រដ្ឋាបាលរាជធានីភ្នំពេញបានបង្កើតគណៈកម្មការពិសេសមួយដើម្បីបង្ក្រាបបទល្មើសឆបោកតាមអនឡាញ បន្ទាប់ពីមានបទបញ្ជារបស់លោកនាយករដ្ឋមន្ត្រី ហ៊ុន ម៉ាណែត។
កាលពីថ្ងៃទី២ ខែកក្កដា ឆ្នាំ២០២៥ រដ្ឋបាលរាជធានីភ្នំពេញបានចេញសេចក្ដីសម្រេចមួយស្ដីពីការបង្កើតគណៈកម្មការចំពោះកិច្ចដើម្បីប្រឆាំងនឹងការឆបោកតាមប្រព័ន្ធបច្ចេកវិទ្យា ក្នុងនោះមានលោកអភិបាលរាធានីភ្នំពេញ ឃួង ស្រេង ជាប្រធាន។ គណៈកម្មការនេះមានសមាសភាពអនុប្រធានប្រចាំការមួយរូប អនុប្រធាន និងសមាជិកជាច្រើនរូបផ្សេងទៀត។
កាលពីខែមេសា លោកនាយករដ្ឋមន្ត្រី ហ៊ុន ម៉ាណែត បានណែនាំដល់ស្ថាប័នអនុវត្តច្បាប់ឲ្យពង្រឹងកិច្ចខិតខំប្រឹងប្រែងប្រឆាំងនឹងបទល្មើសឆបោកតាមអនឡាញ។ លោកបានសង្កត់ធ្ងន់ថា គណៈកម្មការថ្មីសម្រាប់ប្រឆាំងបទល្មើសអនឡាញ គឺជួយបំពេញបន្ថែម មិនមែនជំនួស យន្តការដែលមានស្រាប់នោះទេ គឺធ្វើឡើងតាមរយៈការអនុវត្តកិច្ចសហការគ្នាជាមួយស្ថាប័នពាក់ព័ន្ធ។
គណៈកម្មការដែលបង្កើតនេះនឹងអនុវត្តការងារប្រឆាំងបទល្មើសឆបោកតាមបច្ចេកវិទ្យាតែក្នុងដែនសមត្ថកិច្ចរដ្ឋបាលរាជធានីភ្នំពេញតែប៉ុណ្ណោះ។ ក្រុមការងារប្រតិបត្តិការបង្រ្កាមការឆបោកតាមប្រព័ន្ធបច្ចេកវិទ្យា មានភារកិច្ចប្រើប្រាស់កម្លាំងសរុបនៃគណៈបញ្ជាការឯកភាពរដ្ឋបាលខណ្ឌ ដើម្បីអនុវត្តការបង្រ្កាបការឆបោកតាមប្រព័ន្ធបច្ចេកវិទ្យាឲ្យអស់ពីក្នុងមូលដ្ឋានរបស់ខ្លួន។
អ្នកនាំពាក្យរដ្ឋបាលរាជធានីភ្នំពេញ អ្នកស្រី ដោរ សម្ផស្ស មានប្រសាសន៍ថា គណៈកម្មការនេះនឹងធ្វើការប្រឆាំងនឹងបទល្មើសតាមប្រព័ន្ធបច្ចេកវិទ្យា ហើយគ្របដណ្ដប់ក្នុងរដ្ឋបាលរាជធានីភ្នំពេញ។ អ្នកស្រីមិនបានបញ្ជាក់ទេថាគណៈកម្មការនឹងចាប់ដំណើរការពេលណា និងដំណើរការប្រឆាំងនឹងបទល្មើសឆបោកបែបណានោះដែរ ដោយអ្នកស្រីថាកំពុងជាប់រវល់ភារកិច្ចនៅប្រទេសវៀតណាម។
អភិបាលរាជធានីភ្នំពេញ លោក ឃួង ស្រេង បដិសេធធ្វើអត្ថាធិប្បាយ ដោយលោកបញ្ជាក់ថាកំពុងជាប់រវល់ប្រជុំ។
អ្នកនាំពាក្យក្រសួងមហាផ្ទៃលោក ទូច សុខៈ ប្រាប់ សារព័ត៌មានខេមបូចា ថា គណៈកម្មការមានភារកិច្ចបោសសម្អាតបទល្មើសឆបោកតាមអនឡាញ និងបានអះអាងថា កន្លងមក«មានជាច្រើនករណីត្រូវបានបង្ក្រាប»។ យ៉ាងណាក៏ដោយ លោកថា ដើម្បីបង្កើនការបង្ក្រាប តំបន់ដែលអាចមានការប្រមូលផ្តុំនៃបទល្មើសបែបនេះ គួរបង្កើតគណៈកម្មការមួយ ដើម្បីបន្តគ្រប់គ្រង និងទប់ស្កាត់បទល្មើស។
