ខេត្តបាត់ដំបង៖ បើទោះបីជានៅក្នុងក្រុងបាត់ដំបងមានប្រព័ន្ធទឹកស្អាតប្រើប្រាស់សម្បូរបែបយ៉ាងណាក៏ដោយ ប៉ុន្តែប្រជាពលរដ្ឋជាច្រើនគ្រួសារដែលរស់នៅតាមបណ្ដោយស្ទឹងសង្កែក្នុងខេត្តបាត់ដំបង ពិសេសនៅភូមិបាក់រទេះក្នុងស្រុកឯកភ្នំ នៅតែបន្តប្រើប្រាស់ទឹកស្ទឹងតាមទម្លាប់ដោយកូរសាច់ជូដើម្បីឱ្យទឹកថ្លាយកមកប្រើប្រាស់។
ប្រជាពលរដ្ឋជារស់នៅក្នុងស្រុកឯកភ្នំ ចាប់ពីភូមិព្រែកហ្លួង រហូតភូមិបាក់រទេះ នៅមិនទាន់មានប្រព័ន្ធទឹកស្អាតប្រើប្រាស់នៅឡើយទេ ដោយពួកគេប្រើប្រាស់ទឹកស្ទឹងសង្កែ ដែលមានសភាពល្អក់ ឡើងស្លែពណ៌ខៀវ សំបូរទៅដោយសំរាម និងកាកសំណល់ផ្សេងៗបង្ហូរចូលទៅក្នុងស្ទឹង។
ជិះតាមបណ្ដោយស្ទឹងសង្កែទៅកាន់ភូមិបាក់រទេះ ដែលជាភូមិចុងក្រោយគេ នៃឃុំព្រែកហ្លួង ក្នុងស្រុកឯកភ្នំ គេឃើញប្រជាពលរដ្ឋនៃភូមិផ្សេងៗទៀត មានរបៀបនៃការប្រើប្រាស់ទឹក ស្រដៀងគ្នាត្រង់ថា ប្រភពទឹកសំខាន់ដែលប្រើប្រាស់ប្រចាំថ្ងៃ គឺទឹកស្ទឹង។ ពួកគេប្រើទឹកស្ទឹងបានច្រើនតម្រូវការ ដូចជា ស្រោចស្រពដំណាំ ធ្វើចម្ការ ធ្វើស្រែ ចិញ្ចឹមសត្វ បោកគក់ មុជ ដាំស្ល រហូតដល់យកទឹកនោះមកហូបទៀតផង។
កំពុងអង្គុយបុកគ្រឿងនៅលើគ្រែឈើបួនជ្រុង អ្នកស្រី ឃឿន សារ៉ូ អាយុ៥២ឆ្នាំ ជាពលរដ្ឋរស់នៅភូមិបាក់រទេះ លើកឡើងថា ទឹកស្ទឹងដែលធ្លាប់តែស្រស់ស្អាតប្រែទៅជាពណ៌ខៀវល្អក់ កង្វក់ មានជាតិពុល ពោរពេញដោយសំរាម ជាហេតុធ្វើឱ្យអ្នកស្រីបារម្ភអំពីបញ្ហាសុខភាព ដោយសារតែប្រើប្រាស់ទឹកស្ទឹងកើតរមាស់ជាដើម។
អ្នកស្រី សារ៉ូ និយាយថា៖ «ទឹកវាក្រហូរ ប្រើទៅរមាស់ ជាតិគីមីវាច្រើនញញើតមិនហ៊ានប្រើ កូនចៅតូចៗអត់ហ៊ានឱ្យវាចុះស្ទឹងទេ ខ្លាចរមាស់ហ្នឹងហើយ»។
ក្រឡេកទៅមើលផ្ទះរបស់អ្នកស្រី គេឃើញមានពាង និងអាងស្តុកទឹកដោយបូមទឹកពីស្ទឹងកូរសាច់ជូ។ ទឹកដែលកូរសាច់ជូរួច ឬក៏ទុកឱ្យរងថ្លាហើយ ទើបអ្នកស្រីយកទឹកនោះមកចម្រោះទឹក ដើម្បីទុកពិសារ ដោយមិនឆ្លងកាត់ការដាំឱ្យពុះនោះទេ។
