នៅសល់តែកីឡាចំនួន១៣ប្រភេទដែលកម្ពុជាសម្រេចចុងក្រោយ ដើម្បីបញ្ជូនទៅចូលរួមប្រកួតស៊ីហ្គេមលើកទី៣៣ ឆ្នាំ២០២៥ នៅប្រទេសថៃ ដែលប្រព្រឹត្តទៅចាប់ពីថ្ងៃទី៩ ដល់ទី២០ ខែធ្នូ ខាងមុខ ដោយកាត់បន្ថយពី២១ប្រភេទកីឡា ព្រោះតែបារម្ភពីសុវត្ថិភាព និងបញ្ហាទឹកជំនន់ នៅតំបន់រៀបចំប្រកួតមួយចំនួនរបស់ម្ចាស់ផ្ទះថៃ។
គណៈកម្មាធិការជាតិអូឡាំពិកកម្ពុជា (NOCC) និងក្រសួងអប់រំ យុវជន និងកីឡា បានចេញសេចក្តីជូនដំណឹងរួមគ្នា នៅព្រឹកថ្ងៃទី២៧ ខែវិច្ឆិកានេះ ស្តីពីការធ្វើបច្ចុប្បន្នភាព នៃការចូលរួមស៊ីហ្គេម លើកទី៣៣ ហើយដោយសារការគិតគូរខ្ពស់ពីសុវត្ថិភាពកីឡាករ និងកីឡាការិនី ជាអាទិភាពចម្បងបំផុត និងធានាបានការចូលរួមប្រកបដោយការទទួលខុសត្រូវខ្ពស់បំផុតនោះ កម្ពុជាសម្រេចកាត់បន្ថយពី ២១ប្រភេទកីឡា មកនៅត្រឹម ១៣ប្រភេទកីឡា សម្រាប់ត្រៀមចូលរួមព្រឹត្តិការណ៍នេះ។
សេចក្តីជូនដំណឹងនេះ បញ្ជាក់ថា៖ «ថ្នាក់ដឹកនាំគណៈកម្មាធិការជាតិអូឡាំពិកកម្ពុជា និងក្រសួងអប់រំ យុវជន និងកីឡា ពិសេសទទួលបានអនុសសាន៍ណែនាំដ៏ខ្ពង់ខ្ពស់បំផុត ពីប្រមុខរាជរដ្ឋាភិបាល បានសម្រេចជាចុងក្រោយ កាត់បន្ថយហានិភ័យជាអតិប្បរមា ដោយរៀបចំកាត់បន្ថយចំនួនប្រភេទកីឡា ដែលប្រកួតនៅសុងខ្លា តំបន់ទឹកជំនន់ចេញ និងកីឡាមួយចំនួនទៀត»។
«បច្ចុប្បន្នប្រតិភូកីឡាកម្ពុជាសរុបមានចំនួនតែ ១៥០នាក់ ក្នុង ១៣ប្រភេទកីឡាប៉ុណ្ណោះ។ នេះជាស្មារតីបុរេសកម្ម និងការសម្រេចចិត្តដ៏លំបាករបស់ថ្នាក់ដឹកនាំ ដើម្បីធានាឱ្យមានការចូលរួមផង និងធានាសុវត្ថិភាពខ្ពង់ ដល់ប្រតិភូកីឡាកម្ពុជាផង។ សង្ឃឹមថា បងប្អូនជនរួមជាតិយោគយល់ អធ្យាស្រ័យខ្ពង់ ចំពោះការសម្រេចចិត្តដ៏លំបាកនេះ»។ NOCC និងក្រសួងអប់រំ បានបញ្ជាក់បន្ថែម។
គួរបញ្ជាក់ថា សម្រាប់ការប្រកួតស៊ីហ្គេម លើកទី៣៣ ឆ្នាំ២០២៥នេះ ម្ចាស់ផ្ទះថៃ បានសម្រេចយកទីក្រុងបាងកក រួមទាំងខេត្តឈុនបុរី និងខេត្តសុងខ្លា ដើម្បីរៀបចំការប្រកួត នៅលើប្រភេទកីឡាចំនួន៥០ មានអត្តពលិកជាង ១២០០០នាក់ មកពី ១១ប្រទេស ចូលរួម ប៉ុន្តែពេលនេះ ខេត្តសងខ្លា នៅភាគខាងត្បូងប្រទេសថៃ បាននឹងកំពុងទទួលរងការជន់លិចខ្លាំង ដោយសារទឹកជំនន់។
