ក្រោយពីរងទណ្ឌកម្មពីសហរដ្ឋអាមេរិក និងចក្រភពអង់គ្លេសអស់រយៈពេលជិតមួយខែ និងការរឹបអូសទ្រព្យសម្បត្តិជាង ១៥ពាន់លានដុល្លារដែលជាប់ពាក់ព័ន្ធនឹងស្ថាបនិករបស់ខ្លួន ក្រុមហ៊ុន ព្រីនស៍ គ្រុប បានចេញមុខ«បដិសេធយ៉ាងដាច់អហង្ការ»ចំពោះការចោទប្រកាន់ដែលថា ក្រុមហ៊ុន ឬប្រធានរបស់ខ្លួនពាក់ព័ន្ធនឹងបណ្ដាញឧស្សាហកម្មឆបោកតាមអនឡាញក៏ធំដែលដែលកើតឡើងតាមរយៈការប្រើប្រាស់កម្លាំងពលកម្មដោយបង្ខំ។
បន្ទាប់ពីត្រូវបានដាក់ក្នុងបញ្ជីខ្មៅកាលពីខែតុលា អាជ្ញាធរនៅតាមបណ្តាប្រទេសនានានៅទ្វីបអឺរ៉ុប អាមេរិក និងអាស៊ី បានចាប់ផ្តើមយុទ្ធនាការរឹបអូសទ្រព្យសម្បត្តិ ដោយកំណត់គោលដៅលើក្រុមហ៊ុនពាក់ព័ន្ធ ក៏ដូចជាលោក ចេន ហ្ស៊ី ដែលជាស្ថាបនិករបស់ព្រីនស៍គ្រុប ក្រោមការចោទប្រកាន់ពីបទដឹកនាំអង្គការឧក្រិដ្ឋកម្មឆ្លងដែន។
ព្រីនស៍ គ្រុប បាននិយាយនៅក្នុងសេចក្តីថ្លែងការណ៍មួយកាលពីថ្ងៃអង្គារថា ការចោទប្រកាន់នេះ«គ្មានមូលដ្ឋានច្បាស់លាស់» និងមានគោលបំណង «រកលេសដើម្បី រឹបអូសទ្រព្យសម្បត្តិដែលមានតម្លៃរាប់ពាន់លានដុល្លារ»។
សេចក្តីថ្លែងការណ៍នេះ ជាការឆ្លើយតបជាផ្លូវការលើកដំបូងរបស់ក្រុមហ៊ុនចំពោះទណ្ឌកម្ម ហើយបានធ្វើឡើងប៉ុន្មានថ្ងៃប៉ុណ្ណោះ បន្ទាប់ពីទីភ្នាក់ងារសន្តិសុខតាមអ៊ីនធឺណិតរបស់ចិនបានចោទប្រកាន់រដ្ឋាភិបាលសហរដ្ឋអាមេរិកថា បានរៀបចំផែនការលួចBitcoin ដែលមានតម្លៃប្រហែល ១៣ ពាន់លានដុល្លារ។ ប្រាក់ទាំងនោះត្រូវបានចិនចោទប្រកាន់ថា មានជាប់ពាក់ព័ន្ធនឹងការរឹបអូសBitcoin ដែលមានតម្លៃ១៥ ពាន់លានដុល្លារ ដោយនៅពេលក្រោយមកអាជ្ញាធរសហរដ្ឋអាមេរិកបានអះអាងថា ជាប្រាក់ចំណូលខុសច្បាប់របស់លោក ចេន ដែលមានសញ្ជាតិពីរគឺ អង់គ្លេស និងកម្ពុជា ហើយមានដើមកំណើតមកពីប្រទេសចិន។ លោកត្រូវបានចោទប្រកាន់កាលពីខែតុលាពីបទសមគំនិតឆបោកតាមខ្សែ និងបទល្មើសលាងលុយកខ្វក់។
ការរឹបអូសនេះ ជាការរឹបអូសទ្រព្យសម្បត្តិដ៏ធំបំផុតក្នុងប្រវត្តិសាស្ត្ររបស់ក្រសួងយុត្តិធម៌អាមេរិក។ ក្រសួងមិនបានបញ្ជាក់ថា Bitcoin នោះត្រូវបានរឹបអូសនៅពេលណា ឬដោយវិធីណានោះទេ។
ទណ្ឌកម្មដែលរួមគ្នាដាក់ដោយទីក្រុងវ៉ាស៊ីនតោន និងទីក្រុងឡុងដ៍ បានកំណត់គោលដៅលើអង្គភាពចំនួន ១៤៦ ដែលមានទំនាក់ទំនងជាមួយ ព្រីនស៍ គ្រុប ដែលមានមូលដ្ឋាននៅភ្នំពេញ ហើយកំពុងប្រតិបត្តិការនៅប្រទេសចំនួន៣០ ដែលធ្វើការរកស៊ីក្នុងវិស័យអចលនទ្រព្យ សេវាហិរញ្ញវត្ថុ និងអាជីវកម្មទំនិញប្រើប្រាស់។ វិធានការទាំងនេះបានកាត់ផ្តាច់ក្រុមហ៊ុនទាំងនោះពីក្រុមហ៊ុនអាមេរិក ហើយបានធ្វើឱ្យក្រុមហ៊ុនផ្សេងទៀតប្រឈមនឹងការផាកពិន័យ ប្រសិនបើពួកគេធ្វើប្រតិបត្តិការជាមួយក្រុមហ៊ុនដែលរងទណ្ឌកម្ម។
