សមាគមសម្ព័ន្ធអ្នកសារព័ត៌មានកម្ពុជា

គ.ជ.ប លុបឈ្មោះបេក្ខជនក្រុមប្រឹក្សារបស់គណបក្សភ្លើងទៀនទាំងអស់ពីសង្កាត់មួយក្នុងរាជធានីភ្នំពេញ

សាលាសង្កាត់ទួលស្វាយព្រៃ១ក្នុងរាជធានីភ្នំពេញ ជាសង្កាត់ដែលបេក្ខជនក្រុមប្រឹក្សាសង្កាត់គណបក្សភ្លើងទៀនចំនួន ១៨នាក់ត្រូវបានលុបឈ្មោះចេញពីបញ្ជីឈរឈ្មោះបោះឆ្នោត។ ខេមបូចា/ព្រីង សំរាំង
សាលាសង្កាត់ទួលស្វាយព្រៃ១ក្នុងរាជធានីភ្នំពេញ ជាសង្កាត់ដែលបេក្ខជនក្រុមប្រឹក្សាសង្កាត់គណបក្សភ្លើងទៀនចំនួន ១៨នាក់ត្រូវបានលុបឈ្មោះចេញពីបញ្ជីឈរឈ្មោះបោះឆ្នោត។ ខេមបូចា/ព្រីង សំរាំង

កាល​ពី​ថ្ងៃអង្គារ គណៈកម្មាធិការ​ជាតិ​រៀប​ចំការ​បោះ​ឆ្នោត (គ.ជ.ប) បាន​​សម្រេច​លុប​ឈ្មោះ​បេក្ខជន​ឈរ​ឈ្មោះ​ក្រុម​ប្រឹក្សា​សង្កាត់​របស់​គណបក្ស​ភ្លើង​ទៀន​ចំនួន​ ១៨​នាក់​ចេញពី​បញ្ជី​អ្នក​ឈរ​ឈ្មោះ​បោះឆ្នោត នៅ​សង្កាត់​មួយ​ក្នុង​រាជធានី​ភ្នំពេញ និង​បាន​ផ្ដល់ព័ត៌មាន​តិច​តួច​​ប៉ុណ្ណោះ​ទាក់​ទង​នឹងរឿង​​នេះ​។​

គ.ជ.ប បាន​សម្រេច​លុប​ឈ្មោះ​បេក្ខជន​ឈរ​ឈ្មោះ​ក្រុម​ប្រឹក្សា​សង្កាត់​គណបក្ស​ភ្លើង​ទៀន​​ក្នុង​សង្កាត់​ទួល​ស្វាយ​ព្រៃ​១ ក្នុង​ខណ្ឌ​បឹង​កេងកង​។​ គ.ជ.ប បាន​លើក​ឡើង​ថា​ការ​សម្រេច​ចាត់​វិធានការ​បែបនេះ គឺ​ឆ្លើយ​តប​ទៅ​នឹង​​ពាក្យ​បណ្ដឹង​របស់​ឈ្មោះ​ ម៉ៅ មុន្នី ដែល​បាន​ស្នើ​ឲ្យ​មាន​ការ​លុប​បេក្ខជន​ទាំង​នេះ​ពីប​ញ្ជី​អ្នក​ឈរ​ឈ្មោះ​បោះ​ឆ្នោតដោយអះអាង​ថាមាន​ភាព​មិន​ប្រក្រតី​នៅ​ក្នុងសំណុំ​ឯកសារ​ពាក្យ​ចុះ​ឈ្មោះបេក្ខជន​របស់​គណបក្ស​ប្រឆាំង​មួយ​នេះ។​