ម្ចាស់ផ្ទះថៃ បានសម្រេចនាំយកប្រភេទកីឡា ដែលត្រូវធ្វើនៅខេត្តសង់ខ្លា ទៅរៀបចំនៅខេត្ត ដែលមិនទទួលរងការវាយប្រហារដោយទឹកជំនន់ ជំនួសវិញ ប៉ុន្តែកម្ពុជាបានសម្រេចរួចហើយ ក្នុងការដកប្រភេទកីឡារបស់ខ្លួន ដែលត្រូវប្រកួតនៅខេត្តសុងខ្លា រួមទាំងប្រភេទកីឡា ងាយរងសម្ពាធមួយចំនួនទៀត សរុប ៨ប្រភេទ ចេញពីការប្រកួតស៊ីហ្គេម លើកទី ៣៣ នេះ។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានផ្ញើលិខិតផ្លូវការ កាលពីថ្ងៃទី២៦ ខែវិច្ឆិកា ទៅកាន់លោក Dato’ Seri Chaiyapak Siriwat នាយកប្រតិបត្តិសហព័ន្ធកីឡាអាស៊ីអាគ្នេយ៍ (SEAGF) ដើម្បីប្រាប់ពីសំណើ នៃការដកប្រភេទកីឡាចំនួន ៨ នេះរួចហើយ។
លោក វ៉ាត់ ចំរើន បានបញ្ជាក់ នៅក្នុងលិខិតនោះថា៖ «យើងសរសេរលិខិតនេះ ដើម្បីជម្រាបជាផ្លូវការដល់ SEAGF ថា កម្ពុជានឹងចូលរួមក្នុងកីឡាចំនួនដប់បី (១៣) ហើយនឹងដកខ្លួនចេញពីកីឡាចំនួនប្រាំបី (៨)។ ការកែតម្រូវនេះ ត្រូវបានធ្វើឡើងដោយសារតែកង្វល់សន្តិសុខយ៉ាងសំខាន់ ដែលបង្កបញ្ហាប្រឈមដល់ការធានាសុវត្ថិភាព និងការការពារអត្តពលិក និងមន្ត្រីរបស់យើង»។
យ៉ាងណាក៏ដោយ លោក វ៉ាត់ ចំរើន តាងនាមឱ្យ NOCC បានថ្លែងអំណរគុណដល់សហព័ន្ធកីឡាអាស៊ីអាគ្នេយ៍ ចំពោះការបន្តដឹកនាំរបស់ខ្លួន និងគណៈកម្មាធិការរៀបចំកីឡាស៊ីហ្គេមថៃ (THASOC) ចំពោះការប្តេជ្ញាចិត្តយ៉ាងមុតមាំ និងការខិតខំប្រឹងប្រែងក្នុងការរៀបចំកីឡាស៊ីហ្គេមនេះ។ លោកសម្តែងទំនុកចិត្តយ៉ាងពេញទំហឹង ចំពោះការរៀបចំកីឡាស៊ីហ្គេម ដ៏ជោគជ័យនាពេលខាងមុខនេះ។
លោក ចំរើន បានបញ្ជាក់បន្ថែមក្នុងលិខិតថា៖ «ទោះបីជាមានការកាត់បន្ថយចាំបាច់នេះក៏ដោយ កម្ពុជានៅតែប្តេជ្ញារក្សាការចូលរួមរបស់ខ្លួន នៅក្នុងកីឡា ដែលលក្ខខណ្ឌអនុញ្ញាតឱ្យមានការចូលរួមពីសាធារណជន។ យើងសូមកោតសរសើរយ៉ាងជ្រាលជ្រៅ ចំពោះការយល់ដឹង និងកិច្ចសហប្រតិបត្តិការរបស់ SEAGF និង THASOC»។
តាមការបញ្ជាក់នៅក្នុងលិខិតផ្លូវការ កាលពីថ្ងៃពុធនោះ គឺកម្ពុជាបានស្នើដកប្រភេទកីឡាចំនួន៨ រួមមានកីឡាយូដូ ការ៉ាតេ បញ្ចស៊ីឡាត់ ប៉េតង់ ចំបាប់ វូស៊ូ បាល់ទាត់ និងសីប៉ាក់តាក្រ ហើយរក្សាទុក ១៣ ប្រភេទកីឡា មាន ហែលទឹក អត្តពលកម្ម កីឡាអេឡិចត្រូនិក គុនដាវ កាយសម្ព័ន្ធ ជឺជីតស៊ូ ឃីកបុកស៊ីង តេក្វាន់ដូ ជិះសេះ ម៉ូតូទឹក ទ្រីអាត្លុងបាល់ទាត់លើតុ និង បាល់ទះ។
