សមាគមសម្ព័ន្ធអ្នកសារព័ត៌មានកម្ពុជា

តុលាការបើកសវនាការ​សំណុំរឿង​លោក ទាវ វណ្ណុល​ ខណៈមេធាវី​រដ្ឋាភិបាល​ទារសំណងជំងឺចិត្ត​ ១,៥លានដុល្លារ

លោក ទាវ វណ្ណុល ប្រធានគណបក្សភ្លើងទៀន មកដល់សាលាដំបូងរាជធានីភ្នំពេញ ដើម្បីចូលរួមសវនាការលើសំណុំរឿងរបស់លោកនៅថ្ងៃទី៨ ខែកក្កដា ឆ្នាំ២០២៤។ (ខេមបូចា/ព្រីង សំរាំង)
លោក ទាវ វណ្ណុល ប្រធានគណបក្សភ្លើងទៀន មកដល់សាលាដំបូងរាជធានីភ្នំពេញ ដើម្បីចូលរួមសវនាការលើសំណុំរឿងរបស់លោកនៅថ្ងៃទី៨ ខែកក្កដា ឆ្នាំ២០២៤។ (ខេមបូចា/ព្រីង សំរាំង)

កាល​ពី​ថ្ងៃចន្ទ សាលាដំបូងរាជធានីភ្នំពេញ បានបើកសវនាការលើសំណុំរឿងបរិហារកេរ្តិ៍ជាសាធារណៈរបស់លោក ទាវ វណ្ណុល ប្រធានគណបក្សភ្លើងទៀន ដែលត្រូវបានចោទប្រកាន់ដោយ​សារ​ការ​អត្ថាធិប្បាយដែលលោកបានផ្តល់បទសម្ភាសន៍ជាមួយប្រព័ន្ធផ្សព្វផ្សាយបរទេសមួយ​ ដោយចោទប្រកាន់ថា លទ្ធិប្រជាធិបតេយ្យនៅកម្ពុជាកំពុងដើរថយក្រោយ ក្រោមការដឹកនាំរបស់លោកនាយករដ្ឋមន្ត្រី ហ៊ុន ម៉ាណែត។

នៅ​ក្នុងសេចក្តី​សន្និដ្ឋាន​​ចុង​ក្រោយ​របស់​ខ្លួន​ មេធាវី​រដ្ឋាភិបាល​បាន​ទាមទារ​សំ​ណង​​ជំងឺ​ចិត្ត​ចំនួន ៦ពាន់​លាន​រៀល ឬ​ប្រហែល ១,៥ លាន​ដុល្លារ​ ពីលោក ទាវ វណ្ណុល​។ តុលាការ​គ្រោង​ប្រកាស​សាលក្រម​​នៅ​ថ្ងៃ​ទី២៥ ខែ​កក្កដា។

ក្រុម​មេធាវីរដ្ឋាភិបាលបាន​ដាក់​ពាក្យបណ្តឹងកាលពីខែមីនា ឆ្នាំ២០២៤នេះ ដោយចោទប្រកាន់លោក វណ្ណុល​ ថា បានធ្វើឱ្យខូចមុខមាត់របស់ប្រមុខរដ្ឋាភិបាលកម្ពុជា បន្ទាប់ពីការអត្ថាធិប្បាយបែប​រិះគន់របស់លោក​ចំពោះការធ្លាក់​ចុះ​នៃ​លទ្ធិប្រ​ជា​ធិបតេយ្យ និងសិទ្ធិមនុស្សនៅកម្ពុជា ចាប់តាំងពីលោក ហ៊ុន ម៉ាណែត ចូលកាន់​តំណែង។

លើស​ពី​នេះទៅទៀត​ លោក វណ្ណុល ​តាម​​ចោទ​បាន​និយាយថា រដ្ឋាភិបាល​បាន​ដំ​ឡើង​កាមេរ៉ា​សុវត្ថិភាព ​ដើម្បី​ឃ្លាំមើល​​សកម្មភាព​របស់របស់លោក និង​មេដឹកនាំ​គណបក្ស​​ភ្លើង​ទៀនមួយចំនួនទៀត​។

អំឡុង​សវនាការរយៈពេលបីម៉ោង លោក វណ្ណុល​ បានបដិសេធការចោទប្រកាន់ពីបទបរិហារកេរ្តិ៍ជាសាធារណៈ ដែលផ្តើមចេញពីបទសម្ភាសន៍ជាមួយសារព័ត៌​មាន​ Nikkei Asia ដោយ​​​វិទ្យុបារាំងអន្តរជាតិ (RFI) បន្តផ្សាយនូវអ្វីដែលលោកបាន​និយាយជាមួយសារព័ត៌មាន​ Nikkei Asia។

