អត្តពលិកកម្ពុជាមួយចំនួនបានបំបែកកំណត់ត្រាឈ្នះមេដាយមាសលើវិញ្ញាសាដែលមិនធ្លាប់ឈ្នះពីមុនមក ដោយទទួលបានមេដាយមាសសរុបក្នុងព្រឹត្តិការណ៍ស៊ីហ្គេមដែលខ្មែរធ្វើជាម្ចាស់ផ្ទះមានចំនួន៨១គ្រឿងក្នុងចំណោមមេដាយសរុប២៨២គ្រឿង គឺឈរនៅលំដាប់លេខ៤ក្នុងចំណោម១១ប្រទេស។
ក្រុមកីឡាករ-កីឡាការិនីកម្ពុជាផ្នែកកីឡាហែលទឹក រត់ប្រណាំង និងប្រដាល់គុនខ្មែរផ្នែកនារី រួមទាំងកីឡាមួយចំនួនទៀតបានបង្កើតប្រវត្តិសាស្រ្តថ្មីសម្រាប់កម្ពុជា ដោយឈ្នះបានមេដាយមាសជាបន្តបន្ទាប់នៅក្នុងព្រឹត្តិការណ៍កីឡាស៊ីហ្គេមលើកទី៣២ ដោយវិញ្ញាសាទាំងនោះសុទ្ធតែសម្រេចបានមេដាយមាស ដែលកម្ពុជាមិនធ្លាប់ទទួលបាននៅក្នុងព្រឹត្តិការណ៍អន្តរជាតិមួយនេះ។ ក្នុងនោះមានមេដាយមាសលើវិញ្ញាសាកីឡាហែលទឹក១គ្រឿង រត់ប្រណាំង១គ្រឿង និងប្រដាល់គុនខ្មែរផ្នែកនារី១គ្រឿងផងដែរ។
កីឡាការិនីដែលបានឈ្នះមេដាយមាសលើវិញ្ញាសាប្រដាល់គុនខ្មែរផ្នែកនារី គឺកញ្ញា ទូច ចាន់វត្តី បានរៀបរាប់ថា នាងពិតជាសប្បាយរីករាយដែលអាចលើកមុខមាត់ជូនគ្រួសារ និងជាតិ រួមទាំងបំណងប្រាថ្នារបស់ខ្លួនដែលប៉ងតាំងពីចូលហ្វឹកហាត់ដំបូង ដោយសុខចិត្តព្យួរការសិក្សាថ្នាក់ទី១២ ដើម្បីហ្វឹកហាត់ត្រៀមប្រកួតក្នុងព្រឹត្តិការណ៍មួយនេះ។ យ៉ាងណានៅពីក្រោយភាពជោគជ័យនេះ កីឡាការិនីវ័យ១៨ឆ្នាំរូបនេះត្រូវតស៊ូហ្វឹកហាត់ខ្លាំង និងមិនសូវបានគិតពីសម្រស់ដូចក្មេងស្រីឯទៀតនោះឡើយ។ មួយវិញទៀត នាងក៏ត្រូវបានរងពាក្យសម្តីរិះគន់មួយចំនួនថាជាស្តី្រមិនគួរណាចូលប្រឡូកក្នុងវិស័យនេះសោះ។
កញ្ញា ចាន់វត្តី ប្រាប់ថា៖ «មុននឹងឈ្នះគឺវាតម្រូវឱ្យខ្ញុំតស៊ូខ្លាំង ខំហ្វឹកហាត់យូរឆ្នាំដែរ។ សម្រាប់ខ្ញុំការឈ្នះមេដាយមាសនេះ គឺមានអារម្មណ៍ថារំភើបដែលខ្ញុំអាចយកមេដាយមាសជូនជាតិយើងបាន ហើយខ្ញុំក៏អាចសម្រេចបំណងប្រាថ្នារបស់ខ្ញុំដែលខំហ្វឹកហាត់អស់រយៈពេលច្រើនឆ្នាំ»។
កីឡាការិនីគុនខ្មែររូបនេះមានដើមកំណើតពីស្រុកកៀនស្វាយ ខេត្តកណ្តាល បានបន្តថា មេដាយមាសដែលទើបនឹងទទួលបានពីការប្រកួតស៊ីហ្គេមនាពេលថ្មីៗអាចជួយផ្សព្វផ្សាយក្បាច់គុនខ្មែរឱ្យពលរដ្ឋកាន់តែគាំទ្រ រីឯបរទេសរឹតតែស្គាល់ច្បាស់។ កញ្ញា ចាន់វត្តី ចាត់ទុកថា មេដាយមាសមួយនេះជាសមិទ្ធផលធំជាងគេមិនធ្លាប់មានតាំងពីចូលប្រឡូកក្នុងវិស័យប្រដាល់នេះមក។
