ផ្លូវជាតិ៤១ត្រូវបានស្ថាបនាក្នុងឆ្នាំ២០១៤ដែលជាកំណាត់ផ្លូវដ៏សំខាន់មួយតភ្ជាប់ពីផ្លូវជាតិលេខ៤ទៅកាន់ខេត្តកំពត កំពុងរងការខូចខាតយ៉ាងធ្ងន់ធ្ងរបង្កការលំបាកដល់ការធ្វើដំណើរ។ ខណៈពលរដ្ឋដែលរស់នៅតំបន់នោះ ទទូចឱ្យអាជ្ញាធរពាក់ព័ន្ធ ពិសេសក្រសួងសាធារណការពន្លឿនការជួសជុលរឺស្ថាបនាឱ្យបានឆាប់រហ័សប្រកបដោយគុណភាពខ្ពស់។
បើធ្វើដំណើរពីផ្លូវជាតិលេខ៤ បត់ឆ្វេងមកតាមផ្លូវលេខ៤១ ដល់ចំណុចផ្សារអង្គមេត្រីទៅវិទ្យាល័យអង្គមេត្រី គេឃើញមានជង្ហុកធំៗ កន្លែងខ្លះមានទឹកដក់ ខ្លះដាច់កៅស៊ូមានសភាពរដិបរដុប ខណៈអ្នកដំណើរស្រីប្រុសធ្វើដំណើរដោយប្រុងប្រយ័ត្ន ព្រោះខ្លាចមានគ្រោះថ្នាក់ ដោយសារស្ថានភាពផ្លូវមានការលំបាកខ្លាំង ជាពិសេសពេលមេឃភ្លៀង។ អ្វីដែលគួរឱ្យកត់សម្គាល់ ផ្លូវនេះសំបូរឡានដឹកកម្មកររោងចក្រ និងឡានដឹកជំនិញធំៗចម្រុះមុខ ដែលជាហេតុធ្វើឱ្យផ្លូវនេះកាន់តែមមាញឹក។
ប្រជាពលរដ្ឋរស់នៅតាមបណ្ដោយផ្លូវ៤១ ពិសេសត្រង់ចំណុចផ្សារអង្គមេត្រី ស្ថិតក្នុងភូមិអង្គមេត្រី ឃុំរលាំងគ្រើល ស្រុកសំរោងទង ខេត្តកំពង់ស្ពឺ ត្អូញត្អែរថាផ្លូវគ្មានគុណភាព ពិបាកធ្វើដំណើរ និងបង្កគ្រោះថ្នាក់ដល់អ្នកដំណើរនានា ហើយពួកគេស្នើសុំឱ្យក្រសួងពាក់ព័ន្ធ និងអាជ្ញាធរមូលដ្ឋានចុះពិនិត្យដោយយកចិត្តទុកដាក់ ដើម្បីពន្លឿនការស្ថាបនាផ្លូវនេះឱ្យបានឆាប់រហ័ស ត្បិតថាផ្លូវនេះជាផ្លូវសំខាន់មិនអាចខ្វះបានសម្រាប់ការធ្វើដំណើរប្រកបការងារ។
កំពុងកាន់ចបកាយដីដែលហៀរចេញពីថ្នល់នៅខាងមុខផ្ទះ ពលរដ្ឋមួយរូបរស់នៅឃុំរលាំងគ្រើល គឺលោក សៅ តន អាយុ៥៣ឆ្នាំ ថ្លែងប្រាប់ ខេមបូចា ថា ផ្លូវ៤១ គឺមានភាពលំបាកខ្លាំងណាស់សម្រាប់អ្នកធ្វើដំណើរឆ្លងកាត់ ហើយកាន់តែលំបាកសម្រាប់អ្នករស់នៅតំបន់នេះ តួយ៉ាងដូចលោកជាដើមចង់ធ្វើដំណើរទៅណាមកណា មានការតានតឹងចិត្តណាស់។
