ក្រុមមេធាវីការពារអនុប្រធានគណបក្សភ្លើងទៀន លោក ថាច់ សេដ្ឋា ដែលប្រឈមនឹងការជាប់ពន្ធនាគារដែលតាមចោទថា បានចេញសែកគ្មានសាច់ប្រាក់នោះ បានអះអាងថា ព្រះរាជអាជ្ញាផ្អែកលើភ័ស្តុតាង «ក្លែងក្លាយ» ដើម្បីចោទប្រកាន់កូនក្តី អំឡុងពេលធ្វើសេចក្តីសន្និដ្ឋានចុងក្រោយនៅសាលាដំបូងរាជធានីភ្នំពេញកាលពីថ្ងៃពុធ។
លោក ថាច់ សេដ្ឋា ប្រឈមនឹងការផ្ដន្ទាទោសជាប់ពន្ធនាគារពី២ឆ្នាំទៅ៥ឆ្នាំ និងពិន័យជាប្រាក់ជាអតិបរមា១០លានរៀល (២ ៤៣៧ដុល្លារ) តាមមាត្រា២៣១នៃច្បាប់ស្តីពីឧបករណ៍អាចជួញដូរបាននិងប្រតិបត្តិការទូទាត់សងប្រាក់។
តុលាការគ្រោងប្រកាសសាលក្រមនៅថ្ងៃទី ២១ ខែកញ្ញា។ លោក ថាច់ សេដ្ឋា ដែលត្រូវបានបដិសេធមិនឱ្យនៅក្រៅឃុំនោះ ត្រូវបានឃុំខ្លួនតាំងពីខែមករា។
លោក ថាច់ សេដ្ឋា ត្រូវបានចាប់ខ្លួនកាលពីខែមករា ដែលតាមចោទថា ដោយសារចេញសែកគ្មានសាច់ប្រាក់ចំនួន៥ កាលពីឆ្នាំ២០១៩ និងខកខានមិនបានបង្ហាញខ្លួននៅចំពោះមុខចៅក្រមស៊ើបសួរក្នុងឆ្នាំ២០២១ ដើម្បីដោះស្រាយបណ្តឹង ដែលប្តឹងដោយឈ្មោះ ហាយ វណ្ណរិន ជាម្ចាស់ហាងបញ្ចាំ រិន ឆាយ ។
សារព័ត៌មានសំឡេងប្រជាធិបតេយ្យ(VOD) ធ្លាប់បានរាយការណ៍ថា លោក វណ្ណរិន បានបរិច្ចាគប្រាក់ដល់សមាគមមួយ ទីដែលភរិយារបស់លោកនាយករដ្ឋមន្ត្រី ហ៊ុន ម៉ាណែត មានតួនាទីជាថ្នាក់ដឹកនាំ ហើយលោកក៏មានទំនាក់ទំនងអាជីវកម្មទៅនឹងគណបក្សកាន់អំណាចផងដែរ។
ក្រសួងពាណិជ្ជកម្មបានបង្ហាញឈ្មោះលោក ហាយ វណ្ណរិន ជានាយកក្រុមហ៊ុន ឌីនិត ខមមើសល ដែលរួមមានឈ្មោះ ឌី សុខី ជាប្រធានផងដែរ។ លោកស្រីគឺជាភរិយារបស់លោក ហ៊ុន ម៉ានិត ជាប្អូនប្រុសរបស់លោកនាយករដ្ឋមន្ត្រី ហ៊ុន ម៉ាណែត។ លោក វណ្ណរិន មិនអាចទាក់ទងសុំការបំភ្លឺបានទេ។
ក្នុងពេលធ្វើសេចក្តីសន្និដ្ឋានចុងក្រោយ លោក ថាច់ សេដ្ឋា បានបដិសេធរាល់ការចោទប្រកាន់ ហើយបាននិយាយថា លោកមិនដែលចេញមូលប្បទានប័ត្រនោះទេ។ ដំបូងឡើយ លោកបានទទួលប្រាក់កម្ចីចំនួន ១៨ ០០០ដុល្លារពីហាងបញ្ចាំ ដោយដាក់បញ្ចាំបណ្ណកម្មសិទ្ធិដីដែលឈ្មោះរបស់លោកសម្រាប់អចលនទ្រព្យដែលជាកម្មសិទ្ធិរបស់សហគមន៍ខ្មែរកម្ពុជាក្រោម ដែលលោកក៏ជាប្រធានសមាគមនេះផងដែរ។
ក្រុមមេធាវីរបស់លោក ថាច់ សេដ្ឋា ធ្លាប់បាននិយាយថា លោក សេដ្ឋា ធ្លាប់ចេញឲ្យលោក វណ្ណរិន នូវមូលប្បទានប័ត្រ ដែលបានចុះហត្ថលេខារួចមួយចំនួន ប៉ុន្តែទុកចំហកាលបរិច្ចេទនិងទំហំទឹកប្រាក់ ដើម្បីទុកឱ្យម្ចាស់ហាងបញ្ចាំបំពេញបន្ថែមនៅពេលក្រោយ និងបំពេញការទូទាត់ប្រចាំខែ។ ប៉ុន្តែនៅពេលដែលគណបក្សសង្គ្រោះជាតិត្រូវបានរំលាយតាមដីការបស់តុលាការកំពូលក្នុងឆ្នាំ២០១៧ លោក ថាច់ សេដ្ឋា ដែលពេលនោះជាតំណាងរាស្រ្តជាប់ឆ្នោតរបស់គណបក្សសង្គ្រោះជាតិបានបាត់បង់តំណែង និងប្រាក់ខែសភារបស់លោក។ លោក សេដ្ឋា អះអាងថា លោកបានប្រាប់លោក ហាយ វណ្ណរិន ថា លោកនឹងបង់ប្រាក់ឱ្យដោយឡែកវិញ ប៉ុន្តែមូលប្បទានប័ត្រខ្លះនៅស្ថិតក្នុងដៃរបស់លោក វណ្ណរិន នៅឡើយ។
លោក សំ សុគង់ មេធាវីការពារបានលើកជាសំណួរថា៖ «សែកត្រូវបានចេញនៅឆ្នាំ២០១៩ហេតុអ្វីបានជាគេទើបតែចាប់ខ្លួនគាត់នៅឆ្នាំ២០២៣?»។
ព្រះរាជអាជ្ញារង ប្លង់ សុផល បានអះអាងថា លោក ថាច់ សេដ្ឋា បានចេញសែក ដោយចែករំលែកសែកថតចម្លង ដែលមានទាំងហត្ថលេខារបស់លោក ថាច់ សេដ្ឋា ផងដែរ។ លោក ប្លង់ សុផល ក៏បានបង្ហាញនូវលិខិតមួយច្បាប់ពីស្ថាប័នដែលចេញមូលប្បទានប័ត្រ គឺធនាគារពាណិជ្ជកម្មក្រៅប្រទេស(FTB) ដោយបញ្ជាក់ថា គណនីរបស់លោក សេដ្ឋា «គ្មានប្រាក់»នៅពេលដែលចេញមូលប្បទានប័ត្រ។
លោក ប្លង់ សុផល មានប្រសាសន៍ថា៖ «ជនជាប់ចោទបានប្រព្រឹត្តបទល្មើសជុំវិញឧបករណ៍អាចជួញដូរបាន និងប្រតិបត្តិការទូទាត់សងប្រាក់ សូមចៅក្រមពិចារណាផ្ដន្ទាទោសតាមច្បាប់»។
លោក លី ប៉ាត់ទ្រី មេធាវីរបស់ដើមបណ្តឹងបានមានប្រសាសន៍ថា លោក សេដ្ឋា បានជំពាក់ប្រាក់កូនក្តីលោកចំនួន ៣៣ ៤០០ដុល្លារគិតទាំងដើមទាំងការ។ លោក លី ប៉ាត់ទ្រី បានបង្ហាញនូវឯកសារធនាគារ FTB ហើយបានមានប្រសាសន៍ថា កូនក្តីរបស់លោកបានស្នើសុំបន្ថែម ២០ ០០០ដុល្លារជាសំណងជំងឺចិត្ត។
លោកបានបន្តថា៖ «មានភ័ស្តុតាងគ្រប់គ្រាន់ សូមលោកចៅក្រមផ្តន្ទាទោសជនជាប់ចោទពីបទមិនបំពេញកាតព្វកិច្ចចំពោះឧបករណ៍អាចជួញដូរ»។
ដោយឈរតែម្នាក់ឯងនៅក្នុងឯកសណ្ឋានពណ៌ទឹកក្រូចដែលសម្គាល់ថា លោកគឺជាជនជាប់ចោទ លោក ថាច់ សេដ្ឋា បានស្នើសុំឱ្យចៅក្រមទម្លាក់ចោលការចោទប្រកាន់ទាំងអស់។ លោកមានប្រសាសន៍ថា លោកមិនដែលចេញមូលប្បទានប័ត្រទេ ហើយលោកកត់សម្គាល់ថា សែកយកមកចោទប្រកាន់លោក គឺគ្រាន់តែជាសែកថតចម្លងប៉ុណ្ណោះ។ តុលាការបានច្រានចោលសំណើម្តងហើយម្តងទៀតៗរបស់លោក ថាច់ សេដ្ឋា ឲ្យបង្ហាញមូលប្បទានប័ត្រច្បាប់ដើម អំឡុងពេលសវនាការ។