លោកឲ្យដឹងទៀតថា ក្រសួងក៏បានជំរុញឲ្យរដ្ឋបាលខេត្តនានាដែលកន្លងមកបានបង្ក្រាបបទល្មើសហើយបានបណ្ដេញអ្នកពាក់ព័ន្ធចេញពីប្រទេស និងបានកសាងសំណុំរឿងមួយចំនួនទៅតុលាការ ឲ្យបង្កើតគណៈកម្មការមួយដូចនឹងរដ្ឋបាលរាជធានីភ្នំពេញដែរ។
លោកមានប្រសាសន៍ទៀតថា៖ «ភ្នំពេញនឹងចាប់ផ្ដើមមុនគេ ហើយខេត្តផ្សេងៗទៀតនឹងធ្វើការងារនេះជាបន្តបន្ទាប់ដោយមិនមានការដកថយទេ។ ហើយបើទោះបីជាមិនទាន់មានគណៈកម្មការនេះ អភិបាលខេត្ត និងគណៈអភិបាលខេត្តនឹងបន្តទប់ស្កាត់ និងបញ្ឈប់បទល្មើសទាំងនេះ»។
ជាមួយគ្នានេះដែរ លោកបន្តថា រដ្ឋាភិបាលស្វាគមន៍រាល់កិច្ចសហការពីប្រទេសដទៃដើម្បីប្រឆាំងនឹងបទល្មើសមួយនេះ ដោយថា «វាជាបញ្ហារួម» នៅក្នុងតំបន់។ លោកលើកឡើងថាសហរដ្ឋអាមេរិកបានផ្ដល់ការបណ្ដុះបណ្ដាលក្នុងការងារប្រឆាំងនឹងការជួញដូរមនុស្ស ជាពិសេសទាក់ទងនឹងបញ្ហាស្មុគស្មាញរបស់បទល្មើសអនឡាញនេះដែរ។ លោកបន្ថែមថាកម្ពុជាកំពុងសហសការជាមួយប្រទេសជាច្រើនទៀតក្នុងការចែករំលែកព័ត៌មានគ្នា ជាពិសេសជាមួយប្រទេសចិន។
លោកឲ្យដឹងទៀតថា ចំនួនអ្នកពាក់ព័ន្ធក្នុងបទល្មើសបច្ចេកវិទ្យានេះគិតតាំងពីពេលអតីតនាយករដ្ឋមន្ត្រីលោក ហ៊ុន សែន នៅដឹកនាំរដ្ឋាភិបាល មកដល់ពេលនេះ កម្ពុជារកឃើញអ្នកពាក់ព័ន្ធនឹងបទល្មើសប្រហែល២ម៉ឺននាក់ ហើយក្នុងនោះមនុស្សប្រហែល២០០នាក់ មាន១១សញ្ជាតិ ត្រូវបានកសាងសំណុំរឿងបញ្ជូនទៅតុលាការ។
អាជ្ញាធរបានបង្ក្រាបមជ្ឈមណ្ឌលឆបោកតាមអនឡាញមួយនៅរាជធានីភ្នំពេញកាលពីថ្ងៃទី៣១ ខែមីនា ឆ្នាំ២០២៥ ដោយបានឃុំខ្លួនជនបរទេសចំនួន១៨៦នាក់ ដោយជាប់ពាក់ព័ន្ធនឹងការចោទប្រកាន់ថាបានប្រតិបត្តិការឆបោកតាមប្រព័ន្ធអនឡាញ។
កាលពីថ្ងៃទី៣០ ខែមិថុនា គណៈប្រតិភូស្ថានទូតអាមេរិកប្រចាំកម្ពុជាបានជួបជាមួយអ្នកស្រី ជួ ប៊ុនអេង អនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស និងមន្ត្រី អនុវត្តច្បាប់ជាន់ខ្ពស់ជាច្រើនរូបទៀត ដើម្បីពិភាក្សាកិច្ចសហការដែលកំពុងមាន និងចែករំលែកព័ត៌មានប្រឆាំងនឹងការកើនឡើងនៃការឆបោកតាមអនឡាញ និងការជួញដូរមនុស្ស។
ប្រធានផ្នែកសេដ្ឋកិច្ច និងនយោបាយរបស់ស្ថានទូតអាមេរិកប្រចាំកម្ពុជា Andrew Leyva បានឲ្យដឹងថា៖ «យើងប្ដេជ្ញាចិត្តការពារពលរដ្ឋអាមេរិកដោយធ្វើយ៉ាងណាឲ្យជនល្មើសក្នុងបទល្មើសឆបោកតាមអនឡាញទទួលខុសត្រូវចំពោះបទល្មើសរបស់ពួកគេ តាមរយៈកិច្ចហសការជាមួយមន្ត្រីអនុវត្តច្បាប់របស់កម្ពុជា»។
សារព័ត៌មានខេមបូចា មិនអាចទាក់ទងសុំការអត្ថាធិប្បាយពី អ្នកស្រី ជួ ប៊ុនអេង បានទេ។