លោក ហង្ស ពុទ្ធា អ្នកនាំ​ពាក្យ គ.ជ.ប បាន​ប្រាប់​ខេមបូចា ថា គ.ជ.ប បាន​លុប​ឈ្មោះ​បេក្ខ​ជន​ឈរ​ឈ្មោះ​របស់​គណបក្ស​ភ្លើង​ទៀន​ទាំង​នោះ​កាលពី​ថ្ងៃ​អង្គារ ដោយ​ថា​ខ្លួន​បាន​រក​ឃើញ​ថា​បេក្ខជន​បួន​នាក់​ក្នុង​ចំណោម​ ១៨​នាក់​មិន​បាន​បំពេញ​សំណុំ​ឯកសារ​ដោយ​ខ្លួនឯង​ទេ ដែល​នាំ​ឲ្យ​មាន​ការ​សង្ស័យ​ថា​​​អ្នក​ទាំង​នោះ​ចេះ​អក្សរ​ឬ​អត់​។ ការ​ចេះ​អក្សរ​ គឺ​ជា​តម្រូវការ​មួយ​របស់​ អ្នក​ឈរ​​ឈ្មោះ​ជាបេក្ខជន​​បោះ​ឆ្នោត​ ហើយ​ទោះ​បី​ជា​អ្នក​ទាំង​បួន​ក្រោយ​មក​ត្រូវ​គេ​ដឹង​ថា​ចេះ​អក្សរ​ក៏​ពិត​មែន តែ​ គ.ជ.ប បាន​សម្រេច​លុប​ឈ្មោះ​អ្នក​ទាំង​នោះ​ចេញ​ពី​បញ្ជី​បេក្ខជន​ដដែល​។​​

លោក​បន្ថែម​ថា៖ «អ្នក​ដែល​ប្ដឹង​ឲ្យ​លុប​ឈ្មោះ​បេក្ខជន​ទាំង​នោះ​ពី​បញ្ជី គឺ​ដោយសារ​តែ​មាន​ភាព​មិន​ប្រក្រតី ដែល​ថា​បេក្ខជន​ទាំង​នោះ​មិន​បាន​បំពេញ​សំណុំ​ឯកសារ​ដោយ​ខ្លួន​ឯង​»។​

ភាព​មិន​ប្រក្រតី​សម្ដៅ​ដល់​អ្នក​ទាំង​បួន​មិន​មាន​លក្ខណៈ​សម្បត្តិ​គ្រប់​គ្រាន់​សម្រាប់​ធ្វើជា​បេក្ខជន​ឈរ​ឈ្មោះ។ គណបក្ស​ទាំង​អស់ ជា​ធម្មតា​ទទួល​ខុស​ត្រូវ​ក្នុង​ការ​ជ្រើស​រើស​បេក្ខជនមាន​សក្តា​នុពល និង​ជ្រើស​រើស​បេក្ខជន​បម្រុង​សម្រាប់​បញ្ជី​ឈ្មោះ​បេក្ខជន​​របស់​ខ្លួន​។ យ៉ាងណា ក្នុង​ករណី​នេះ បេក្ខជន​ទាំង​ ១៨​រូប​របស់​គណបក្ស​ភ្លើង​ទៀន ត្រូវ​បាន​ដក​សិទ្ធិ​មិន​ឲ្យ​ឈរ​ឈ្មោះ​ជា​បេក្ខ​ជន​សម្រាប់​ការ​បោះ​ឆ្នោត ខណៈ​ដែល​ពេលវេលាសម្រាប់​ចុះ​ឈ្មោះ​បេក្ខជន​ក៏​ត្រូវ​បាន​បិទ​ជា​ផ្លូវ​ការ​ដូច​គ្នា ដែល​ធ្វើ​ឲ្យ​គណបក្ស​ភ្លើង​ទៀន​មិន​មាន​បេក្ខជន​ក្នុង​សង្កាត់​មួយ​នេះ​នោះ​ទេ។​​​

លោក ហង្ស ពុទ្ធា មិន​បាន​ផ្ដល់​ព័ត៌មាន​លម្អិត​ពី​មូល​ហេតុ​ដែល​លុប​ឈ្មោះ​បេក្ខជន​ទាំង​អស់ពី​បញ្ជី​នោះទេ ដោយ​គ្រាន់​តែ​និយាយ​ថា​ធ្វើ​តាម​សំណើរ​របស់​ដើម​បណ្ដឹង​ ខុសបទបញ្ជា និងនីតិវិធីនៃការបោះឆ្នោតជ្រើសរើសក្រុមប្រឹក្សាឃុំ សង្កាត់។