អ្នកស្រី សារ៉ូ និយាយថា៖ «ចង់បានហ្នឹងហើយទឹកស្អាត ឱ្យតែគេធ្វើឱ្យ[ភ្ជាប់ប្រព័ន្ធទឹកស្អាត] តែសព្វថ្ងៃយកទឹកស្ទឹង តែយើងបូមទៅទុកឱ្យថ្លារួចយកមកចម្រុះអត់បានដាំផង ផឹកទៅវា សុំាហើយ»។
ដោយសារតែបញ្ហាទឹកប្រើប្រាស់គឺជារឿងចាំបាច់ ដែលមិនអាចខ្វះបាន អ្នកស្រី សារ៉ូ ពិតជា ចង់ឃើញរដ្ឋាភិបាលភ្ជាប់បណ្ដាញទឹកស្អាតដល់ភូមិឃុំអ្នកស្រីជាខ្លាំង ខណៈសព្វថ្ងៃអ្នកស្រី ក៏ត្រូវចំណាយប្រាក់ទិញទឹកប្រើផងដែរ។
អ្នកស្រីបន្ថែមថា៖ «ទិញទឹកសុទ្ធទឹកអីរហូត ចុះលុយដែរ អាធុងខៀវនោះ២ពាន់រៀល»។
ស្រ្តីម្នាក់សុំមិនបញ្ចេញឈ្មោះ មានមុខរបរចម្លងដ វ័យ៥០ឆ្នាំប្លាយ នៅឃុំព្រែកហ្លួង បានលើកឡើងអំពីការប្រើប្រាស់ទឹកស្ទឹង ត្បិតគ្មានទឹកស្អាតប្រើប្រាស់ ហើយតាំងពីអ្នកស្រីធំដឹងក្ដីមក ប្រភពទឹកដែលឃើញមុនគេ គឺទឹកស្ទឹងសង្កែនេះឯង ហើយមកទល់ពេលនេះ អ្នកស្រីមិនទាន់ឃើញមានប្រព័ន្ធទឹកស្អាតតភ្ជាប់មកកាន់តំបន់អ្នកស្រីរស់នៅទេ។
ស្រ្តីចម្លងដសុំមិនបញ្ចេញឈ្មោះ និយាយថា៖ «ថីមិនចង់បានទឹកស្អាត រាល់ថ្ងៃប្រើធុងចម្រោះទន្សាយធុងអីដែរ បូមដាក់ពាងហើយកូរសាច់ជូឱ្យថ្លា រាល់ថ្ងៃមិនទាន់មានទឹករដ្ឋមកទេ»។
ស្រ្តីរូបនេះលើកឡើងទៀតថា ទោះបីជាសភាពទឹកស្ទឹងប្រែប្រួល មានសំរាម និងការបង្ហូរកាកសំណល់ផ្សេងៗចូលក្នុងស្ទឹងក៏ដោយ អ្នកស្រីអះអាងថា ការប្រើប្រាស់ទឹកស្ទឹងមិនឃើញមានជាបញ្ហាអ្វីដល់សុខភាពឡើយ ត្បិតអ្នកស្រីមានភាពសុំានឹងទឹកស្ទឹងនេះទៅហើយ។
អ្នកស្រីនិយាយថា៖ «និយាយទៅវាសុំាហើយ អ្នកស្រុកនេះសុំាហើយ រអ៊ូចេះតែរអ៊ូតែមិនដឹងធ្វើម៉េច បើអ្នកធ្លាប់មុជទឹកម៉ាស៊ីន ហើយមកមុជទឹកនេះដឹងតែរមាស់ហើយ»។
បើតាមការសាកសួរកុមារ និងចាស់ច្រើននាក់ បានឱ្យដឹងថា ពួកគេប្រើប្រាស់ទឹកស្ទឹងនារដូវប្រាំង និងប្រើប្រាស់ទឹកភ្លៀងនារដូវវស្សា។ ប៉ុន្តែបញ្ហានៅត្រង់ថា ទឹកស្ទឹងនារដូវប្រាំង ប្រែជាកង្វក់ ដែលតម្រូវឱ្យពួកគេ ទិញទឹកសុទ្ធយកមកបរិភាគ។
