រដ្ឋមន្ត្រីក្រសួងមហាផ្ទៃ លោក ស សុខា បានជួលក្រុមហ៊ុនមេធាវីអាមេរិកចំនួនពីរ ក្នុងតម្លៃ ជាង ២៥០ ០០០ ដុល្លារ ដើម្បីជួយប្រឆាំងនឹងការព្យាយាមដាក់ទណ្ឌកម្មលើលោក និងគាំទ្រ ដល់ការចូលរួមផ្នែកការទូតរបស់លោកនៅទីក្រុងវ៉ាស៊ីនតោន។ នេះបើតាមឯកសារដែលបានដាក់ជូនក្រសួងយុត្តិធម៌សហរដ្ឋអាមេរិក។
កិច្ចព្រមព្រៀងទាំងនេះ ត្រូវបានចុះហត្ថលេខាក្នុងខែឧសភា ជាមួយក្រុមហ៊ុន Seiden Law និងក្រុមហ៊ុន Nelson Mullins ហើយត្រូវបានបង្ហាញជាសាធារណៈនៅថ្ងៃទី១ ខែមិថុនា ក្រោមច្បាប់សហរដ្ឋអាមេរិកស្ដីពីការបញ្ចុះបញ្ចូល (lobbying)ជំនួសឱ្យជនបរទេស។ កិច្ចព្រមព្រៀងទាំងនេះ មួយផ្នែកទាក់ទងនឹងសេចក្ដីព្រាងច្បាប់ដែលផ្ដោតលើបុគ្គល និងស្ថាប័នបរទេសដែលមានទំនាក់ទំនងជាមួយប្រតិបត្តិការឆបោកតាមអនឡាញ។
លោក សុខា បានបដិសេធពីទំនាក់ទំនងជាមួយប្រតិបត្តិការបែបនេះ ហើយអ្នកនាំពាក្យក្រសួងមហាផ្ទៃ លោក ទូច សុខៈ បានឆ្លើយក្នុងសារ Telegram ថា លោក សុខា បានជួលមេធាវី ដើម្បីការពារខ្លួនគាត់ ក្រសួង និងកិត្តិយសរបស់កម្ពុជា ពីអ្វីដែលគាត់ហៅថាជាការមួលបង្អាច់បរិហារកេរ្តិ៍។
អ្នកនាំពាក្យរូបនេះបានបន្តថា៖ «សិទ្ធិមានមេធាវី គឺជាសិទ្ធិទូទៅដែលច្បាប់អន្តរជាតិផ្ដល់ឱ្យ ដើម្បីការពារខ្លួន ការពារក្រសួង និងកិត្តិយសរបស់កម្ពុជា ពីអំពើមូលបង្កាច់ និងការទាញភ្ជាប់ទៅនឹងអ្វីមួយដែលខ្លួនមិនបានពាក់ព័ន្ធ»។ លោកបានបន្ថែមថា ឧក្រិដ្ឋជនបានគំរាមកំហែងដល់សុវត្ថិភាពរបស់លោក និងគ្រួសារទៅទៀត ក្នុងនាមលោកជារដ្ឋមន្ត្រីក្រសួងមហាផ្ទៃ ដឹកនាំបង្ក្រាបការឆបោកតាមអនឡាញ និងការជួញដូរមនុស្ស។
ក្រុមហ៊ុន Nelson Mullins បានលើកឡើងថា ខ្លួននឹងផ្ដល់ការប្រឹក្សាដល់លោក សុខា ដែលជាឧបនាយករដ្ឋមន្ត្រីផងដែរអំពីសកម្មភាពការទូតនៅសហរដ្ឋអាមេរិក រហូតដល់ខែកក្កដា។ ក្រុមហ៊ុននេះបានបន្តថា ការងាររបស់ខ្លួនអាចរួមមានការទាក់ទងជាមួយសមាជិកព្រឹទ្ធសភា មន្ត្រីរដ្ឋាភិបាល និងប្រព័ន្ធផ្សព្វផ្សាយ ដើម្បីជួយជំរុញទំនាក់ទំនងឲ្យប្រសើរឡើងវិញ។
ក្រុមហ៊ុន Seiden Law បាននិយាយថា ខ្លួននឹងផ្ដល់សេវាកម្មផ្នែកច្បាប់ ដែលទាក់ទងនឹងការទំនាក់ទំនងជាមួយការិយាល័យត្រួតពិនិត្យទ្រព្យសម្បត្តិបរទេស (Office of Foreign Assets Control) នៃក្រសួងរតនាគារសហរដ្ឋអាមេរិក និងគណៈកម្មាធិការសភាមួយ ដែលកំពុងពិនិត្យសេចក្ដីព្រាងច្បាប់ផ្ដោតលើបុគ្គល និងស្ថាប័នបរទេសដែលមានទំនាក់ទំនងជាមួយការបោកប្រាស់តាមប្រព័ន្ធអ៊ីនធឺណិត។
