ភាគីតំណាងសហជីពកម្មករបានស្នើដំឡើងប្រាក់ឈ្នួលអប្បបរមាចំនួន១៤ដុល្លារបន្ថែមលើប្រាក់ឈ្នួលបច្ចុប្បន្ន មានចំនួន២០៤ដុល្លារ ដល់កម្មករនិយោជិតក្នុងផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរនិងកាបូប ជាមួយក្រុមប្រឹក្សាជាតិប្រាក់ឈ្នួលសម្រាប់ឆ្នាំ២០២៥ ប៉ុន្តែនិយោជកថាពួកគេអាចផ្តល់ការដំឡើងបានត្រឹមតែ ១ដុល្លារប៉ុណ្ណោះ។
បន្ទាប់ពីកិច្ចប្រជុំនៅក្រសួងការងារ និងបណ្ដុះបណ្ដាលវិជ្ជាជីវៈ លោក គឹម ចាន់សំណាង អនុប្រធានតំណាងអង្គការវិជ្ជាជីវៈកម្មករនិយោជិត បាននិយាយកាលពីថ្ងៃព្រហស្បតិ៍ថា ការដំឡើងប្រាក់ឈ្នួលចំនួន ១៤ដុល្លារនេះ គឺជាសំណើបឋមសម្រាប់ការពិភាក្សាលើប្រាក់ឈ្នួលរបស់កម្មករនិយោជិត។
លោកបាននិយាយថា តួលេខនេះគឺផ្អែកលើអត្រាអតិផរណាបច្ចុប្បន្ន រួមជាមួយប្រាក់ចំណេញរបស់ក្រុមហ៊ុន និងការកើនឡើងនៃការបញ្ជាទិញ ក៏ដូចជាស្ថានភាពនយោបាយប្រកបដោយសុខសន្តិភាពរបស់ប្រទេស។
លោកនិយាយថា៖ «ពីខាងសហជីព ខ្ញុំគិតថា ១៤ដុល្លារគឺសមហេតុផលណាស់ [ទោះបីជា] អ្វីដែលទទួលយកមិនប្រាកដប្រជាក៏ដោយ។ វាផ្អែកលើការពិភាក្សាបន្ថែមទៀតព្រោះភាគីទាំងពីរមានអំណះអំណាងរៀងខ្លួន។ ប៉ុន្តែយើងអាចរំពឹងថានឹងមានការដំឡើងប្រាក់ឈ្នួលនៅឆ្នាំ២០២៥»។
ប្រាក់ឈ្នួលអប្បបរមាបានកើនឡើងពី ៤០ដុល្លារក្នុងឆ្នាំ១៩៩៧ ដល់ ១៤៥ដុល្លារ ក្នុងឆ្នាំ២០១៥ ហើយបានកើនឡើងជាបន្តបន្ទាប់ទៀតដល់ ២០០ដុល្លារ ក្នុងឆ្នាំ២០២៣ និង ២០៤ដុល្លារ នៅឆ្នាំ២០២៤។
ទោះយ៉ាងណា លោក សំណាង មានការព្រួយបារម្ភថា នៅពេលប្រាក់ឈ្នួលត្រូវបានតំឡើងនោះ កម្មករនិយោជិតនឹងត្រូវបង់ថ្លៃជួល និងទំនិញកាន់តែខ្ពស់ ដែលកត្តាទាំងនេះអាចនឹងធ្វើឲ្យការចំណាយរបស់ពួកគេកើនឡើង។ លោកបានស្នើដល់ម្ចាស់ផ្ទះ និងអាជីវករកុំដំឡើងថ្លៃជួល និងតម្លៃទំនិញហួសហេតុ។
