កម្ពុជា-ថៃបានយល់ព្រមពិចារណាបើកច្រកទ្វារព្រំដែនឡើងវិញ ក្រោយពីបានបិទតាំងពីខែមិថុនា មុនមានការផ្ទុះអាវុធដាក់គ្នាចំនួនប្រាំថ្ងៃកាលពីចុងខែកក្កដា។ ភាគីទាំងពីរក៏បានលើកពីផលប៉ះពាល់នៃការបិទព្រំដែនចំពោះពាណិជ្ជកម្មតាមផ្លូវគោកផងដែរ។ ទន្ទឹមនឹងការហាមឃាត់នាំចូលប្រេងឥន្ធនៈ អគ្គិសនី និងផលិតផលកសិកម្ម ការបិទព្រំដែនគោកនេះបានធ្វើឲ្យកសិករ និងពាណិជ្ជករដែលធ្វើអាជីវកម្មឆ្លងដែនកំពុងជួបការលំបាក។
ក្នុងជំនួបពិសេសគណៈកម្មាធិការព្រំដែនទូទៅកម្ពុជា-ថៃ ហៅកាត់ថា GBC នៅខេត្តកោះកុងកាលពីថ្ងៃទី១០ ខែកញ្ញា ភាគីទាំងពីរទំនងជាបានពិភាក្សាគ្នាដោយសង្កត់ធ្ងន់លើការបើកច្រកព្រំដែនឲ្យមានសភាពធម្មតាឡើងវិញ។
ការជជែងពីរឿងនេះចំពេលដែលមានសម្ពាធពីអ្នកវិនិយោគ រួមទាំងក្រុមហ៊ុនជប៉ុន ដែលពឹងផ្អែកលើការដឹកជញ្ជូនទំនិញរបស់ខ្លួនឆ្លងកាត់ព្រំដែនគោក។ រដ្ឋាភិបាលប្រទេសទាំងពីរថ្លឹងថ្លែងលើការបើកព្រំដែនឡើងនេះសម្រាប់តែទំនិញចាំបាច់។
ចាប់តាំងពីថ្ងៃទី២៣ ខែមិថុនា ច្រកព្រំដែនគោកទាំង១៨ រវាងកម្ពុជា-ថៃ ត្រូវបានភាគីថៃផ្ដើមបិទមុន ដែលនេះជាអ្វីធ្វើឡើងក្នុងន័យឆ្លើយតបទៅនឹងភាពតានតឹងរវាងប្រទេសជិតខាងទាំងពីរ ហើយតាំងពីពេលនោះមកច្រកព្រំដែនគោកទាំងនោះមិនបានបើសម្រាប់ពាណិជ្ជកម្មទៀតទេ។
បើតាមអគ្គនាយកដ្ឋានគយ និងរដ្ឋាករកម្ពុជា ទំនិញថៃនាំចូលកម្ពុជាបានធ្លាក់ចុះ១៧%ក្នុងខែមិថុនា ជិត៤៨ភាគរយក្នុងខែកក្កដា និង៣៣ភាគរយក្នុងខែសីហា នេះបើធៀបនឹងខែឧសភា ដែលពេលនោះការផ្ទុះអាវុធឡើងដំបូងបានកើតឡើង។
រដ្ឋាភិបាលថៃឲ្យដឹងដែរថា ពាណិជ្ជកម្មឆ្លងដែនរវាងប្រទេសទាំងពីរបានធ្លាក់ចុះ៩៧%នៅក្នុងខែកក្កដា គិតជាទឹកប្រាក់មានប្រហែល១១លានដុល្លារ។ នេះបើតាមការចុះផ្សាយរបស់ Nikkei Asia។
ជាមួយគ្នានេះដែរទំនិញថៃក៏ប្រឈមនឹងការធ្វើពិហិកាពីប្រជាពលរដ្ឋកម្ពុជា ចាប់តាំងពីការប៉ះទង្គិចគ្នាបានកើតឡើង ហើយផលិតផលរបស់ក្រុមហ៊ុនមានយីហោល្បីៗមួយចំនួនដូចជាក្រុមហ៊ុនប្រេងឥន្ធនៈ PTT ក៏ប្រជាជនខ្មែរពហិការប្រើប្រាស់ដែរ។
ស្ថាននីយប្រេងឥន្ធនៈPTT នៅកម្ពុជាមានសេចក្ដីរាយការណ៍ថាបានស្វែងរកប្រភពនាំចូលប្រេងពីប្រទេសវៀតណាម ហើយម្ចាស់ស្ថានីយខ្លះបានសម្រេចប្ដូរឈ្មោះទៅជា «ស្ថានីយប្រេងឥន្ធនៈសន្តិភាពកម្ពុជា ឬPPC» វិញ ដើម្បីបន្ថយកំហឹងប្រឆាំងនឹងផលិតផលថៃ។
យ៉ាងណាការបើកព្រំដែនឡើងវិញនៅមិនទាន់ច្បាស់ថា ត្រូវធ្វើពេលណានោះទេ។ នាយករដ្ឋមន្ត្រី ហ៊ុន ម៉ាណែត បានគាំទ្រទៅនឹងយន្តការគណៈកម្មាធិការព្រំដែនទូទៅ ដោយហៅជំនួបនាពេលកន្លងមកនេះថាមាន «លទ្ធផលវិជ្ជមាន» ខណៈមេដឹកនាំយោធាថៃលើកឡើងថាការបើកព្រំដែននឹងត្រូវរឹតត្បិតដោយផ្ដោតតែលើ«ការដឹកជញ្ជូនទំនិញ» ហើយក៏បានព្រមានដែរថា គ្រោងការបើកនេះក៏អាចមិនអនុវត្តដែរ បើសិនជាមានការជំទាស់ពីប្រជាពលរដ្ឋ។