ការ​លុប​​ឈ្មោះ​បេក្ខជន​ពី​បញ្ជី​ឈរ​ឈ្មោះ​បោះ​ឆ្នោតលើក​​នេះ ជា​វិធាន​ការចុង​ក្រោយ​បំផុត​មួយ ដែល​មាន​នៅ​ទូទាំង​ប្រទេស​ ដែល​បេក្ខជន​ត្រូវ​លុប​ឈ្មោះ​កន្លង​មក​សុទ្ធ​តែ​ពាក់​ព័ន្ធ​នឹងគណបក្ស​ប្រឆាំង ដែលការណ៍​នេះ​​នាំ​ឲ្យ​​មានការ​ថ្កោល​ទោស​ពី​អង្គការ​សង្គម​ស៊ីវិល ដោយ​ថា​វិធានការ​នេះ​គឺ​ប្រើ​ដើម្បី​ជា​ឧបសគ្គ​ដល់​គណបក្ស​ភ្លើង​ទៀន​។ នៅពេល​នេះ ភាព​ចេះ​អក្សរ​ត្រូវ​បាន​គេ​ប្រើ​​ជា​មូល​ហេតុ​សំខាន់​ក្នុង​ការ​ដាក់​ពាក្យ​បណ្ដឹង​នៅ​ គ.ជ.ប។​​

លោក ថាច់ សេដ្ឋា អនុប្រធាន​គណបក្ស​ភ្លើង​ទៀន បង្ហាញ​ការ​ខក​ចិត្ត​ចំពោះ​ការ​សម្រេច​ចិត្ត​របស់​ គ.ជ.ប នេះ។ លោក​​ឲ្យ​ដឹង​ថា​ ដើម​បណ្ដឹង​ឈ្មោះ មុន្នី ជា​បេក្ខជន​ក្រុមប្រឹក្សា​សង្កាត់​របស់​គណបក្ស​ប្រជា​ជន​កម្ពុជា​។​

លោក​បន្ថែម​ថា៖ «​យើងជួបបញ្ហាច្រើន ដូចថ្ងៃនេះ (ថ្ងៃទី២២ ខែមីនា)»។  លោកបន្ថែមថា៖ «វាសំខាន់ទាក់ទងនឹងបញ្ជីឈ្មោះហ្នឹងដែរ គឺគ.ជ.ប.គេសម្រេចលុបបញ្ជីបេក្ខជននៅសង្កាត់ទួលស្វាយព្រៃ១ ទាំងស្រុងតែម្ដង។ មូលហេតុដោយសារគណបក្សប្រជាជនដែលជាគូបដិបក្ស  មកប្ដឹងគេយកមកជាមូលដ្ឋាន មករំលាយបេក្ខជនយើងក្នុងមួយសង្កាត់១ វាជារឿងមួយដែលធ្ងន់ធ្ងរ»។

លោក​ពន្យល់​ថា អ្នក​ទាំង​បួន​បាន​តវ៉ា​ថា​ពួកគេ​មិន​បាន​ទទួល​ស្គាល់​ឈ្មោះ​របស់​ខ្លួន​ជា​បេក្ខជន​នោះទេ​។​

លោក​បន្ថែមថា៖ «​វាអយុត្តិ​ធម៌ណាស់ យើង​មិន​អាច​ទទួល​យក​បាន​ទេ»។​

កម្ពុជា​នឹង​រៀប​ចំការ​បោះ​ឆ្នោត​ក្រុម​ប្រឹក្សា​ឃុំ​-សង្កាត់​ នៅ​ថ្ងៃទី​៥ ខែមិថុនា ដែល​មាន​ឃុំ​-សង្កាត់​ទាំង​អស់​ចំនួន​ ១ ៦៥២​។ បើ​តាម​ព័ត៌មាន​របស់​ គ.ជ.ប. បេក្ខជន​ឈរ​ឈ្មោះ​បោះ​ឆ្នោត​ដែល​បាន​ចុះ​បញ្ជី​មាន​ចំនួន​ ៨២ ៧៨៦​នាក់ នៅ​ទូទាំង​ប្រទេស​មក​ពី​គណបក្ស​ចំនួន​ ១៧​។​

គណបក្ស​ភ្លើង​ទៀន​ ជា​គណបក្សមាន​បេក្ខជន​ឈរ​ឈ្មោះ​ច្រើន​ជាង​គេ​លំដាប់​ទៅ​ពីរ បន្ទាប់​ពី​គណបក្ស​ប្រជា​ជន​កម្ពុជា​។ គណបក្ស​ប្រឆាំង​មួយ​នេះ​ថា​ខ្លួន​ ខកខាន​ដាក់​បេក្ខជន​តែ​នៅ​ឃុំ​ចំនួន​បី​ប៉ុណ្ណោះ​នៅ​ទូទាំង​ប្រទេស គឺ​ឃុំ​ក្នុង​ខេត្ត​រតនគិរី និង​ពោធិ៍​សាត់​។​​