រដ្ឋមន្ត្រីក្រសួងការងារ លោក ហេង សួរ បានប្រាប់អ្នកសារព័ត៌មានថា កិច្ចប្រជុំត្រីភាគីលើកទី៣ របស់ក្រុមប្រឹក្សាជាតិប្រាក់ឈ្នួលអប្បបរមា នឹងត្រូវធ្វើឡើងនៅថ្ងៃទី៦ ខែកញ្ញា ឆ្នាំ២០២៤។ លោកមានប្រសាសន៍ថា ទីប្រឹក្សាប្រាក់ឈ្នួលអប្បបរមាបានពន្យល់ពីភាពប្រែប្រួលនៃលក្ខណៈវិនិច្ឆ័យចំនួន៧ចំណុចដែលត្រូវពិចារណាលើប្រាក់ឈ្នួល ហើយភាគីនីមួយៗបានសិក្សា និងគណនាតួលេខបឋមរៀងៗខ្លួន ដោយតំណាងកម្មករនិយោជិតស្នើសុំ ១៤ដុល្លារ និងនិយោជក ១ដុល្លារ សម្រាប់ឆ្នាំ ២០២៥ ។
លោកហេង សួរ មានប្រសាសន៍ថា៖ «ទាំងនេះគឺជាតួលេខបឋម។ នៅពេលមានកិច្ចប្រជុំជាបន្តបន្ទាប់ គោលជំហរនេះអាចត្រូវបានសម្រុះសម្រួល និងពិភាក្សាបន្ថែមទៀត។ តួលេខអាចនឹងកើនឡើងនិងថយចុះទៅតាមស្ថានភាពជាក់ស្តែងនៅពេលដែលភាគីទាំងពីរបានដាក់ទឡ្ហីករណ៍របស់ពួកគេ»។
លោករដ្ឋមន្ត្រីមានប្រសាសន៍ថា ភាគីទាំងពីរហាក់ដូចជាមានភាពចាស់ទុំ និងការយល់ដឹងអំពីការចរចាប្រាក់ឈ្នួល ហើយរំពឹងថានឹងមានការសម្របសម្រួលបន្ថែមទៀតដើម្បីឱ្យភាគីទាំងពីរស្វែងរកចំណុចរួមមួយនៅក្នុងការចរចាប្រាក់ឈ្នួលឆ្នាំ២០២៥។
ដោយកត់សម្គាល់ថាអ្វីដែលលើសសូន្យគឺជាដំណឹងល្អ លោក ហេង សួរ ជឿថា ការដំឡើងលើស១ដុល្លារអាស្រ័យលើរបៀបដែលភាគីទាំងសងខាងយល់ចិត្តគ្នា។
ប្រសិនបើពួកគេមិនអាចឈានដល់ចំណុចកណ្តាលបានទេ រដ្ឋាភិបាលនឹងសម្រុះសម្រួលដើម្បីឱ្យភាគីទាំងពីរអាចឈានដល់ការស្រុះស្រួលគ្នា។ រដ្ឋាភិបាលក៏នឹងអនុវត្តប្រព័ន្ធបោះឆ្នោតក្នុងកិច្ចប្រជុំចុងក្រោយនៅថ្ងៃទី២៦ ខែកញ្ញា។
លោក ហេង សួរ មានប្រសាសន៍ថា៖ «ទោះជាការដំឡើងប្រាក់ឈ្នួលខ្ពស់ ឬទាបក៏ដោយ ភាគីទាំងពីរបានឯកភាពគ្នាលើការដំឡើងប្រាក់ឈ្នួលអប្បបរមានៅឆ្នាំ២០២៥ ដោយគ្រាន់តែការដំឡើងប្រាក់ឈ្នួល ស្ថិតក្នុងរង្វង់ផ្សេងគ្នាដែលស្ថិតក្នុងចន្លោះហ្នឹង។ និយោជកបន្ថែម ១ដុល្លារ ហើយកម្មករសុំ ១៤ដុល្លារ»។
យោងតាមក្រសួងការងារ ការចរចាប្រាក់ឈ្នួលត្រូវប្រកាន់ខ្ជាប់នូវលក្ខណៈវិនិច្ឆ័យចំនួន៧ចំណុចនៅក្នុងច្បាប់ប្រាក់ឈ្នួលអប្បបរមា រួមមាន ស្ថានភាពគ្រួសារ អាត្រាអតិផរណា ការចំណាយក្នុងការរស់នៅ ផលិតភាព ការប្រកួតប្រជែងរបស់ប្រទេស ស្ថានភាពទីផ្សារការងារ និងកម្រិតចំណេញរបស់វិស័យកាត់ដេរ។
លោក ណាង សុធី អនុប្រធានសហព័ន្ធនិយោជក និងសមាគមពាណិជ្ជកម្មកម្ពុជា លើកឡើងថា សំណើរបស់កម្មករនិយោជិត មានលក្ខណៈសមស្របតាមលក្ខណៈបច្ចេកទេស ប៉ុន្តែនិយោជកត្រូវគិតមួយជ្រុងទៀត ដោយសារពួកគេប្រឈមនឹងការលំបាកជាមួយកម្ចីពីធនាគារ។
លោកនិយាយថា៖ «ឧទាហរណ៍អត្រាការប្រាក់ នៅពេលដែលប្រជាជនសាមញ្ញខ្ចីលុយពីធនាគារអត្រាការប្រាក់ទាប ប៉ុន្តែពេលម្ចាស់អាជីវកម្មខ្ចីប្រាក់ពីធនាគារវិញនោះអត្រាការប្រាក់ខ្ពស់ដោយសារសេដ្ឋកិច្ច»។
ដូច្នេះការដំឡើងប្រាក់ឈ្នួល ១ដុល្លារគ្រាន់តែជាការចាប់ផ្តើមនៃការចរចាសម្រាប់កិច្ចប្រជុំបន្ទាប់ ហើយវាមិនមែនជាចំនួនចុងក្រោយសម្រាប់ការដំឡើងប្រាក់ឈ្នួលអប្បបរមានោះទេ។
លោក សុធី និយាយាថា៖ «ប្រាក់ឈ្នួលនឹងកើនឡើងព្រោះវាជាគោលនយោបាយរបស់រដ្ឋាភិបាល ប៉ុន្តែសម្រាប់យើងសំណើ ១ដុល្លារគឺជាការចាប់ផ្តើមដ៏ល្អ»។
លោកបន្ថែមថា កម្មករនិយោជិតបានមើលឃើញថាមានកំណើននៃការវិនិយោគ ប៉ុន្តែការពិតអ្នកវិនិយោគដែលមកមិនទាន់សម្រេចចិត្តវិនិយោគទេ ដែលកត្តានេះគឺជាបញ្ហា។ ជាឧទាហរណ៍ បើប្រៀបធៀបទៅនឹងប្រទេសផ្សេងទៀតដូចជាប្រទេសវៀតណាមនោះ ប្រាក់ឈ្នួលអប្បបរមាក្នុងវិស័យកាត់ដេររបស់កម្ពុជាគឺ «ប្រសើរជាង» ។
លោក ព្រំ សារ៉ាត់ វ័យ៤៣ឆ្នាំ បានប្រាប់ ខេមបូចា ថា លោកបានបម្រើការងារនៅរោងចក្រ យីដា អស់រយៈពេល៩ឆ្នាំ ដោយទទួលបានប្រាក់ឈ្នួល ២០៤ដុល្លារក្នុងមួយខែ។ លោកសង្ឃឹមថាប្រាក់ឈ្នួលនឹងកើនដល់២៥០ដុល្លារ ដែលគ្រប់គ្រាន់សម្រាប់ការចំណាយប្រចាំថ្ងៃរបស់កម្មករ។
