សមាគមសម្ព័ន្ធអ្នកសារព័ត៌មានកម្ពុជា

តុលាការផ្តន្ទាទោសមន្ត្រីជាន់ខ្ពស់គណបក្សភ្លើងទៀន លោក ថាច់ សេដ្ឋា ដាក់ពន្ធនាគារចំនួន១៨ខែ

រថយន្តរបស់សមត្ថកិច្ចបានដឹកលោក ថាច់ សេដ្ឋា អនុប្រធានគណបក្សភ្លើងទៀន និងអ្នកទោសផ្សេងទៀតចេញពីសាលាដំបូងរាជធានីភ្នំពេញ ទៅកាន់ពន្ធនាគារ បន្ទាប់ពីការប្រកាសសាលក្រមករណីលោក ថាច់ សេដ្ឋា កាលពីថ្ងៃទី២១ ខែកញ្ញា ឆ្នាំ២០២៣។ (ខេមបូចា/ ហ៊ែល កំសាន)
រថយន្តរបស់សមត្ថកិច្ចបានដឹកលោក ថាច់ សេដ្ឋា អនុប្រធានគណបក្សភ្លើងទៀន និងអ្នកទោសផ្សេងទៀតចេញពីសាលាដំបូងរាជធានីភ្នំពេញ ទៅកាន់ពន្ធនាគារ បន្ទាប់ពីការប្រកាសសាលក្រមករណីលោក ថាច់ សេដ្ឋា កាលពីថ្ងៃទី២១ ខែកញ្ញា ឆ្នាំ២០២៣។ (ខេមបូចា/ ហ៊ែល កំសាន)

អនុប្រធានគណកប្សភ្លើងទៀន លោក ថាច់ សេដ្ឋា ត្រូវបានផ្តន្ទាទោសដាក់ពន្ធនាគារ​រយៈ​ពេល​១៨ខែ​ពីបទបានចេញ សែកគ្មានសាច់ប្រាក់ ខណៈដែលសង្គមស៊ីវិល និងមន្ត្រីជាន់ខ្ពស់​គណបក្សភ្លើងទៀន លើកឡើងថា ជាចេតនានយោបាយច្រើនជាងការអនុវត្តតាមផ្លូវច្បាប់។

ចៅក្រម​ជំនុំជម្រះសាលាដំបូងរាជធានីភ្នំពេញ លោកស្រី ឈុន ដាវី បានប្រកាសសាល​ក្រម នៅថ្ងៃទី២១ ខែកញ្ញា ថា៖ «តុលាការសម្រេចផ្តន្ទាទោសជនជាប់ចោទ ថាច់ សេដ្ឋា ដាក់​ពន្ធនាគារ​១ឆ្នាំ៦ខែ និងពិន័យប្រាក់៣លានរៀល»

ជាមួយគ្នានោះដែរ តុលាការបានសម្រេ​ចឱ្យជនជាប់ចោទ ថាច់ សេដ្ឋា សងប្រាក់ដែលជំពាក់​ទៅ​ដើមបណ្តឹង​ចំនួន ៣៣ ៤០០​ដុល្លារ និង៥លានរៀល ជាប្រាក់សំណងជំងឺចិត្ត។

លោក ថាច់ សេដ្ឋា ត្រូវបានចាប់ខ្លួនកាលពីខែមករា ដែល​តាម​ចោទ​ថា ដោយ​សារ​​ចេញសែក​គ្មាន​សាច់ប្រាក់​ចំនួន៥ កាល​ពី​ឆ្នាំ២០១៩ តាមមាត្រា២៣២១នៃច្បាប់ស្តីពី​ឧបករណ៍​អាច​ជួញ​ដូរ​បាន និងប្រតិបត្តិការទូទាត់សងប្រាក់ និងខកខានមិន​បាន​បង្ហាញខ្លួននៅចំពោះមុខ​ចៅក្រម​ស៊ើបសួរក្នុងឆ្នាំ២០២១ ដើម្បីដោះស្រាយបណ្តឹង ដែល​ប្តឹង​ដោយឈ្មោះ ហាយ​ វណ្ណរិន ​ជា​ម្ចាស់ហាងបញ្ចាំ រិន ឆាយ។

លោក សឺន ជុំជួន មេធាវីការពារសិទ្ធិឱ្យលោក​ ថាច់ សេដ្ឋា លើកទ្បើងថា ​លោកមានការ​សោយ​ស្តាយ​ចំពោះការផ្តន្ទាទោសកូនក្តីរបស់លោក ហើយលោកនឹងពិភាក្សាជាមួយកូនក្តី​ក្នុងការប្តឹងឧទ្ធរណ៍ចំពោះការសម្រេចនេះ។