កញ្ញា ចាន់វត្តី អះអាងថា៖ «វាធំធេងសម្រាប់ប្រទេសជាតិ ហើយវាលើកស្ទួយវិស័យប្រដាល់យើងបានច្រើនផងដែរ។ អត់មានសមិទ្ធផលណាដែលធំជាងលើកនេះទេ ព្រោះដោយសារលើកនេះការប្រកួតស៊ីហ្គេមតំណាងឱ្យប្រទេសកម្ពុជាដែលជាម្ចាស់ផ្ទះដែលរង់ចាំអស់រយៈពេល៦៤ឆ្នាំ។ អ៊ីចឹងខ្ញុំគិតថា ការប្រកួតលើកនេះគឺវាជាការប្រកួតធំបំផុតក្នុងឆាកជីវិតរបស់ខ្ញុំ»។
គួរជម្រាបថា កញ្ញា ទូច ចាន់វត្តី គឺជាកីឡាការិនីដំបូងគេបង្អស់ដែលអាចយកមេដាយមាសជូនកម្ពុជាបាននៅក្នុងព្រឹត្តិការណ៍កីឡាស៊ីហ្គេមសម្រាប់វិញ្ញាសាប្រដាល់គុនខ្មែរផ្នែកនារី ដោយបានយកឈ្នះកីឡាការិនីវៀតណាមនៅក្នុងវគ្គផ្តាច់ព្រ័ត្រកាលពីថ្ងៃ១១ ខែឧសភា កន្លងទៅ។ ដោយឡែកនៅក្នុងព្រឹត្តិការណ៍លើកទី៣២នេះ នាងក៏ជាម្ចាស់មេដាយមាសជាស្ត្រីតែម្នាក់គត់ដែរក្នុងចំណោមម្ចាស់មេដាយមាសគុនខ្មែរទាំង១៤នាក់។
កីឡាការិនីរូបនេះបានដាក់ការប្តេជ្ញាចិត្តថា នឹងខំប្រឹងធ្វើឱ្យបានល្អបន្ថែមទៀតដើម្បីយកជោគជ័យក្នុងព្រឹត្តិការណ៍សំខាន់ៗនាពេលខាងមុខ ជាពិសេសការប្រកួតកីឡាស៊ីហ្គេមលើកទី៣៣ដែលថៃធ្វើជាម្ចាស់ផ្ទះនៅឆ្នាំ២០២៥ខាងមុខនេះ។
កញ្ញាបញ្ជាក់ថា៖ «ការតាំងចិត្តរបស់ខ្ញុំសម្រាប់ព្រឹត្តិការណ៍ក្រោយៗទៀត គឺថានឹងធ្វើឱ្យល្អដូចកាលដែលកម្ពុជាធ្វើជាម្ចាស់ផ្ទះព្រឹត្តិការណ៍ស៊ីហ្គេមលើកទី៣២នេះ។ ហើយខ្ញុំនឹងខំហ្វឹកហាត់បន្ថែមឱ្យល្អជាងលើកនេះទៅទៀត»។
ក្រៅតែពីកីឡាការិនីគុនខ្មែររូបនេះ ក៏មានអត្តពលិកមួយចំនួនទៀតដែលឈ្នះបានមេដាយមាសដែរ ដូចជាកីឡាការិនីហែលទឹក កាំង មុយនីន ដែលបានយកឈ្នះកីឡាការិនីឥណ្ឌូនេស៊ីលើវិញ្ញាសាហែលទឹក៤០០ម៉ែត្រ ដោយប្រើថេរវេលាជិត៤នាទី។ ដោយឡែក កីឡាករបាល់ទាត់លើតុ រៀម សុខភិរម្យ ក៏បានឈ្នះមេដាយមាសលើវិញ្ញាសាឯកត្តជនបុរសផងដែរ។