នៅថ្ងៃទី៣ ខែកក្កដា អ្នកស្រី ជូ ប៊ុនអេង បានជួបជាមួយឯកអគ្គរដ្ឋទូតឥណ្ឌូនេស៊ី និងអូស្រ្តាលី ដែលជាសហប្រធានកិច្ចប្រជុំនៅបាលី ក៏ដូចជាឯកអគ្គរដ្ឋទូតលាវ ម៉ីយ៉ាន់ម៉ា ហ្វីលីពីន និងម៉ាឡេស៊ី ដើម្បីត្រៀមសម្រាប់កិច្ចប្រជុំថ្នាក់តំបន់ក្នុងការឆ្លើយតបទៅនឹងការជួញដូរមនុស្សឆ្លងដែន និងបទល្មើសពាក់ព័ន្ធតាមប្រព័ន្ធអនឡាញ។
របាយការណ៍របស់អង្គការលើកកលែងទោសអន្តរជាតិមួយបានកំណត់អត្តសញ្ញាណមជ្ឈមណ្ឌលឆបោកតាមអនឡាញចំនួន៥៣ទីតាំងនៅក្នុងតំបន់ចំនួន១៣ផ្សេងគ្នា ដែលភាគច្រើននៃទីតាំងទាំងនោះមាននៅតំបន់មាត់សមុទ្រ និងព្រំដែន។ ក្រៅពីនេះនៅមាន «តំបន់គួរឲ្យសង្ស័យ» ចំនួន៤៥ផ្សេងទៀតទំនងជាកំពុងធ្វើសកម្មភាពដូចគ្នានេះ។ កម្រោងប្រឆាំងការជួញដូរមនុស្សនៅកម្ពុជា កាលពីខែតុលា ឆ្នាំ២០២៤ បានប៉ាន់ប្រមាណថាយ៉ាងហោចណាស់មានទីតាំងឆបោកតាមអនឡាញចំនួន៣៥០កន្លែង កំពុងដំណើរការនៅទូទាំងប្រទេស និងបានកេងប្រវ័ញ្ចកម្លាំងពលកម្មកម្មករបរទេសចំនួន ១៥០ ០០០នាក់។
បើតាមរបាយការណ៍កន្លងទៅរបស់អ្នកជំនាញអង្គការសហប្រជាជាតិ អំពើឆបោកបានចល័ត និងរាលដាលខ្លាំងនៅក្នុង «ខេត្តព្រះសីហនុ រាជធានីភ្នំពេញ ប៉ៃលិន អន្លង់វែង អូស្មាច់ ខេត្តកណ្ដាល ពោធិ៍សាត់ កោះកុង ក្រុងបាវិត ជ្រៃធំ កំពត ឧត្តរមានជ័យ ប៉ោយប៉ែត បន្ទាយមានជ័យ ស្វាយរៀង និងមាននៅក្នុងតំបន់សេដ្ឋកិច្ចពិសេសតារាសាគរ និង តំបន់សេដ្ឋកិច្ចពេសេស Henge ថ្មដា»ផងដែរ។
លោក អំ សំអាត នាយកទទួលបន្ទុកកិច្ចការទូទៅនៃអង្គការ លីកាដូ មានប្រសាសន៍ថា ការបង្កើតគណៈកម្មការមួយនេះ នៅក្នុងរាជធានីភ្នំពេញគឺ «ជារឿងល្អ» ដោយថាវាអាចធានានូវតម្លាភាព និងពង្រឹងការអនុវត្តច្បាប់។ យ៉ាងណាលោកសង្ឃឹមថាគណៈកម្មការដូចគ្នានេះនឹងត្រូវបង្កើតនៅតាមខេត្តផ្សេងៗទៀត ដើម្បីទប់ស្កាត់ និងបង្ក្រាបបទល្មើសនៅតំបន់ទាំងនោះ។
លោកថ្លែងថា៖ «បញ្ហាបទល្មើសតាមអនឡាញបានធ្វើឲ្យប៉ះពាល់មុខមាត់កម្ពុជា ពីព្រោះថាកន្លងមករបាយការណ៍អន្តរជាតិលើកពីអំពើឆបោកនៅទីនេះ។ ដូចនេះ ការបង្កើតគណៈកម្មការគឺជារឿងល្អ ប៉ុន្តែគណៈកម្មការត្រូវតែបង្ក្រាប [បទល្មើស] ឲ្យមានប្រសិទ្ធភាព [បញ្ឈប់]អំពើពុករលួយ និងអនុវត្តច្បាប់ឲ្យបានតឹងរឹង និងហសការជាមួយប្រទេសជាដៃគូផ្សេងទៀត»៕
ប្រែសម្រួលពីអត្ថបទភាសាអង់គ្លេស៖ Phnom Penh Sets Up Anti-Scam Task Force Amid Rising Online Scams