លោកបានបន្តថា៖ «ផ្អែកតាមឯកសារ ភ័ស្តុតាងដែលយើងពិភាក្សាដេញដោលកន្លងមក មិនមានមូលដ្ឋានគ្រប់គ្រាន់សម្រាប់ឱ្យតុលាការផ្តន្ទាទោសកូនក្តីរបស់ខ្ញុំទេ»

ក្រុម​មេធាវីរបស់លោក ថាច់ សេដ្ឋា ធ្លាប់បាននិយាយថា លោក សេដ្ឋា ធ្លាប់​​ចេញឲ្យ​លោក វណ្ណរិន នូវ​​​​មូលប្បទានប័ត្រ​ ដែលបាន​ចុះហត្ថលេខារួចមួយ​ចំនួន​​ ប៉ុន្តែ​ទុក​ចំហ​កាលបរិច្ចេទ​និង​ទំហំទឹកប្រាក់​ ដើម្បីទុក​ឱ្យម្ចាស់ហាងបញ្ចាំបំពេញបន្ថែមនៅ​​ពេល​​ក្រោយ និងបំពេញ​ការ​ទូទាត់ប្រចាំខែ។ ប៉ុន្តែនៅពេលដែលគណបក្សសង្គ្រោះជាតិត្រូវបានរំលាយ​តាមដីកា​របស់​តុលាការ​កំពូល​ក្នុងឆ្នាំ២០១៧ លោក ថាច់ សេដ្ឋា ដែលពេលនោះជាតំណាងរាស្រ្តជាប់ឆ្នោត​របស់​គណបក្សសង្គ្រោះជាតិបានបាត់បង់តំណែង និងប្រាក់ខែសភារបស់​លោក​។ លោក សេដ្ឋា អះអាង​ថា លោក​បាន​ប្រាប់លោក ​ហាយ វណ្ណ​រិន ​ថា ​លោក​​នឹង​បង់​ប្រាក់​ឱ្យ​ដោយ​ឡែក​វិញ​ ប៉ុន្តែ​មូលប្បទានប័ត្រ​ខ្លះ​នៅ​​ស្ថិត​ក្នុង​ដៃ​របស់លោក វណ្ណរិន​​ នៅឡើយ​។

កញ្ញា ធីម សុភាព មេធាវីការពារក្តីឱ្យដើមបណ្តឹង​លោក ហាយ​ វណ្ណរិន ថ្លែងថាកញ្ញា​ស្វាគមន៍​ការ​សម្រេច​របស់​តុលាការ ពិសេសការសងលុយដែលជំពាក់មកឱ្យកូនក្តីគាត់វិញ។

កញ្ញា សុភាព បានបញ្ជាក់ថា៖ «នេះគឺជាឆន្ទានុសិទ្ធិរបស់តុលាការ គាត់[ចៅក្រម]មាន​សំអាង​ហេតុ​ច្បាស់លាស់​បទល្មើសប្រព្រឹត្តដែលមានចែងនៅក្នុងច្បាប់ ហើយខ្ញុំមិមាន​មតិយោបល់អីផ្សេងទេ»

កញ្ញាមេធាវីបន្តថា៖ «ចា តុលាការបានសម្រេចឱ្យគាត់សងជាប្រាក់ដែលជំពាក់ និងជាមួយ​សំណង​ការខូចខាត គឺយើងអាចទទួលយកបាន»

មន្ត្រីជាន់ខ្ពស់បក្សប្រឆាំងលោក រ៉ុង ឈុន មើលឃើញថា ការផ្ដន្ទាទោស១ឆ្នាំកន្លះ និងមាន​ការ​ពិន័យ​ជាប្រាក់៣លានរៀល និងសងដើមបណ្តឹងចំនួន៥លានរៀល ចំពោះលោក ថាច់ សេដ្ឋា គឺជារឿងអយុត្តិធម៌។ 

លោកបន្តថា ករណីសែកស្អុយនេះគ្រួសារលោក ថាច់ សេដ្ឋា បញ្ជាក់ថា ធ្លាប់បានដោះស្រាយ​គ្នា​រួចអស់ហើយ ហើយកន្លងមកតុលាការក៏ធ្លាប់កាត់ក្តីលើករណីនេះដែរ ប៉ុន្តែនៅតែយក​ករណី​មក​ដាក់បន្ទុកលើលោក ថាច់ សេដ្ឋា ដដែល។ 