ជុំវិញប្រធានបទនេះ មហាជនមួយចំនួនធំ នៅតែមិនអស់ចិត្ត និងបន្តរិះគន់ ចំពោះការសម្រេចបញ្ជូនប្រតិភូកីឡាកម្ពុជា ទៅចូលរួមប្រកួតស៊ីហ្គេម នៅប្រទេសថៃនេះ។ ពួកគាត់ បានលើកជាមតិយោបល់ សុំឱ្យដកប្រភេទកីឡា ១៣ទៀត គឺមិនចាំបាច់ទៅចូលរួមទាំងអស់តែម្តង ដោយលើកហេតុផលថា ថៃស្អប់ខ្មែរយើងខ្លាំងណាស់ ហេតុនេះពួកគេ នឹងធ្វើបាបអត្តពលិកកម្ពុជា ជាមិនខាន។
តែទោះបីជាយ៉ាងណា ចំពោះបញ្ហានេះ លោកឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា ហង់ជួន ណារ៉ុន បានថ្លែងនៅចំពោះមុខប្រតិភូកីឡាកម្ពុជា ត្រៀមទៅប្រកួតស៊ីហ្គេមនេះ នៅក្នុងពិធីជួបសំណេះសំណាល កាលពីថ្ងៃទី២៣ ខែវិច្ឆិកាថា កម្ពុជា នឹងបាត់បង់កិត្តិយស បើសិនជាធ្វើពហិការមិនចូលរួមការប្រកួតកីឡាស៊ីហ្គេម ឆ្នាំ២០២៥ ហើយម្ចាស់ផ្ទះថៃ ក៏បាក់មុខខ្លាំង បើសិនជាធ្វើឱ្យប៉ះពាល់ដល់កីឡាករ កីឡាការិនី និងប្រតិភូកីឡាកម្ពុជា។
លោក ណារ៉ុន ថា កម្ពុជាបានគិតគូរពិចារណាទាំងលំបាក និងថ្លឹងថ្លែងច្បាស់លាស់ ក្នុងស្ថានភាពដ៏តានតឹង ដែលកម្ពុជាបានជួបប្រទះជាមួយថៃ ប៉ុន្តែបើកម្ពុជាមិនចូលរួមស៊ីហ្គេមនេះ នឹងធ្វើឱ្យប៉ះពាល់ដល់មុខមាត់ធ្ងន់ធ្ងរ ស្របពេលកម្ពុជាកំពុងក្លាយជាគោលដៅ ដែលប្រទេសក្នុងតំបន់ តាមដានយ៉ាងយកចិត្តទុកដាក់ អ៊ីចឹងរឿងនេះ នឹងធ្វើឱ្យកម្ពុជាបាត់បង់កិត្តិយស ជាពិសេស គឺការបំបាក់មុខទៅដល់អាស៊ាន ព្រោះស៊ីហ្គេម ជាព្រឹត្តិការណ៍របស់អាស៊ានទាំងមូល ដែលមានគណៈកម្មាធិការកីឡាអាស៊ាន ជាអ្នកត្រួតពិនិត្យ។
លោករដ្ឋមន្រ្តី បានបញ្ជាក់ថា៖ «ក្នុងករណីយើងមិនបញ្ជូនទៅ ឬធ្វើពហិការ នឹងធ្វើឱ្យប៉ះពាល់ធ្ងន់ជាង ដោយសារគេថា យើងធ្វើឱ្យប៉ះពាល់ដល់កិត្តិយសអាស៊ាន អ៊ីចឹងវាមិនមែនតែរឿងជាមួយម្ចាស់ផ្ទះទេ។ ម្ចាស់ផ្ទះថៃ គ្មានសិទ្ធិណាមួយ ក្នុងការសម្រេចថា មិនឱ្យកម្ពុជា ចូលរួម ឬមិនចូលរួមឡើយ ប៉ុន្តែបើយើងមិនចូលរួម គេនឹងវ៉ៃយើងថា យើងមិនមែនបំបាក់មុខម្ចាស់ផ្ទះទេ តែបំបាក់មុខអាស៊ាន»។
