ស្ថានីយវិទ្យុឯករាជ្យចំនួនពីរ គឺវិទ្យុសំឡេងសហរដ្ឋអាមេរិក វីអូអេ និងវិទ្យុអាស៊ីសេរី ត្រូវសម្រេចឱ្យផ្អាកសកម្មភាពផ្សព្វផ្សាយរបស់ខ្លួនភ្លាមៗ ដែលការណ៍នេះបង្កជាកង្វល់សម្រាប់អ្នកធ្វើការលើការលើកកម្ពស់សេរីភាពសារព័ត៌មាន សហជីព និងសង្គមស៊ីវិលនៅកម្ពុជា។ ការសម្រេចឱ្យបញ្ឈប់ការផ្សាយនេះ ទំនងជាអាចធ្វើឱ្យប៉ះពាល់ដល់សេរីភាពសារព័ត៌មាន និងលទ្ធិប្រជាធិបតេយ្យនៅកម្ពុជា ប៉ុន្តែមន្ត្រីរដ្ឋាភិបាលថាមិនប៉ះពាល់នោះទេ។
លោកប្រធានាធិបតី ដូណាល់ ត្រាំ បានចុះហត្ថលេខាលើក្រឹត្យមួយដោយបានកាត់ផ្ដាច់ជំនួយទៅទីភ្នាក់ងាររដ្ឋាភិបាលចំនួនប្រាំពីរដែលរួមមានទាំងទីភ្នាក់ងារអាមេរិកសម្រាប់ប្រព័ន្ធផ្សព្វផ្សាយសកល (USAGM) ដែលជាអាណាព្យាបាលរបស់វិទ្យុសំឡេងសហរដ្ឋអាមេរិក និងវិទ្យុអាស៊ីសេរីផងដែរ កាលពីថ្ងៃសុក្រ កន្លងទៅ។ ការផ្ដាច់ជំនួយនេះ ក៏អនុវត្តលើវិទ្យុអឺរ៉ុបសេរី ឬវីទ្យុសេរី ដែលផ្សាយនៅបណ្ដាប្រទេសអឺរ៉ុបខាងកើតរួមមានរុស្ស៊ី និងអ៊ុយក្រែនផងដែរ។
បទបញ្ជានេះបានដាក់ឲ្យបុគ្គលិកវិទ្យុសំឡេងសហរដ្ឋអាមេរិកចំនួន ១ ៣០០នាក់សម្រាកពីការងារកាលពីថ្ងៃសៅរ៍កន្លងទៅ។ វិទ្យុសំឡេងសហរដ្ឋអាមេរិកបង្កើតឡើងនៅឆ្នាំ១៩៤២ និងផ្សាយទៅកាន់មនុស្សប្រមាណជា៣៦០លាននាក់ក្នុងមួយសប្ដាហ៍។ ភ្នាក់ងារអាមេរិកសម្រាប់ប្រព័ន្ធផ្សព្វផ្សាយសកល (USAGM) មានបុគ្គលិកសរុបប្រហែល ៣ ៥០០នាក់ និងប្រើប្រាស់ថវិកាប្រមាណជា៨៨៦លានដុល្លារក្នុងឆ្នាំ២០២៤។
លោក ឈឺន ឆន វ័យ៥៥ឆ្នាំ រស់នៅភូមិភ្នំរ៉ៃ ឃុំតាតោក ស្រុកសំឡូត ខេត្តបាត់ដំបង លើកឡើងថា ការផ្អាកការផ្សាយរបស់វិទ្យុវីអូអេ និងវិទ្យុអាស៊ីសេរី គឺប្រៀបដូចជាបាត់សំឡេងក៏មានសក្ដានុពលមួយសម្រាប់ជនរងគ្រោះដូចជារួបលោក។ លោកបានបង្ហាញការសោកស្ដាយ និងកត់សម្គាល់ថា វត្តមានប្រព័ន្ធផ្សព្វផ្សាយទាំងពីរពិតជាមានសារសំខាន់ក្នុងកាលៈទេសៈនេះ។
កាលពីឆ្នាំ២០០៩ ពេលដែលមិនសូវមានប្រព័ន្ធផ្សព្វផ្សាយឯករាជ្យ និងមិនមានប្រព័ន្ធអ៊ីនធឺណិតប្រើសម្បូរបែប លោក ឆន ថា វិទ្យុទាំងពីរនេះហើយជាទីពឹងរបស់លោកក្នុងការទទួលបានព័ត៌មាន និងបានជួយលោកលើកពីបញ្ហារំលោភបំពានដីធ្លីនៅសហគមន៍។