លោក សំ គន្ធាមី នាយកប្រតិបត្តិអង្គការនិកហ្វិច (NICFEC) មាន​ប្រសាសន៍​ថា ការ​សម្រេច​លុប​ឈ្មោះ​បេក្ខជន​ទាំង​ ១៨​រូបនេះ បាន​ធ្វើ​ឲ្យ​ប៉ះពាល់​ដល់​សិទ្ធិ​របស់​អ្នក​បោះ​ឆ្នោត​សម្រាប់​ការ​ជ្រើស​រើស​តំណាង​របស់​ពួកគេ​។​​

យ៉ាងណា លោកថា ច្បាប់​ស្ដីពី​ការ​បោះ​ឆ្នោតក្រុម​ប្រឹក្សា​ឃុំ-សង្កាត់ បាន​អនុញ្ញាត​ឲ្យ​មាន​ការ​លុប​ឈ្មោះ​បេក្ខជន​ណា​ដែល​មិន​​ចេះ​អក្សរ​ចេញពី​បញ្ជី​បាន​។​​

លោក​និយាយ​ក្នុង​លក្ខខណ្ឌ​ទូទៅ​ថា​៖ «​បើ​តាម​អ្វី​ដែល​ខ្ញុំ​បាន​មើល​ឃើញ គឺមិន​មាន​ការ​ប៉ះពាល់​អ្វី​ខ្លាំង​ដល់​ដំណើរ​ការ​បោះ​ឆ្នោត​នោះទេ ពីគ្រោះ​ពួកគេ [គណបក្សនយោបាយ] មាន​បេក្ខជន​បម្រុង»។

ជាមួយ​គ្នា​នេះ ការ​លុប​ឈ្មោះ​បេក្ខជន​ចេញពី​បញ្ជី​ ក្នុង​ខណ្ឌ​បឹង​កេងកង​នេះ គឺ​ជា​វិធានការ​ថ្មី​មួយ​ទៀត​ដែល​ គ.ជ.ប បាន​កាត់​បេក្ខជន​ចេញពី​បញ្ជី​អ្នក​ឈរ​ឈ្មោះ​បោះ​ឆ្នោត​ទាក់​ទង​នឹង​បញ្ហា​អក្ខរកម្ម​។​

 ស្លាក​គណបក្ស​ភ្លើង​ទៀន និង​គណបក្ស​ប្រ​ជា​ជន​កម្ពុជា​នៅ​តាម​បណ្ដោយ​ផ្លូវ​មួយ​ក្នុង​ខេត្ត​កណ្ដាល ថ្ងៃទី​៨ ខែមីនា ឆ្នាំ​២០២២។ ខេមបូចា/ព្រីង សំរាំង​
ស្លាក​គណបក្ស​ភ្លើង​ទៀន និង​គណបក្ស​ប្រ​ជា​ជន​កម្ពុជា​នៅ​តាម​បណ្ដោយ​ផ្លូវ​មួយ​ក្នុង​ខេត្ត​កណ្ដាល ថ្ងៃទី​៨ ខែមីនា ឆ្នាំ​២០២២។ ខេមបូចា/ព្រីង សំរាំង​

កាល​ពី​ថ្ងៃ​សុក្រ សប្ដាហ៍​មុន គ.ជ.ប ក៏​បាន​លុប​ឈ្មោះ​បេក្ខជន​ ២០​នាក់​របស់​គណបក្ស​ភ្លើង​ទៀន និង​បួន​នាក់​របស់​គណបក្ស​ឆន្ទៈ​ខ្មែរ ដែល​បាន​ដាក់​ឲ្យ​ឈរ​ជា​បេក្ខជន​សម្រាប់​ការ​បោះ​ឆ្នោត​ខាងមុខ​។​​