ពលរដ្ឋមួយរូបទៀត គឺអ្នកស្រី ហឿន ហី អាយុ ៧២ឆ្នាំ រស់នៅភូមិបាក់រទេះ ឃុំព្រែកហ្លួង ស្រុកឯកភ្នំ ខេត្តបាត់ដំបង បានឱ្យដឹងថា ពលរដ្ឋនៅតំបន់នេះពុំទាន់មានទឹករដ្ឋប្រើប្រាស់នៅឡើយទេដោយត្រូវទិញទឹកស្អាតពីនាយទុនសម្រាប់ការបរិភោគប្រចាំថ្ងៃដែលក្នុងមួយធុងស្មើនឹង២០០០រៀល ដែលជាទូទៅក្នុងមួយខែអ្នកស្រីប្រើប្រាស់អស់២ទៅ៣ធុងចំណោមសមាជិក២នាក់ក្នុងគ្រួសារ។
ចំពោះការប្ដូរមកទិញទឹកពីនាយទុនសម្រាប់បរិភោគប្រចាំថ្ងៃ អ្នកស្រី ហី បន្ថែមថា ដោយសារតែស្ថានភាពទឹកស្ទឹងដែលអ្នកស្រីធ្លាប់តែយកមកបរិភោគ ងូត និងប្រើប្រាស់ប្រចាំថ្ងៃបានប្រែជាកខ្វក់ និងដុះស្លែ ព្រោះតែការបោះនិងបង្ហូរកាកសំណល់ផ្សេងៗចូលក្នុងស្ទឹងស្របពេលដែលទំនប់ខាងលើកំពុងស្ថិតក្នុងការសាងសង់។
អ្នកស្រី ហី លើកឡើងថា៖ «ពីមុនគឺទឹកវាហូររហូត ដល់ឥឡូវទឹកគេបិទទៅ គេមិនសូវឱ្យហូប។ ពេលគេបើកទៅ[សំរាមវាអណ្ដែតមក] ដល់ពេលគេបិទទៅទឹកក៏ដុះស្លែពេញស្ទឹង»។
យ៉ាងណាមិញ អ្នកស្រីថាប្រសិនជាទឹកស្អាតដែលនាយទុនយកមកលក់នោះលែងមានបន្តទៀត ក៏អ្នកស្រីមិនយកទឹកពីស្ទឹងទៅដាំដើម្បីបរិភោគនោះដែរ។ ដោយអ្នកស្រីបន្តថា៖ «មានអីនឹងហ៊ានយកដាំ បើឃើញនឹងភ្នែក មកឡើងរីកស្គុយ អាខោទឹកនោមមនុស្សចាស់ក្មេងអីក៏វាមក ទាំងការ៉ុងៗ»។
អ្នកស្រី ហី បន្ថែមថា ដោយសារតែគាត់ធ្លាប់កើតមានរមាស់បន្ទាប់ពីចុះងូតទឹកស្ទឹងរួច ទើបគាត់លែងហ៊ានចុះងូតទឹកផ្ទាល់បន្តទៀត ដោយគាត់បានដាក់ទុយោដើម្បីបូមទឹកពីស្ទឹងដាក់ក្នុងពាង និងកូរសាច់ជូរដើម្បីអាចប្រើប្រាស់បាន។
អ្នកស្រីបន្តថា៖ «បើនិយាយឱ្យចំទៅដល់ពេលវាកខ្វក់អ៊ីចឹង! សូម្បីតែអ្នកមុជក៏អត់ចង់ហ៊ានចុះមុជក្នុងស្ទឹងដែរ។ ពេលចុះមុជទៅ ដល់ពេលឡើងមកវិញវារមាស់[..] ចង់ងូតចង់អីបូមដាក់ពាង រងឱ្យថ្លាទៅគេងូតទឹកពាង»។
ជាមួយគ្នា អ្នកស្រី ហី សង្ឃឹមថា អាជ្ញាធរពាក់ព័ន្ធនឹងជួយពិនិត្យដើម្បីតភ្ជាប់បណ្ដាញទឹកស្អាតប្រើប្រាស់ដល់ប្រជាពលរដ្ឋរស់នៅតំបន់នេះផងដែរ។