ព្រះរាជអាជ្ញាបានដកស្រង់សម្តី​របស់លោក វណ្ណុល ដែលថា រដ្ឋាភិបាលបាន​ដំ​ឡើងកាមេរ៉ាសុវត្ថិភាព ដើម្បីឃ្លាំមើល​លោក និងសកម្មភាពរបស់មេដឹកនាំគណបក្ស​ភ្លើងទៀន​ផ្សេងទៀត ព្រមទាំង​ផ្នែកនៃសម្តី​ ដែលលោក​និយាយអំពីការដឹក​នាំ​​របស់លោក ហ៊ុន ម៉ាណែតថា  «កាន់តែអាក្រក់ទៅៗ» ហើយ​ថា «គ្មានលទ្ធិប្រជាធិបតេយ្យទេ​នៅកម្ពុជា»។

លោក ទាវ វណ្ណុល បាន​ប្រាប់​តុលាការ​ថា៖ «ខ្ញុំ​មិន​ទទួលយក​ការ​ចោទ​ប្រកាន់​នេះ​ទេ ព្រោះ​ការ​ចោទ​ប្រកាន់នេះ ​មិន​ពិតទេ»។ ដោយលោកបានបន្ថែថា៖​ «ខ្ញុំ​មាន​សេ​រីភាព​ក្នុង​ការ​បញ្ចេញ​មតិ ដូច​ពលរដ្ឋ​ខ្មែរ​ដទៃ​ទៀត​ ដែលត្រូវ​បាន​​ធានា​ដោយ​​មាត្រា ៤១នៃ​រដ្ឋធម្មនុញ្ញ»។

លោក វណ្ណុល បាន​បន្ត​ថា៖ «ខ្ញុំ​គ្មាន​ចេតនា​ធ្វើ​ឲ្យ​ខូច​កិត្តិយស​រដ្ឋាភិបាល​ទេ ហើយ​ខ្ញុំ​សុំ​ឲ្យ​តុលាការ​ឱ្យរួចផុតពីបទចោទ»។

លោក​បានទទួលស្គាល់នៅក្នុងបទសម្ភាសន៍របស់លោក​ជាមួយសារព័ត៌មាន​ Nikkei Asia ថា លោក​បានធ្វើការប្រៀបធៀបលទ្ធិប្រជាធិបតេយ្យក្រោមការដឹក​នាំ​របស់លោក ហ៊ុន ម៉ាណែត ថាមានការ «រឹតត្បិត» ច្រើន​ជាងឪពុករបស់គាត់ គឺលោក ហ៊ុន សែន ហើយថា លទ្ធិប្រជាធិបតេយ្យបានដើរថយក្រោយដោយមានសមាជិកគណបក្ស សកម្មជន និងអ្នករិះគន់ត្រូវបានចាប់ខ្លួន។

 លោក វណ្ណុល​ បានបដិសេធអត្ថបទ ដែលបាន​ផ្សាយការអត្ថាធិប្បាយរបស់លោក​ ដែលលោកត្រូវបានដកស្រង់សម្តីដែល​និយាយថា «រដ្ឋាភិបាល» បាន​ដំ​ឡើង​កាមេរ៉ាសុវត្ថិភាព ប៉ុន្តែតាមពិត លោក​ប្រើពាក្យ «អាជ្ញាធរ» បានដាក់​កាមេរ៉ា​។

លោក​បានអះអាង​​​ថាពីផ្លូវធំចូលទៅផ្ទះរបស់លោក ​មាន​ចម្ងាយ ២ ៥០០ម៉ែត្រ ហើយមាន​កាមេរ៉ា​សុវត្ថិភាព​ «តែ​មួយ​គត់»​​​ ដាក់បាញ់ចំមុខផ្ទះដែល​មាន​បំណង​ឃ្លាំមើល​​សកម្ម​ភាព​របស់​លោក។

ព្រះរាជអាជ្ញារង ឆាយ ហុង បានរក្សាការចោទប្រកាន់ពីបទបរិហារកេរ្តិ៍ជាសាធារណៈ ហើយស្នើឱ្យចៅក្រមពិចារណាផ្តន្ទាទោស​លើជនជាប់ចោទ ទាវ វណ្ណុល​ ដែលមាន «ចេតនាទុច្ចរិត​» ធ្វើឱ្យខូចកេរ្តិ៍ឈ្មោះរបស់រដ្ឋាភិបាល។

