ការកាត់បន្ថយម៉ោងឆ្លងដែនជាឯកតោភាគីរបស់អាជ្ញាធរថៃនៅច្រកព្រំដែនបឹងត្រកួន នាព្រឹកថ្ងៃទី៩ ខែមិថុនា បានធ្វើឱ្យកម្មករ និងអាជីវករខ្នាតតូចខ្មែររាប់រយនាក់រងគ្រោះ។ ក្នុងនោះដែរ ពួកគេភាគច្រើនបារម្ភថាការបន្តភាពតានតឹងនៅព្រំដែននេះគំរាមកំហែងដល់ជីវភាពរស់នៅរបស់ពួកគេ ជាពិសេសនៅក្នុងសហគមន៍ដែលកំពុងរងគ្រោះស្រាប់។
មនុស្សប្រមាណ២០០នាក់ កំពុងរង់ចាំបញ្ចប់នីតិវិធីឆ្លងដែនដើម្បីចូលប្រទេសថៃ នៅច្រកព្រំដែនបឹងត្រកួន ក្នុងស្រុកថ្មពួក ខេត្តបន្ទាយមានជ័យ។
ពួកគេភាគច្រើនជាអ្នកធ្វើការក្រៅប្រព័ន្ធ ដូចជាជាងកាត់សក់ ជាងអ៊ុតសក់ កម្មករសំណង់ កម្មករចម្ការដំឡូង និងអ្នកលក់អាហារ ដែលបានលើកឡើងពីការព្រួយបារម្ភ បន្ទាប់ពីភាគីថៃធ្វើការផ្លាស់ប្តូរម៉ោងប្រតិបត្តិការជាឯកតោភាគី។
ប្រកបការងារនៅហាងអ៊ុតសក់មួយកន្លែងក្នុងប្រទេសថៃអស់រយៈពេលជាង១០ឆ្នាំ អ្នកស្រី សុផាន់ណា វ័យ ៤៧ឆ្នាំ មានដើមកំណើតមកពីខេត្តសៀមរាប បានសម្ដែងការព្រួយបារម្ភអំពីជម្លោះព្រំដែនរវាងប្រទេសថៃ និងកម្ពុជា។
ច្រកទ្វារព្រំដែនបឹងត្រកួន គឺជាច្រកដ៏សំខាន់មួយសម្រាប់អ្នកភូមិ និងប្រជាពលរដ្ឋចំណាកស្រុកផ្សេងទៀត ឆ្លងដែនចូលប្រទេសថៃដើម្បីរកចំណូលទ្រទ្រង់ជីវភាពគ្រួសារ។
អំឡុងពេលមានការតានតឹងនៅព្រំដែន អ្នកស្រី សុផាន់ណា បានត្រឡប់មកកម្ពុជាវិញមួយរយៈ មុននឹងសម្រេចចិត្តត្រឡប់ទៅធ្វើការងារប្រចាំថ្ងៃរបស់គាត់វិញនៅថ្ងៃចន្ទ ដោយសង្ឃឹមថាស្ថានការណ៍នឹងដោះស្រាយដោយសន្តិវិធី ហើយអ្វីៗនឹងវិលទៅរកភាពប្រក្រតីវិញ។
អ្នកស្រីបាននិយាយជាមួយអ្នកយកព័ត៌មានមុនពេលឆ្លងចូលប្រទេសថៃថា៖ «ខ្ញុំមិនដឹងថាថ្ងៃមុខវានឹងទៅជាយ៉ាងណាទេ ប៉ុន្តែខ្ញុំសម្រេចចិត្តទៅប្រទេសថៃវិញថ្ងៃនេះ»។
អ្នកស្រីបានបន្តថា៖ «ខ្ញុំចង់ឃើញការចរចាដោយសន្តិភាព ព្រោះយើងជាអ្នករកស៊ីតូចតាច។ ពួកយើង ប្រឈមនឹងការលំបាកក្នុងការរស់នៅទៅហើយ»។ អ្នកស្រីអាចរកចំណូលបានចន្លោះពី ៣០០ បាត ទៅ ១០០០ បាត (៣៧.០០០ រៀល ទៅ ១២៣.០០០ រៀល) ជារៀងរាល់ថ្ងៃ ហើយពេលខ្លះក៏បានតិចជាងនេះដែរ។
