យុវជន សកម្មជនបរិស្ថាន និងគ្រួសារជាច្រើននាក់ត្រូវបានប្រជាការពារខណ្ឌដូនពេញរារាំងក្នុងរាជធានីភ្នំពេញ កាលពីថ្ងៃទី១០ ខែធ្នូ ខណៈពួកគេព្យាយាមទៅបួងសួងនៅព្រះអង្គដងកើដោយសន្តិវិធីដើម្បីអបអរទិវាសិទ្ធិមនុស្សអន្តរជាតិ និងទាមទារឲ្យដោះលែងសកម្មជនដែលជាប់ពន្ធនាគារ។
ពួកគេបានប្រមូលផ្តុំគ្នានៅជិតផ្សាររាត្រីក្នុងរាជធានីភ្នំពេញ ដោយកាន់បដា ខណៈពួកគេរៀបចំដង្ហែទៅកាន់ទីសក្ការៈព្រះអង្គដងកើ ក្បែរព្រះបរមរាជវាំង ដើម្បីបួងសួងឲ្យដោះលែងសកម្មជនដែលជាប់ពន្ធនាគារ។ ក្នុងចំណោមពួកគេ មានគ្រួសាររបស់អ្នកការពារបរិស្ថានមាតាធម្មជាតិត្រូវបានកាត់ទោសឲ្យជាប់ពន្ធនាគារចន្លោះពី៦-៨ឆ្នាំ កាលពីខែកក្កដា ពីបទក្បត់ជាតិប្រឆាំងនឹងរដ្ឋាភិបាល។
ប្រជាការពារខណ្ឌបានបញ្ឈប់ការដង្ហែរនៅមុនពេលចាប់ផ្តើម ដោយបង្ខំឱ្យក្រុមនេះសម្រេចចិត្តបួងសួងជាមួយដើមឈើមួយដើមនៅជិតផ្សាររាត្រីជំនួសវិញ ដោយមានកម្លាំងប្រជាការពារឈរឃ្លាំមើលនៅក្បែរនោះ។
លោក អឿង អូន យុវជននៅក្នុងក្រុមនោះបាននិយាយថា ការប្រមូលផ្តុំនេះមានគោលបំណងមិនត្រឹមតែបួងសួងប៉ុណ្ណោះទេ ប៉ុន្តែដើម្បីជំរុញឲ្យរដ្ឋាភិបាល ក្នុងទិវាសិទ្ធិមនុស្សអន្តរជាតិ ដោះលែងអ្នកការពារបរិស្ថាន សកម្មជននយោបាយ និងអ្នកការពារសិទ្ធិមនុស្សដែលកំពុងជាប់ឃុំក្នុងពន្ធនាគារ។
លោកឱ្យដឹងថា៖ «អាជ្ញាធរខ្លះស្លៀកសម្លៀកបំពាក់ស៊ីវិល ហើយខ្លះទៀតពាក់ឯកសណ្ឋាន។ ពួកគេបានប្រើពាក្យមិនសមរម្យ ហើយក៏បានចាប់យកបដាពីយើងមួយចំនួនផងដែរ» ។ លោកបន្តរៀបរាប់ពីរបៀបដែលប្រជាការពារហាមមិនឲ្យពួកគាត់បន្តដំណើរទៅកាន់ទីសក្ការៈ ដោយមិនបានប្រាប់ពីមូលហេតុទេ។
អ្នកចូលរួមម្នាក់ទៀតក៏បានពណ៌នាអំពីអាជ្ញាធរដោយប្រើភាសាមិនសមរម្យ និងរុញច្រានក្រុមនេះផងដែរ។
វីដេអូបង្ហាញពីទិដ្ឋភាពនៃការចលាចលត្រូវបានគេបង្ហោះលើហ្វេសប៊ុកដោយក្រុមអ្នកតវ៉ាម្នាក់។
លោក អឿង អូន ក៏បានរិះគន់អាជ្ញាធរដែលបានរឹតត្បិតសិទ្ធិរបស់អ្នកតស៊ូមតិផងដែរ។
លោកបានបញ្ជាក់ថា៖ «កម្ពុជាជាប្រទេសប្រជាធិបតេយ្យ។ ដូច្នេះខ្ញុំសំណូមពរឲ្យអាជ្ញាធរអនុញ្ញាតឲ្យប្រជាពលរដ្ឋ និងយុវជនចូលរួមបញ្ចេញមតិ និងជួបជុំដែលមានចែងក្នុងច្បាប់»។