ចំណែកម្ចាស់ជ័យលាភីមេដាយមាសផ្នែកកីឡាអត្តពលកម្ម(រត់ប្រណាំង)កម្ពុជាដែលមានដើមកំណើតពីស្រុកកញ្ជៀច ខេត្តព្រៃវែង គឺកីឡាករ ឈុន ប៊ុនថន បានឱ្យដឹងថា លោកបានព្យួរការសិក្សាអស់រយៈពេលជិត១ឆ្នាំ ដើម្បីចេញទៅហ្វឹកហាត់ត្រៀមនៅប្រទេសចិន។ កីឡាករដែលកំពុងសិក្សាថ្នាក់បរិញ្ញាបត្រឆ្នាំទី៣នៃដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍(DMC) បានបញ្ជាក់ថា ការឈ្នះមេដាយមាសលើវិញ្ញាសានេះមិនមែនជារឿងចៃដន្យនោះទេ ពោលគឺលោកបានតស៊ូហ្វឹកហាត់ ហើយក៏ធ្លាប់រងបរាជ័យផ្ទួនៗរហូតជិត១០ឆ្នាំ ទម្រាំតែអាចយកជ័យជម្នះនេះបាន។
កីឡាកររត់ប្រណាំងរូបនេះក៏បានរងនូវការឈឺចាប់ដោយសារការបាត់បង់ឪពុកម្តាយតាំងពីវ័យក្មេង ហើយការចូលប្រឡូកក្នុងវិស័យនេះក៏គ្មានការជំរុញ និងលើកទឹកចិត្តដែរ ផ្ទុយទៅវិញមានការមើលងាយពីមនុស្សជុំវិញខ្លួនមួយចំនួន ប៉ុន្តែរូបលោកនៅតែជម្នះបញ្ហាទាំងនោះបាន។
លោក ប៊ុនថន បញ្ជាក់ថា៖ «ការឈឺចាប់ខ្ញុំមានច្រើនណាស់! ទី១គឺខ្ញុំក្រ ខ្ញុំទៅធ្វើអីក៏អត់មានអ្នកគាំទ្រដែរ។ ទី២គឺខ្ញុំបាត់បង់គ្រួសារ! បាត់បងឪពុកម្តាយ។ ទម្រាំតែបានមេដាយមាសនឹងគឺគិតទុករហូតរយៈពេលជិត១០ឆ្នាំហើយ ព្រោះខ្ញុំចាញ់រហូត ប្រកួតចាញ់គេរហូត»។
ជុំវិញលទ្ធផលដ៏គាប់ប្រសើរមួយនេះ ម្ចាស់មេដាយមាសវិញ្ញាសារត់ប្រណាំងកម្ពុជារូបនេះប្តេជ្ញាចិត្តថា នឹងចូលរួមលើកស្ទួយវិស័យមួយនេះឱ្យកាន់តែរីកចម្រើន ដើម្បីឱ្យពិភពលោកដឹងថាកម្ពុជាក៏មានក្រុមអត្តពលិកឆ្នើមដែរ។
លោកអះអាងថា៖ «ការប្តេជ្ញាចិត្តក្នុងការប្រកួតកីឡារត់ប្រណាំងនៅថ្ងៃអនាគតខាងមុខទៀត ខ្ញុំនឹងខិតខំហ្វឹកហាត់បន្ថែម ដើម្បីយកមេដាយអន្តរជាតិឱ្យបានច្រើនសម្រាប់កម្ពុជា លើកកេរ្តិ៍ឈ្មោះកម្ពុជាទៅលើពិភពលោក»។
អនុប្រធានសហព័ន្ធកីឡាអត្តពលកម្ម(រត់ប្រណាំង) លោក ដាំ ភិរម្យ គូសបញ្ជាក់ថា កីឡាករ ឈុន ប៊ុនថន ជាបុគ្គលម៉ឺងម៉ាត់ក្នុងការហ្វឹកហាត់ និងយកចិត្តទុកដាក់នូវអ្វីដែលជាការបង្ហាត់បង្រៀនរបស់លោកគ្រូ ដូច្នេះការខិតខំប្រឹងប្រែងក្នុងការហ្វឹកហាត់ទាំងនោះ ទើបធ្វើឱ្យគាត់ក្លាយជាកីឡាករទទួលបានជោគជ័យដំបូងគេបង្អស់។
លោកបន្ថែមថា ការឈ្នះមេដាយមាសលើវិញ្ញាសានេះនឹងធ្វើឱ្យបរទេសចាប់អារម្មណ៍លើកម្ពុជា ខណៈដែលពីមុនមិនមានប្រទេសណាមួយចាប់អារម្មណ៍នោះទេ។