គ.ជ.ប បាន​និយាយ​ក្នុង​សេចក្ដី​ថ្លែង​ការណ៍​របស់​ខ្លួន​ថា សមាជិក​ខ្លួន​បាន​​ទទួល​ពាក្យ​បណ្ដឹង​ចំនួន​ ១៦​បណ្ដឹង​ពី​ប្រជា​ពល​រដ្ឋ​មូល​ដ្ឋាន​ប្រឆាំង​នឹង​បេក្ខជន​នៅ​ក្នុង​ទីក្រុង​ភ្នំពេញ ខេត្ត​កោះ​កុង និង​ខេត្ត​មួយ​ចំនួន​ទៀត ដោយ​ចោទ​បេក្ខជន​ទាំង​នោះ​ថា​មិន​ចេះ​អាន និង​សរសេរ​អក្សរ​ខ្មែរ​។​

សេចក្ដី​ថ្លែង​ការណ៍​​របស់​ គ.ជ.ប សរសេរថា៖ «​បើ​តាម​ចម្លើយ​អ្នក​ទាំង​នោះ ពួក​គេ​ពិត​ជា​មិន​ចេះ​សរសេរ និង​អាន​មែន»។

ក្រៅ​ពី​នេះ មាន​បេក្ខជន​ខ្លះ​ទៀត​មិន​មាន​ទាំង​ឈ្មោះ​ក្នុង​បញ្ជី​បោះ​ឆ្នោត​ក្នុង​មូល​ដ្ឋាន​ដែល​ខ្លួន​ឈរ​ឈ្មោះ​ឲ្យ​គេ​បោះ​ឆ្នោត​ផង​។​​

បន្ទាប់​ពី​សេចក្ដី​សម្រេច​របស់​ គ.ជ.ប កាល​ពី​ថ្ងៃ​សុក្រ លោក ថាច់ សេដ្ឋា បាន​ជួប​ប្រជុំ​ជាមួយ​មន្ត្រី​ជាន់​ខ្ពស់​ក្រ​សួង​មហាផ្ទៃ ដោយ​បាន​លើក​យក​ពី​បញ្ហា​ដែល​កំពុង​កើត​មាន​​នៅ​មូលដ្ឋាន ដោយ​អាជ្ញាធរ​បាន​រារាំង​ គំរាម​កំហែង និង​ចាប់​ខ្លួន​​បេក្ខជន​របស់​គណបក្ស​ភ្លើង​ទៀន ដោយ​ចោទ​ប្រកាន់​ថា​បាន​ក្លែង​បន្លំ​ឯកសារ​។

លោក ថាច់ សេដ្ឋា មាន​ប្រសាសន៍​ថា៖ «​មេឃុំ​ [គណបក្ស​ប្រជា​ជន​កម្ពុជា] ដែល​បាន​អំណាច បារម្ភ​ខ្លាច​បាត់​តំណែង​របស់​ពួកគេ ដូច​នេះ ពួកគេ​ព្យាយាម​ធ្វើ​គ្រប់​បែប​យ៉ាង ដើម្បី​បង្ក​ការ​រំខាន​ដល់​គណបក្ស​ភ្លើង​ទៀន»។​

លោក ឲ្យ​ដឹង​ទៀត​ថា ក្រ​សួង​មហា​ផ្ទៃ​បាន​ទទួល​ស្គាល់​ពី​បញ្ហា​ដែល​កំពុង​កើត​មាន និង​បាន​​​យក​ចិត្ត​ទុក​ដាក់​លើ​រឿង​ដែល​ថា​អាជ្ញាធរ​បាន​បន្ត​អនុវត្ត​មិន​ត្រឹម​ត្រូវ​។​​

កាលពី​សប្ដាហ៍​មុន តុលាការ​ខេត្ត​ពោធិ៍​សាត់ បាន​ឃុំ​ខ្លួន​បេក្ខជន​គណបក្ស​ភ្លើង​ទៀន​ចំនួន​ពីរ​រូប គឺ​ឈ្មោះ អ៊ុក សៅវ៉ារិន និង ឈួន ឈឿង ដោយ​ចោទ​ថា​បាន​ក្លែង​បន្លំឯកសារ​សាធារណៈ​។ លោក ថាច់ សេដ្ឋា បាន​ច្រាន​ចោល​ការ​ចោទ​ប្រកាន់​នេះ និង​ថាវា​ជា​ការ​គំរាម​កំហែង​ផ្នែក​នយោបាយ​។​

លោក ហង្ស ពុទ្ធា ឲ្យ​ដឹង​ទៀត​ថា គ.ជ.ប នៅ​បន្ត​​ដោះស្រាយ​សំណុំ​រឿង​ពាក់ព័ន្ធ​នឹង​ការ​ដក​ឈ្មោះបេក្ខជន​ពី​គណបក្ស​មួយចំនួន ដែល​ក្នុង​នោះ​គណបក្ស​ភ្លើង​ទៀន​មាន​ច្រើន​ជាង​គេ​។​

