចុប្បន្ននៅបន្តនាំប្រេងចូលរាល់ថ្ងៃ មិនមានការបិទប្រភពនាំចូលប្រេងមកកម្ពុជានោះទេ»។
លោកបន្តថា ក្រុមហ៊ុនប្រេងក្នុងស្រុកនានាបាននាំចូលប្រេងសម្រាប់ផ្គត់ផ្គង់តម្រូវការប្រចាំថ្ងៃក្នុងស្រុកបានគ្រប់គ្រាន់តាមតម្រូវការ។ យ៉ាងណា លោកថាតម្លៃអាចនឹងកើនឡើងទៅតាមតម្លៃប្រេង និងឧស្ម័នរបស់ទីផ្សារអន្តរជាតិ។
លោកជំរុញឲ្យសាធារណជនកុំព្រួយបារម្ភរហូតទិញប្រេងស្តុកទុក ដែលអាចបង្កជាហានិភ័យនៃការកើតមានអគ្គិភ័យ។
លោក ហុង វណ្ណៈ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា បានលើកឡើងថាតម្លៃប្រេងមិនមែនប៉ះពាល់តែកម្ពុជានោះទេ តែវាជាបញ្ហាសកល។
លោកមានប្រសាសន៍ថា៖ «តម្លៃប្រេងឡើងខ្ពស់ វានឹងប៉ះពាល់ដល់ចង្វាក់ផ្គត់ផ្គង់ ផលិតកម្ម និងការដឹកជញ្ជូន។ តម្លៃទំនិញក៏នឹងកើនឡើងនៅកម្ពុជា ដែលវាបង្កការរំខានដល់ប្រជាពលរដ្ឋដែលមានប្រាក់ចំណូលទាប។ ពេលថ្លៃដឹកជញ្ជូនកើនឡើង វានឹងធ្វើឲ្យប៉ះពាល់ដល់ជីវភាពប្រជាពលរដ្ឋ»។
លោកបន្ថែមថា រដ្ឋាភិបាលគួរពិចារណាបង្កើតគណៈកម្មការបន្ទាន់មួយដើម្បីដោះស្រាយបញ្ហានេះ ដោយពង្រឹងបរិមាណប្រេងបម្រុងទុក ស្វែងរកប្រភពផ្គត់ផ្គង់នានាដើម្បីនាំចូល និងរុករកផលិតកម្មប្រេងក្នុងស្រុក។
អ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ មិនអាចទាក់ទងសុំការអត្ថាធិប្បាយបានទេ។ អ្នកនាំពាក្យរាជរដ្ឋាភិបាល លោក ប៉ែន បូណា បដិសេធអត្ថាធិប្បាយលើរឿងនេះ និងបានបង្វែរឲ្យរកព័ត៌មាននៅលើទំព័រហ្វេសប៊ុករបស់ក្រសួងពាណិជ្ជកម្ម៕
ប្រែសម្រួលពីអត្ថបទភាសាអង់គ្លេស៖ Cambodia Assures Fuel Supply As Gasoline Prices Jump