លោកបន្តថា ដោយសារតែស្ថានភាពផ្លូវពិបាកបែបនេះ កាន់តែបង្កការកកស្ទះនៅពេលពលរដ្ឋសម្រុកធ្វើដំណើរទៅធ្វើការ និងពេលត្រឡប់មកផ្ទះវិញ ព្រោះមានឡានដឹកកម្មកររោងចក្រ ឡានដឹកទំនិញ ឡានដឹកថ្ម ដឹកខ្សាច់ ឆ្លងកាត់ច្រើន។
លោកថ្លែងយ៉ាងដូច្នេះថា៖ «ផ្លូវហ្នឹងវាលំបាក ទីមួយឃើញអ្នកធ្វើដំណើរលំបាក ហើយយើងអ្នកនៅផ្ទះជុំវិញហ្នឹងក៏លំបាកចឹងទៅ ផ្លូវឡានវាមកជាប់កន្លែងហ្នឹងវាច្រើន ស្ទះចរាចរក៏ច្រើន។ ភ្លៀងវិញទឹកដក់ពេញផ្លូវ ថ្ងៃមុនមានឡានគ្រោះថ្នាក់ទៀត ដោយសារផ្លូវវាខូចខ្លាំង»។
លោកបន្ថែមថា ដោយសារតែផ្លូវនេះខូចខ្លាំង លោកឃើញក្រុមហ៊ុនចិនដែលគ្រប់គ្រងការសាងសង់បានចាក់ដី និងជួសជុលណ្ដោះអាសន្នដែរ តែមិនបានប៉ុន្មានផងផ្លូវក៏នៅតែខូចដដែល។ ដោយសារតែផ្ទះរបស់លោកនៅជាប់នឹងថ្នល់ លោកថាមានការលំបាកខ្លាំងការរស់នៅ និងរកស៊ី។
លោកប្រាប់ថា៖ «រំខានមែនទែន ពេលខ្លះយើងចេញឡានចេញអីអត់រួច ចង់ធ្វើដំណើរទៅនេះទៅនោះអត់បាន ដល់តែពេលវាស្ងួតទៅវាហ៊ុយទៀត»។
លោក តន លើកឡើងថា ផ្លូវនេះខូចខាតក៏ដោយសារតែមិនមានប្រព័ន្ធលូបង្ហូរទឹកត្រឹមត្រូវ ដូច្នេះពេលមានភ្លៀងទឹកលិចផ្លូវ គួបផ្សំនឹងមានឡានដឹកលើសទម្ងន់ឆ្លងកាត់ច្រើន ក៏បណ្ដាលឱ្យផ្លូវទ្រុឌទ្រោមដូច្នេះ។
លោករំពឹងថា អាជ្ញាធរពាក់ព័ន្ធនឹងជួយជំរុញឱ្យក្រុមហ៊ុនសង់ផ្លូវប្រកបដោយស្ដង់ការ ដើម្បី ប្រើប្រាស់បានយូរអង្វែង ពិសេសពន្លឿនការជួសជុលតាមដែលអាចធ្វើបាន។ ព្រោះលោកឮដំណឹងមកថា គ្រោងនឹងធ្វើឆាប់ៗនេះហើយ តែមកដល់ពេលនេះមិនទាន់ឃើញមានសកម្មភាពអ្វីឡើយ។
លោក តន បន្ថែមថា៖ «បញ្ហាសំខាន់គឺប្រលាយទឹកហ្នឹងហ្មង៎ ដល់ទឹកហូរមកផ្លូវវាខូច ចឹងសំណូមពរ[ក្រុមហ៊ុន]ធ្វើឱ្យស្រួល ឱ្យស្អាតឱ្យជាប់បានយូរ មានប្រលាយទឹកត្រឹមត្រូវ»។
បុរសវ័យ៥០ប្លាយអង្គុយលើម៉ូតូ បានអនុញ្ញាតផ្ដល់បទសម្ភាសន៍ជាមួយខេមបូចា តែសុំមិនបញ្ចេញឈ្មោះ បានឱ្យដឹងថា កំណាត់ផ្លូវជាតិលេខ៤១នេះកាន់តែខូចធ្ងន់ធ្ងរទៅៗ ពិសេសពេលមេឃភ្លៀងហើយពិបាកក្នុងការធ្វើដំណើរ។ លោកតែងសង្កេតឃើញថា ពលរដ្ឋដែលធ្វើដំណើឆ្លងកាត់ ពើបប្រទះនឹងគ្រោះថ្នាក់ចរាចរជាញឹកញយ ពិសេសអ្នកដំណើរដែលមិនដឹងពីស្ថានភាពផ្លូវ។
បុរសសុំមិនបញ្ចេញឈ្មោះរូបនេះបញ្ជាក់ថា៖«ផ្លូវហ្នឹងវាពិបាកជិះអ៊ីចឹងទៅ បើនិយាយពីពិបាក ពិបាកដល់កហើយ ហ៊ុយក៏ហ៊ុយ អ្នកដំណើរដួលរហូត អាគ្រលុកចឹងអ្នកធ្លាប់ជិះកាត់គេអត់ដែលដួលទេ ដួលតែអ្នកដំណើរថ្មីៗទេ»។
បុរសរូបនេះប្រាប់ឱ្យដឹងថា ផ្លូវនេះជាគម្រោងក្រោមការគ្រប់គ្រងសាងសង់របស់ក្រុមហ៊ុនចិន ហើយផ្លូវនេះ មានកាខូចខាតយូរហើយ តែក្រុមហ៊ុនជួសជុលតិចតួចបណ្ដោះអាសន្ន តែនៅតែ ខូចដដែល។ លោក បានសម្ដែងការបារម្ភចំពោះសុវត្ថិភាពអ្នកដំណើរ និងប្រជាពលរដ្ឋក្នុង មូលដ្ឋាន ដូច្នេះក៏បានស្នើទៅអ្នកពាក់ព័ន្ធឱ្យជួយពន្លឿនការស្ថាបនាកំណាត់ផ្លូវជាតិ៤១នេះ ពិសេសឱ្យអាជ្ញាធរត្រួតពិនិត្យប្រព័ន្ធលូសងខាងផ្លូវឡើងវិញ ដើម្បីកុំឱ្យមានការលិចផ្លូវទៀត។
លោកឱ្យដឹងថា៖«ផ្លូវហ្នឹងចិនអ្នកធ្វើ ដូច្នេះសំណូមពរឱ្យឆាប់ធ្វើទៅ បានជិះស្រួលទាំងអស់គ្នា និងកាយប្រឡាយផង បើនាំគ្នាលុបប្រឡាយអស់ហើយ បានទឹកឯណាហូរអស់»។
ពលរដ្ឋរូបនេះបង្ហើបប្រាប់ថា បញ្ហាដែលពលរដ្ឋជួបប្រទះ ធ្លាប់បានស្នើទៅអាជ្ញាធរដែរ តែដោយសារតែផ្លូវនេះមានក្រុមហ៊ុនចិនជាអ្នកកាន់កាប់ ដូច្នេះអាជ្ញាធរមិនលូកដៃឡើយ។
លោកបញ្ជាក់ថា៖ «អាជ្ញាធររដ្ឋខ្ជិលមាត់ ខ្ជិលតអ៊ីចឹងទៅណា អាងតែថាក្រុមហ៊ុនចិនគេមកធ្វើ។ ខ្ញុំចង់ឱ្យតែគេមកធ្វើទេ អ្នកណាក៏ចង់ដែរ»។
ពលរដ្ឋមួយរូបទៀត គឺលោក ទេព វិបុល កំពុងតែប៉ះកង់រ៉ឺម៉ក ដែលបែកពេលជិះកាត់ផ្លូវ៤១ បានប្រាប់ថា កង់បីលោកបែកកង់ព្រោះទង្គិចនឹងដុំថ្ម និងជង្ហុកធំៗ ហើយផ្លូវនេះមានស្ថានភាពពិបាកខ្លាំងណាស់ប្រសិនបើមេឃភ្លៀងវិញកាន់តែវេទនាមួយតង់ទៀត ពេលជិះអាចនឹងក្រឡាប់ក៏មាន។
លោកប្រាប់ថា៖ «បើមេឃភ្លៀងវិញមានទឹកដក់ ពេលខ្លះមើលផ្លូវអត់ឃើញគ្រលុកជួនកាលទៅបិះក្រឡាប់រឺម៉ក់ក៏មានដែរ បើធ្វើឱ្យស្មើបន្តិចស្រួលជិះ»។
មេភូមិអង្គមេត្រី លោក គឹម ហួត ប្រាប់ឱ្យដឹងថា ក្នុងនាមលោកជាអាជ្ញាធរមូលដ្ឋានមួយរូប លោក៏មានការកង្វល់ចិត្តចំពោះបញ្ហាផ្លូវខូចខាតនេះដែរ ប៉ុន្តែលោកអះអាងថាមិនអាចធ្វើអ្វីចេញឡើយក្រៅតែពីសម្ដែងការមិនសប្បាយចិត្ត។
លោកហួតថ្លែងថា៖«ទៅឃើញពិបាកចិត្តចង់ងាប់ហើយ ឡានវាកកស្ទះនៅហ្នឹង អាណាស្ទុះចូលទៅអត់រួចអ៊ីចឹងទៅ»។
លោកបន្តថា ក្នុងនាមលោកជាមេភូមិ លោកមិនអាចចេញវិធានការណ៍អ្វីធំដុំឡើយ ព្រោះផ្លូវខូចក៏ដោយសារតែឡានដឹកលើសទម្ងន់ យានយន្តចរាចរណ៍ស្ទះខ្វាត់ខ្វែង។ លោកក៏រំពឹង ដែរថា ក្រោយការជួសជុលរួចនឹងមានផ្លូវល្អសម្រាប់ពលរដ្ឋប្រើប្រាស់។
លោក ចែម ភិនរីមវុទ្ធី អភិបាលស្រុកគងពិសី ថ្លែប្រាប់ឱ្យដឹងថា ថ្វីត្បិតតែផ្លូវនេះកំពុងខូច តែនៅពេលបញ្ចប់ការស្ថាបនាហើយ លោកនឹងសហការជាមួយអ្នកពាក់ព័ន្ធ ដើម្បីថែរក្សាផ្លូវមួយខ្សែរនេះកុំឱ្យរងការខូចខាតធ្ងន់ធ្ងរ។
លោកបញ្ជាក់ថា៖«យើងនឹងដាក់ជញ្ជីងចល័តក្នុងករណីដឹកលើសទម្ងន់ ចំពោះការចូលរួម គឺរួមគ្នាទប់ស្កាត់ទាំងអស់គ្នាទាំងជំនាញពាក់ព័ន្ធ ទាំងអាជ្ញាធរ»។
អភិបាលខេត្តកំពង់ស្ពឺ លោក វ៉ី សំណាង បានថ្លែងប្រាប់ ខេមបូចា ថា ផ្លូវជាតិលេខ៤១ មិនស្ថិតក្រោមការគ្រប់គ្រងរបស់អាជ្ញាធរថ្នាក់ខេត្តឡើយ គឺស្ថិតក្រោមការគ្រប់គ្រង់របស់ថ្នាក់ជាតិម្យ៉ាងផ្លូវនេះបានប្រគល់សិទ្ធិស្ថាបនាទៅឱ្យក្រុមហ៊ុនចិនជាអ្នកស្ថាបនាហើយ។
លោក សំណាង ថ្លែងថា៖ «ផ្លូវជាតិ៤១ជារបស់ថ្នាក់ជាតិដែលទទួលបន្ទុកក្នុងការធ្វើអីៗហ្នឹងណា ចិនគាត់ទទួលបន្ទុក ហើយគេបានធ្វើពីដំបូងៗមកតែឥឡូវវាខកខាន ខ្ញុំអត់ដឹងថាសួរពីណាបាន»។
លោកអះអាងថា ក្រុមហ៊ុនចិនដែលកាន់កាប់នេះ នឹងស្ថាបនាផ្លូវ៤១ឱ្យប្រសើរជាងមុន ទាំងស្ដង់កា ទំហំ និងការរចនាលម្អ ហើយពលរដ្ឋខ្មែរគប្បីចូលរួមថែរក្សាផ្លូវឱ្យបានយូរអង្វែង។
លោកបញ្ជាក់បន្ថែមថា៖ «ខ្ញុំអំពាវនាវដល់អ្នករកស៊ីដឹកជញ្ជូនឱ្យគោរពច្បាប់ចរាចរណ៍ គោរពវិធាននៃទម្ងន់ដើម្បីធ្វើយ៉ាងណាឱ្យផ្លូវយើងប្រើប្រាស់បានយូរ ហើយបើយើងចេះតែចង់បានម្នាក់ៗឯងចឹងវាអត់ល្អ»។
លោក ប៉ាល់ ចន្ទតារា លេខាធិការនិងជាអ្នកនាំពាក្យក្រសួងសាធារណការ និងដឹកជញ្ជូន បានមានប្រសាសន៍ថា គម្រោងស្ថាបនាផ្លូវជាតិ៤១ គឺគ្រាន់តែពង្រឹងគុណភាពឱ្យល្អជាងមុន និងត្រឹមត្រូវតាមស្ដង់ដា ព្រោះក្រសួងមានថវិការសម្រាប់កែលម្អឡើងវិញ។ ម្យ៉ាង ក្រសួងមានគម្រោងច្បាស់លាស់ នឹងគ្រោងសម្ពោធចុងឆ្នាំ២០២២នេះ។
លោកថ្លែងថា៖ «កាលលើកមុនយើងអត់លុយចង់ធ្វើផ្លូវឱ្យបានច្រើន តែឥឡូវនេះយើងគិតគូរពីគុណភាព ឥឡូវវាដល់ម៉ោងគិតពីគុណភាពហើយក្មួយ»។
លោកបានបន្ថែមថា ក្រសួងមានកញ្ចប់ថវិការសម្រាប់ជួសជុលផ្លូវ៤១ហើយ ប៉ុន្តែក្នុងរង្វង់ទឹកប្រាក់ប៉ុន្មានលោកមិនច្បាស់ទេ។ ទន្ទឹមនឹងនេះ ក្រុមហ៊ុនចិន ជាអ្នកកាន់កាប់ក្នុងការជួសជុលផ្លូវមួយខ្សែនេះ។
នាយកប្រតិបត្តិអង្គការតម្លាភាពកម្ពុជា លោកប៉ិច ពិសី បានឱ្យដឹងថា បញ្ហាហេដ្ឋារចនាសម្ព័ន្ធដែលគ្មានគុណភាពនេះជារឿងដដែលៗ និងកើតមានជាយូរមកហើយ។ បញ្ហាផ្លូវគ្មានគុណភាពនេះ ក៏ធ្វើឱ្យពលរដ្ឋកើតជាកង្វល់ផងដែរ។
លោកមានប្រសាសន៍ថា៖ «ធ្វើផ្លូវធ្វើស្ពានអត់គុណភាព ហើយនឹងសំណង់សាធារណៈផ្សេងទៀត ជាក្ដីបារម្ភសម្រាប់សាធារណជន ពលរដ្ឋគាត់ខ្វល់ខ្វាយ»។
ដើម្បីដោះស្រាយបញ្ហានេះ លោកពិសី លើកឡើងថា រដ្ឋាភិបាល គប្បីមើលទៅលើធាតុសំខាន់ពីរយ៉ាង៖ ទី១ គឺការធ្វើលទ្ធកម្ម(ការចូលរួមដេញថ្លៃ)ជាសាធារណៈប្រកបដោយតម្លាភាព និងបើកចំហ។ ទីពីរ ដើម្បីដោះស្រាយឱ្យចំគោលដៅ រដ្ឋាភិបាលគួរតែសិក្សាឱ្យស៊ីជម្រៅបន្ថែមពីដើមចម និងពិនិត្យលើក្រុមហ៊ុនដែលគ្រប់គ្រងគម្រោងសង់ផ្លូវ ថាហេតុអ្វីសង់ផ្លូវគ្មានគុណភាព ។
លោកពន្យល់យ៉ាងដូច្នេះថា៖ «លទ្ធកម្ម(ការចូលរួមដេញថ្លៃ)សាធារណៈគួរបើកជាសាធារណៈ មានការប្រកួតប្រជែង ពិតប្រាកដមិនមានអំពើរពុករលួយ ដោយផ្ដល់ឱកាសដល់ក្រុមហ៊ុនដែលមានសមត្ថភាពផ្នែកបច្ចេកទេស ផ្នែកហិរញ្ញវត្ថុអាចធ្វើកម្រោងសាធារណៈបាន»។ លោកបន្តថា៖ «គួរតែមានការសិក្សាឱ្យស៊ីជម្រៅ ថាហេតុអ្វីក្រុមហ៊ុនដែលដេញថ្លៃបានធ្វើគម្រោងអត់មានគុណភាពហើយចេះតែខូច?»។
យោងតាមលិខិតបំភ្លឺរបស់មន្ទីរសាធារណការ និងដឹកជញ្ជូនខេត្តកំពង់ស្ពឺ កាលពីថ្ងៃទី១០ ខែឧសភា ឆ្នាំ២០២២ កន្លងទៅ បានឱ្យដឹងថា កំណាត់ផ្លូវជាតិលេខ៤១ ខ្សែផ្លូវនេះស្ថិតក្នុងគម្រោងធ្វើឱ្យប្រសើរឡើងវិញ ក្រោមហិរញ្ញប្បទានសហប្រតិបត្តិការពីសាធារណរដ្ឋប្រជាមានិតចិន ហើយក្រុមហ៊ុនដេញថ្លៃបានដោយក្រុមហ៊ុនចិនសាងសង់ផ្លូវនិងស្ពាន(CRBC)បានសន្យាថានឹងចុះជួសជុល ឆាប់ៗខាងមុខនេះ ហើយគ្រោងនឹងបើកការដ្ឋាននៅពេលវេលាសមស្របណាមួយ។
គួរជម្រាបជូនថា ផ្លូវជាតិលេខ៤១ ចាប់ពីផ្សារថ្នល់ ទទឹងចំណុចប្រសព្វនៃផ្លូវជាតិលេខ៤ ខេត្តកណ្តាល កាត់ខេត្តកំពង់ស្ពឺ ខេត្តតាកែវ ទៅដងទង់ខេត្តកំពត មានប្រវែងសរុបជាង៩៥គីឡូម៉ែត្រ ជាប្រភេទក្រាលកៅស៊ូពីរជាន់(DBST)បានបញ្ចប់ការសាងសង់នៅខែឧសភា ឆ្នាំ២០១៤ និងដាក់ឱ្យប្រើប្រាស់នៅខែមិថុនា ឆ្នាំ២០១៥ ដោយចំណាយថវិកាសរុបប្រមាណ៤៦លានដុល្លារ។
បើតាមក្រសួងសាធារណការ មកដល់បច្ចុប្បន្នផ្លូវនេះបានរងការខូចខាតយ៉ាងដំណំដោយសារការបើកបរលើសទម្ងន់កំណត់ គួបផ្សំនឹងស្ថានភាពផ្លូវមានកម្រិតទាប និងលិចលង់ ដោយជំនន់ទឹកភ្លៀង ដែលតម្រូវឱ្យធ្វើការជួសជុលលើកកម្ពស់ឡើងវិញ ដើម្បីងាយស្រួលក្នុងការធ្វើចរាចរណ៍។
កន្លងមកលោកនាយករដ្ឋមន្រ្តីហ៊ុន សែន ធ្លាប់មានប្រសាសន៍ថា គម្រោងស្ថាបនាឡើងវិញនូវផ្លូវជាតិមួយខ្សែនេះ នឹងត្រូវប្រើប្រាស់ប្រាក់កម្ចីពីប្រទេសចិន ដូចគ្នានឹងគម្រោងកែលម្អឡើងវិញនូវផ្លូវជាតិលេខ៣១ និងផ្លូវជាតិលេខ៣៣៕