តាំងពីមានការប៉ះទង្គិចគ្នាមក អ្នកស្រីថាហាងអ៊ុតសក់របស់គាត់គឺមិនសូវមានអតិថិជនច្រើនទេ។ ហើយប្រសិនបើស្ថានការណ៍កាន់តែអាក្រក់ អ្នកស្រីគ្រោងនឹងត្រឡប់មកកម្ពុជាវិញ ប៉ុន្តែមិនទាន់ច្បាស់ ថាតើគាត់អាចធ្វើអ្វីបានក្នុងជីវភាពរស់នៅទីនេះនៅឡើយទេ។
អ្នកស្រី សុផាន់ណា បាននិយាយថា៖ «យើងទាំងអស់គ្នាពឹងផ្អែកលើច្រកទ្វារ [បើកប្រតិបត្តិការ] ដូច្នេះនៅពេលដែលបញ្ហាព្រំដែនកើតឡើង កម្មករខ្លះមិនមានអាហារហូបចុកគ្រប់គ្រាន់ទេ។ យើងមិនដែលជួបប្រទះការលំបាកបែបនេះពីមុនមកទេ»។
អ្នកភូមិម្នាក់ទៀតឈ្មោះ រឿន អាយ អាយុ ៣២ឆ្នាំ បានប្រាប់អ្នកសារព័ត៌មានរបស់ខេមបូចា ថា អ្នកស្រីកំពុងរង់ចាំច្រកព្រំដែនបើក ដោយសារគាត់ត្រូវការឆ្លងទៅប្រទេសថៃ ដើម្បីទិញរបស់របរមកលក់នៅក្នុងភូមិ ដែលជាប្រភពចំណូលដ៏សំខាន់របស់គាត់។ អ្នកស្រីធ្វើដំណើរទៅប្រទេសថៃជារៀងរាល់ថ្ងៃ។
អ្នកស្រីឱ្យដឹងថា ចាប់តាំងពីការផ្លាស់ប្តូរម៉ោងប្រតិបត្តិការ អ្នកលក់តូចតាចនៅកម្ពុជានិងថៃគឺសុទ្ធតែរកបានចំណូលទាប។
អ្នកស្រីនិយាយដោយសង្ឃឹមថាការចរចាអាចដោះស្រាយដោយរលូន៖ «ខ្ញុំទិញទំនិញសព្វមុខពីថៃមកលក់ក្នុងភូមិ។ ភាគច្រើនពួកយើងទិញពីថៃ។ ដូច្នេះ សូមកុំឲ្យមានជម្លោះកើតឡើង ព្រោះអ្នកដែលប៉ះពាល់គឺពលរដ្ឋទន់ខ្សោយ ដូចជាយើងនេះឯង។ សូមអាណិតពួកយើងផង សូមគិតពីពលរដ្ឋទន់ខ្សោយដូចពួកយើងផង»។
ស្ត្រីវ័យ៥០ឆ្នាំម្នាក់ទៀត គឺអ្នកស្រី ញេវ ធី កំពុងប្រញាប់ប្រញាល់ឆ្លងដែន ដើម្បីទៅធ្វើការជាកម្មករចំការដំឡូងមីក្នុងប្រទេសថៃ ដែលអ្នកស្រីអាចរកចំណូលបាន ២៥០ បាត (ប្រហែល ៣ ម៉ឺនរៀល)ក្នុងមួយថ្ងៃ បន្ទាប់ពីផ្លាស់ទៅទីនោះជាមួយគ្រួសារជិត ២០ ឆ្នាំមុន។
អ្នកស្រីមានក្ដីបារម្ភពីការស្នាក់នៅ និងធ្វើការនៅប្រទេសថៃ ក្រោយប្រទេសថៃធ្វើការផ្លាស់ប្តូរពេលវេលាចេញចូលច្រកព្រំដែន។ ជាមួយគ្នា អ្នកស្រីឱ្យដឹងដែរថា រៀងរាល់ប្រាំពីរថ្ងៃម្តង គាត់ត្រូវត្រឡប់ទៅព្រំដែនវិញ ដើម្បីបន្តលិខិតឆ្លងដែន។ ចំណែកឯ កូនរបស់គាត់ក៏កំពុងរស់នៅ និងសិក្សានៅប្រទេសថៃផងដែរ។
