សាលាឧទ្ធរណ៍បន្តបើកសវនាការលើ លោក កឹម សុខា អតីតប្រធានគណបក្សប្រឆាំង នៅព្រឹកថ្ងៃទី៨ ខែមេសា ឆ្នាំ២០២៦ ពាក់ព័ន្ធនឹងបទក្បត់ជាតិប៉ុនប៉ងផ្ដួលរំលំរដ្ឋាភិបាល បន្ទាប់ពីពន្យារពេលជាច្រើនលើក។
សាលាឧទ្ធរណ៍បានចាប់ផ្តើមសវនាការនៅថ្ងៃទី៣០ ខែមករា ឆ្នាំ២០២៤ ប៉ុន្តែដំណើរការនីតិវិធីត្រូវបានពន្យារពេលបីលើកមុនពេលឈានដល់ដំណាក់កាលសន្និដ្ឋាន ដែលដំបូងឡើយត្រូវបានគ្រោងនឹងចាប់ផ្តើមនៅខែកញ្ញា ឆ្នាំ២០២៤ ប៉ុន្តែចាប់តាំងពីពេលនោះមកត្រូវបានពន្យារពេលរហូតដល់ខែធ្នូ ឆ្នាំ២០២៥។
សាលាឧទ្ធរណ៍បានពន្យារពេលលើកទីមួយនៅថ្ងៃទី១៩ ខែកញ្ញា ឆ្នាំ២០២៤។ ការពន្យារពេលលើកទីពីរនៅថ្ងៃទី១៤ ខែសីហា ឆ្នាំ២០២៥ និងការពន្យារពេលលើកទីបីនៅថ្ងៃទី១៨ ខែធ្នូ ឆ្នាំ២០២៥។
កាលពីថ្ងៃទី៣ ខែមីនា ឆ្នាំ២០២៣ សាលាដំបូងរាជធានីភ្នំពេញ បានផ្តន្ទាទោសអតីតប្រធានគណបក្សប្រឆាំង លោក កឹម សុខា ដាក់ពន្ធនាគាររយៈពេល២៧ឆ្នាំ ពីបទក្បត់ជាតិប៉ុនប៉ងផ្ដួលរំលំរដ្ឋាភិបាល។
នៅពេលនោះ ប្រធានក្រុមប្រឹក្សាចៅក្រម លោក កូយ សៅ បានប្រកាសសាលក្រមថា លោក កឹម សុខា ត្រូវផ្តន្ទាទោសឱ្យជាប់ពន្ធនាគាររយៈពេល២៧ឆ្នាំ ពីបទសន្និដ្ឋិភាពជាមួយបរទេសតាមមាត្រា៤៣៩ និងមាត្រា៣៤៣នៃក្រមព្រហ្មទណ្ឌ។
លោកប្រធានក្រុមប្រឹក្សាចៅក្រម បានប្រកាសទោសបន្ថែមទៀតថា លោក កឹម សុខា ត្រូវបានដកសិទ្ធិជាពលរដ្ឋជាស្ថាពរ ដោយដកសិទ្ធិបោះឆ្នោត ដកសិទ្ធិឈរឈ្មោះឱ្យគេបោះឆ្នោតឱ្យ និងដកសិទ្ធិធ្វើនយោបាយ។
លើសនេះទៀត សាលក្រមរបស់សាលាដំបូងរាជធានីភ្នំពេញបានរារាំងលោក កឹម សុខា មិនឱ្យចាកចេញពីផ្ទះ ឬទំនាក់ទំនងដោយផ្ទាល់ ឬតាមប្រព័ន្ធអ៊ីនធឺណិតជាមួយបុគ្គលណាទាំងអស់ក្រៅពីសមាជិកគ្រួសារ លើកលែងតែមានការអនុញ្ញាតពីព្រះរាជអាជ្ញា។
លោក កឹម សុខា ដែលជាអតីតប្រធានគណបក្សសង្គ្រោះជាតិ ត្រូវបានចាប់ខ្លួនកាលពីថ្ងៃទី៣ ខែកញ្ញា ឆ្នាំ២០១៧ និងត្រូវបានចោទប្រកាន់ពីបទសមគំនិតជាមួយបរទេស ដែលតាមចោទថា សហការជាមួយសហរដ្ឋអាមេរិកប៉ុនប៉ងធ្វើបដិវត្តន៍ពណ៌ ដើម្បីផ្តួលរំលំរដ្ឋាភិបាល នៃគណបក្សប្រជាជនកម្ពុជាដែលកំពុងកាន់អំណាច។
គណបក្សសង្គ្រោះជាតិត្រូវបានរំលាយតាមដីការបស់តុលាការកំពូលកាលពីឆ្នាំ២០១៧ ដោយចោទប្រកាន់ថាជាយានជំនិះសម្រាប់ការប៉ុនប៉ងធ្វើបដិវត្តន៍ដូចគ្នានោះ។ ជាផ្នែកនៃសេចក្តីសម្រេចនេះ សមាជិកគណបក្សសង្គ្រោះជាតិជាង១០០ នាក់ត្រូវបានរារាំងមិនឱ្យធ្វើនយោបាយរយៈពេលប្រាំឆ្នាំ៕