លោក ឆាយ ហុង បានមាន​ប្រសាសន៍​ថា៖ «ជនជាប់ចោទមាន​អសុទ្ធចិត្ត​ ដែលចង់​​បំផ្លាញកិត្តិយស និងកេរ្តិ៍ឈ្មោះរបស់រដ្ឋាភិបាល» ដោយបាន​បន្ថែមថា កាមេរ៉ាសុវត្ថិភាពត្រូវបានតំឡើងនៅតាមដងផ្លូវ ដើម្បីរក្សាសណ្តាប់ធ្នាប់សាធារណៈ។

លោក ឆាយ ហុង បានមាន​ប្រសាសន៍​ថា ជនជាប់​ចោទបានធ្វើបទ​សម្ភាស​ន៍មុនការបោះឆ្នោតព្រឹទ្ធសភា ដែលមានបំណងធ្វើ​ឱ្យប៉ះពាល់ដល់កិត្តិយសរបស់រដ្ឋាភិ​បាល។

លោក ម៉ម ចាន់ណែត​ តំណាងមេធាវីរដ្ឋាភិបាល មានប្រសាសន៍ថា មាន «ធាតុផ្សំ​នៃភស្តុតាង» គ្រប់គ្រាន់ដែលអាចដាក់​បន្ទុក​លោក​ វណ្ណុល​ ពីបទបរិហារកេរ្តិ៍ជាសាធារណៈ បន្ទាប់ពីលោក វណ្ណុល បានផ្តល់បទសម្ភាសន៍ដល់សារព័ត៌មាន​ Nikkei Asia ហើយបានចែករំលែកព័ត៌មាននេះនៅលើបណ្តាញសង្គម​ Telegram និងទំព័រ Facebook របស់គណបក្ស​ភ្លើងទៀន​។

លោក ចាន់ណែត បានមានប្រសាសន៍ថា៖ «ការលើកទ្បើងរបស់ជនជាប់​ចោទបានប៉ះពាល់ដល់កិត្តិយសរបស់រដ្ឋាភិបាលកម្ពុជា ដែលប៉ះពាល់ដល់ទំនាក់ទំ​នង ការវិនិយោគ ការអភិវឌ្ឍ និងសេដ្ឋកិច្ចរបស់ប្រទេស។ [ខ្ញុំ]ទាមទារ​សំណង​ជំងឺចិត្ត​ប្រាំមួយ​ពាន់​លាន​រៀល»។

លោក ជូង ជូងី មេធាវីរបស់លោក ទាវ វណ្ណុល បានទទូច​ឱ្យតុលាការទម្លាក់បទ​ចោទ ដោយសារកូនក្តីរបស់លោក​គ្រាន់តែលើកឡើងពី «ការយល់ឃើញ​របស់អ្នក​នយោ​បាយ»  ដោយបង្ហាញពី «ការពិតដែលថា មានអ្វីមួយកំពុងកើតឡើង»ទាក់​ទងនឹងលទ្ធិប្រជាធិបតេយ្យ និងសេរីភាពនៃការបញ្ចេញមតិ។

លោកមាន​ប្រសាសន៍​ថា ដំណើរការ​ប្រជាធិបតេយ្យ​បាន​អនុញ្ញាត​ឱ្យ​គណបក្ស​នយោបាយ​មាន​សិទ្ធិចូមរួម​ «ការ​​បោះឆ្នោត​ដោយ​សេរី និង​យុត្តិធម៌» ប៉ុន្តែ​គណបក្ស​​ភ្លើងទៀន​​ត្រូវ​បាន​ដក​សិទ្ធិ ហើយ​សមាជិកគណ​បក្ស និង​សកម្មជន​ត្រូវ​បាន​កាត់ទោស ចាប់​ខ្លួន និង​ផ្តន្ទា​ទោស​ដោយ​តុលាការ។

ឆ្លើយតបនឹងសេចក្តីសន្តិដ្ឋាន​របស់មេធាវីរដ្ឋាភិបាលដែលថា ការអត្ថាធិប្បាយរបស់លោក ទាវ វណ្ណុល «ប៉ះពាល់ដល់ទំនាក់ទំនងប្រទេសទាំងពីរ» (កម្ពុជា និងជប៉ុន) លោក ជូង ជូងី បាននិយាយថា មិនមានរឿងបែបនេះកើតឡើងទេ ដោយ​សារ​កូនក្តីរបស់លោកបានផ្តល់​បទសម្ភាស​ន៍​ជាមួយ​សារព័ត៌មាន​បរទេស។