យ៉ាងណា លោក ពុទ្ធា ថា មាន​ការ​ «ភាន់ច្រឡំ» អំពី​បញ្ហា ដូច​ជា​ការ​លុប​ឈ្មោះ​បេក្ខជន ដែល​វា​មិន​មែន​ជា​ការ​ដាក់​សម្ពាធ​នយោបាយ​ទេ ប៉ុន្តែ​ជា​ការ​អនុវត្ត​លើ​លក្ខខណ្ឌ​​តម្រូវ​លើ​ការ​ចេះ​អក្សរ​។​

អ្នក​វិភាគ​នយោបាយ លោក ឯម សុវណ្ណារ៉ា មាន​ប្រសាសន៍​ថា​ គណបក្ស​ភ្លើង​ទៀន ជាគណបក្ស​មាន​សក្តានុពល​មួយ​ក្នុង​ការ​ប្រកួត​ប្រជែង​ដណ្ដើម​កៅ​អី​ក្រុម​ប្រឹក្សា​ឃុំ-សង្កាត់ ជាមួយ​គណបក្ស​ប្រជា​ជន​កម្ពុជា។ លោក បាន​លើក​ឡើង​ពី​ប្រជា​ប្រិយភាព​របស់​គណក្ស ដែល​កន្លង​មក​មាន​ឈ្មោះ​ថា​គណបក្ស​សម រង្ស៊ី និង​ក្រោយ​មក​បាន​បញ្ជូល​គ្នា​ជាមួយ​គណបក្ស​សិទ្ធិ​មនុស្ស បង្កើត​ជា​គណបក្ស​សង្គ្រោះ​ជាតិ និង​ស្ទើរ​តែអាច​យក​ឈ្នះ​ការ​បោះ​ឆ្នោត​លើ​គណបក្ស​ប្រជា​ជន​កម្ពុជា​កាលពី​ការ​បោះ​ឆ្នោត​ឃុំ-សង្កាត់​ក្នុង​ឆ្នាំ​២០១៧​។​

លោក មានប្រសាសន៍ថា៖ «បើ​សិនជា​​ការ​លុប​ឈ្មោះ​នៅ​តែ​បន្ត​មាន វា​នឹង​ប៉ះពាល់​ដក់​ការ​​បោះ​ឆ្នោត​ដោយ​សេរី និង​យុត្តិ​ធម៌ រួម​ទាំង​មាន​ការ​រិះគន់ពី​សហគមន៍​អន្តរជាតិ​អំពី​សិទ្ធិ​ចូល​រួម​បោះ​ឆ្នោត​ផង​ដែរ»។​

លោកឲ្យ​ដឹង​ទៀត​ថា សាធារណជន​បាន​បាត់​បង់ជំនឿ​លើ​ គ.ជ.ប តាំង​ពី​មានការ​រំលាយ​គណបក្ស​សង្គ្រោះជាតិ ហើយ​សមាជិក​ គ.ជ.ប បច្ចុប្បន្ន​ស្ទើរ​ទាំងអស់​សុទ្ធ​តែមាន​ទំនាក់​ទំនង​នឹង​គណបក្ស​ប្រជា​ជន​កម្ពុជា​។​

អ្នក​នាំ​ពាក្យ​គណបក្ស​កាន់​អំណាច លោក សុខ​ ឥសាន្ត បាន​បដិសេធថាការ​លុបឈ្មោះ​បេក្ខជន​របស់​បក្ស​ប្រឆាំងនេះ​មិន​ពាក់ព័ន្ធ​នឹង​រឿង​នយោបាយ​នោះ​ទេ​។​

លោក​បន្ថែម​ថា៖ «​វាមិន​មែន​ជា​ការ​រារាំង​ផ្នែក​នយោបាយ​ទេ ពីព្រោះ​បេក្ខជន​គណបក្ស​ភ្លើង​ទៀន​មិន​ចេះអានអក្សរខ្មែរ»។ លោកថា គ.ជ.ប ធ្វើ​តាម​នីតិវិធី​ច្បាប់​។​

