លោកនាយករដ្ឋមន្ត្រី ហ៊ុន ម៉ាណែត មានប្រសាសន៍ថា មានរបាយការណ៍បរទេសអំពីប្រទេសកម្ពុជាស្តីពីការជួញដូរមនុស្ស ដែល «មិនសុក្រឹត ឬយុត្តិធម៌» ហើយបានបន្ទាបចំណាត់ថ្នាក់នៃកិច្ចខិតខំប្រឹងប្រែងរបស់ខ្លួនក្នុងការប្រយុទ្ធប្រឆាំងនឹងការជួញដូរមនុស្ស។
លោកបានធានាថា រដ្ឋាភិបាលនៅតែប្តេជ្ញាចិត្តក្នុងការប្រយុទ្ធប្រឆាំងនឹងឧក្រិដ្ឋកម្មឆ្លងដែន ជាពិសេសការជួញដូរមនុស្ស និងដើម្បីពង្រឹងការបង្ការ និងបង្ក្រាបនូវយុទ្ធសាស្ត្ររបស់ឧក្រិដ្ឋជន ។
លោក ហ៊ុន ម៉ាណែត បានលើកឡើងក្នុងទិវាជាតិប្រយុទ្ធប្រឆាំងការជួញដូរមនុស្ស នៅរាជធានីភ្នំពេញ កាលពីថ្ងៃទី១២ ខែធ្នូ ឆ្នាំ២០២៤ ថា៖ «យើងមិនដែលបដិសេធថាយើងមិនមានបញ្ហានេះទេ។ កម្ពុជាមិនដែលបដិសេធថាខ្លួនមិនមានបញ្ហាការជួញដូរមនុស្ស ឬបញ្ហាអសន្តិសុខផ្សេងទៀតនោះដែរ»។
លោក ហ៊ុន ម៉ាណែត បានថ្លែងថា៖ «ហេតុដូច្នេះហើយបានជាយើងបានពង្រឹងវិធានការ អនុវត្តច្បាប់ និងសហការជាមួយបរទេសព្រោះយើងមានសុឆន្ទៈច្បាស់លាស់»។
លោកបានលើកយកករណីបុរសជនជាតិកូរ៉េខាងត្បូងម្នាក់ដែលអះអាងថា គាត់ត្រូវបានចាប់ខ្លួន និងធ្វើទារុណកម្ម ប៉ុន្តែក្រោយមកប៉ូលិសបានរកឃើញថាទីតាំងដែលហេតុការណ៍បានកើតឡើងគឺមិនពិតបន្ទាប់ពីពួកគេបានត្រួតពិនិត្យពួកគេ។ ក្នុងករណីមួយទៀត លោកបាននិយាយថា ប្រព័ន្ធផ្សព្វផ្សាយបានរាយការណ៍អំពីបុរសបរទេសម្នាក់ដែលត្រូវបានគេធ្វើជា «ទាសករឈាម» ប៉ុន្តែវាមិនបានឆ្លុះបញ្ចាំងពីស្ថានភាពពិតនោះទេ។
លោក ហ៊ុន ម៉ាណែត បានបន្តថា នាពេលកន្លងមក ឧក្រិដ្ឋជនជាច្រើន ដែលភាគច្រើនជាជនអន្តោប្រវេសន៍ខុសច្បាប់ បានចូលមកក្នុងប្រទេសកម្ពុជា ក្រោមការក្លែងបន្លំលាក់ខ្លួនប្រព្រឹត្តបទល្មើសយ៉ាងអនាធិបតេយ្យលើទឹកដីកម្ពុជា ដែលនាំឱ្យកើតមានឧក្រិដ្ឋកម្មតាមប្រព័ន្ធអ៊ីនធឺណិតដ៏ធំ ដែលកម្ពុជាមិនធ្លាប់ជួបប្រទះពីមុនមក។
ជាមួយគ្នានេះ លោក ស សុខា រដ្ឋមន្ត្រីក្រសួងមហាផ្ទៃ បានពន្យល់ថា យុទ្ធនាការថ្នាក់ជាតិ ដើម្បីប្រយុទ្ធប្រឆាំងការជួញដូរមនុស្ស គឺជាការខិតខំប្រឹងប្រែងរួមគ្នារបស់ក្រសួង ស្ថាប័នចំនួន២២ និងអង្គភាពជំនាញចំនួន៥។ អង្គភាពធ្វើការរួមគ្នានៅថ្នាក់ជាតិ និងថ្នាក់ក្រោមជាតិ ដើម្បីសម្របសម្រួលទប់ស្កាត់ និងបង្ក្រាបការជួញដូរមនុស្ស។
លោក ស សុខា បានមានប្រសាសន៍ក្នុងទិវាជាតិប្រឆាំងការជួញដូរមនុស្សថា៖ «នៅក្នុងរយៈ១០ខែកន្លងទៅនេះ យើងសង្កេតឃើញថ្វីត្បិតករណីការជួញដូរមនុស្សនិងបទល្មើសពាក់ពន្ធ័មិនទាន់រលត់យ៉ាងនៅកម្ពុជាយ៉ាងណាក្តី ប៉ុន្តែសកម្មភាពបទល្មើសរាយការណ៍មានការថយចុះហើយបទល្មើសត្រូវបានបង្ក្រាបទាន់ពេលវេលា»។
លោកបានបន្ថែមថា កត្តានេះបាននាំឲ្យមានស្ថិរភាពនយោបាយ សេដ្ឋកិច្ច និងសង្គមនៅកម្ពុជា។
