យ៉ាងហោចមនុស្ស៤នាក់បានស្លាប់ និង៥នាក់ទៀតបានរងរបួស បន្ទាប់ពីហ្វូងមនុស្សបានកើនឡើងកាន់តែច្រើននៅខាងក្រៅផ្ទះវីឡារបស់មហាសេដ្ឋី ជាកន្លែងដែលមនុស្សបានប្រមូលផ្តុំគ្នាដើម្បីទទួលអំណោយជាលុយ(អាំងប៉ាវ)សម្រាប់រដូវចូលឆ្នាំចិន។
នៅព្រឹកថ្ងៃព្រហស្បតិ៍ មនុស្សរាប់រយនាក់បានប្រមូលផ្ដុំគ្នានៅខាងក្រៅផ្ទះវីឡារបស់លោក សុខ គង់ ដែលជាមហាសេដ្ឋីអចលនទ្រព្យ និងជាស្ថាបនិកក្រុមហ៊ុនប្រេងឥន្ទនៈសូគីម៉ិច ដោយសង្ឃឹមថានឹងទទួលបាន «អាំង ប៉ាវ» – ស្រោមសំបុត្រក្រហមដែលពោរពេញដោយប្រាក់ ដែលជាព្រឹត្តិការណ៍ប្រចាំឆ្នាំដែលរៀបចំដោយលោក សុខ គង់។
អ្នកនាំពាក្យស្នងការនគរបាលរាជធានីភ្នំពេញ លោក សំ វិច្ឆិកា បានបញ្ជាក់ថា មានអ្នកស្លាប់៤នាក់ និងរបួស៥នាក់ ហើយលោកបានបន្ថែមថា អ្នកស្លាប់មានប្រុស២នាក់ ស្រី២នាក់ អាយុប្រហែល៥០ឆ្នាំ។
សាក្សីបានប្រាប់ សារព័ត៌មានខេមបូចា ថាឧបទ្ទវហេតុនេះប្រហាក់ប្រហែលនឹង «ការរត់ជាន់គ្នា» ដោយមានសន្តិសុខព្យាយាមរុញមនុស្សចេញ ខណៈដែលហ្វូងមនុស្សបានជាន់លើគ្នាទៅវិញទៅមក។
អ្នកស្រី យឿន អាយុ ៦២ ឆ្នាំ បានធ្វើដំណើរមកពីខេត្តកណ្តាល ដោយសង្ឃឹមថានឹងបានប្រាក់ពីលោក គង់ ដោយនិយាយថា ភាពក្រីក្របានជំរុញឱ្យអ្នកស្រីធ្វើដំណើរទៅទីនោះ។
យឿន បាននិយាយថា៖ «រាប់ពាន់នាក់» បានប្រមូលផ្តុំគ្នាក្នុងរយៈពេលប៉ុន្មានម៉ោងបន្ទាប់ពីនាងមកដល់វីឡារបស់លោក សុខ គង់ ប៉ុន្តែភាពចលាចលបានផ្ទុះឡើងមុនពេលអ្នកស្រីទទួលបានប្រាក់។ អ្នកស្រីបានរំលឹកពីការព្យាយាមរំដោះខ្លួនចេញពីហ្វូងមនុស្ស ខណៈមនុស្សជាច្រើនបានរុញច្រានគ្នាទៅវិញទៅមក។
អ្នកស្រីបានបញ្ជាក់ថា៖ «ខ្ញុំបានឃើញផ្ទាល់ភ្នែកមនុស្សពីរនាក់ស្លាប់ និងប្រាំមួយនាក់រងរបួស រួមទាំងមនុស្សចាស់ និងក្មេង។ អ្នកស្រី យឿន បានលើកឡើងដោយសំអាងលើការរត់ជាន់គ្នាកាលពីឆ្នាំ២០១០ នៅលើស្ពានកោះពេជ្រ រាជធានីភ្នំពេញ ដែលបានសម្លាប់មនុស្សជាង៣៥០នាក់។
អ្នកស្រី ពៅ ដែលគេចផុតពីការកើនឡើងនោះ បានបន្ទរសម្តីរបស់អ្នកស្រី យឿន ដោយនិយាយថា មនុស្សរាប់រយនាក់ ទាំងក្មេងទាំងចាស់ បានរុញ និងជាន់គ្នា ដើម្បីទទួលបានអាំងប៉ាវ។
អ្នកស្រី ពៅ បន្ថែមថា៖ «ខ្ញុំបានរត់ពេលឃើញហ្វូងមនុស្ស។ អាំងប៉ាវនីមួយៗមានតម្លៃ១០ ដុល្លារ ឬច្រើនជាងនេះ នេះជាចំនួនច្រើនសម្រាប់ប្រជាជនក្រីក្រ»។
អធិការនគរបាលខណ្ឌដូនពេញ លោក ទៀង ច័ន្ទសារ ដែលចុះពិនិត្យកន្លែងកើតហេតុ បានបដិសេធមិនធ្វើអត្ថាធិប្បាយជាមួយអ្នកយកព័ត៌មានខេមបូចា ទេ។
លោក សំ វិច្ឆិកា បានលើកឡើងហាក់ខុសគ្នាពីពលរដ្ឋអ្នកចូលរួមក្នុងហេតុការនោះថា៖ «ការទទួលអំណោយ ពួកគាត់ចូលប្រជ្រៀតគ្នា ហើយអាកាសធាតុថ្ងៃហ្នឹងមិនអំណោយទានទៀត រាងអាប់អួ រាងក្តៅផង ចឹងវាបណ្តាលឱ្យថប់ដង្ហើមខ្លះ អ៊ីចឹងទៅមានបញ្ហាធ្វើឱ្យគាត់ខ្យល់ ដួលអីចឹងទៅ»។
លោកបន្ថែមថា ម្ចាស់ផ្ទះតែងតែធ្វើទានជារាល់ឆ្នាំ ហើយយើងសូមអំពាវទាវប្រសិនជាមានការចែកអំណោយជាលក្ខណៈទ្រង់ទ្រាយធំ សូមឱ្យសហការជាមួយអាជ្ញាធរមានសមត្ថកិច្ច ធ្វើយ៉ាងណាឱ្យដំណើការចែកអំណោយនោះដោយសុវត្ថិភាព និងសន្តិសុខសណ្តាប់ធ្នាប់។ ជាមួយគ្នានោះអ្នកឧកញ៉ា សុខ គង់ និងក្រុមគ្រួសារឧបត្ថមគ្រួសារអ្នកដែលបានបាត់បង់ជីវិតម្នាក់១៥លានរៀល និងអ្នករងរបួសក្នុងមួយនាក់៤លានរៀល៕
ប្រែសម្រួលពីអត្ថបទភាសាអង់គ្លេស៖ Four Dead in Crowd Surge Outside Tycoon’s Villa During Gift Event