លោកបន្តថា៖ «ប្រជាពលរដ្ឋខាតបង់ ព្រោះថាមិនមានប្រព័ន្ធផ្សព្វផ្សាយឯករាជ្យដើម្បីជួយផ្សាយបញ្ហា និងកង្វល់របស់ប្រជាសហគមន៍ ដូចនេះវាហានិភ័យខ្ពស់ណាស់។ វិទ្យុទាំងពីរជាឧបករណ៍នាំសំឡេងជនរងគ្រោះទៅកាន់សារធារណជន»។
ប្រធានសមាគមប្រជាធិបតេយ្យឯករាជ្យ សេដ្ឋកិច្ចក្រៅប្រព័ន្ធ ឬហៅកាត់ថា IDEA លោក វ៉ន ពៅ លើកឡើងថា លោកមានការតក់ស្លុតជាខ្លាំងពេលឮដំណឹងពីការផ្អាកការផ្សាយរបស់វិទ្យុឯករាជ្យសំខាន់ទាំងពីរនេះ ក្រោយលោកត្រាំចូលកាន់អំណាច។
ក្នុងនាមជាអ្នកតាមដានស្ថានភាពនយោបាយ សិទ្ធិមនុស្ស និងបញ្ហាពិភពលោក លោក «មិនដែលស្រមៃដល់ទេថាមានរឿងទាំងនេះកើតឡើងចំពោះវិទ្យុឯករាជ្យទាំងពីរ» ដែលកន្លងមកបានពាំនាំ «សំឡេងពិតរបស់ប្រជាពលរដ្ឋ និងជនរងគ្រោះ» ក៏ដូចជាសំឡេងមួយជួយលើកឡើងពីបញ្ហាសង្គម និងការគោរពសិទ្ធិមនុស្ស ប្រជាធិបតេយ្យ និងលក្ខខណ្ឌការងារសម្រាប់កម្មករនិយោជិតទាំងក្នុង និងក្រៅប្រព័ន្ធ។
លោកបន្ថែមថា៖ «ក្នុងស្ថានភាពនេះ អាមេរិកមិនគួរបោះបង់ពួកយើងទេ ដែលមានន័យថាការបិទការផ្សាយវិទ្យុទាំងពីរប្រៀបដូចជាការបោះបង់ជនរងគ្រោះ។ លំហូរនៃលទ្ធិប្រជាធិបតេយ្យមិនមានទៀតទេ ព្រោះថាសំឡេងរបស់យើងត្រូវបានបំបិទ»។
លោកយល់ថា សេរីភាពសារព័ត៌មាននឹងកាន់តែតូចចង្អៀត និងយូរៗទៅសំឡេងជនរងគ្រោះក៏ត្រូវបានគេបំភ្លេចចោលនៅក្នុងប្រទេសមួយដែលសេរីភាពសារព័ត៌មានកំពុងមានការរឹតត្បិត។ លោកបញ្ជាក់ថា ភាពអយុត្តិធម៌នានាដែលបានកើតលើប្រជាពលរដ្ឋកន្លងមក មានតែវិទ្យុឯករាជ្យពីរនេះទេ «បានធ្វើការផ្សព្វផ្សាយ»។
«ការបាត់បង់ការឆ្លុះបញ្ជាំងពីសង្គម»
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនណាហ្គាវើលដ៍ អ្នកស្រី ម៉ម សុវន្ថេត ប្រាប់ខេមបូចាថា អ្នកស្រីមានការសោកស្ដាយ និងបារម្ភថាអំពើអយុត្តិធម៌ក្នុងប្រទេសនេះនឹងកើតមានកាន់តែច្រើននៅពេលលែងមានវិទ្យុទាំងពីរនេះរាយការណ៍ពីបញ្ហាសិទ្ធិការងារដែលពួកខ្លួនកំពុងជួបប្រទះ។
អ្នកស្រីបន្តថា៖ «នៅពេលគ្មានវិទ្យុទាំងពីរនេះ ខ្ញុំបារម្ភថាពេលខ្ញុំតវ៉ា [ប្រឆាំងនឹងក្រុមហ៊ុនណាហ្គាវើលដ៍] គឺគ្មាននរណាដឹងនោះទេ ប្រជាជនកម្ពុជានឹងលែងមានសំឡេង ពីព្រោះថាប្រព័ន្ធផ្សព្វផ្សាយក្នុងស្រុកភាគច្រើនមិនរាយការណ៍ផ្ទាល់ពីជនរងគ្រោះនោះទេ។ ដូចនេះ ក្នុងនាមជាជនរងគ្រោះ ខ្ញុំខ្លាច និងបារម្ភ»។
អ្នកស្រីបន្ថែមថា ពេលអវត្តមានវិទ្យុទាំងពីរនេះនឹងបាន «ប្រយោជន៍ទៅអ្នកធ្វើបាបគេ» ក្នុងការប្រព្រឹត្តសកម្មភាព«ល្មើសនានា» និងធ្វើឲ្យជនងាយរងគ្រោះរងការឈឺចាប់។
អ្នកស្រីលើកឡើងទៀតថា រដ្ឋាភិបាលអាមរិកគួរបន្តគាំទ្រវិទ្យុឯករាជ្យទាំងពីរ ដោយថាការបិទនេះមានន័យថាពួកគេគាំទ្រជនផ្ដាច់ការ និងជនជិះជាន់អ្នកដទៃ។ អ្នកស្រីលើកឡើងថា៖ «យើងកំពុងរងទុក្ខ ដូចនេះពេលមានព័ត៌មានពិត ប្រព័ន្ធផ្សព្វផ្សាយឯករាជ្យផ្សាយពីកង្វល់យើង។ ឥឡូវយើងកំពុងតែរងទុក្ខ ទោះជាយើងស្រែកខ្លាំងៗ ក៏គ្មានអ្នកឮដែរ»។
យុវជនម្នាក់ទៀតដែលនិយមស្ដាប់ និងតាមដានបញ្ហាក្នុងប្រទេស ក៏ដូចជាសកលលោកតាមរយៈវិទ្យុវីអូអេ និងអាស៊ីសេរី ប្រាប់ខេមបូចាថា កញ្ញាភ្ញាក់ផ្អើលពេលឮថាមានការផ្អាកការផ្សាយរបស់វិទ្យុទាំងនេះ។
កញ្ញាចេះស្ដាប់ព័ត៌មានតាំងពីកុមារភាពតាមឪពុករបស់ខ្លួន។ និយាយក្នុងលក្ខខណ្ឌមិនបញ្ចេញឈ្មោះ កញ្ញាលើកឡើងថា «វិទ្យុទាំងពីរប្រៀបដូចជាមិត្តជិតស្និទ្ធ» និង «ជាកញ្ចក់» ឆ្លុះបញ្ចាំងពីសង្គម និងពិភពលោកដែលកញ្ញាកំពុងរស់នៅ។
តាមរយៈការស្ដាប់ការផ្សាយរបស់វិទ្យុទាំងនេះ កញ្ញាបានដឹងព័ត៌មានជាច្រើនពីកម្ពុជាទាក់ទងនឹងស្ថានភាពនយោបាយ អំពើពុករលួយ បញ្ហាសិទ្ធិមនុស្ស បញ្ហាដីធ្លី សកម្មជនបរិស្ថាន និង «ទុក្ខលំបាក» របស់ជនរងគ្រោះ ដែលអ្វីទាំងនេះមិនមានស្ថាប័នព័ត៌មានណាផ្សាយនោះទេ។
ដូចនេះការខកខានផ្សាយរបស់វិទ្យុទាំងពីរគឺជា «ការបាត់បង់ការឆ្លុះបញ្ជាំងពីសង្គម» ទាំងសម្រាប់កញ្ញា និងប្រជាពលរដ្ឋខ្មែរជាច្រើនផ្សេងទៀត។
កញ្ញាបន្ថែមថា៖ «ខ្ញុំសោកស្ដាយពេលដឹងថាវិទ្យុទាំងពីរនឹងត្រូវផ្អាកការផ្សាយ ព្រោះថាវិទ្យុទាំងនេះបានផ្ដល់ព័ត៌មាន និងចំណេះដឹងពីព្រឹត្តិការណ៍នានាដែលសារព័ត៌មានផ្សេងទៀតមិនហ៊ានផ្សាយ ទាំងក្នុងស្រុក និងអន្តរជាតិ»។
កញ្ញាបន្តថា អវត្តមានវិទ្យុទាំងពីរនឹងអាចធ្វើឲ្យអំពើអយុត្តិធម៌កើនឡើង ព្រោះថា «គ្មាននរណាចេញមុខ» និងនាំយកបញ្ហារបស់ប្រជាពលរដ្ឋឲ្យពិភពលោកបានដឹងទេ។ កញ្ញាយល់ថា សាធារណជនក៏នឹងបាត់បង់ឱកាសទទួលបានព័ត៌មានពិតផងដែរ។ កញ្ញាឲ្យដឹងទៀតថា៖ «សម្រាប់ខ្ញុំ វាដូចជាការបាត់បង់កញ្ចក់ឆ្លុះពីបញ្ហាសង្គម។ យើងមិនដឹងថានឹងមានអ្វីកើតឡើងនៅជុំវិញខ្លួននោះទេ[…] វាដូចជាបាត់បង់មិត្តជិតស្និទ្ធ។ ខ្ញុំមិនចង់ឲ្យវិទ្យុទាំងពីរបាត់បង់នោះទេ ព្រោះថាស្ថាប័នទាំងពីរបានជួយរាយការណ៍ពីរឿងពិត»។
ប្រធានវិទ្យុអាស៊ីសេរី អ្នកស្រី Bay Fang មិនបានឆ្លើយតបដោយផ្ទាល់មកសារព័ត៌មានខេមបូចានោះទេ។ អ្នកស្រីបានចេញសេចក្ដីថ្លែងការណ៍មួយថាអ្នកស្រីនឹងប្ដឹងទាស់ចំពោះបទបញ្ជានេះ។ អ្នកស្រីនិយាយក្នុងសេចក្ដីថ្លែងការណ៍ថា៖ «ការបិទវិទ្យុអាស៊ីសេរី គឺជាកាដូសម្រាប់ជនផ្ដាច់ការ និងជនជិះជាន់ រួមមានទាំងបក្សកុម្មុយនីស្តចិន ដែលតែងតែសប្បាយចិត្តដែលអាចឲ្យឥទ្ធិពលរបស់ពួកគេរីកសាយភាយតាមចិត្តដោយគ្មានការត្រួតពិនិត្យក្នុងលំហព័ត៌មាន»។
ដូចគ្នាដែរនាយកវិទ្យុវីអូអេ លោក Michael Abramowitz បានសរសេរលើបណ្ដាញសង្គមហ្វេសប៊ុកថា វាជាលើកដំបូងហើយក្នុងរយៈពេល៨៣ឆ្នាំ ដែល «ព័ត៌មានរបស់វីអូអេត្រូវគេបិទមិនឲ្យផ្សាយ»។ លោកថា លោកពិត «ជាមានការសោកស្ដាយជាខ្លាំង»។
លោកបន្តថា វីអូអេបានលើកកម្ពស់សិទ្ធិសេរីភាព និងលទ្ធិប្រជាធិបតេយ្យនៅជុំវិញពិភពលោក ដោយបានប្រាប់ពីរឿងរ៉ាវរបស់អាមេរិក ដោយបានផ្ដល់នូវភាពច្បាស់លាស់ និងគ្រប់ជ្រុងជ្រោយក្នុងអត្ថបទព័ត៌មាន និងដំណឹងរបស់ខ្លួន ជាពិសេសសម្រាប់អ្នកដែលរស់នៅក្នុងប្រទេសដឹកនាំដោយជនផ្ដាច់ការ។
ការបាត់បង់ព័ត៌មានឯករាជ្យនៅកម្ពុជា
កាលពីខែ កញ្ញា ឆ្នាំ២០១៧ រដ្ឋាភិបាលបង្ក្រាបលើប្រព័ន្ធផ្សព្វផ្សាយឯករាជ្យដោយបានចោទប្រកាន់ថាកាសែត The Cambodia Daily ថាជំពាក់ប្រាក់ពន្ធជាង៦,៣លានដុល្លារ និងនៅឆ្នាំ២០២៣ បានបិទវិទ្យុសំឡេងប្រជាធិបតេយ្យវីអូឌី។
អ្នកស្រី ឆន សុគន្ធា នាយិកាប្រតិបត្តិមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ បានលើកឡើងថា ស្ថានភាពនឹងកាន់តែពិបាកក្រោយការបិទវិទ្យុវីអូអេ និងអាស៊ីសេរី ដែលវិទ្យុទាំងនេះតែងរាយការណ៍ពីបញ្ហាសំខាន់ៗក្នុងប្រទេសកម្ពុជា។
អ្នកស្រីបន្តថា៖ «វានឹងមានបញ្ហាលំបាកកាន់តែខ្លាំងនៅពេលដែលគ្មានវត្តមានប្រព័ន្ធផ្សព្វផ្សាយឯករាជ្យក្នុងប្រទេស សូម្បីសព្វថ្ងៃនេះយើងមានសាពត៌មានឯករាជ្យមួយចំនួនដូចជា វីអូអេ នៅតែមានការលំបាក ខណៈដែលប្រជាពលរដ្ឋក៏ពិបាកក្នុងការផ្ដល់ព័ត៌មានអំពីការរំលោភសិទ្ធិមនុស្សដែលកើតឡើងក្នុងសហគមន៍របស់ពួកគាត់»។
អ្នកស្រីបន្ថែមថា ប្រព័ន្ធផ្សព្វផ្សាយឯករាជ្យដើរតួយ៉ាងសំខាន់ក្នុងការលើកកម្ពស់ប្រជាធិបតេយ្យ និងសិទ្ធិមនុស្ស ក៏ដូចជាសេរីភាពនៃការបញ្ចេញមតិនៅកម្ពុជា ក៏ដូចជាប្រទេសផ្សេងទៀតដែល «មិនទាន់មានប្រជាធិបតេយ្យពេញលេញ»។
នាយកប្រតិបត្តិសមាគមសម្ព័ន្ធអ្នកកាសែតកម្ពុជា ហៅកាត់ថា ខេមបូចា លោក ណុប វី មានប្រសាសន៍ថា ការផ្ដាច់ជំនួយមកកាន់វិទ្យុវីអូអេ និងអាស៊ីសេរី នឹងធ្វើឲ្យមានផលលំបាកដល់កម្ពុជា និងប្រទេសផ្សេងទៀតក្នុងពិភពលោក។
លោកលើកឡើងថា ប្រព័ន្ធផ្សព្វផ្សាយទាំងពីររាយការណ៍ពីការធ្លាក់ចុះសេរីភាពបញ្ចេញមតិ ផ្សាយពីព្រឹត្តិការណ៍សំខាន់ៗទាំងក្នុងស្រុក និងក្រៅស្រុក ព្រមទាំងផ្ដល់នូវការវិភាគដែលផ្ដល់នូវឥទ្ធិពលជាវិជ្ជមានទៅដល់ការយល់ឃើញ និងការគិតស៊ីជម្រៅរបស់អ្នកអាន ឬអ្នកស្ដាប់។
លោកបន្ថែមថា៖ «វាបានធ្វើឲ្យប៉ះពាល់ខ្លាំងដល់សេរីភាព។ យើងដឹងថាក្នុងសង្កមមួយរីកចម្រើនទៅបានដោយសារមានគំនិតផ្សេងៗគ្នាច្រើន។ បើយើងប្រកាន់យកគំនិតតែមួយ នោះសង្គមនឹងមិនមានការរីកចម្រើននោះទេ»។
សមាជិកព្រឹទ្ធសភា មកពីគណបក្សឆន្ទៈខ្មែរ លោក គង់ មូនីកា បង្ហាញការសោកស្ដាយចំពោះការផ្ដាច់ជំនួយសហព័ន្ធលើវិទ្យុវីអូអេ ដោយថាវិទ្យុនេះកន្លងមកបានផ្ដល់ព័ត៌មានស៊ីជម្រៅដល់ប្រជាពលរដ្ឋ។