ចក្រភពអង់គ្លេសក៏បានបង្កកទ្រព្យសម្បត្តិអាជីវកម្ម និងអចលនទ្រព្យដែលមានតម្លៃជាង ១៣០លានដុល្លារផងដែរ ខណៈដែល តៃវ៉ាន់ សិង្ហបុរី និង ហុងកុង បានធ្វើការរឹបអូសទ្រព្យសម្បត្តិ ដែលខ្លះមានតម្លៃរហូតដល់ ៣៥០លានដុល្លារ។
ព្រីនស៍ គ្រុប បាននិយាយថា ការចោទប្រកាន់នេះ«បានបង្កហានិភ័យយ៉ាងខ្លាំងដល់បុគ្គលិកដែលគ្មានកំហុសរាប់ពាន់នាក់ ដៃគូសហការ និង សហគមន៍ពាក់ព័ន្ធដែលសហការជាមួយក្រុមហ៊ុនទាំងនៅកម្ពុជា និងនៅក្រៅប្រទេស»។
ទោះជាយ៉ាងណាក៏ដោយ រដ្ឋអាជ្ញាសហរដ្ឋអាមេរិកបានចោទប្រកាន់ក្រុមហ៊ុននេះថា បាននិងកំពុងប្រតិបត្តិការអង្គការឧក្រិដ្ឋកម្មឆ្លងដែនដ៏ធំមួយក្នុងទ្វីបអាស៊ី ដោយធ្វើការបោកប្រាស់តាមប្រព័ន្ធអនឡាញដែលបង្កើតឡើងតាមរយៈកម្លាំងពលកម្មដោយបង្ខំ និងបានកំណត់គោលដៅជនរងគ្រោះដោយប្រើល្បិចស្នេហា និងការបោកបញ្ឆោតផ្នែកវិនិយោគ មុននឹងធ្វើការលាងលុយកខ្វក់តាមរយៈរូបិយប័ណ្ណគ្រីបតូ។
ក្នុងប៉ុន្មានឆ្នាំចុងក្រោយនេះ នៅពេលដែលប្រតិបត្តិការឆបោកបានរីករាលដាលពាសពេញតំបន់ ដោយកម្ពុជាត្រូវបានគេជឿថាជាកន្លែងប្រមូលផ្តុំទីតាំងបោកប្រាស់រាប់រយកន្លែង ដែលប្រើប្រាស់កម្មករដែលរងការជួញដូរ ឬបង្ខិតបង្ខំយ៉ាងតិច ១០០ ០០០នាក់ មកពីជាង ២០ ប្រទេស និងបង្កើតប្រាក់ចំណូលប៉ាន់ស្មានពី ១២.៥ ទៅ ១៩ ពាន់លានដុល្លារក្នុងមួយឆ្នាំៗ ព្រីនស៍ គ្រុប ត្រូវបានសារព័ត៌មានជាច្រើនធ្វើការស៊ើបអង្កេតជុំវិញការចោទប្រកាន់ថាមានតួនាទីក្នុងឧស្សាហកម្មខុសច្បាប់នេះ។
តាមសេចក្តីថ្លែងការណ៍ចេញផ្សាយកាលពីថ្ងៃអង្គារ ក្រុមហ៊ុននេះបានបញ្ជាក់ថា ខ្លួនបានសហការជាមួយក្រុមមេធាវីមកពីក្រុមហ៊ុនច្បាប់ Boies Schiller Flexner ដែលជាក្រុមហ៊ុនល្បីឈ្មោះរបស់សហរដ្ឋអាមេរិក ។
មេធាវីរបស់លោក ចេន គឺលោក Matthew L. Schwartz ប្រធានក្រុមហ៊ុន Boies Schiller Flexner មិនបានឆ្លើយតបភ្លាមៗចំពោះសំណើសុំការអត្ថាធិប្បាយនោះទេ។
ស្ថានទូតអាមេរិកប្រចាំកម្ពុជាបានបដិសេធមិនធ្វើអត្ថាធិប្បាយ ដោយបង្វែរសំណួរទៅក្រសួងការបរទេស។
យោងតាមសេចក្តីថ្លែងការណ៍របស់ក្រសួងយុត្តិធម៌សហរដ្ឋអាមេរិក លោក ចេន នៅតែបន្តគេចខ្លួនគិតត្រឹមខែតុលា៕
ប្រែសម្រួលពីអត្ថបទភាសាអង់គ្លេស៖ Prince Group Denies Link to Force-Labor Scams After Asset Seizures