យោងតាមរដ្ឋបាលខេត្តបាត់ដំបង ស្ទឹងសង្កែ មានចម្ងាយប្រមាណ២៥០គីឡូម៉ែត្រ ហូរកាត់ស្រុកចំនួន៦ និងឃុំចំនួន២៧ នៃខេត្តបាត់ដំបង មុននឹងទឹកស្ទឹងហូរចាក់ទៅបឹងទន្លេសាប។ បើតាមប្រភពដដែល ជម្រៅមធ្យមនៃស្ទឹងសង្កែដែលមន្ទីរធនធានទឹកខេត្តបាត់ដំបងធ្លាប់បានសិក្សាកាលពីឆ្នាំ២០១៣ ជម្រៅស្ទឹងសង្កែនារដូវប្រាំង ២,៣៥ម៉ែត្រ និងរដូវវស្សា៦,៧៩ម៉ែត្រ។
មេឃុំព្រែកហ្លួង អ្នកស្រី សឿង វណ្ណា បានប្រាប់ខេមបូចា ថា អ្នកស្រីពុំអាចបញ្ជាក់ពីមូលហេតុដែលរដ្ឋមិនអាចធ្វើការផ្គត់ផ្គង់សេវាទឹកស្អាតជូនពលរដ្ឋនៅតំបន់នេះនោះទេ។ អ្នកស្រីបន្ថែមថា រូបគាត់ផ្ទាល់គឺសុទ្ធសឹងតែប្រើប្រាស់ទឹកស្អាតដែលផ្គត់ផ្គង់ដោយឯកជន។
អ្នកស្រីមានប្រសាសន៍ថា៖«ខ្ញុំអត់ច្បាស់ទេអាហ្នឹង! តែខ្ញុំគ្រាន់តែដឹងថា រាល់ថ្ងៃខ្ញុំប្រើ ភូមិខ្ញុំប្រើរបស់ឯកជន។ តែរដ្ឋខ្ញុំអត់ដឹងថាគេតត្រឹមណាអីត្រឹមណា អត់ដឹងទេ! រាល់ថ្ងៃនៅប្រើរបស់ឯកជន ក្រុមហ៊ុនឯកជនទឹកស្អាតឯកភ្នំ»។
ចំពោះការផ្គត់ផ្គង់ប្រព័ន្ធទឹកស្អាតរបស់ឯកជនទៅកាន់អ្នកភូមិបាក់រទេះវិញ អ្នកស្រី វណ្ណា ឱ្យដឹងថា កន្លងមកខាងឃុំបានដាក់សំណើរទៅក្រុមហ៊ុនទឹកស្អាតឯកភ្នំដើម្បីធ្វើការតភ្ជាប់ដែរ តែថាខាងក្រុមហ៊ុនកំពុងតែរៀបចំតបណ្ដាញទឹកស្អាតជាបណ្ដើរៗដែរហើយ។
អ្នកស្រីបន្ថែមថា៖ «ខ្ញុំបានធ្វើសំណើរទៅដែរ សំខាន់ក្រុមហ៊ុនគេអត់ទាន់តបណ្ដាញទៅដល់ដោយសារគេមានជំហានរបស់គេ [ឆ្នាំនេះភូមិនេះ ឆ្នាំក្រោយភូមិនោះ]។ សំខាន់ភូមិផ្សេងៗទៀតតម្រូវការប៉ុន្មានៗក៏អត់ទាន់ដឹងដែរ។ គ្រាន់តែថារាល់ថ្ងៃនេះតែត្រឹមភូមិរហាលសួងសិនទេ គេអត់ទាន់ចុះទៅដល់បាក់រទេះនោះទេ»។
អភិបាលស្រុកឯកភ្នំ លោក ម៉ិល សុផល ប្រាប់ឱ្យខេមបូចាដឹងថា ដោយសារតែតំបន់បាក់រទេះមានរយៈចម្ងាយឆ្ងាយធ្វើឱ្យរដ្ឋពិបាកនឹងផ្គត់ផ្គង់សេវាទឹកស្អាតបាន ដូច្នេះរដ្ឋបានផ្ដល់អាជ្ញាបណ្ណដល់សេវាកម្មឯកជនជាអ្នកផ្គត់ផ្គង់។
លោកមានប្រសាសន៍ថា៖ «ឆ្ងាយណាស់! រដ្ឋបានផ្ដល់ទីតាំងហ្នឹង ឱ្យសេវាកម្មឯកជនធ្វើហើយ។ [ដូច្នេះខាងទឹករដ្ឋមិនអាចតភ្ជាប់ដល់ទីនោះទេមែនទេ?] មិនដល់ទេឆ្ងាយណាស់ក្មួយ នៅជិតមាត់ទន្លេ ជិតតំបន់ផ្លូវទឹកឯណោះ»។