លោក ជូង ជូងី ចោទ​សួរថា៖ «តើ​លោក​បានឃើញ​ថា ​​ជំនួយ​ណា​មួយ​ត្រូវ​បាន​កាត់ ​ដោយ​សារ​តែ​សម្តី​​របស់​លោក ទាវ វណ្ណុល​ ឬ​ក៏​មាន​ការ​កាត់​ផ្តាច់​ [ដោយ EU] ទាក់ទង​នឹង EBA [អ្វី​គ្រប់​យ៉ាង​លើក​លែងតែ​​​អាវុធ]? វាអត់មានទេ»។ លោក ជូង ជូងី បានមានប្រសាសន៍ថា៖ «សូមពិចារណាទម្លាក់ចោល​បទចោទ​លើកូនក្តីរបស់ខ្ញុំ»។

បន្ទាប់ពីសវនាការ លោក វណ្ណុល​ បានប្រាប់អ្នកសារព័ត៌មានថា លោកគ្មានសង្ឃឹមថា តុលាការនឹង​ទម្លាក់ការចោទប្រកាន់នោះទេ ដោយសារលោកដឹងច្បាស់​ថា ក្នុង​នាម​ជាគណបក្សប្រឆាំង លទ្ធផលគឺថា ពួកគាត់​ «មិនដែល​រួចខ្លួនពីការចោទហ្នឹងទេ​»។

លោក​បាន​មាន​ប្រសាសន៍​ថា៖ «ខ្ញុំយល់ថា ការទាមទារសំណងហ្នឹងវាហួសហេតុ ប៉ុន្តែនេះវាជាសិទ្ធិរបស់ខាងអ្នកចោទ ហើយខ្ញុំសង្ឃឹមថា ចៅក្រមគាត់នឹងធ្វើការពិចារណារឿងនេះ»។

សហគមន៍អន្តរជាតិ រួមទាំងអង្គការសហប្រជាជាតិ បានលើក​ឡើង​ថា ប្រទេសកម្ពុជាមាន​ «ការធ្លាក់ចុះនូវ​​សិទ្ធិ​សេរីភាពពលរដ្ឋ និងសិទ្ធិ​នយោបាយ និងមាន​ការអនុវត្តបែប​គាបសង្កត់» ដែលមាន​ទំនាក់ទំនងនឹងមេដឹកនាំនយោបាយនៅ​កម្ពុជា ដែល «ប៉ះពាល់យ៉ាងធ្ងន់ធ្ងរ» ដល់សិទ្ធិមនុស្ស។

មេដឹកនាំជាន់ខ្ពស់គណបក្សប្រឆាំងមួយចំនួន​ ដូចជា​ លោក ថាច់ សេដ្ឋា ត្រូវបានតុលាការ​រកឃើញ​​ពិរុទ្ធភាព​ចំពោះ​បទចោទប្រកាន់ ពីរ​ ដែល​មិនពាក់ព័ន្ធនឹង​គ្នា​ គឺការចេញសែកគ្មាន​សាច់​ប្រាក់​ និងបទ​ញុះញង់ ខណៈលោក សុន ឆ័យ ត្រូវ​បាន​តុលាការ​រក​ឃើញពិរុទ្ធពីបទបរិ​ហារកេរ្តិ៍ ដោយសារ​លោក​បាន​និយាយថា ការលួច​បន្លំសន្លឹកឆ្នោត អំឡុងការបោះឆ្នោតឃុំសង្កាត់ខែមិថុនា។

លោក ស៊ុន ចន្ធី ប្រធានគណបក្សកម្លាំង​ជាតិ ត្រូវបានចោទប្រកាន់ពីបទញុះ​ញង់​បង្ក​ឱ្យ​មាន​ភាពវឹកវរ​ធ្ងន់ធ្ងរដល់សន្តិសុខ​​សង្គម បន្ទាប់ពីលោកត្រឡប់មកពីប្រ​ទេសជប៉ុន ទីដែល​លោកបានចោទប្រកាន់ថា “ក្រោមការដឹកនាំរបស់រដ្ឋាភិបាលកម្ពុជា ប្រជាពលរដ្ឋ​ជំពាក់ធនាគារ ដែលបណ្តាល​ឱ្យមានចំណាកស្រុកតាមភូមិ”។

លោក មឺ​ សេងហ៊ អនុប្រធាន​គណបក្ស​កម្លាំង​ជាតិប្រចាំ​ខេត្ត​កំពង់ចាម ត្រូវ​បាន​ឃុំ​​ខ្លួន​បណ្តោះ​អាសន្ន បន្ទាប់​ពី​ត្រូវ​បាន​ចោទ​ប្រកាន់​ពី​បទ​ញុះញង់​ឲ្យ​មាន​ការ​រើស​អើង កាល​ពី​ថ្ងៃ​ទី​១៥ ខែ​មីនា៕

ប្រែសម្រួលពីអត្ថបទភាសាអង់គ្លេស៖ Opposition Leader Teav Vannol’s Case Heard, Gov’t Lawyer Demands $1.5 Million Compensation

996 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម