ជម្លោះព្រំដែន

យ៉ាងហោចណាស់ យោធិនកម្ពុជាចំនួន៤នាក់បានរងរបួស ដោយសារអម្បែងគ្រាប់ ដែលផ្ទុះនៅពីក្រោយកងកម្លាំងកម្ពុជាកំពុងដើរល្បាត បន្ទាប់ពួកគេបានជួបជាមួយនឹងក្រុមល្បាតរបស់យោធាថៃដែលដើរល្បាតនៅម្ខាងទៀតលួសបន្លា នៅថ្ងៃអាទិត្យ ទី៥ ខែកក្កដា ឆ្នាំ២០២៦ នៅតំបន់ចម្ការស្វាយចន្ទី ភូមិសាស្ត្រចូកគ្រួស ក្នុងភូមិថ្មដូន ឃុំគោកមន ស្រុកបន្ទាយអំពិល ខេត្តឧត្តរមានជ័យ។ យោងតាមអ្នកនាំពាក្យក្រសួងការពារជាតិកម្ពុជា លោកស្រី ម៉ាលី​ សុជាតា លើកឡើងក្នុងសេចក្តីប្រកាសព័ត៌មាននៅរសៀលថ្ងៃទី៦ ខែកក្កដា។

យោធាថៃកំពុងសាងសង់របងព្រំដែនចាក់បេតុងថ្មនៅខេត្តចន្ទបុរី ក្នុងទឹកដីថៃ ដែលជាប់ព្រំដែននឹងខេត្តបាត់ដំបងរបស់កម្ពុជា ដែលសកម្មភាពនេះត្រូវបានអ្នកវិភាគនយោបាយមើលឃើញថា ជាការងាកចេញពីស្មារតីកិច្ចសហប្រតិបត្តិការរវាងប្រទេសជិតខាង និងឆ្ពោះទៅរកការអនុវត្តគោលនយោបាយបែបឯកតោភាគី។