សមាគមសម្ព័ន្ធអ្នកសារព័ត៌មានកម្ពុជា

រដ្ឋសភាបានអនុម័តសេចក្តីព្រាងវិសោធនកម្មរដ្ឋធម្មនុញ្ញដ៏ចម្រូងចម្រាស ដែលស្នើឡើងដោយ CPP

លោកនាយករដ្ឋមន្រ្តីហ៊ុន សែន កំពុងសំឡឹងមើលខណៈសមាជិករដ្ឋសភាអនុម័តលើការកែប្រែមាត្រាមួយចំនួនក្នុងរដ្ឋធម្មនុញ្ញដែលបានស្នើឡើងដោយគណបក្សប្រជាជនកម្ពុជា នាថ្ងៃទី២៨ខែកក្កដា ឆ្នាំ២០២២។ ខេមបូចា/ព្រីង សំរាំង
លោកនាយករដ្ឋមន្រ្តីហ៊ុន សែន កំពុងសំឡឹងមើលខណៈសមាជិករដ្ឋសភាអនុម័តលើការកែប្រែមាត្រាមួយចំនួនក្នុងរដ្ឋធម្មនុញ្ញដែលបានស្នើឡើងដោយគណបក្សប្រជាជនកម្ពុជា នាថ្ងៃទី២៨ខែកក្កដា ឆ្នាំ២០២២។ ខេមបូចា/ព្រីង សំរាំង

រដ្ឋសភាកាលពីថ្ងៃព្រហស្បតិ៍បានអនុម័តលើវិសោធនកម្មមាត្រាចំនួនប្រាំបីនៃរដ្ឋធម្មនុញ្ញដែលការកែប្រែនេះត្រូវបានជំទាស់យ៉ាងខ្លាំងដោយគណបក្សប្រឆាំង និងក្រុមសង្គមស៊ីវិល។

នៅក្នុងសម័យប្រជុំពេញអង្គកាលពីថ្ងៃព្រហស្បតិ៍ ដោយមានការចូលរួមពីលោកនាយករដ្ឋមន្ត្រី ហ៊ុន សែន សមាជិកសភាចំនួន ១០៥ រូប ក្នុងចំណោម ១០៦ រូប បានអនុម័តលើការធ្វើវិសោធនកម្មនេះទាំងស្រុង។

លោក កើត រិទ្ធ រដ្ឋមន្ត្រីក្រសួងយុត្តិធម៌ មានប្រសាសន៍ថា ការធ្វើវិសោធនកម្មនេះ គឺចាំបាច់ដើម្បីបំពេញចន្លោះខ្វះខាតនៃរដ្ឋធម្មនុញ្ញ និងធានាដល់ដំណើរការនៃស្ថាប័នកំពូលរបស់ប្រទេសមិន​ឲ្យ​ជាប់គាំង​។ លោក​បាន​ច្រានចោល​ការ​ចោទ​ប្រកាន់ដែល​ថាការ​ធ្វើ​វិសោធនកម្ម​នេះ​នឹង​ធ្វើ​ឱ្យ​ប្រព័ន្ធ​សភានិយម​របស់​ព្រះរាជាណាចក្រ​ចុះខ្សោយ។

លោក​បានថ្លែងថា៖ «វិសោធនកម្មធ្វើឡើងដើម្បីការពារឧត្តមប្រយោជន៍របស់ជាតិ»។ លោកបានបន្ថែមថា៖ «ការជាប់គាំងខាងនយោបាយជាអ្វីដែលគណបក្សមួយចំនួនដែលមានជំហរមិនស្របនឹងរដ្ឋាភិបាលចង់បានបំផុតព្រោះនោះជាឧត្តមប្រយោជន៍របស់គណបក្សខ្លួន ហើយគេតែងតែរិះរកវិធីគ្រប់បែបយ៉ាងដែលមានចែងក្នុងរដ្ឋធម្មនុញ្ញ ឬឆ្លៀតឱកាសពីភាពចន្លោះប្រហោងក្នុងរដ្ឋធម្មនុញ្ញដើម្បីបង្កជាឧបសគ្គធ្វើឱ្យស្ថាប័នជាតិជាប់គាំង​ឬបង្កជាការរំខាននានាដល់កិច្ចដំណើរការនៃស្ថាប័នជាតិ សំដៅតថ្លៃខាងនយោបាយសម្រាប់ផលប្រយោជន៍របស់គណបក្សខ្លួនតែប៉ុណ្ណោះ»។​