លោកបន្តថា៖ «យើងឃើញថារឿងនេះហ្នឹងវា គឺថាភ្ជាប់ទៅនឹងគេថានយោបាយច្រើនជាង ការអនុវត្តច្បាប់»។ លោកបន្ថែមទៀតថា ករណីនេះបើមិនជាប់ពាក់ព័ន្ធនឹងនយោបាយទេ លោក ថាច់ សេដ្ឋា នឹងមិនអាចឈានមកដល់ការផ្ដន្ទាទោសរហូតមកដល់ពេលនេះដែរ។

ចំណែកភរិយាលោក ថាច់ សេដ្ឋា អ្នកស្រី ថាច់ សុខ បូរ៉ានី បានឱ្យដឹងថា ការសម្រេចរបស់​តុលាការ​ដែលផ្ដន្ទាទោស១ឆ្នាំកន្លះ និងមានការពិន័យជាប្រាក់ទៀត គឺជារឿងអយុត្តិធម៌​ណាស់​សម្រាប់ស្វាមីអ្នកស្រី។

 អ្នកស្រីបន្តថា ការចោទប្រកាន់ទៅលើសស្វាមីអ្នកស្រី គឺមិនបានបង្ហាញ​ភស្តុតាងណា​មួយ​ឡើយ។ អ្នកស្រីបានលើកឡើងថា៖ «គ្រាន់តែបង្ហាញភស្តុតាង ក៏អត់មានបានបង្ហាញ​អ្វី​ទាំង​អស់។ បទចោទគាត់គ្រាន់តែសែកស្អុយដូចថា COPY មួយសន្លឹកដែលចាប់គាត់ដាក់គុក មិនយុត្តិធម៌ចំពោះគាត់ទេ»។  

អ្នកស្រីបានស្នើសុំឱ្យតុលាការដោះលែងស្វាមីរបស់អ្នកស្រី ព្រោះគ្រាន់តែចោទរឿង​សែក​ស្អុយ​ក៏បានបំផ្លាញកិត្តិយសរបស់ស្វាមីគាត់ដែរ។ អ្នកស្រីបន្តថា នឹងបន្តទាមទារឱ្យ​តុលាការ​ទម្លាក់បទចោទនេះ និងដោះលែងឱ្យស្វាមីអ្នកស្រីមាន​សេរីភាពវិញ។

លោក អំ សំអាត នាយក​ទទួល​បន្ទុក​កិច្ចការ​ទូទៅ​នៃ​អង្គការ​ឃ្លាំមើល​សិទ្ធិមនុស្ស លីកាដូ យល់​ឃើញ​ថា ការផ្ទន្ទាទោសលោក​ ថាច់​ សេដ្ឋា គឺពាក់ព័ន្ធនឹងរឿងនយោបាយ ជាជាងការអនុវត្តច្បាប់។

លោកមានប្រសាសន៍ថា៖ ​«វាជារឿងនយោបាយច្រើនជាងការអនុវត្តន៍ច្បាប់​ចឹងយើងមើល​ទៅ​ការកាត់ទោស​នេះវាអត់មានអីចំទ្បែកទេ​ បើយើងមើលទៅរឿងមុនៗ​ទៅលើសកម្មជន និងអ្នកនយោបាយ​កន្លង​មក»

លោកបន្តថា ការកាត់ទោសលោក ថាច់ សេដ្ឋា នឹងបន្តឱ្យមានការរិះគន់បន្ថែមទៀតពីមតិជាតិ​និងអន្តរជាតិ ពីព្រោះចាប់តាំងពីគាត់ក្លាយជាអនុប្រធានគណបក្សភ្លើងទៀន និងមាន​ប្រជាប្រិយភាព​ក៏ត្រូវបានឃាត់ខ្លួន។

នៅព្រឹកថ្ងៃព្រហស្បតិ៍ដដែល ចៅក្រមសាលាដំបូងរាជធានីភ្នំពេញក៍បានបើកសវនាការ​ជំនុំ​ជម្រះ​ជនជាប់ចោទ លោក ថាច់ សេដ្ឋា ពាក់ព័ន្ធនឹងបទចោទដាច់ដោយទ្បែកមួយទៀត គឺ «បទ​ញុះញង់​ឱ្យមានភាពវឹកវរក្នុងសង្គម» និង«ញុះញង់ឱ្យមាន​ការ​រើសអើង»​ ហើយតុលាការ​នឹងប្រកាសសាលក្រម​នៅថ្ងៃទី១៨ ខែតុលា ឆ្នាំ២០២៣។