អ្នកស្រីបន្ថែមថា៖ «ពួកយើងពិតជាមានការបារម្ភណាស់អំពីបញ្ហានេះ។ បើសិនថ្ងៃណាមួយថៃគេមិនឱ្យយើងចូល ពួកយើងនឹងគិតជំហានបន្ទាប់ទៀត ប៉ុន្តែយើងគ្រាន់តែចង់រស់មួយថ្ងៃដើម្បីមួយថ្ងៃប៉ុណ្ណឹងឯង។ ដូច្នេះយើងអត់ចង់ឱ្យមានវិវាទនោះទេ»។
មន្ត្រីប៉ុស្តិ៍ត្រួតពិនិត្យច្រកទ្វារតំបន់ព្រំដែនបឹងត្រកួនម្នាក់សុំមិនបញ្ចេញឈ្មោះ បាននិយាយថា អាជ្ញាធរថៃបានបើកច្រកទ្វារនៅម៉ោង ៨ ព្រឹក និងបិទនៅម៉ោង ១២ ថ្ងៃត្រង់ ខណៈភាគីកម្ពុជាបើកទ្វារនៅម៉ោង ៩ ព្រឹក និងបិទនៅម៉ោង ១២ ថ្ងៃត្រង់។
មន្ត្រីរូបនោះបានថ្លែងថា៖ «ភាគីថៃបានបិទដោយឯកតោភាគី ដោយមិនបានពិភាក្សាជាមួយភាគីកម្ពុជាឡើយ»។ ដោយលោកបន្ថែមថា៖ «ព័ត៌មានទាំងអស់ពីភាគីថៃ គឺមិនច្បាស់លាស់ ពីព្រោះពួកគេអនុវត្តដោយឯកតោភាគី»។
លោកថា ការផ្លាស់ប្តូរម៉ោងធ្វើការបានប៉ះពាល់ដល់ពលរដ្ឋដែលត្រូវឆ្លងដែនទៅធ្វើការ ឬទិញទំនិញនៅប្រទេសថៃ។
លោកបាននិយាយថា៖«វាពិតជាប៉ះពាល់ដល់ការប្រកបរបររកស៊ីរបស់ប្រជាពលរដ្ឋនៃប្រទេសទាំងពីរ និងសេដ្ឋកិច្ចផងដែរ»។
ជាធម្មតាមានប្រជាពលរដ្ឋខ្មែរចន្លោះពី ២០០ ទៅ៣០០នាក់ បានឆ្លងកាត់ច្រកនេះជាប្រចាំ ហើយពួកគេភាគច្រើនទៅធ្វើជាកម្មករចម្ការដំឡូងមី និងអំពៅ ខណៈអ្នកខ្លះទៀតទៅទិញឥវ៉ាន់ពីថៃមកវិញ។
ស្នងការរងនគរបាលខេត្តបន្ទាយមានជ័យ លោក ញាណ ឡាញ់ ដែលជួយគ្រប់គ្រងផ្នែករដ្ឋបាលនៅប៉ុស្តិ៍ត្រួតពិនិត្យបានបដិសេធមិនធ្វើអត្ថាធិប្បាយទេ។
មន្ត្រីនគរបាលម្នាក់បានប្រាប់អ្នកសារព័ត៌មានរបស់ខេមបូចា ថា ពលរដ្ឋខ្មែររាប់រយនាក់បានចូលប្រទេសថៃ នៅពេលច្រកទ្វារព្រំដែនបើកនៅម៉ោង ៩ ព្រឹក ប៉ុន្តែចន្លោះម៉ោង ១០ ព្រឹក ដល់ម៉ោង ១២ ថ្ងៃត្រង់ មិនមានមនុស្សច្រើនទេ ដែលឆ្លងព្រំដែន។
ប្រភពដដែលឱ្យដឹងទៀតថា ភាគច្រើនពលរដ្ឋទាំងនោះធ្វើការនៅប្រទេសថៃ ឬក៏ទៅទិញទំនិញមួយចំនួនតូចមកលក់ក្នុងប្រទេសកម្ពុជា ដោយលោកកត់សម្គាល់ថាម៉ោងដ៏ខ្លីបានបង្ខំឱ្យពួកគេមួយចំនួនប្រញាប់ត្រឡប់មកវិញមុនពេលច្រកទ្វារព្រំដែនបិទ។