ក្រុម​សង្គម​ស៊ីវិល​ជាង១០០កាលពីថ្ងៃ​ពុធ​បាន​អំពាវនាវ​ឱ្យ​រដ្ឋសភា​ពន្យារ​ការ​អនុម័តការធ្វើវិសោធនកម្មរដ្ឋធម្មនុញ្ញដែល​ស្នើ​ដោយ​គណបក្ស​ប្រជាជន​កម្ពុជានេះ​។ ពួកគេ​ថា វិសោធនកម្ម​នេះ​ធ្វើ​ឲ្យ​ប៉ះពាល់​ដល់​តួនាទី​របស់​រដ្ឋសភាដែលត្រួត​ពិនិត្យ​​អំណាច​របស់​រដ្ឋាភិបាល និង​ធ្វើ​ឱ្យ​សិទ្ធិ​ពលរដ្ឋ​ចុះ​ខ្សោយផងដែរ។

លោក សុន ឆ័យ អនុ​ប្រធាន​គណបក្ស​​ភ្លើងទៀន​បាន​ថ្លែង​ថា៖ «យើង​មិន​ពេញ​ចិត្ត​នឹង​រឿង​ដែល​កំពុង​កើត​ឡើងឡើយ ប៉ុន្តែ​យើងក៏​មិន​អាច​ធ្វើ​អី​ដើម្បី​បញ្ឈប់​វា​បាន​ដែរទេ»។ លោក​បានបន្ថែមថា៖ «យើង​ចង់​ឱ្យ​ស្ថាប័នសភា​មាន​ការ​ទទួល​ខុស​ត្រូវ​ច្រើន​ជាង​នេះ ដើម្បី​ឱ្យរដ្ឋាភិបាលដែល​កើត​ចេញ​ពីសភា ​អាច​បំពេញ​មុខងារ​ដោយ​ការ​ទទួល​ខុស​ត្រូវ។ យើង​មិន​ចង់ឃើញ​​ការ​ផ្លាស់​ប្តូរដោយសារតែការបារម្ភពី​ការពារ​អំណាច​បុគ្គល ឬ​អ្នក​ដឹកនាំ​រដ្ឋាភិបាល​ទេ»

លោក សាម អ៊ីន អគ្គលេខាធិការ​គណបក្ស​ប្រជាធិបតេយ្យ​មូលដ្ឋាន​បាន​សម្តែង​ការ​ខកចិត្ត​ចំពោះ​ការ​ធ្វើវិសោធនកម្ម​នេះ។

លោក​បាន​ថ្លែង​ថា​៖ «​វិសោធនកម្ម​នេះ​ធ្វើ​ឲ្យ​ការទទួល​ខុសត្រូវ​របស់​រដ្ឋាភិបាល​ចំពោះការងារ​របស់ខ្លួន​កាន់តែ​ខ្សោយ ។ យើង​បារម្ភ​ថា​អំពើ​ពុករលួយ ក៏ដូចជាការ​រំលោភ​អំណាច​នឹង​កើន​ឡើង​នៅ​ពេល​អនាគត»

លោកនាយករដ្ឋមន្ត្រី ហ៊ុន សែន និងតំណាងរាស្រ្តគណបក្សប្រជាជនកម្ពុជា អនុម័តលើសេចក្តីព្រាងច្បាប់វិសោធនកម្មរដ្ឋធម្មនុញ្ញ នា​ថ្ងៃទី២៨ ខែកក្កដា ឆ្នាំ២០២២។​ ខេមបូចា/ព្រីង សំរាំង

អ្នកនាំពាក្យ​គណបក្ស​ប្រជាជន​កម្ពុជា លោក សុខ ឥសាន ថ្លែង​ការពារ​ការ​កែប្រែ​នេះ ដោយ​ថាការ​ធ្វើ​វិសោធនកម្ម​នេះ​ធ្វើ​ឡើង​ស្រប​តាម​រដ្ឋធម្មនុញ្ញ។ លោក​បដិសេធ​ថា វា​មិន​មែន​ជា​ការ​ក្តោប​អំណាច​របស់​បក្ស​កាន់​អំណាច​ទេ។