ចំពោះផែនការនៃការតភ្ជាប់ប្រព័ន្ធទុយោទឹក លោក សុផល បន្ថែមថា គឺខាងសេវាករឯកជនជាអ្នករ៉ាប់រងនិងបានចាប់ផ្ដើមធ្វើបណ្ដើរៗហើយ ប៉ុន្តែលោកពុំដឹងពីកាលបរិច្ឆេទរួចរាល់ពេលណានោះទេ។
លោក សុផល ថ្លែងថា៖ «ខ្ញុំអត់ដឹងថាផែនការរបស់សេវាករហ្នឹង! គាត់ធ្វើទៅដល់ហ្នឹងឆ្នាំណានោះទេ ព្រោះគេមានផែនការរបស់គេ តភ្ជាប់ទៅ! ព្រោះដែនសមត្ថកិច្ចរបស់សេវាករឯកជន»។
លោក ជិន រដ្ឋា អាយុ៥២ឆ្នាំ ជាម្ចាស់អាជីវកម្មទឹកស្អាតឯកភ្នំ ឱ្យដឹងថា ក្រុមហ៊ុនបានកំពុងរៀបចំនូវប្រព័ន្ធទឹកស្អាត និងដាក់តទុយោជាបណ្ដើរៗហើយ ដែលអាចនឹងដល់ភូមិបាក់រទេះនៅដើមឆ្នាំក្រោយនេះ។ លោកបន្តថា ភាពយឺតយ៉ាវនៃគម្រោងតភ្ជាប់នេះ ដោយសារ តែពលរដ្ឋនៅតំបន់នោះភាគច្រើនមិនសូវមានអ្នកចង់តភ្ជាប់។ មួយវិញទៀត លោកបន្ថែមថា ដោយសារពលរដ្ឋថាមិនមានថវិកាគ្រប់គ្រាន់ ក៏ដូចជាអ្នកខ្លះថាមិនទាន់មានការចាំបាច់ ដោយសារមានប្រភពទឹកស្ទឹងប្រើប្រាស់ជាយូរមកហើយ។
លោកនិយាយថា៖ «បាទ! អត់អីទេ គ្រាន់តែបញ្ចូនដំណឹងថាបានចុះហើយ ក្រុមហ៊ុនមានគម្រោងទៅហើយ។ ដោយសារយើងដើរធ្វើតេស្តទៅវាមួយគីឡូពីរគីឡូអី មានអ្នកតទឹកតែ៣-៤នាក់។ អ៊ីចឹង យើងទាមទារអាកន្លែងណាត្រូវដាក់មុន ដាក់ក្រោយ»។ លោកបន្ថែមថា៖ «សម្បូរអ្នកចម្ការច្រើនមួយជួរហ្នឹងនោះ គ្មានអីទេ! ហើយគាត់មានប្រភពទឹក គាត់បូមដាក់ចម្ការ ដាក់ពាងកូរសាច់ជូរ អាហ្នឹងជាប្រពៃណីជាង២០-៣០ឆ្នាំហើយ»។
លោក រដ្ឋា ឱ្យដឹងដែរថា អាជីវកម្មរបស់លោកបានបើកដំណើរការអស់រយៈពេលជាង១០ឆ្នាំមកហើយ ដោយក្នុងនោះលោកក៏ទទួលបាននូវអាជ្ញាបណ្ណដែលចេញពីក្រសួង និងបានចុះកិច្ចសន្យាធ្វើអាជីវកម្មសម្រាប់រយៈពេល២០ឆ្នាំផងដែរ។ រីឯការផ្គត់ផ្គង់ទឹកស្អាតទៅដល់អ្នកភូមិបាក់រទេះនោះ លោកថាបានដឹកទៅដាក់អស់រយៈពេល ៦ទៅ៧ឆ្នាំមកហើយ។
នៅផ្នែកខាងលើនៃស្ទឹងសង្កែ ពិសេសត្រង់ភូមិតាមិម គេឃើញមានបែចិញ្ចឹមត្រីជាច្រើនទីតាំង ដែលអ្នកស្រុកចិញ្ចឹមនៅក្នុងស្ទឹង ទៅតាមទំហំនិងខ្នាតដែលពួកគេសាងសង់។