លោកបានជំរុញឲ្យប្រទេសដទៃទៀតរក្សាកិច្ចសហប្រតិបត្តិការដោយស្មោះត្រង់ដើម្បីដោះស្រាយបញ្ហាជាក់ស្តែងដែលប៉ះពាល់ដល់សុវត្ថិភាពពលរដ្ឋខ្លួន។ លោកបានសង្កត់ធ្ងន់លើសារៈសំខាន់នៃការអនុវត្តការវាយតម្លៃឱ្យបានហ្មត់ចត់ និងពង្រឹងកិច្ចសហប្រតិបត្តិការ ទន្ទឹមនឹងការជៀសវាងការចោទប្រកាន់ដែលគ្មានមូលដ្ឋាន។
លោកស្រី ជូ ប៊ុនអេង អនុប្រធានគណៈកម្មាធិការជាតិប្រយុទ្ធប្រឆាំងការជួញដូរមនុស្ស (NCCT) និង លោក ឆាយ គឹមខឿន អ្នកនាំពាក្យអគ្គស្នងការនគរបាលជាតិ មិនអាចទាក់ទងសុំការបំភ្លឺបានទេ។
យោងតាម Freshnews ដែលបានចេញផ្សាយរបាយការណ៍ឆមាសទី១ របស់ NCCT ករណីចំនួន១០៤ ត្រូវបានកត់ត្រា បណ្តាលឱ្យមានការចាប់ខ្លួនចំនួន១៣៤នាក់ ក្នុងនោះមានជនបរទេស៤នាក់ ពីបទជួញដូរមនុស្ស និងកេងប្រវ័ញ្ចផ្លូវភេទ។ បន្ថែមពីលើនេះ អាជ្ញាធរបានជួយសង្គ្រោះជនរងគ្រោះចំនួន២៩០នាក់ ក្នុងនោះស្រី២៤១នាក់ និង១៣៤នាក់ ជាអនីតិជនក្រោមអាយុ១៨ឆ្នាំ។
លោក អំ សំអាត ប្រធានប្រតិបត្តិនៃអង្គការសិទ្ធិមនុស្ស លីកាដូ បានសម្តែងការព្រួយបារម្ភចំពោះស្ថានការណ៍ជួញដូរមនុស្សដែលកើនឡើងក្នុងរយៈពេលប៉ុន្មានឆ្នាំចុងក្រោយនេះ។ លោកបានសង្កត់ធ្ងន់ថា ការក្លែងបន្លំតាមប្រព័ន្ធអ៊ីនធឺណឺតបានក្លាយជាកត្តាចម្បងដែលរួមចំណែកដល់ការជួញដូរមនុស្សនៅក្នុងប្រទេសកម្ពុជា ដែលធ្វើឱ្យមានភាពស្មុគស្មាញដល់កិច្ចខិតខំប្រឹងប្រែងក្នុងការដោះស្រាយបញ្ហានេះ។
លោកបានកត់សម្គាល់ថា បញ្ហាប្រឈមទាំងនេះប៉ះពាល់ដល់សមត្ថភាពរបស់កម្ពុជាក្នុងការទាក់ទាញការវិនិយោគ ចំពេលមានការព្រួយបារម្ភពីសុវត្ថិភាព និងសន្តិសុខ ជាពិសេសភ្ញៀវទេសចរដែលមានការកើនឡើងដោយសារបញ្ហាការជួញដូរមនុស្សដែលកំពុងបន្ត។
លោក សំអាត លើកឡើងថា ប្រព័ន្ធផ្សព្វផ្សាយបរទេសបានរាយការណ៍អំពីការបោកប្រាស់តាមប្រព័ន្ធអ៊ីនធឺណិត ដែលបង្កការព្រួយបារម្ភចំពោះការអនុវត្តច្បាប់នៅកម្ពុជា។
លោកបន្តថា៖ «ដូច្នោះកម្ពុជាត្រូវតែពង្រឹងយុទ្ធនាការនិងវិធានការក្នុងការទប់ស្កាត់ក្នុងការជួញដូរមនុស្ស ទី១ ត្រូវតែពង្រឹងក្នុងការអនុវត្តច្បាប់ឲ្យកាន់តែមានប្រសិទ្ធភាព ទី២ លុបបំបាត់ទាក់ទងអំពើពុករលួយក្នុងការជួញដូរមនុស្ស ទី៣ ត្រូវធានាថាអ្នកដែលបង្កត្រូវតែអនុវត្តក្នុងវិធានការផ្លូវច្បាប់»។
លោកប្រាប់ថា អាជ្ញាធរកម្ពុជាត្រូវការការបណ្តុះបណ្តាលបច្ចេកទេសបន្ថែមទៀត ដើម្បីដោះស្រាយការវិវត្តនៃការជួញដូរមនុស្ស ជាពិសេសពាក់ព័ន្ធនឹងការបោកប្រាស់តាមអ៊ីនធឺណិត។ កិច្ចសហប្រតិបត្តិការក្នុងតំបន់ក៏មានសារៈសំខាន់ផងដែរក្នុងការកំណត់អត្តសញ្ញាណអ្នកជួញដូរមនុស្ស និងរារាំងប្រទេសកម្ពុជាកុំឱ្យក្លាយជាជម្រកនៃជនល្មើស។
លើសពីនេះ លោកបានជំរុញឱ្យមានការលើកកម្ពស់ការយល់ដឹងដល់ប្រជាពលរដ្ឋ និងជំរុញឱ្យមានការចូលរួមរបស់ពួកគេក្នុងការទប់ស្កាត់ការជួញដូរមនុស្ស ដែលជាកត្តាសំខាន់៕
ប្រែសម្រួលពីអត្ថបទភាសាអង់គ្លេស៖ Cambodia Never Denied Human Trafficking Problem; Remains Committed to Combating It