សមាជិកគ្រួសាររបស់សកម្មជនបរិស្ថានមាតាធម្មជាតិ ដែលការជាប់ពន្ធនាគារនេះត្រូវបានថ្កោលទោសដោយអង្គការសិទ្ធិមនុស្សអន្តរជាតិជាច្រើន ក៏បានចូលរួមក្នុងសកម្មភាពនេះមុននឹងធ្វើដំណើរទៅកាន់ទីលានប្រជាធិបតេយ្យ រាជធានីភ្នំពេញ ដើម្បីប្រារព្ធទិវាសិទ្ធិមនុស្ស ដែលមានការចូលរួមពីមន្ត្រីការទូតបរទេសជាន់ខ្ពស់។
កញ្ញា ឡុង ស្រីលីន ប្អូនស្រីរបស់សកម្មជនមាតាធម្មជាតិ ឡុង គន្ធា ដែលជាប់ពន្ធនាគារបានជំរុញឲ្យក្រុមជាតិ និងអន្តរជាតិ ចងចាំការលះបង់របស់សកម្មជនដែលកំពុងជាប់ពន្ធនាគារនៅកម្ពុជា។
កញ្ញា ស្រីលីន បានថ្លែងថា៖ «សូមគោរពសិទ្ធិពួកគេ ហើយដោះលែងពួកគេដោយគ្មានការរឹតត្បិត» ដោយបានគូសបញ្ជាក់ពីបញ្ហាសុខភាពថ្មីៗរបស់ គន្ធា ក្នុងពន្ធនាគារ និងសូមឱ្យបានធូរស្រាលចាប់ពីពេលនេះទៅ។
អ្នកស្រី ប៉ាត រស្មី ភរិយាកំពុងមានផ្ទៃពោះរបស់សកម្មជនមាតាធម្មជាតិម្នាក់ទៀតដែលជាប់ពន្ធនាគារគឺ ថុន រដ្ឋា បានអំពាវនាវឱ្យមានការដោះលែងស្វាមី និងតស៊ូមតិដើម្បីភាពគ្មានទោសពៃរ៍របស់គាត់នៅក្នុងព្រឹត្តិការណ៍នៅទីលានប្រជាធិបតេយ្យ ឱ្យរួចផុតពីការជ្រៀតជ្រែកដែលអ្នកស្រីបានជួបប្រទះក្នុងពេលដែលអ្នកស្រីព្យាយាមទៅបួងសួង។
អង្គការសិទ្ធិមនុស្សក្នុងស្រុក លីកាដូ បានឱ្យដឹងថា ប្រទេសកម្ពុជាបានរងការរិះគន់ពីប្រជាជាតិ និងក្រុមអន្តរជាតិចំពោះការចាប់ខ្លួនលើក្រុមអ្នកប្រឆាំង អ្នកការពារបរិស្ថាន និងអ្នកការពារសិទ្ធិមនុស្សកម្ពុជា ដោយបានចាប់ឃុំខ្លួនសកម្មជន មេដឹកនាំគណបក្សប្រឆាំង និងសមាជិកសហជីពយ៉ាងតិច ២៤ នាក់នៅក្នុងឆមាសទីមួយនៃឆ្នាំ ២០២៤។
ការជាប់ឃុំឃាំងដ៏គួរឱ្យកត់សម្គាល់មួយបានកើតឡើងនៅចុងខែកក្កដា នៅពេលដែលមនុស្សយ៉ាងតិច៩៤នាក់ រួមទាំងអនីតិជនត្រូវបានចាប់ខ្លួនដោយចោទប្រកាន់ពីបទប៉ុនប៉ងផ្តួលរំលំរដ្ឋាភិបាលបន្ទាប់ពីរៀបចំការតវ៉ាប្រឆាំងនឹងកិច្ចព្រមព្រៀងអភិវឌ្ឍន៍ជាមួយវៀតណាម និងឡាវ។ ចាប់តាំងពីពេលនោះមក រដ្ឋាភិបាលបានដកខ្លួនចេញពីកតិកាសញ្ញានេះ ប៉ុន្តែមិនមានសញ្ញាណាមួយថា អ្នកដែលកំពុងជាប់ឃុំនឹងជៀសវាងការបៀតបៀនបន្ថែមទៀតទេ។
លោក ជា ខេមា អភិបាលខណ្ឌដូនពេញ ដែលមើលការខុសត្រូវលើកម្លាំងប្រជាការពារ បានបដិសេធមិនធ្វើអត្ថាធិប្បាយជុំវិញការបង្ក្រាបអ្នកតវ៉ាទេ៕
រាយការណ៍បន្ថែមដោយ តាំង ប៉ហ្គិច
ប្រែសម្រួលពីអត្ថបទភាសាអង់គ្លេស៖ Security Forces Block Family and Supporters of Jailed Activists from Marching to Shrine