លោក ហៀង អាយុ៤០ឆ្នាំ ជាពលរដ្ឋម្នាក់រស់នៅភូមិតាមឹម បានលើកឡើងថា ទឹកស្ទឹងសង្កែដែលលោកធ្លាប់ប្រើប្រាស់ពីមុនមានសភាពស្អាត ចំណែកទឹកស្ទឹងបច្ចុប្បន្ននេះ មានភាពកខ្វក់ ដោយមានបែចិញ្ចឹមត្រី និងមានកាកសំណល់សំរាមផងដែរ។ លោកបានលើកជាក្ដីបារម្ភថា ទឹកស្ទឹងប្រែជាបែបនេះ អាចនឹងធ្វើឱ្យប៉ះពាល់ដល់សុខភាពរបស់លោក និងគ្រួសារផងដែរ។
លោក ហៀង បញ្ជាក់ថា៖ «ទឹកនេះខ្ញុំប្រើប្រាស់ប្រចាំថ្ងៃ ដាំបាយដាំអីផង និងស្រោចបន្លែផង ទឹកពីមុនស្អាត ឥឡូវអត់សូវស្អាត»។ លោកបន្តថា៖ «ទោះបីមិនពេញចិត្តក៏ដោយ[បញ្ហាចិញ្ចឹមត្រីធ្វើឱ្យទឹកល្អក់]យើងម្នាក់ឯងក៏ធ្វើអីមិនកើតដែរ»។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យ៉ង់ គិមអេង យល់ឃើញថា ប្រជាពលរដ្ឋនឹងប្រឈមការប៉ះពាល់សុខភាពដូចជាកើតជំងឺរមាស់ នៅពេលដែលប្រភពទឹករបស់ពួកគេត្រូវបានបំពុលដោយសារការធ្វើអាជីវកម្ម និងកត្តាផ្សេងៗទៀត។
លោក គិមអេង មានប្រសាសន៍ថា៖ «ប្រភពទឹកដែលប្រជាពលរដ្ឋប្រើប្រាស់មិនគួរឱ្យមានការធ្វើអាជីវកម្មណាមួយដែលប៉ះពាល់ទឹកដែលប្រជាពលរដ្ឋប្រើប្រាស់នោះទេ។ [..] ផលប៉ះពាល់យើងឃើញថា កាលណាទឹកមិនស្អាត ទឹកវាកខ្វក់នោះវាអាចកើតជំងឺដូចជារមាស់ កើតអីផ្សេងៗទៀតដែលអាចប៉ះពាល់ដល់សុខភាពពួកគាត់»។
អាស្រ័យហេតុនេះ លោកថា អាជ្ញាធរគួរតែមានជាវិធានការដោះស្រាយដើម្បីអាចជួយសម្រួលដល់ការរស់នៅរបស់ពលរដ្ឋដែលរស់នៅតាមបណ្ដោយស្ទឹងទាំងនោះ។ ដោយលោកបន្តថា ពលរដ្ឋដែលរស់នៅទីក្រុងនិងជនបទ គឺមានឱកាសស្មើគ្នាក្នុងការទទួលបានសេវាទឹកស្អាតប្រើប្រាស់ ក៏ដូចជាសេវាផ្សេងៗផងដែរ។
លោក គិមអេង បន្ថែមថា៖ «ជាទូទៅ ការទទួលបានទឹកស្អាតគួរតែមានឱកាសស្មើគ្នា។ ពីព្រោះថាប្រជាពលរដ្ឋនៅកន្លែងណាក៏ដូចកន្លែងណាដែរ គួរតែទទួលបាននូវទឹកស្អាតប្រើប្រាស់ និងសេវាផ្សេងៗដូចៗគ្នា។ អ៊ីចឹងរដ្ឋគួរតែគិតគូរដោះស្រាយ យើងមិនគួរមានត្រឹមតែនៅក្នុងទីក្រុងទេ! នៅតាមទីជនបទក៏ដោយ ដែលគ្នាជួបបញ្ហាក៏គួរតែដោះស្រាយដែរ»៕
