សាលាដំបូងរាជធានីភ្នំពេញនៅថ្ងៃទី២៥ ខែកក្កដានេះ បានផ្តន្ទាទោសលោក ទាវ វណ្ណុល ប្រធានគណបក្សភ្លើងទៀន ពីបទបរិហាកេរ្តិ៍ជាសាធារណៈ ដោយពិន័យ១០លានរៀល និងសងជំងឺចិត្តចំនួន៦ពាន់លានរៀល ឬប្រហែល១,៥លានដុល្លារ។
លោក ទាវ វណ្ណុល ប្រធានគណបក្សភ្លើងទៀន ត្រូវបានសាលាដំបូងរាជធានីភ្នំពេញសម្រេចផ្តន្ទាទោសពីបទបរិហាកេរ្តិ៍ជាសាធារណៈនៅព្រឹកថ្ងៃទី២៥ ខែកក្កដា ដោយពិន័យ១០លានរៀល និងតម្រូវឱ្យសងជំងឺចិត្តចំនួន៦ពាន់លានរៀល ឬប្រហែល១,៥លានដុល្លារ ទៅដើមបណ្តឹង។
លោក ទាវ វណ្ណុល ប្រធានគណបក្សភ្លើងទៀន ដែលត្រូវបានចោទប្រកាន់ពីបទបរិហាកេរ្តិ៍ជាសាធារណៈ ដោយសារការអត្ថាធិប្បាយដែលលោកបានផ្តល់បទសម្ភាសន៍ជាមួយប្រព័ន្ធផ្សព្វផ្សាយបរទេសមួយ ដោយចោទប្រកាន់ថា លទ្ធិប្រជាធិបតេយ្យនៅកម្ពុជាកំពុងដើរថយក្រោយ ក្រោមការដឹកនាំរបស់លោកនាយករដ្ឋមន្ត្រី ហ៊ុន ម៉ាណែត។
នៅក្នុងសេចក្តីសន្និដ្ឋានចុងក្រោយកាលពីថ្ងៃទី៩ ខែកក្កដា មេធាវីរដ្ឋាភិបាលបានទាមទារសំណងជំងឺចិត្តចំនួន ៦ពាន់លានរៀល ឬប្រហែល ១,៥ លានដុល្លារ ពីលោក ទាវ វណ្ណុល។
ក្រុមមេធាវីរដ្ឋាភិបាលបានដាក់ពាក្យបណ្តឹងកាលពីខែមីនា ឆ្នាំ២០២៤ ដោយចោទប្រកាន់លោក វណ្ណុល ថា បានធ្វើឱ្យខូចមុខមាត់របស់ប្រមុខរដ្ឋាភិបាលកម្ពុជា បន្ទាប់ពីការអត្ថាធិប្បាយបែបរិះគន់របស់លោកចំពោះការធ្លាក់ចុះនៃលទ្ធិប្រជាធិបតេយ្យ និងសិទ្ធិមនុស្សនៅកម្ពុជា ចាប់តាំងពីលោក ហ៊ុន ម៉ាណែត ចូលកាន់តំណែង។
គួររំលឹកថា មេដឹកនាំជាន់ខ្ពស់គណបក្សប្រឆាំងមួយចំនួន ដូចជា លោក ថាច់ សេដ្ឋា ត្រូវបានតុលាការរកឃើញពិរុទ្ធភាពចំពោះបទចោទប្រកាន់ ពីរ ដែលមិនពាក់ព័ន្ធនឹងគ្នា គឺការចេញសែកគ្មានសាច់ប្រាក់ និងបទញុះញង់ ខណៈលោក សុន ឆ័យ ត្រូវបានតុលាការរកឃើញពិរុទ្ធពីបទបរិហារកេរ្តិ៍ ដោយសារលោកបាននិយាយថា ការលួចបន្លំសន្លឹកឆ្នោត អំឡុងការបោះឆ្នោតឃុំសង្កាត់ខែមិថុនា។
លោក ស៊ុន ចន្ធី ប្រធានគណបក្សកម្លាំងជាតិ ត្រូវបានចោទប្រកាន់ពីបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម បន្ទាប់ពីលោកត្រឡប់មកពីប្រទេសជប៉ុន ទីដែលលោកបានចោទប្រកាន់ថា “ក្រោមការដឹកនាំរបស់រដ្ឋាភិបាលកម្ពុជា ប្រជាពលរដ្ឋជំពាក់ធនាគារ ដែលបណ្តាលឱ្យមានចំណាកស្រុកតាមភូមិ”។
លោក មឺ សេងហ៊ អនុប្រធានគណបក្សកម្លាំងជាតិប្រចាំខេត្តកំពង់ចាម ត្រូវបានឃុំខ្លួនបណ្តោះអាសន្ន បន្ទាប់ពីត្រូវបានចោទប្រកាន់ពីបទញុះញង់ឲ្យមានការរើសអើង កាលពីថ្ងៃទី១៥ ខែមីនា៕