ឯកសារដែលដាក់ដោយ ក្រុមហ៊ុន Seiden បានបញ្ជាក់ថា ការងារខ្លួននឹងព្យាយាមដោះស្រាយការដាក់ឈ្មោះលោក សុខា ក្នុងសេចក្ដីព្រាងច្បាប់ដែលបានស្នើ ដែលនឹងតម្រូវឱ្យប្រធានាធិបតីសហរដ្ឋអាមេរិក លោក ដូណាល់ ត្រាំ ដាក់ទណ្ឌកម្មលើរដ្ឋមន្រ្តីរូបនេះ និងបុគ្គលផ្សេងទៀតដែលត្រូវបានចោទប្រកាន់ថាមានទំនួលខុសត្រូវចំពោះការបោកប្រាស់ដែលផ្ដោតលើជនជាតិអាមេរិកាំង។ សេចក្ដីព្រាងច្បាប់នេះក៏នឹងបង្កើតក្រុមការងារពហុស្ថាប័នមួយ ដើម្បីប្រយុទ្ធប្រឆាំងនឹងបណ្ដាញនៅពីក្រោយការបោកប្រាស់ទាំងនោះផងដែរ។
សេចក្ដីព្រាងច្បាប់ដែលបានស្នើនេះ ក៏បានដាក់ឈ្មោះមន្ត្រីកម្ពុជាជាច្រើននាក់ផ្សេងទៀត និងលោក ហ៊ុន តូ ដែលជាបងប្អូនជីដូនមួយរបស់នាយករដ្ឋមន្ត្រីកម្ពុជា លោក ហ៊ុន ម៉ាណែត សម្រាប់ការដាក់ទណ្ឌកម្មដែលអាចកើតមានផងដែរ។
ការចោទប្រកាន់អំពីទំនាក់ទំនងរបស់លោក សុខា ជាមួយបណ្ដាញឆបោក កើតចេញពីតួនាទីពីមុនរបស់លោក ដែលជាសហប្រធាននៃក្រុមហ៊ុនវិនិយោគ ជិនបី (Jinbei) ដែលត្រូវបានគេភ្ជាប់ទៅនឹងសកម្មភាពឆបោកដែលប្រព្រឹត្តដោយលោក ចេន ហ្ស៊ី (Chen Zhi) ស្ថាបនិកនៃក្រុមហ៊ុន ព្រីនស៍ គ្រុប (Prince Group)។ នេះបើតាមកំណត់ត្រារបស់ក្រសួងពាណិជ្ជកម្ម។ ទីក្រុងវ៉ាស៊ីនតោន និងចក្រភពអង់គ្លេស បានដាក់ទណ្ឌកម្មលើលោក ចេន ហ្ស៊ី និងក្រុមហ៊ុនព្រីនស៍ កាលពីឆ្នាំមុន ដោយចោទប្រកាន់ក្រុមនេះថា មានការពាក់ព័ន្ធក្នុងប្រតិបត្តិការឆបោក ការលាងលុយកខ្វក់ និងការជួញដូរមនុស្ស។ ចាប់តាំងពីពេលនោះមក លោក ចេន ហ្ស៊ី ត្រូវបានបញ្ជូនខ្លួនទៅប្រទេសចិន។
លោក សុខៈ បាននិយាយថា ការទាក់ទងគ្នាពីមុនរបស់លោក សុខា ជាមួយលោក ចេន ហ្ស៊ី គឺជា «ទំនាក់ទំនងសង្គមធម្មតាប៉ុណ្ណោះ» ហើយលោកបដិសេធទំនួលខុសត្រូវចំពោះអំពើខុសច្បាប់ណាមួយ ដែលលោក ចេន ហ្ស៊ី ប្រហែលជាបានប្រព្រឹត្ត។
រដ្ឋមន្ត្រីវ័យ ៤៥ ឆ្នាំរូបនេះ ដែលបានស្នងតំណែងពីឪពុករបស់លោកកាលពីឆ្នាំ២០២៣ បច្ចុប្បន្នកំពុងដឹកនាំយុទ្ធនាការរបស់កម្ពុជាប្រឆាំងនឹងការឆបោកតាមអនឡាញ និងការជួញដូរមនុស្ស។ យុទ្ធនាការនេះ ត្រូវបានដាក់ចេញ ខណៈដែលកម្ពុជាកំពុងប្រឈមនឹងសម្ពាធអន្តរជាតិកាន់តែខ្លាំង ដោយសារប្រទេសនេះបានត្រូវឧក្រិដ្ឋជនប្រើប្រាស់ជាមជ្ឈមណ្ឌលនៃបណ្ដាញឆបោកតាមអ៊ីនធឺណិតឆ្លងដែន៕
ប្រែសម្រួលពីអត្ថបទភាសាអង់គ្លេស៖ Sar Sokha Hires US Law Firms as Sanctions Loom