លោក ថាច់ សេដ្ឋា បានលើកឡើងថា៖ «យើងគោរពសាសនាព្រះពុទ្ធ សូមលោកចៅក្រមប្រកាន់ខ្ជាប់នូវសីលធម៌ និងផ្តល់យុត្តិធម៌ដើម្បីសេរីភាព និងគោរពសិទ្ធិមនុស្ស»។
លោក សឺន ជុំជួន មេធាវីការពារក្តីរបស់លោក ថាច់ សេដ្ឋា មានប្រសាសន៍ថា មូលប្បទានប័ត្រចំនួនប្រាំសន្លឹកនោះ គឺ «ក្លែងក្លាយ» ហើយទាមទារឱ្យតុលាការ និងមេធាវីដើមបណ្តឹងបង្ហាញមូលប្បទានប័ត្រច្បាប់ដើម។
លោក ជុំជួន ថ្លែងថា៖ «សែកដែលយកមកចោទប្រកាន់លោក ថាច់ សេដ្ឋា គឺជាសែកក្លែងក្លាយ ហើយដើម្បីភាពបរិសុទ្ធ ដើមបណ្តឹងគួរតែយកសែកច្បាប់ដើមមក»។
លោក ជូង ជូងី មេធាវីការពារក្តីម្នាក់ទៀតរបស់លោក ថាច់ សេដ្ឋា បានជំទាស់ថា សែកទាំងប្រាំសន្លឹកនេះ និងរបាយការណ៍របស់ធនាគារ ដែលមិនមានហត្ថលេខារបស់លោក ថាច់ សេដ្ឋា មិនអាចប្រើប្រាស់ជាភ័ស្តុតាងបានទេ។
លោកបានបន្តថា៖ «របាយការណ៍ធនាគារមិនមានហត្ថលេខារបស់គាត់ [ថាច់ សេដ្ឋា] ហើយឯកសារចម្លងក៏មិនអាចប្រើជាភស្តុតាងបានទេ»។ លោកបន្ថែមថា៖ «ការយកសែក ឬសែកថតចម្លងធ្វើជាភស្តុតាង ដើម្បីចោទប្រកាន់កូនក្តីរបស់ខ្ញុំ គឺជាល្បិចកលទុច្ចរិត»។
លោកស្រី ធីម សុភាព ជាមេធាវីរបស់ដើមបណ្តឹងបានឆ្លើយតបថា ភ័ស្តុតាងទាំងអស់ដែលចាំបាច់ ដើម្បីបញ្ជាក់លើសំណុំរឿងរបស់លោក ថាច់ សេដ្ឋា ដែលបានចេញសែកគ្មានសាច់ប្រាក់នោះ គឺលិខិតរបស់ធនាគារ FTB ដែលបញ្ជាក់ថា លោក សេដ្ឋា មិនមានប្រាក់នៅក្នុងគណនីរបស់លោកទេ។
លោកស្រីបញ្ជាក់ថា៖ «មិនចាំបាច់ពិភាក្សាអំពីមូលប្បទានប័ត្រ [មូលប្បទានប័ត្រច្បាប់ដើម] ទេ ពីព្រោះធនាគារបានចេញលិខិតផ្ទៀងផ្ទាត់ថា គណនីធនាគាររបស់គាត់មិនមានប្រាក់ទេក្នុងឆ្នាំ២០១៩»។
អ៊ីម៉ែលដែលផ្ញើទៅកាន់អាសយដ្ឋានលើគេហទំព័ររបស់ធនាគារ FTB ហើយត្រូវបានបដិសេធ ហើយនៅពេលដែល ខេមបូចា ទាក់ទងទៅកាន់ផ្នែកទទួលទូរស័ព្ទរបស់ធនាគារ បុគ្គលិកម្នាក់បានបដិសេធមិនភ្ជាប់ទូរស័ព្ទ ខេមបូចា ទៅកាន់អ្នកនាំពាក្យទេ។
លោក គីមសួរ ភិរិទ្ធ អ្នកនាំពាក្យគណបក្សភ្លើងទៀន បានថ្លែងថា លោកសង្ឃឹមថា តុលាការនឹងដោះលែងលោក ថាច់ សេដ្ឋា ពីព្រោះដើមចមនៃសំណុំរឿង គឺស្ថិតនៅក្នុងជម្លោះរដ្ឋប្បវេណី ដែលឥឡូវនេះបានក្លាយជារឿងនយោបាយ។ លោកបានបន្ថែមថា៖ «វាពិបាកនិយាយ [ទម្លាក់ការចោទប្រកាន់] ព្រោះវាពាក់ព័ន្ធនឹងនយោបាយ»៕
ប្រែសម្រួលពីអត្ថបទភាសាអង់គ្លេស៖ Candlelight Leader Thach Setha’s Lawyers Decry “Fake” Evidence in Trial’s Closing Arguments