លោកបន្ថែមថា៖ «អវត្តមានវិទ្យុវីអូអេពីកម្ពុជា គឺជាកង្វល់មួយដែរ ដោយថាយើងលែងបានទទួលព័ត៌មានអាចជឿជាក់បានតទៅទៀតទ្បើយដោយសារថា សារព័ត៌មានភាគច្រើននៅក្នុងស្រុក គឺសារព័ត៌មានដែលមានទិន្នាការលម្អៀងទៅរកគណបក្សកាន់អំណាច និងមិនបានឆ្លុះបញ្ចាំងពីតថភាពជាក់ស្តែងក្នុងសង្គមទេ។ ខ្ញុំគិតថា វានឹងជះឥទ្ធិពលប៉ះពាល់ដល់ការយល់ដឹងរបស់ពលរដ្ឋពាក់ព័ន្ធបញ្ហាសិទ្ធិមនុស្ស និងលទ្ធិប្រជាធិបតេយ្យ។ ខ្ញុំពិតជាសោកស្ដាយចំពោះរឿងនេះ»។
ចំណែកអ្នកនាំពាក្យក្រសួងព័ត៌មានលោក ទេព អស្នារិទ្ធ ប្រាប់ខេមបូចាថា ការសម្រេចចិត្តផ្ដាច់ជំនួយរបស់លោកត្រាំ លើវិទ្យុទាំងពីរនេះ នឹងជួយអាមេរិកសន្សំថវិកា បង្កើនប្រសិទ្ធភាពការងារ និងលុបបំបាត់អំពើពុករលួយ។
លោកបន្តថា រដ្ឋបាលលោកត្រាំ បានរកឃើញថា ទីភ្នាក់ងារទាំងនេះមិនបានបម្រើប្រយោជន៍សង្គមអាមេរិកកាំងនោះទេ ហើយគឺ «គ្រាន់តែជាឧបករណ៍នយោបាយអាមេរិក» និងថានេះគឺជា «របត់មួយ» របស់ពិភពលោក។
សម្រាប់បរិបទកម្ពុជា ប្រព័ន្ធផ្សព្វផ្សាយរដ្ឋ និងឯកជន ទាំងប្រពៃណី និងឌីជីថល គឺកំពុងបម្រើដល់សេចក្ដីត្រូវការរបស់អ្នកអាន ក៏ដូចជាតម្រូវការប្រើប្រាស់បច្ចេកវិទ្យនាពេលបច្ចុប្បន្ន និងអនាគត។
កម្ពុជាមានប្រព័ន្ធផ្សព្វផ្សាយទាំងវិទ្យុ ទូរទស្សន៍ កាសែត និងអនឡាញសរុប ១ ៦២០ស្ថាប័ន និងមានសមាគមកាសែតចំនួន២៦ និងមានអ្នកសារព័ត៌មានជាង ៨ ០០០នាក់ ដែលកំពុងបំពេញការងារ «ដោយសេរី និងសុវត្ថិភាព» ដោយបានអនុវត្តទៅតាមក្រមសីលធម៌ វិជ្ជាជីវៈ ដើម្បីធានាសិទ្ធិរបស់ប្រជាពលរដ្ឋក្នុងការទទួលបានព័ត៌មាន។
អ្នកទាំងនោះបានលើកកម្ពស់សេរីភាពសារព័ត៌មាននៅកម្ពុជា ដែល «ស្ថានភាពប្រព័ន្ធផ្សព្វផ្សាយមានភាពល្អប្រសើរក្នុងឆ្នាំ២០២៤»។
លោកបន្ថែមថា៖ «ប្រជាពលរដ្ឋនៅតែបន្តទទួលបានព័ត៌មានសម្បូរបែប ហើយការបិទទីភ្នាក់ងារព័ត៌មានអាមេរិក គឺមិនប៉ះពាល់ការទទួលបានព័ត៌មាននៅកម្ពុជានោះទេ»។
ប្រធានស្ដីទីការិយាល័យវីអូអេនៅភ្នំពេញលោក សុខ ពៅខេមរា និងនាយកវីអូអេប្រចាំតំបន់អាស៊ីខាងកើត និងប៉ាស៊ីហ្វិក លោក Nadia Madjid មិនអាចទាក់ទងសុំការអត្ថាធិប្បាយបានទេ៕
ប្រែសម្រួលពីអត្ថបទភាសាអង់គ្លេស៖ Communities, Unions Saddened and Fear Loss of Voice After Trump Cuts Funds to VOA, RFA, Puts Staff On Leave
