កម្ពុជា និងថៃ នឹងជួបប្រជុំគ្នានៅរាជធានីភ្នំពេញ នៅថ្ងៃទី១៤ ខែមិថុនា ក្នុងគោលបំណងចុងក្រោយ ដើម្បីកាត់បន្ថយភាពតានតឹងបន្ថែមទៀត បន្ទាប់ពីមានការប៉ះទង្គិចគ្នានៅព្រំដែនកាលពីសប្តាហ៍មុន ខណៈដែលភាគីទាំងពីរបានចោទគ្នាទៅវិញទៅមកចំពោះការបាញ់ប្រហារដោយកាំភ្លើង ដែលបណ្តាលឱ្យទាហានខ្មែរស្លាប់ម្នាក់ នៅជិតព្រំដែនភាគខាងជើងនៃខេត្តព្រះវិហារ។ យោងតាមក្រសួងការបរទេសកម្ពុជា។
កិច្ចប្រជុំនេះធ្វើឡើងបន្ទាប់ពីកិច្ចពិភាក្សាទ្វេភាគី រួមទាំងរវាងមន្ត្រីយោធាជាន់ខ្ពស់ និងការផ្លាស់ប្តូរខ្លីៗរវាងបេសកជននៃក្រសួងការបរទេសនៅខាងក្រៅវេទិកាមួយក្នុងប្រទេសជប៉ុនកាលពីថ្ងៃសុក្រ។ ភាគីទាំងពីរបានសន្យាការពារកុំឱ្យមានការផ្ទុះឡើងទៀត។
ទោះជាយ៉ាងណា វោហាសាស្ត្រមិនទាន់បាត់បង់ទាំងស្រុងនៅឡើយទេ។ កាលពីថ្ងៃសៅរ៍ អតីតនាយករដ្ឋមន្ត្រីកម្ពុជា លោក ហ៊ុន សែន ដែលបច្ចុប្បន្នជាប្រធានព្រឹទ្ធសភា និងជាឪពុករបស់នាយករដ្ឋមន្ត្រីបច្ចុប្បន្នលោក ហ៊ុន ម៉ាណែត បានចាត់ទុកអ្នករិះគន់ជំហរព្រំដែនកម្ពុជាថា៖ «ពួកជ្រុលនិយមថៃ»។ ទំព័រហ្វេសប៊ុករបស់គាត់ក្រោយមកត្រូវបានគេរាយការណ៍ថាត្រូវបានបិទនៅក្នុងប្រទេសថៃ។
លោក ជុំ សុន្ទរី អ្នកនាំពាក្យក្រសួងការបរទេស បានថ្លែងថា ក្នុងជំនួបទ្វេភាគីនៅទីក្រុង តូក្យូ ថ្ងៃទី៣០ ឧសភា ២០២៥ រដ្ឋមន្ត្រីការបរទេសរបស់ប្រទេសទាំងពីរ បានឯកភាពប្រកាន់ស្មារតីនៃការគោរពអនុស្សរណៈនៃការយោគយល់គ្នាឆ្នាំ២០០០ ស្តីពីការវាស់វែង និងខណ្ឌសីមាព្រំដែនគោកកម្ពុជា-ថៃ និងប្រើប្រាស់គ្រប់យន្តការដែលមានស្រាប់ ជាពិសេសជំរុញយន្តការ គណៈកម្មការចម្រុះខណ្ឌសីមា និងបោះបង្គោលព្រំដែនគោក (JBC) ជួបពិភាក្សាការងារគ្នាឱ្យបានឆាប់តាមដែលអាចធ្វើទៅបាន ដើម្បីដោះស្រាយបញ្ហាព្រំដែន ដោយផ្ដោតសំខាន់ទៅលើតំបន់ដែលបានកើតហេតុនាពេលថ្មីនេះ។
លោក សុន្ទរី លើកឡើងថា៖ «ក្នុងស្មារតីនេះ កម្ពុជាបានឯកភាពធ្វើជាម្ចាស់ផ្ទះរៀបចំកិច្ចប្រជុំគណៈកម្មការចម្រុះខណ្ឌសីមា និងបោះបង្គោលព្រំដែនគោក (JBC) កម្ពុជា-ថៃ នាថ្ងៃទី១៤ ខែមិថុនា ឆ្នាំ២០២៥ នៅរាជធានីភ្នំពេញ»។ លោកបន្តថា ក្រសួងការបរទេស និងសហប្រតិបត្តិការអន្តរជាតិ បានជូនព័ត៌មាននេះជាផ្លូវការទៅភាគីថៃរួចហើយ។
សូមបញ្ជាក់ថា ជាមួយនឹងការប្ដេជ្ញាដ៏មោះមុតក្នុងការការពារអធិបតេយ្យ និងបូរណភាពទឹកដីរបស់ខ្លួន កម្ពុជាប្រកាន់ជំហររឹងមាំ ក្នុងការប្រែក្លាយតំបន់ព្រំដែនជាមួយប្រទេសជិតខាង ឱ្យក្លាយទៅជាតំបន់សន្តិភាព មិត្តភាព កិច្ចសហប្រតិបត្តិការ និងការអភិវឌ្ឍ ដើម្បីជាផលប្រយោជន៍របស់ប្រទេស និងប្រជាជនរៀងៗខ្លួន។
លោកបន្ថែមថា៖ «កម្ពុជាប្រកាន់ជំហរដោះស្រាយបញ្ហាព្រំដែនដោយសន្តិវិធី តាមរយៈការប្រើប្រាស់យន្តការបច្ចេកទេស និងច្បាប់អន្តរជាតិជាគោល»។
លោកស្រី ម៉ាលី សុជាតា អ្នកនាំពាក្យក្រសួងការពារជាតិ លើកឡើងថា ស្ថានភាពតាមបន្ទាត់ព្ពំដែន ន្ទថ្ងៃទើ៣ ដែមិថុនា ឆ្នាំ២០២៥ គិតត្រឹមម៉ោងង ១៨:០០នាទី ចំពោះសភាពការណ៍នៅតាមបណ្តោយព្រំដែន មានសភាពស្ងប់ស្ងាត់ធម្មតា។
ក្រុមមការងារគណៈកម្មាធិការព្រំដែនថ្នាក់ភូមិភាគកម្ពុជា-ថៃ បានប្រជុំពិភាក្សាគ្នា ដើម្បីត្រៀមរៀបចំកិច្ចប្រជុំគណៈកម្មការព្រំដែនថ្នាក់ភូមិភាគកម្ពុជា-ថៃ (RBC) លើកទី២៦ ដែលគ្រោងនឹងធ្វើនៅថ្ងៃទី២៦-២៧ ខែមិថុនា ឆ្នំ២០២៥ ខាងមុខនេះ។
លោក ប៉ែន បូណា អ្នកនាំពាក្យរាជរដ្ឋាភិបាលកម្ពុជា បានឆ្លើយតបតាមប្រព័ន្ធតេឡេក្រាមថា លោកចង់បញ្ជាក់ពីជំហររបស់រាជរដ្ឋាភិបាលកម្ពុជាថាទាំងនាយករដ្ឋមន្ត្រី ប្រធានព្រឹទ្ធសភា និងក្រសួងការបរទេសកម្ពុជាបានបញ្ជាក់ជំហរច្បាស់លាស់ណាស់ចំពោះការដោះស្រាយបញ្ហាព្រំដែនជាមួយថៃ «ជំហររបស់យើង គឺយើងប្រើប្រាស់គ្រប់យន្តការ»។
លោកបានបញ្ចាក់ថា៖ ក្នុងនោះមានបីសំខាន់ៗ ទី១ ប្រើប្រាស់យន្តការការទូត ការចរចា ដែលហៅថា JBC នេះជាយន្តការដែលមានស្រាប់ដោយសន្តិវិធី ទី២ ប្រើប្រាស់ផ្លូវច្បាប់អន្តរជាតិ(តុលាការអន្តរជាតិ) និងទី៣ យើងត្រៀមកម្លាំងយោធាក្នុងការពារបូរណភាពទឹកដី ក្នុងករណីដែលមានការឈ្លានពាន។
Phumtham Wechayachai រដ្ឋមន្ត្រីក្រសួងការពារជាតិថៃ បានបញ្ជាក់ថា ប្រទេសថៃកំពុងធ្វើការដើម្បីរក្សាជម្លោះកុំឱ្យកើនឡើងដល់កម្រិតនៃតុលាការ ICJ ដោយផ្តោតលើការគ្រប់គ្រងចំណុចតានតឹង និងប្រកាន់ខ្ជាប់នូវអនុស្សរណៈនៃការយោគយល់គ្នា (MoU) ឆ្នាំ២០០០ រវាងប្រទេសទាំងពីរ ដែលលោកបានលើកឡើងថា ផ្តល់នូវផ្លូវត្រង់ជាងក្នុងការដោះស្រាយ។ យោងតាមសារព័ត៌មាន The Nation។
លោកបានថ្លែងដោយសំដៅដល់ប្រទេសកម្ពុជាថា៖ «យើងត្រូវតែជៀសវាងការចូលក្នុងការលេងហ្គេមរបស់ពួកគេ»។ លោកបន្តថា៖ «ការធ្វើដូច្នេះអាចធ្វើអន្តរកម្មបញ្ហាជាអន្តរជាតិ។ នេះជាបញ្ហាសំខាន់របស់ជាតិ ដែលប៉ះពាល់ដោយផ្ទាល់ដល់ឯករាជ្យភាព និងបូរណភាពទឹកដីរបស់ប្រទេសថៃ»។
លោកបានកត់សម្គាល់ថា ភាគីទាំងពីរបានយល់ព្រមបើកកិច្ចប្រជុំគណៈកម្មការព្រំដែនចម្រុះកម្ពុជា-ថៃ (JBC) នៅរាជធានីភ្នំពេញ នៅថ្ងៃទី១៤ ខែមិថុនា ឆ្នាំ២០២៥។
នៅចន្លោះឆ្នាំ២០០៨ និង២០១១ កងទ័ពកម្ពុជា-ថៃបានប៉ះទង្គិចគ្នានៅតំបន់ប្រាសាទព្រះវិហារ ប្រាសាទតាមាន់ធំ ប្រាសាទតាមាន់តូច និងប្រាសាទតាក្របី។ ហេតុការណ៍នេះកើតឡើងក្រោយពេលដែលអង្គការយូណេស្កូបានដាក់បញ្ចូលប្រាសាទព្រះវិហារជាសម្បត្តិបេតិកភណ្ឌពិភពលោក៕