យោងតាមប្រព័ន្ធផ្សព្វផ្សាយថៃ ហាងមួយចំនួនក្នុងប្រទេសថៃ បានបង្ហាញសញ្ញាហាមប្រាមប្រជាជនកម្ពុជា និងព្រមានថា «ពួកគេនឹងមានគ្រោះថ្នាក់ ប្រសិនបើពួកគេព្យាយាមចូលមក»។
អតីតនាយករដ្ឋមន្ត្រី ហ៊ុន សែន ដែលបច្ចុប្បន្នជាប្រធានព្រឹទ្ធសភា បានគូសបញ្ជាក់ថា កម្ពុជាបាននាំចេញទំនិញទៅប្រទេសថៃជាង ១,១ ពាន់លានដុល្លារ និងបាននាំចូលទំនិញចំនួន ៥,២ ពាន់លានដុល្លារក្នុងឆ្នាំ ២០២៤ ដែលមានន័យថា ឱនភាពពាណិជ្ជកម្មរបស់កម្ពុជាជាមួយថៃមានចំនួនជាង ៤,១ ពាន់លានដុល្លារ។
លោកមានប្រសាសន៍បន្ថែមថា ក្នុងរយៈពេលប្រាំខែដើមឆ្នាំនេះ កម្ពុជាបាននាំចេញទំនិញដែលមានតម្លៃជាង ២០០ លានដុល្លារទៅប្រទេសថៃ ខណៈការនាំចូលពីប្រទេសថៃមានប្រមាណ ១,៥ ពាន់លានដុល្លារ។
ចំពោះការវិវត្តចុងក្រោយនេះ ក្រសួងការពារជាតិបាននិយាយថា កងកម្លាំងយោធាកម្ពុជា និងថៃបានជួបប្រជុំគ្នាកាលពីថ្ងៃទី ៨ ខែមិថុនា ដោយបានសម្រេចធ្វើការកែសម្រួលកម្លាំងទាហានទាំងសងខាងឲ្យត្រឡប់ចូលតំបន់ដែលសមស្រប ដើម្បីកាត់បន្ថយភាពតានតឹង និងប្រឈមមុខគ្នានៅតាមព្រំដែន។
ចំពេលមានភាពតានតឹងកើតឡើង គណៈកម្មាធិការព្រំដែនរួម (JBC) ដែលជាយន្តការយូរអង្វែងសម្រាប់ដោះស្រាយវិវាទព្រំដែន គ្រោងនឹងពិភាក្សាលើបញ្ហានេះនៅរាជធានីភ្នំពេញនៅថ្ងៃទី ១៤ ខែមិថុនាខាងមុខ។
ក្រសួងការពារជាតិរបស់កម្ពុជា បានចេញសេចក្តីប្រកាសព័ត៌មាននៅថ្ងៃទី៩ ខែមិថុនា ដោយបញ្ជាក់ថា កងទ័ពមិនត្រូវបានដកចេញពីតំបន់នានាក្នុងដែនអធិបតេយ្យភាពរបស់ខ្លួន ជាទីដែលកងទ័ពកម្ពុជាឈរជើងជាយូរមកហើយនោះឡើយ។
យោងតាមក្រសួង ការរៀបចំដោយកងទ័ពកម្ពុជា រួមទាំងការឈរជើង ការដាក់ពង្រាយ ការកែសម្រួល និងការចល័តកងកម្លាំង គឺស្ថិតនៅក្នុងដែនសមត្ថកិច្ចរបស់ខ្លួន ហើយត្រូវបានអនុវត្តដើម្បីការពារបូរណភាពទឹកដីកម្ពុជា ៕
ប្រែសម្រួលពីអត្ថបទភាសាអង់គ្លេស៖ Half-day Operating Hours at Boeng Trakoun Checkpoint Worry Cambodians Reliant on Thai Jobs