លោកបានអះអាងថា ការចំណាយប្រចាំថ្ងៃរបស់ពួកគេមានកម្រិតខ្ពស់ ដោយសារពួកគេត្រូវទូទាត់កម្ចីធនាគារ ថ្លៃសិក្សា និងវិក្កយបត្រផ្សេងៗ។
លោកនិយាយថា៖ «ការចំណាយគ្រួសាររបស់ខ្ញុំយ៉ាងហោចណាស់ ១០ដុល្លារក្នុងមួយថ្ងៃ ហើយនេះគឺសម្រាប់តែអាហារ និងការចំណាយសម្រាប់កូនៗរបស់ខ្ញុំប៉ុណ្ណោះ។ ខ្ញុំមិនបានគិតអំពីការបង់ប្រាក់កម្ចីធនាគាររបស់ខ្ញុំទេ»។
អ្នកស្រី ម៉ិច សៀងហៃ វ័យ៣៨ឆ្នាំ ដែលបានបម្រើការងារនៅរោងចក្រ ស៊ិន តៃ អស់រយៈពេល១២ ឆ្នាំ រំពឹងថានឹងឃើញការដំឡើងប្រាក់ឈ្នួលអប្បបរមាចាប់ពី ១០ដុល្លារឡើងទៅ នៅឆ្នាំក្រោយ ដោយសារការកើនឡើងនៃថ្លៃទំនិញ។
អ្នកស្រីបានប្រាប់ ខេមបូចា ថា៖ «ប្រាក់ឈ្នួលអប្បបរមាបច្ចុប្បន្ននឹងមិនអាចបំពេញតម្រូវការប្រចាំថ្ងៃបានទេ ប្រសិនបើវាត្រូវបានកាត់ចេញពីថ្លៃជួល និងការចំណាយប្រចាំថ្ងៃ»។
អ្នកស្រី សៀងហៃ ចង់ឱ្យក្រសួង និងភាគីពាក់ព័ន្ធសិក្សាពីការដំឡើងប្រាក់ឈ្នួលអប្បបរមាឱ្យបានត្រឹមត្រូវ ក៏ដូចជាការកើនឡើងតម្លៃ នៃតម្រូវការប្រចាំថ្ងៃ។ អ្នកស្រីបាននិយាយថា ប្រសិនបើប្រាក់ឈ្នួលរបស់ពួកគេត្រូវបានដំឡើង ប៉ុន្តែតម្លៃទំនិញក៏ឡើងដូចគ្នានោះ ប្រាក់ឈ្នួលថ្មីនឹងមិនអាចរ៉ាប់រងលើការចំណាយប្រចាំថ្ងៃបានទេ។
អ្នកស្រី យ៉ាង សុភ័ណ្ឌ ប្រធានសម្ព័ន្ធសហជីពកម្ពុជា បានប្រាប់ ខេមបូចា ថា ការសិក្សាអំពីប្រាក់ឈ្នួលអប្បបរមារបស់សហជីពកម្មករ និងអង្គការអន្តរជាតិជាច្រើន បានស្នើសុំដំឡើងប្រាក់ឈ្នួល ២២៥ដុល្លារ ដែលនឹងអាចរ៉ាប់រងលើការចំណាយរបស់កម្មករ។
សហជីពបានចេញនូវសំណើរួមគ្នាមួយ ដោយអំពាវនាវឱ្យដំឡើងប្រាក់ឈ្នួល ៧ភាគរយ ស្មើនឹង ១៤ដុល្លារ ដើម្បីបូកបន្ថែមលើប្រាក់ឈ្នួលបច្ចុប្បន្ន ដោយសិក្សាពីសេដ្ឋកិច្ច និងបំពេញតាមលក្ខណៈវិនិច្ឆ័យទាំង៧ចំណុច ក្នុងច្បាប់ប្រាក់ឈ្នួលអប្បបរមា៕
ប្រែសម្រួលពីអត្ថបទភាសាអង់គ្លេស៖ Unions Seek $14 Rise, Employers $1, in Second 2025 Minimum Wage Meeting