លោក ភិរម្យ បញ្ជាក់ថា៖ «យើងធ្លាប់តែពាក់អាវកម្ពុជាហើយគេនៅក្នុងអាស៊ានក៏ដូចជានៅក្នុងព្រឹត្តិការណ៍ធំៗគឺគេមិនដែលចាប់អារម្មណ៍នឹងប្រទេសកម្ពុជារបស់យើងនោះទេ។ ដោយចាប់ពីថ្ងៃនេះទៅនៅក្នុងអាស៊ីអាគ្នេយ៍គឺគេចាប់អារម្មណ៍ខ្លាំងណាស់ទៅលើកីឡាករ ឈុន ប៊ុនថន ព្រោះអីពេលដែលគាត់ឈ្នះហ្នឹងគឺថាគាត់រត់ដាច់ពីគេតែម្ដងអត់មានបន្លំអីនោះទេ ព្រោះកីឡាអត្តពលកម្មកន្លងមកឈ្នះតែក្បាល ឬទ្រូងនោះទេ ប៉ុន្តែនេះ គឺឈុន ប៊ុនថន គាត់រត់ដាច់គេប្រហែល២ទៅ៣ម៉ែត្រ»។
ខេមបូចាមិនទាន់អាចសុំការចូលរួមបន្ថែមពី អគ្គលេខាធិការគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២(CAMSOC) លោក វ៉ាត់ ចំរើន បាននៅឡើយទេ។ ប៉ុន្តែលោកធ្លាប់បានបញ្ជាក់ថា ការដែលអត្តពលិកកម្ពុជាទទួលបានលទ្ធផលល្អជាបន្តបន្ទាប់នេះ ដោយសារតែពួកគេបានតៀមខ្លួន និងមានកម្លាំងចិត្តគ្រប់គ្រាន់ក្នុងការធ្វើជាម្ចាស់ផ្ទះក្នុងព្រឹត្តិការណ៍នេះ ហើយក៏ទទួលបានភាពកក់ក្តៅពីមហាជនជាងការចេញទៅប្រកួតនៅក្រៅប្រទេស។
លោកបញ្ជាក់ថា៖ «កីឡាកររបស់យើងមានចិត្តសាស្ត្រល្អក្នុងការប្រកួត កម្លាំងចិត្តរបស់គាត់ក្នុងនាមជាម្ចាស់ផ្ទះហ្នឹងវាល្អជាងយើងទៅប្រកួតនៅប្រទេសគេ ហើយសំខាន់គឺការគាំទ្ររបស់ប្រជាជន យុវជន មហាជនហ្នឹងវាផុសផុលគ្រប់ទីកន្លែងទាំងអស់»។
លោកឱ្យដឹងបន្ថែមថា អត្តពលិកកម្ពុជាបានសម្រេចគោលបំណងដែលចង់បានមេដាយសរុបច្រើនជាងមេដាយសរុបកាលពីប្រកួតព្រឹត្តិការណ៍ស៊ីហ្គេមនៅប្រទេសវៀតណាម ពោលគឺកាលនោះទទួលបានត្រឹមតែ៦៣គ្រឿងប៉ុណ្ណោះ។
គួរបញ្ជាក់ថា ប្រភេទកីឡាដែលបានដាក់ចូលក្នុងព្រឹត្តិការណ៍កីឡាស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះនេះមានចំនួន៣៦ប្រភេទ ដោយមានវិញ្ញាសាសរុបចំនួន៥៧៩ ខណៈអត្តពលិក និងមន្ត្រីពាក់ព័ន្ធ រួមនិងគណៈប្រតិភូដែលចូលរួមសរុបមានចំនួន ១០ ៨៩០នាក់។