យ៉ាងណាក៏ដោយ លោក ហង់ជួន ណារ៉ុន បានសង្កត់ធ្ងន់ទៅលើតួនាទីរបស់ម្ចាស់ផ្ទះថៃ ដែលត្រូវផ្តល់នូវសន្តិសុខ និងសុវត្ថិភាពដល់ប្រតិភូកីឡាកម្ពុជា និងត្រូវរក្សាឱ្យបាននូវគោលការណ៍តម្លាភាពក្នុងការប្រកួតប្រជែង ព្រោះបើថៃបំពានលក្ខខណ្ឌទាំងអស់នេះ ថៃនឹងបាក់មុខខ្លាំងជាមិនខាន។
លោកបានសង្កត់ធ្ងន់ថា៖ «រឿងស៊ីហ្គេមនេះ យើងបានពិភាក្សាគ្នា និងថ្លឹងថ្លែងមុននឹងសម្រេច ហើយការសម្រេចនេះ ដើម្បីផលប្រយោជន៍ជាតិ និងកិត្តិយសជាតិ។ យើងយល់ឃើញថា ម្ចាស់ផ្ទះថៃ ត្រូវមានកាតព្វកិច្ចក្នុងការថែរក្សាសុវត្ថិភាពរបស់ប្រតិភូកីឡាយើង ផ្ទុយទៅវិញបើមានរឿងអីកើតឡើងប៉ះពាល់ដល់កីឡាករ កីឡាការិនីកម្ពុជា គឺម្ចាស់ផ្ទះថៃ នឹងបាក់មុខវិញ»។
ជាមួយគ្នានេះ ថ្នាក់ដឹកនាំប្រតិភូកីឡាស៊ីហ្គេមកម្ពុជា បានរៀបចំក្រុមអន្តរាគមន៍ពិសេស សម្រាប់ពិនិត្យតាមដាន វាយតម្លៃសភាពការណ៍ និងការគ្រប់គ្រងដល់អត្តពលិករបស់ខ្លួន ដើម្បីធានាសុវត្ថិភាព ក៏ដូចជាឆ្លើយតបទៅវិញភ្លាមៗ នៅពេលមានវិបត្តិកើតឡើង ក្នុងការចូលរួមការប្រកួតស៊ីហ្គេមលើកនេះ។ នេះបើតាមសេចក្តីប្រកាសព័ត៌មាន របស់អគ្គនាយកដ្ឋានកីឡានៃក្រសួងអប់រំ យុវជន និងកីឡា កាលពីថ្ងៃទី២៥ ខែវិច្ឆិកា។
នៅក្នុងចំណុចទី៣ ដល់ទី៥ នៃសេចក្តីប្រកាសព័ត៌មាននេះ បញ្ជាក់ថា៖ «ថ្នាក់ដឹកនាំប្រតិភូកីឡាស៊ីហ្គេមកម្ពុជា បានរៀបចំក្រុមអន្តរាគមន៍ពិសេស ពិនិត្យតាមដាន វាយតម្លៃសភាពការណ៍ និងទំនាក់ទំនងភ្លាមៗជាមួយក្រុមការងារទទួលបន្ទុករបស់ភាគីថៃ និងបានរៀបចំផែនការគ្រប់ជ្រុងជ្រោយ ចំពោះសុវត្ថិភាពអត្តពលិក និងការគ្រប់គ្រងពេលមានវិបត្តិ»។
ក្រុមអន្តរាគមន៍ពិសេស បានដាក់អនុវត្តគោលការណ៍ណែនាំតឹងរឹង និងយន្តការសន្តិសុខ ចំពោះប្រតិភូ និងក្រុមកីឡា ដើម្បីធានាសន្តិសុខក្នុងពេលស្នាក់នៅ-ធ្វើដំណើរ និងសុវត្ថិភាពក្នុងពេលប្រកួតស៊ីហ្គេម លើកទី៣៣ នេះ។
អគ្គនាយកដ្ឋានកីឡា បានសង្កត់ធ្ងន់ នៅក្នុងចំណុចទី៥ នៃសេចក្តីប្រកាសព័ត៌មានថា៖ «ក្រុមការងារចុះត្រួតពិនិត្យគ្រប់ការប្រកួតទាំងអស់ ករណីមានបញ្ហាកើតឡើង ភាពមិនប្រក្រតី នឹងពិនិត្យនីតិវិធីប្ដឹងនៅនឹងកន្លែង។ ចំពោះករណីកម្រិតធ្ងន់ធ្ងរ ក្រុមការងារនឹងពិនិត្យនីតិវិធីបញ្ជូនប្រតិភូកីឡាត្រឡប់មកកម្ពុជាវិញ»៕