លោក ក៏​បាន​ច្រាន​ចោល​ការ​អះអាង​ថា​មាន​ការ​គំរាម​កំហែង​ផ្នែក​នយោបាយ ដែល​ថាមាន​ការ​គំរាម​ដក​ហូត​បណ្ណ​ក្រីក្រ ពី​ប្រជា​ពល​រដ្ឋ​ណា​ដែល​ចូល​រួម​ជាមួយ​គណបក្ស​ប្រឆាំង​។​​

យ៉ាងណា សម្រាប់​លោក គង់ មូនីកា ប្រធាន​គណបក្ស​ឆន្ទៈខ្មែរ មាន​ប្រសាសន៍​ថា លោក​ជឿ​ថា​ការ​លើក​យក​រឿង​មិន​ចេះ​អក្សរ​គឺ «ជាហេតុ​ផល​មិន​ត្រឹម​ត្រូវ» សម្រាប់​ការ​លុប​ឈ្មោះ​បេក្ខជន​​។​

លោក បន្ថែម​ថា៖ «​យើង​គិត​ថាមាន​បញ្ហា​ជា​ច្រើន​ផ្សេង​ទៀត»។ លោក​បន្ត​ថា គណបក្ស​បាន​ដឹង​ពី​នីតិវិធី​របស់​ គ.ជ.ប ក្នុង​ចិត្ត​ស្រាប់​ហើយពេល​ចុះ​បញ្ជី​ឲ្យ​បេក្ខ​ជន​។​

លោក ឲ្យ​ដឹង​ទៀត​ថា ការ​គំរាម​កំហែង​មក​លើ​គណបក្ស​ឆន្ទៈខ្មែរ​នៅ​ក្រៅ​រាជធានី​ភ្នំពេញ មាន​ទាំង​ការ​ស្នើ​ឲ្យ​ដក​ខ្លួន​ពី​បេក្ខជន​ឈរឈ្មោះ ដោយ​មាន​ការ​គំរាម​ពី​មេឃុំ ដែល​ថា​អ្នក​ពាក់​ព័ន្ធ​ជាមួយ​គណបក្ស​នឹង​ត្រូវ​ដក​ហូត​បណ្ណ​ក្រីក្រ​។​

លោកបន្ត​ថា៖ «រដ្ឋាភិបាល និងរដ្ឋបាលឃុំសង្កាត់ហ្នឹងឯង ជាអ្នកជួយដល់ប្រជាពលរដ្ឋ មិនមែនណគណបក្សនយោបាយទេ។ ដូច្នេះប្រសិនបើគណបក្សឆន្ទៈខ្មែរជាប់ឆ្នោត យើងអាចធ្វើអ្វីដែលប្រសើរជាងគណបក្សកាន់អំណាចធ្វើសព្វថ្ងៃ»។​​

លោក ខឿយ ស៊ីនឿន អនុប្រ​ធាន​គណបក្ស​ខ្មែរ​ស្រឡាញ់​ជាតិ មាន​ប្រ​សាសន៍​ថា​គណបក្ស​របស់​លោក មិនមាន​ជួប​បញ្ហា​រឿង​ដាក់​បេក្ខជន​ឈរ​ឈ្មោះ​នោះទេ ប៉ុន្តែ​ថា​បាន​ជួប​បញ្ហា​ផ្សេង​ជា​ច្រើន​ទៀត​នៅ​មូល​ដ្ឋាន រួម​មាន​ការ​គំរាម​ដក​បណ្ណ​ក្រី​ក្រ ​ពី​សមាជិក​គណបក្ស​ផង​ដែរ​។​​

លោក បាន​លើក​ជា​ឧទាហរណ៍​ពី​បេក្ខជន​បក្ស​ចំនួន​ប្រាំ​រូប​​ក្នុង​សង្កាត់​អូរចា ក្រុង​បាត់​ដំបង បាន​ឈប់​ចូល​រួម​យុទ្ធនាការ​គណបក្ស​បន្ទាប់​ពី​ខ្លាច​បាត់​បង់​បណ្ណ​ក្រី​ក្រ​របស់​ខ្លួន​៕

ប្រែសម្រួលពីអត្ថបទភាសាអង់គ្លេស៖ In unusual move, NEC cuts entire Candlelight candidate list in one Phnom Penh commune

949 views

ព័ត៌មានថ្មី

អត្ថបទពេញនិយម