គិតចាប់តាំងពីមានភាពតានតឹងរវាងប្រទេសទាំងពីរ ពលករកម្ពុជាជិត១លាននាក់បានត្រឡប់ពីថៃមកកម្ពុជាវិញ។ នេះបើតាមក្រសួងការងារ។ ការវិលត្រឡប់យ៉ាងគំហុកនេះបានធ្វើឲ្យប៉ះពាល់ដល់អាជីវកម្មនៅថៃ និងបានបង្កើនភាពមិនច្បាស់លាស់នៅស្រុកកំណើត ពេលដែលពលករខ្មែររាប់សែននាក់ទាំងនោះកំពុងរកការងារធ្វើ ជាពិសេសការងារក្នុងវិស័យសេដ្ឋកិច្ចក្រៅប្រព័ន្ធ។
កសិករ និងពាណិជ្ជករជំរុញឲ្យមានការបើកព្រំដែន តែថ្នាក់ដឹកនាំនយោបាយនៅមិនទាន់រកឃើញការឯកភាពគ្នា។
លោក ស្រឺត សារ៉ែម វ័យ៤៤ឆ្នាំ រស់នៅស្រុកស្វាយចេក ខេត្តបន្ទាយមានជ័យ ស្វាគមន៍ចំពោះការពិភាក្សាឲ្យបើកព្រំដែនឡើងវិញ ប៉ុន្តែលោកនៅមិនច្បាស់ថា ព្រំដែនអាចបើកវិញមុនការប្រមូលផលដំឡូងមី ឬអត់។
លោកលើកឡើងថា៖ «ខែនេះ ដំឡូងមីកំពុងលូតលាស់។ បើសិនជាព្រំដែនបើក វាល្អ ព្រោះថៃនឹងជួយទិញខ្លះ»។
លោក អិល ឈិញ ប្រធានសមាគមកសិករដំឡូងមី មានប្រសាសន៍ថា ដំឡូងមីកម្ពុជាភាគច្រើននាំទៅវៀតណាម ដើម្បីបំពេញចន្លោះខ្វះខាតរបស់ទីផ្សារថៃគិតចាប់ពីមានការបិទព្រំដែន។ លោកសង្ឃឹមថា ការបើកព្រំដែនឡើងវិញនឹងអនុញ្ញាតឲ្យមានការនាំចូលទៅប្រទេសថៃវិញ ដែលជាប្រយោជន៍ដល់កសិករ បើទោះបីជាថៃមិនមានតម្រូវការភ្លាមៗក៏ដោយ ព្រោះថៃក៏ត្រូវទិញពីកសិកររបស់ខ្លួនដែរ។
អ្នកនាំពាក្យរដ្ឋាភិបាលលោក ប៉ែន បូណា បដិសេធផ្ដល់ព័ត៌មានលម្អិតទាក់ទងនឹងលទ្ធភាពបើកព្រំដែនវិញ ដោយបានណែនាំអ្នកសារព័ត៌មានឲ្យពិនិត្យលើខ្លឹមសារសេចក្ដីថ្លែងការណ៍របស់ GBC វិញ។
អ្នកនាំពាក្យក្រសួងពាណិជ្ជកម្ម មិនបានឆ្លើយតបភ្លាមៗទៅនឹងការសុំអត្ថាធិប្បាយលើទំនោរពាណិជ្ជកម្មនេះដែរ។
ទន្ទឹមនឹងនេះ អាជ្ញាធរថៃបាននិយាយថា ពួកគេនឹងចាប់ផ្ដើមបើកច្រកព្រំដែននៅខេត្តចន្ទបុរី និងត្រាតជាប់ខេត្តបៃលិន បាត់ដំបង ពោធិ៍សាត់ និងកោះកុងរបស់កម្ពុជា។
ការបើកព្រំដែនវិញនេះនឹងត្រូវមានការសម្របសម្រួលជាមួយអាជ្ញាធរគយ និងក្រសួងពាណិជ្ជកម្ម និងឧស្សាហកម្ម ដើម្បីដំណើរការឡើងវិញសម្មភាពពាណិជ្ជកម្មក្រោមវិធានការសុវត្ថិភាព។ នេះបើតាមការចុះផ្សាយរបស់ព័ត៌មានថៃ។
រដ្ឋមន្ត្រីស្ដីទីក្រសួងការពារជាតិថៃ លោក Nattaphon Narkphanit ប្រាប់សារព័ត៌មានក្នុងស្រុកថា ការឆ្លងកាត់ព្រំដែននឹងធ្វើឡើងដោយមានកម្រិត និងចំពោះតែយានយន្តជាក់លាក់មួយចំនួន ដោយផ្ដើមពីពីរទៅបីឡានក្នុងមួយថ្ងៃ ទៅដល់២០ទៅ៣០ឡានក្នុងមួយថ្ងៃ។ លោកមិនបានបញ្ជាក់ច្បាស់ទេថា រថយន្តដឹកទំនិញនឹងត្រូវអនុញ្ញាតឲ្យឆ្លងកាត់ ឬអត់។ លោកថ្លែងថាការបើកឡើងវិញនេះកើតចេញពីការស្នើសុំរបស់ក្រុមពាណិជ្ជករ មិនមែនកើតពីរដ្ឋាភិបាលថៃ ឬកម្ពុជានោះទេ៕
ប្រែសម្រួលពីអត្ថបទភាសាអង់គ្លេស៖ Timeline for Reopening Border With Thailand Unclear; Traders Bare the Brunt