របាយរកាណ៍របស់គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២(CAMSOC)បានបង្ហាញនៅថ្ងៃទី១៧ ដែលជាថ្ងៃបិទព្រឹត្តិការណ៍ស៊ីហ្គេមលើកទី៣២នេះថា កម្ពុជាទទួលបានមេដាយសរុបចំនួន២៨២គ្រឿង ក្នុងនោះមានសំរិទ្ធ ១២៦គ្រឿង ប្រាក់៧៤គ្រឿង និងមាស៨១គ្រឿង។ តួរលេខនេះបញ្ជាក់ថា កម្ពុជាឈរនៅលំដាប់លេខ៤ បន្ទាប់ពីឥណ្ឌូនេស៊ី ថៃ និងវៀតណាម ដែលឈរនៅលំដាប់កំពូល។
ក្នុងនោះវិញ្ញាសាដែលកម្ពុជាទទួលបានមេដាយមាសច្រើនជាងប្រទេសដទៃមានចំនួន៥វិញ្ញាសាដូចជា វិញ្ញាសាវ៉ូវីណាម ទទួលបានមេដាយមាស១០គ្រឿង ក្នុងចំណោមមេដាយសរុប២៧គ្រឿង។ វិញ្ញាសាគុនខ្មែរទទួលបានមាន១៤គ្រឿង ក្នុងចំណោមមេដាយសរុប១៩គ្រឿង។ វិញ្ញាសាល្បុកត្តោទទួលបានមេដាយមាស៨គ្រឿង ក្នុងចំណោមមេដាយសរុប១៨គ្រឿង។ វិញ្ញាសាឃីកបុកស៊ីង ទទួលបានមេដាយមាស៦គ្រឿង ក្នុងចំណោមមេដាយសរុប ១៣គ្រឿង ខណៈវិញ្ញាសាគ្រីឃីកទទួលបានមេដាយមាស៣គ្រឿង ក្នុងចំណោមមេដាយសរុប ៤គ្រឿង។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យ៉ង់ គិមអេង មានប្រសាសន៍ថា ឱ្យតែមានការលើកទឹកចិត្ត និងការយកចិត្តទុកដាក់បង្ហាត់ នោះនឹងធ្វើឱ្យអត្តពលិកកម្ពុជា មានសមត្ថភាពគ្រប់គ្រាន់ ក្នុងការប្រជែងជាមួយបរទេសបាន ព្រោះលោកថាខ្មែរមិនមែនគ្មានសមត្ថភាពនោះទេ គ្រាន់តែខ្វះការហ្វឹកហាត់ និងការជ្រោមជ្រែងផ្សេងៗ។
លោកបញ្ជាក់ថា៖ «ជុំវិញបញ្ហានេះ ខ្ញុំគិតថាការលើកទឹកចិត្តកីឡាករគឺជារឿងសំខាន់ណាស់។ ឱ្យតែយើងមានការលើកទឹកចិត្តមានការជួយបណ្ដុះបណ្ដាលច្បាស់លាស់ខ្ពស់ទៅដល់កីឡាករ-កីឡាការិនីគឺពួកគាត់មានសមត្ថភាព»។
លោកបន្ថែមថា៖ «ខ្មែរយើងគឺមិនមែនគ្មានសមត្ថភាពយកឈ្នះកីឡាករកីឡាការិនីនៅបណ្ដាប្រទេសនៅក្នុងតំបន់នោះទេ គ្រាន់តែយើងខ្វះការហ្វឹកហាត់ ខ្វះអ្នកជំនាញមកជួយ និងខ្វះការលើកទឹកចិត្តប៉ុណ្ណោះ។ អ៊ីចឹង ខ្ញុំគិតថាយ៉ាងណាគួរតែធ្វើឱ្យអាជីពកីឡារបស់គាត់អាចទ្រទ្រង់ជីវភាពរស់នៅរបស់ពួកគាត់បាន ដូច្នេះពួកគាត់នឹងមានកំលាំងចិត្ត និងប្រឹងប្រែងបន្តទៀតហើយ»។
បើតាមអនុក្រឹត្យរាជរដ្ឋាភិបាល មេដាយមាស១គ្រឿង(១វិញ្ញាសា) ទទួលបានថវិកាលើកទឹកចិត្ត៤០លានរៀល, មេដាយប្រាក់១គ្រឿងទទួលបាន៣០លានរៀល និងមេដាយសំរឹទ្ធ១គ្រឿង ទទួលបាន១៦លានរៀល៕