លោក​បាន​ថ្លែង​ថា​៖ «​ក្រុម​អង្គការ​ក្រៅ​រដ្ឋាភិបាល​និយាយ​ដូច្នេះ​ដើម្បី​ផ្គាប់​ចិត្ត​មេ​របស់​ពួកគេនៅក្រៅប្រទេសប៉ុណ្ណោះ ហើយ​រំខាន​ដល់​ការ​រីក​ចម្រើន​របស់​រដ្ឋាភិបាល។ ការ​ធ្វើ​វិសោធនកម្ម​គឺ​ចាំបាច់​ដើម្បី​ធានា​ដល់​ការស្ថាប័នរដ្ឋ​ដោយ​រលូន​»​

ការផ្លាស់ប្តូរដែលបង្កើតក្តីបារម្ភបំផុតសម្រាប់ក្រុមសង្គមស៊ីវិល​និងបក្សប្រឆាំងនោះគឺមាត្រា៩៨និង១១៩ ។

មាត្រា៩៨ចែងពីអំណាចរបស់សភាក្នុងការទម្លាក់សមាជិកគណៈរដ្ឋមន្រ្តីនិងរដ្ឋាភិបាលពីដំណែង។ ក្នុងមាត្រាចាស់ញត្តិបន្ទោសរាជរដ្ឋាភិបាល ត្រូវបានលើកឡើងជូនរដ្ឋសភាដោយតំណាងរាស្រ្តចំនួន៣០នាក់នៃសមាជិកសរុប១២៥នាក់នោះរដ្ឋសភាអាចលើកយកមកពិភាក្សាបាន ប៉ុន្តែក្នុងវិសោធនកម្មលើកទី១០នេះ ចំនួនតំណាងរាស្រ្តត្រូវមានរហូតដល់១ភាគ៣ ឬយ៉ាងហោចណាស់៤១នាក់។ គណបក្សប្រជាជនកម្ពុជា នៅអាណត្តិនេះកាន់កាប់កៅអីនៅក្នុងសភាទាំង១២៥។​

មាត្រា១១៩ ចែងពីការតែងតាំងនាយករដ្ឋមន្រ្តី និងការបង្កើតរដ្ឋាភិបាលថ្មី។ កាលពីមុនអំណាចក្នុងការតែងតាំងស្ថិតនៅក្នុងដៃប្រធាន និងអនុប្រធានទាំងពីរនៃរដ្ឋសភា។​ ការធ្វើវិសោធនកម្មបានផ្លាស់ប្តូរការទទួលខុសត្រូវទៅលើគណបក្សដែលមានកៅអីច្រើនជាងគេក្នុងរដ្ឋសភាទៅវិញ។

លោក កន សាវាង្ស មន្រ្តីឃ្លាំមើលការបោះឆ្នោតនៃអង្គការ COMFREL បានសម្តែងការខកចិត្តចំពោះសេចក្តីសម្រេចរបស់សភា ដោយនិយាយថា ការធ្វើវិសោធនកម្មរដ្ឋធម្មនុញ្ញគួរតែត្រូវបានដាក់ពីមុខសាធារណជន។

លោក​បាន​ថ្លែង​ថា​៖ «​វា​ជា​ការ​សម្រេចរបស់សភា​​ក្នុងអាណត្តិរបស់ខ្លួន ។ ប៉ុន្តែ​ក្នុង​នាមយើង​ជា​ប្រជាជន​កម្ពុជា បង្ហាញ​ការ​ព្រួយ​បារម្ភរបស់យើង​ជុំវិញរឿងនេះ។ យើង​នឹង​តាមដាន​ការ​អនុវត្ត​ដោយយកចិត្តទុកដាក់ ហើយ​ទុក​ឲ្យ​សាធារណជន​ជាវិនិច្ឆ័យទៅចុះ»៕​

ប្រែសម្រួលពីអត្ថបទភាសាអង់គ្លេស៖  National Assembly passes CPP-backed changes to Constitution

274 views

ព័ត៌មានថ្មីៗ

អត្ថបទពេញនិយម