លោកស្រីចៅក្រម​ ឈុន ដាវី លើកទ្បើងថា​ លោក ថាច់​​ សេដ្ឋា បានប្រព្រឹត្តបទញុះញង់​​បង្ក​ឱ្យ​មានភាពវឹកវរក្នុងសង្គម នៅថ្ងៃទី​១៣ ខែមករា ឆ្នាំ២០២៣​ តាមរយៈបង្ហោះសារ​វីដេអូលើ​បណ្តាយ​​សង្គមយូធូប [YouTube] រិះគន់ក្នុងការប្ររពខួប៤៤ឆ្នាំ ថ្ងៃ៧មករា របស់គណបក្ស​ប្រជាជនកម្ពុជា។

លោក សេង ហៀង តំណាងអយ្យការថ្លែងថា ការចោទប្រកាន់នេះព្រោះលោក ថាច់ សេដ្ឋា បានថ្លែងមុនថ្ងៃបោះឆ្នោតថ្នាក់ជាតិ ដែលចោទថាលោកបានចេញសារនយោបាយ និង​ចង់​វាយ​ប្រហារមកលើរាជរដ្ឋាភិបាល និងដើម្បីឱ្យប្រជាជន​មានការខឹង​សម្បារ​ពេលដែល​នឹកដល់ប្រវត្តិសាស្រ្តខ្មែរ និងវៀតណាម។

លោកថ្លែងថា៖ «យល់ថាជនជាប់ចោទមានចេតនាទុច្ចរិត​ឧបាយកល​ជ្រកក្រោមស្លាក​អ្នកនយោបាយឃោសនាញុះញុងបញ្ឆេះកំហឹងពលរដ្ឋឱ្យស្អប់រាជរដ្ឋាភិបាល»។ លោក សេង ហៀង បន្ថែមថា៖ «ជនជាប់ចោទប្រព្រឹត្តបទញុះញុងបង្កភាបវឹកវរប៉ះពាល់ដល់សន្តិសុខជាតិ និងសណ្តាប់ធ្នាប់សារធាណៈ។ សូមចៅក្រមពិចារណាផ្តន្ទាទោស ថាច់ សេដ្ឋា តាមមាត្រា ៤៩៤, ៤៩៥,​ និង៤៩៦»

នៅក្នុងបន្ទប់សវនាការ លោក ថាច់​ សេដ្ឋា បានឆ្លើយថា លោកគ្រាន់តែនិយាយពីប្រវត្តិសាស្រ្ត​នៃថ្ងៃ៧មករា និងនិយាយពីដើមកំណើតនៃការ​បង្កើតគណបក្សប្រជាជនកម្ពុជា ដែល​គណបក្ស​នេះលោកថាគឺត្រូវបានបង្កើតដោយ​វៀតណាម។

លោកបន្តថា ការនិយាយនេះ គឺមិនមានចេតនាដើម្បីឱ្យបំផុសបំផុលឱ្យមានការ​រើសអើង​ពូជសាសន៍ ឬដើម្បីបង្ក​ឱ្យ​មាន​ស្ថាន​ភាព​វឹកវរ​ក្នុង​សង្គមទេ គឺក្នុងគោលបំណងដើម្បី​ឱ្យ​យុវជនខ្មែរ​បានយល់ពីប្រវត្តិសាស្រ្តជាពិសេសអំពីស្តូបមិត្តភាពកម្ពុជា វៀតណាម ដែលមាន​ស្ទើរតែពេញក្នុងប្រទេសកម្ពុជា។

លោក ថាច់ សេដ្ឋា បញ្ជាក់ថា៖ «នេះជាប្រវត្តិសាស្រ្តខ្មែរ ក្នុងនាមជាអ្នកនយោបាយឱ្យនិយាយពីអ្វី? ហើយ​បើខ្ញុំស្របតាម​គណបក្សប្រជាជន ខ្ញុំមិនបាច់បង្កើតបក្សទេ»។ លោកបន្តថា៖ «ហេតុអ្វីយើង​និយាយអត់បាន? ហេតុអ្វីយើងរៀនអត់បាន?»លោកបន្ថែមថា៖«គ្រាន់តែនិយាយពី​នយោបាយ​ហើយយកលេះថាទប់ស្កាត់ ហើយចាប់ដាក់គុក៥ទៅ៦ខែ»

290 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម