នារសៀលម៉ោង៤ នៅថ្ងៃអាទិត្យ អាជ្ញាធរថៃប្រមាណ ១០នាក់ក្នុងឯកសណ្ឋានពណ៌ខ្មៅបានដើរចេញពីអគារក្បែរនោះដើម្បីទាញទ្វាររបងបិទប៉ុស្តិ៍ត្រួតពិនិត្យ។
ជាមួយគ្នានោះ អាជ្ញាធរកម្ពុជាប្រមាណ ៣០នាក់ ដែលឈរក្បែររបងព្រំដែនក៏បានចាប់ផ្ដើមបិទច្រកទ្វារព្រំដែន ស្របពេលពលរដ្ឋខ្មែរបានប្រញាប់ប្រញាល់ចាកចេញពីប្រទេសថៃត្រឡប់មកផ្ទះវិញ។
កំពុងដើរឆ្លងកាត់ច្រកព្រំដែនថៃ ដោយស្ពាយនូវបង្វិចធំមួយ លោក សុខ សុខនី វ័យ ៦៧ឆ្នាំ ជាអ្នករស់នៅក្រុងប៉ោយប៉ែត ខេត្តបន្ទាយមានជ័យ ក្នុងប្រទេសកម្ពុជា ឱ្យដឹងថា លោកជាអាជីវករលក់អាវជជុះនៅផ្សាររោងក្លឿប្រទេសថៃជាង២០ឆ្នាំមកហើយ។ ចំពោះដំណឹងដែលអាជ្ញាធរថៃនឹងបិទច្រកទ្វារអន្តរជាតិប៉ោយប៉ែតនៅវេលាម៉ោង៤រសៀលនោះ លោកថាបានលឺតៗគ្នាប៉ុណ្ណោះ ដោយមិនមែនដឹងពីអាជ្ញាធរនៃប្រទេសទាំងពីរនោះទេ។
លោក សុខនី និយាយថា៖ «ខ្ញុំចង់ឱ្យអាជ្ញាធរនៃប្រទេសទាំងពីរប្រកាសជាផ្លូវការនូវការបិទប៉ុស្តិ៍ត្រួតពិនិត្យ ដើម្បីកុំឱ្យប្រជាពលរដ្ឋភ័យខ្លាច»។ ដោយលោកបន្ថែមថា លោកក៏ទើបតែបានលឺថ្ងៃនេះដែរ (ថ្ងៃអាទិត្យ) ថាអាជ្ញាធរថៃបិទប៉ុស្តិ៍នៅម៉ោង ៣ រសៀល ទើបគាត់ប្រញាប់ចាកចេញពីព្រំដែនថៃឱ្យបានមុនម៉ោង។
ជាទូទៅ ការបិទប៉ុស្តិ៍ត្រួតពិនិត្យពិតជាមានផលប៉ះពាល់ដល់អាជីវកម្មរបស់ប្រជាជននៃប្រទេសទាំងពីរ ព្រោះពួកគេជាអ្នកជិតខាងគ្នា។ លោក សុខនី បានលើកឡើងថា៖«ការកាត់បន្ថយម៉ោងធ្វើអាជីវកម្មនិងតម្រូវឱ្យទៅដល់ប៉ុស្ត៍ត្រួតពិនិត្យលឿនជាងរាល់ដង គឺបានប៉ះពាល់ដល់អាជីវកម្មខ្ញុំ។ វាពិតជាលំបាកព្រោះខ្ញុំមានពេលខ្លីក្នុងការលក់សម្លៀកបំពាក់របស់ខ្ញុំ»។
កំពុងឈរកាន់ដៃកូនទាំង២នាក់ រង់ចាំនៅមុខប៉ុស្តិ៍ត្រួតពិនិត្យប៉ោយប៉ែត នៅម៉ោងប្រមាណ៣និង៣០នាទីរសៀល អ្នកស្រី ឈិត ស្រីនិច អាយុ ២៨ឆ្នាំ បានប្រាប់អ្នកយកព័ត៌មានខេមបូចា ថា ភាពតានតឹងនៅព្រំដែនកម្ពុជា និងថៃ បានធ្វើឱ្យប៉ះពាល់ដល់ប្រជាពលរដ្ឋសាមញ្ញដូចអ្នកស្រី ជាពិសេសអ្នកដែលធ្វើការនៅប្រទេសថៃ។
អាជ្ញាធរថៃបានតម្រូវឱ្យពលរដ្ឋខ្មែរចាកចេញ ឬចូលប្រទេសថៃត្រឹមម៉ោង៤រសៀល។ ហើយមានតែទិដ្ឋាការរយៈពេលប្រាំពីរថ្ងៃប៉ុណ្ណោះសម្រាប់ប្រជាជនកម្ពុជាដែលមានលិខិតឆ្លងដែន ឬបណ្ណព្រំដែនបច្ចុប្បន្ន។
ប្រកបរបរជាជាងប៉ូលាស្បែកជើងម្នាក់នៅផ្សាររោងក្លឿ អ្នកស្រី ស្រីនិច មានដើមកំណើតមកពីខេត្តកំពង់ធំ បាននិយាយថា ក្នុងមួយថ្ងៃគាត់អាចរកបានចំណូលត្រឹមតែ ៣០០ បាត (ប្រមាណ ៣៦០០០ រៀល) ប៉ុណ្ណោះ។ ដូច្នេះ ពេលមានភាពតានតឹងនៅព្រំដែន កម្មករធម្មតាដូចជាអ្នកស្រីងាយប្រឈមនឹងការបាត់បង់ការងារ ហើយវានឹងប៉ះពាល់ដល់ប្រាក់ចំណូលគ្រួសាររបស់គាត់ និងអ្នកផ្សេងទៀត។
អ្នកស្រីបាននិយាយថា៖ «វាពិបាកណាស់។ កន្លងមកភាគីថៃបិទនៅម៉ោង ១០ យប់ ប៉ុន្តែឥឡូវខ្ញុំត្រូវប្រញាប់ចេញពីការងារមុនម៉ោង ៤ រសៀល អាជ្ញាធរថៃមិនបានជូនដំណឹងដល់ពួកយើងអំពីការបិទជាមុនទេ»។
អ្នកស្រីបានត្អូញត្អែរថា៖ «ផលប៉ះពាល់ទីមួយគឺទាក់ទងនឹងសេដ្ឋកិច្ចមិនដំណើរការល្អ យើងមិនអាចលក់អ្វីបានទេ ហើយយើងមានការងារធ្វើលុះត្រាតែអតិថិជនមករកយើង ខ្ញុំខ្លាចបាត់បង់ការងារ ប្រសិនបើព្រំដែនបិទទាំងស្រុង»។
កម្មករ និងភ្ញៀវទេសចរណ៍ប្រឈមនឹងការលំបាក
អ្នកស្រី យ៉ាន អាយុ ៣៨ឆ្នាំ ជាពលរដ្ឋរស់នៅក្រុងប៉ោយប៉ែត ដែលធ្វើការជាអ្នកអូសរទេះសម្រាប់ភ្ញៀវជាតិ និងអន្តរជាតិ នៅច្រកព្រំដែនអន្តរជាតិប៉ោយប៉ែត បាននិយាយថា ការផ្លាស់ប្តូរម៉ោងធ្វើការរបស់អាជ្ញាធរថៃដោយមិនជូនដំណឹងដល់ភាគីកម្ពុជា បានបង្កការលំបាកដល់កម្មករ និងម្ចាស់អាជីវកម្មខ្នាតតូច។ អ្នកស្រីបញ្ជាក់ថា ទាំងពលរដ្ឋខ្មែរ និងថៃប្រឈមនឹងបញ្ហាដោយសារច្បាប់ថ្មីនេះ។
អ្នកស្រី យ៉ាន បារម្ភថា បើស្ថានភាពបែបនេះនៅតែបន្ត ម្ចាស់អាជីវកម្មតូចតាចអាចប្រឈមនឹងការខាតបង់ប្រាក់ចំណូលសម្រាប់ផ្គត់ផ្គង់គ្រួសារ។ អ្នកស្រីបន្តថា ពួកគេក៏អាចប្រឈមនឹងសម្ពាធផ្លូវចិត្តផងដែរ ជាពិសេសអ្នកដែលជួលផ្ទះនៅជិតផ្សាររោងក្លឿ ហើយមានកូនទៅសាលារៀនក្នុងប្រទេសកម្ពុជា ត្រូវធ្វើដំណើរទៅមក។
អ្នកស្រី យ៉ាន បន្ថែមថា៖ «សម្រាប់ខ្ញុំ ដរាបណាច្រកទ្វារបើកចំហ ហើយប្រជាជនថៃ និងខ្មែរមិនឈ្លោះគ្នា កម្មករដែលរកបានដោយធ្វើការនៅជិតព្រំដែន នឹងមិនបាត់បង់ប្រាក់ចំណូលរបស់ពួកគេទេ។ ប៉ុន្តែទោះបីជាយ៉ាងណាក៏ដោយ ប្រជាជនកម្ពុជានឹងរងផលប៉ះពាល់»។
ក្នុងនាមជាខ្មែរ អ្នកស្រីមិនចង់ឱ្យមានជម្លោះជាមួយជនជាតិថៃទេ ហើយសង្ឃឹមថានឹងមានដំណោះស្រាយដោយសន្តិវិធីឆាប់ៗ។
ស្រ្តីដែលធ្វើការនៅទីនោះអស់រយៈពេលជាង១០ឆ្នាំ រៀបរាប់ថា៖ «យើងជាប្រជាពលរដ្ឋបានត្រឹមតែរង់ចាំមើល ហើយសង្ឃឹមថាពួកគេនឹងមិនបិទព្រំដែនទេព្រោះវានឹងប៉ះពាល់ដល់ប្រជាជន»។
អភិបាលរងខេត្តបន្ទាយមានជ័យ លោក លឹម សុដា ដែលចូលរួមត្រួតពិនិត្យស្ថានភាពនៅច្រកប៉ោយប៉ែត បានប្រាប់អ្នកសារព័ត៌មានថា ការផ្លាស់ប្តូរម៉ោងបើកច្រកព្រំដែនបានបង្កការលំបាកខ្លះដល់ភ្ញៀវទេសចរ និងប្រជាពលរដ្ឋខ្មែរដែលតែងតែធ្វើដំណើរឆ្លងដែនទាំងព្រឹកព្រលឹមទៅរកស៊ីនៅប្រទេសថៃ។
លោក សុដា បានមានប្រសាសន៍ថា៖ «ការផ្លាស់ប្តូរពេលវេលាគឺពិតជាប៉ះពាល់ដល់ប្រជាជនរបស់យើង [អាជីវករនៅក្នុងផ្សារថៃ]»។ ដោយលោកបន្ថែមថា បច្ចុប្បន្ននេះប៉ុស្តិ៍ត្រួតពិនិត្យក្នុងតំបន់ផ្សេងទៀតក៏បានផ្លាស់ប្តូរម៉ោងបើកចន្លោះពីម៉ោង ៨ ព្រឹកដល់ម៉ោង ១២ យប់មានន័យថាតែពាក់កណ្តាលថ្ងៃប៉ុណ្ណោះ។
លោកបន្តថា ភាគីថៃមិនបានប្រាប់អាជ្ញាធរកម្ពុជាអំពីម៉ោងបើកជាលាយលក្ខណ៍អក្សរទេ គ្រាន់តែនិយាយផ្ទាល់មាត់ថា ប៉ុស្តិ៍ត្រួតពិនិត្យនឹងបើកពីម៉ោង ៨ ព្រឹក ដល់ម៉ោង ៤ រសៀល។
លោក សូដា បន្ថែមថា៖ «ខ្ញុំបានជួបអាជីវករខ្មែរនៅផ្សាររោងក្លឿកាលពីព្រឹកមិញ ពួកគេមិនខឹងនឹងអាជ្ញាធររបស់យើងទេ ព្រោះពួកគេដឹងថាជាភាគីថៃដែលបិទច្រកមុន»។
នៅពេលអ្នកសារព័ត៌មានសួរគាត់ថា តើប្រទេសណាដែលរងផលប៉ះពាល់ខ្លាំងជាង ទាក់ទងនឹងការបាត់បង់អាជីវកម្ម ដោយសារច្បាប់ព្រំដែនថ្មីនេះ លោកថាមិនអាចផ្តល់ចម្លើយបានទេ។
ម៉ោងប្រតិបត្តិការប៉ុស្តិ៍ត្រួតពិនិត្យត្រូវបានផ្លាស់ប្ដូរ
ប្រធានប៉ុស្តិ៍ត្រួតពិនិត្យនៃច្រកទ្វារអន្តរជាតិប៉ោយប៉ែត លោក វ៉ាន់ ដារ៉ាន់ បានបញ្ជាក់ថា អាជ្ញាធរថៃបានបិទច្រកទ្វាររបស់ខ្លួនជាឯកតោភាគី ដោយមិនបានជូនដំណឹងដល់កម្ពុជាជាផ្លូវការនោះទេ។
លោកបានប្រាប់អ្នកយកព័ត៌មាននៅប៉ុស្តិ៍ត្រួតពិនិត្យថា៖«ខ្ញុំមិនអាចបញ្ជាក់លម្អិតអំពីបញ្ហានេះបានទេព្រោះវាជាការសម្រេចចិត្តរបស់ភាគីយោធាថៃ»។
យ៉ាងណាមិញ លោកមិនបានឆ្លើយតបនឹងសំណួរទាក់ទងនឹងផលប៉ះពាល់ដែលនឹងកើតមានមកលើប្រជាជនកម្ពុជាក្រោយការផ្លាស់ប្ដូរម៉ោងនោះទេ ប៉ុន្តែលោកថា៖ «ពលរដ្ឋសប្បាយចិត្ត និងគាំទ្រចំណាត់ការរបស់រដ្ឋាភិបាលយើង»។
ជាមួយគ្នានេះ ប៉ុស្តិ៍នគរបាលច្រកទ្វារអន្តរជាតិប៉ោយប៉ែតរបស់កម្ពុជា ក៏បានប្រកាសបើកម៉ោងថ្មីគឺពីម៉ោង៩ព្រឹក ដល់ម៉ោង៤ល្ងាច និងអនុវត្តចាប់ពីថ្ងៃទី០៨ ខែមិថុនា តទៅ។ លើសពីនេះ អ្នកដំណើរកម្ពុជា ដែលចង់ចូលប្រទេសថៃ គឺត្រូវបានអនុញ្ញាតឱ្យតែរយៈពេល៧ថ្ងៃប៉ុណ្ណោះ មិនថាកាន់លិខិតឆ្លងដែន ឬបណ្ណព្រំដែន។
មុនពេលកើតមានភាពតានតឹងនៅព្រំដែន កម្ពុជាស្ថិតក្នុងចំណោមប្រទេសចំនួនប្រាំមួយដែលត្រូវបានបន្ថែមថ្មី ដែលពលរដ្ឋមានសិទ្ធិស្នាក់នៅដោយគ្មានទិដ្ឋាការរហូតដល់ ៦០ថ្ងៃ នេះបើយោងតាមសេចក្តីសម្រេចរបស់គណៈរដ្ឋមន្ត្រីថៃក្នុងការបង្កើនទេសចរណ៍។
ប្រព័ន្ធផ្សព្វផ្សាយក្នុងស្រុកបានរាយការណ៍ថា នៅរសៀលថ្ងៃទី៨ ខែមិថុនា អាជ្ញាធរកម្ពុជាបានបិទច្រកទ្វារអន្តរជាតិអូរស្មាច់ ដើម្បីឆ្លើយតបនឹងការសម្រេចចិត្តឯកតោភាគីរបស់ប្រទេសថៃក្នុងការរឹតបន្តឹងប្រតិបត្តិការ។
ក្នុងនោះ ច្រកទ្វារព្រំដែនអូរស្មាច់ ជាំ និងជប់គគីរ ក្នុងខេត្តឧត្តរមានជ័យ ពេលនេះបើកបានតែបីថ្ងៃក្នុងមួយសប្តាហ៍ប៉ុណ្ណោះ បន្ទាប់ពីមានចំណាត់ការរបស់អាជ្ញាធរថៃ។
បន្ថែមលើនេះ ច្រកទ្វារព្រំដែនអន្តរជាតិចាំយាម ក្នុងខេត្តកោះកុង ក៏បានបិទនៅរសៀលថ្ងៃអាទិត្យដែរ។
ប្រជាជនថៃនឹងប្រឈមខ្លាំងបំផុត
រលកនៃការប្រតិកម្មជាសាធារណៈបានផ្ទុះឡើងបន្ទាប់ពីការបិទជាឯកតោភាគីដោយប្រទេសថៃ ដោយប្រជាជនកម្ពុជាស្នើឱ្យធ្វើពហិកាផលិតផលថៃ។ ទោះជាយ៉ាងនេះក្តី ប្រធានព្រឹទ្ធសភា លោក ហ៊ុន សែន បានជំរុញឱ្យមានការអត់ធ្មត់ ដោយបានក្រើនរំលឹកពលរដ្ឋថា លោក និងលោកនាយករដ្ឋមន្ត្រី ហ៊ុន ម៉ាណែត មិនចង់ឱ្យជម្លោះនេះរីកធំឡើងដល់កម្រិតនៃការស្អប់ខ្ពើមជាតិសាសន៍នោះទេ។
លោកបានមានប្រសាសន៍ថា៖ «យោធាថៃបានបិទច្រកព្រំដែនប៉ោយប៉ែតជាឯកតោភាគីមុនកាលកំណត់។ ដូច្នេះថៃត្រូវតែទទួលខុសត្រូវទាំងស្រុងចំពោះសកម្មភាពនេះ។ សម្រាប់ប្រជាពលរដ្ឋកម្ពុជា វាជារឿងសំខាន់ក្នុងការរក្សាភាពចាស់ទុំ និងថ្លៃថ្នូរជានិច្ច ហើយចៀសវាងការបង្កជាសកម្មភាពណាមួយបន្តទៀត»។
លោកថា ប្រសិនបើផលិតផលថៃអវត្តមានពីទីផ្សារកម្ពុជា វាមិនមែនដោយសារប្រជាជនកម្ពុជាបានជ្រើសរើសរួមធ្វើពហិកាទេ ផ្ទុយទៅវិញវាជាផលវិបាកនៃការបិទព្រំដែន ព្រោះថាបើពលរដ្ឋត្រូវបានរាំងស្ទះ នោះទំនិញក៏ដូចគ្នា។
លោកថ្លែងថា៖ «ប្រសិនបើទំនិញដែលនាំចូលលែងចូលប្រទេសកម្ពុជាហើយនោះ ប្រជាជនថៃគួរតែដោះស្រាយបញ្ហានេះដោយផ្ទាល់ជាមួយរដ្ឋាភិបាលរបស់ពួកគេ ព្រោះអ្នកដែលនឹងរងគ្រោះច្រើនជាងគេគឺប្រជាជនថៃខ្លួនឯង»។
យោងតាមការចុះផ្សាយរបស់ប្រព័ន្ធផ្សព្វផ្សាយថៃ ហាងជាច្រើននៅក្នុងប្រទេសថៃបានបង្ហាញសញ្ញាហាមប្រាមប្រជាជនកម្ពុជា និងព្រមានថា «ពួកគេនឹងមានគ្រោះថ្នាក់ប្រសិនបើពួកគេព្យាយាមចូល»។
លោក ហ៊ុន សែន ក៏បានគូសបញ្ជាក់ដែរថា កម្ពុជាបាននាំចេញទំនិញទៅប្រទេសថៃជាង ១,១ ពាន់លានដុល្លារ ហើយបាននាំចូលទំនិញចំនួន ៥,២ ពាន់លានដុល្លារក្នុងឆ្នាំ ២០២៤ ដែលមានន័យថា ឱនភាពពាណិជ្ជកម្មរបស់កម្ពុជាជាមួយថៃមានចំនួនជាង ៤,១ ពាន់លានដុល្លារ។
ក្នុងរយៈពេលប្រាំខែដើមឆ្នាំនេះ កម្ពុជាបាននាំចេញទំនិញដែលមានតម្លៃជាង ២០០ លានដុល្លារទៅប្រទេសថៃ ខណៈការនាំចូលពីប្រទេសថៃមានប្រមាណ ១,៥ ពាន់លានដុល្លារ។
ជម្រើសដែលល្អបំផុតគឺដោះស្រាយនៅតុលាការយុត្តិធម៌អន្តរជាតិ
អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ លោក ជុំ សុន្ទរី បានប្រាប់សារព័ត៌មានខេមបូចាថា លោកឧបនាយករដ្ឋមន្ត្រី ប្រាក់ សុខុន បានផ្ញើលិខិតមួយច្បាប់ជូនសមភាគីថៃ កាលពីថ្ងៃទី៦ ខែមិថុនា ឆ្នាំ២០២៥ ដោយពន្យល់ថា ជម្លោះព្រំដែនបានបន្តអូសបន្លាយជាច្រើនទស្សវត្សមកហើយ ទោះបីជាមានយន្តការទ្វេភាគី និងកិច្ចខិតខំប្រឹងប្រែងដោយសុច្ឆន្ទៈក្នុងការដោះស្រាយក៏ដោយ។
លោក សុន្ទរី បាននិយាយដោយដកស្រង់សម្ដីក្នុងលិខិតថា៖ «បញ្ហាដែលមិនអាចដោះស្រាយបានទាំងនេះនៅតែបន្តជាប្រភពនៃការយល់ច្រឡំ និងភាពតានតឹងដែលកើតឡើងដដែលៗ ហើយនាំឱ្យមានឧប្បត្តិហេតុអកុសលជាច្រើន»។
ថ្មីៗបំផុតគឺការប្រឈមមុខដាក់គ្នាកាលពីថ្ងៃទី២៨ ឧសភា នៅភូមិតេជោមរកត ឃុំមរកត ស្រុកជាំក្សាន្ត ខេត្តព្រះវិហារ ដែលកងកម្លាំងយោធាថៃបានបើកការបាញ់ប្រហារ មកលើទីតាំងកងទ័ពកម្ពុជា បណ្តាលឱ្យទាហានខ្មែរម្នាក់ស្លាប់។
លិខិតនោះបានសរសេរថា៖ «ឧប្បត្តិហេតុនេះបានគូសបញ្ជាក់បន្ថែមអំពីភាពបន្ទាន់នៃការស្វែងរកដំណោះស្រាយប្រកបដោយនិរន្តរភាព និងសន្តិភាព។ ដោយមើលឃើញពីភាពស្មុគស្មាញ លក្ខណៈប្រវត្តិសាស្ត្រ និងភាពរសើបនៃជម្លោះទាំងនេះ វាកាន់តែបង្ហាញឱ្យឃើញច្បាស់ថា ការសន្ទនាទ្វេភាគីតែម្ខាងអាចនឹងមិនគ្រប់គ្រាន់ដើម្បីនាំមកនូវដំណោះស្រាយដ៏ទូលំទូលាយ និងយូរអង្វែងឡើយ»។
ក្នុងបរិបទនេះ រដ្ឋាភិបាលកម្ពុជា ជឿជាក់ថា ផ្លូវឆ្ពោះទៅមុខដ៏សមស្រប និងសន្តិភាពបំផុត គឺការដាក់ពាក្យបណ្ដឹងពាក់ព័ន្ធនឹងតំបន់មុំបី ប្រាសាទតាមាន់ធំ ប្រាសាទតាមាន់តូច និងតំបន់ប្រាសាទតាក្របី ទៅតុលាការយុត្តិធម៌អន្តរជាតិ (ICJ) ដើម្បីកាត់ក្តី។
សេចក្តីសម្រេចធ្វើឡើងដោយICJ ដែលជាស្ថាប័នធ្វើការផ្អែកលើច្បាប់អន្តរជាតិ នឹងផ្តល់នូវដំណោះស្រាយប្រកបដោយយុត្តិធម៌ មិនលំអៀង និងយូរអង្វែង។ ក្នុងនោះដែរ វានឹងផ្តល់ភាពច្បាស់លាស់អំពីព្រំដែនទឹកដីរៀងៗខ្លួន ហើយសំខាន់ជាងនេះទៅទៀត វានឹងជួយលើកកម្ពស់បរិយាកាសនៃសន្តិភាព ស្ថេរភាព និងកិច្ចសហប្រតិបត្តិការរវាងប្រទេសទាំងពីរ។
លិខិតនោះក៏បានចែងដែរថា៖ «សកម្មភាពបែបនេះក៏នឹងបញ្ជាក់ពីការប្តេជ្ញាចិត្តទៅវិញទៅមករបស់យើងក្នុងការលើកកំពស់នីតិរដ្ឋ រក្សាភាពសុខដុមរមនាក្នុងតំបន់ និងការជំរុញវិបុលភាពរួមរបស់ប្រជាជនយើងនៅក្នុងសហគមន៍អាស៊ាន»។
ចំពោះការវិវត្តចុងក្រោយនេះ ក្រសួងការពារជាតិបាននិយាយថា កងកម្លាំងយោធាកម្ពុជា និងថៃបានជួបប្រជុំគ្នាកាលពីថ្ងៃទី ៨ ខែមិថុនា ដោយសម្រេចបន្ធូរបន្ថយភាពតានតឹង ដោយត្រឡប់ទៅទីតាំងឈរជើងរៀងខ្លួនវិញ៕
ប្រែសម្រួលពីអត្ថបទភាសាអង់គ្លេស៖ New Border Rules Disrupting Lives, Livelihoods as Cambodia-Thailand Tensions Escalate
